Bụrụ Onye Na-ege Ntị nke Ọma
1 Ọ na-achọ inye onwe onye ọzụzụ iji na-ege ntị nke ọma. Ọ na-achọkwa ka onye ahụ na-ege ntị nwee ọchịchọ ịmụta ihe na irite uru site n’ihe ọ na-anụ. N’ihi ya, Jisọs mesiri ike mkpa ọ dị ‘ilezi anya otú unu si anụ.’—Luk 8:18.
2 Nke a dị otú a karịsịa mgbe anyị gara nzukọ ọgbakọ, na mgbakọ dị iche iche. Ndị a bụ oge ndị anyị na-aghaghị ige ntị nke ọma. (Hib. 2:1) Lee isi ihe ụfọdụ ndị ga-enyere gị aka ịbụ onye na-ege ntị nke ọma ná nnọkọ ndị a nke ndị Kraịst.
◼ Jiri nzukọ ndị ahụ kpọrọ ihe. Ha bụ ụzọ bụ́ isi e si eme anyị ‘ndị mmụta Jehova’ site n’aka “onye ahụ na-achị ezinụlọ, onye kwesịrị ka a tụkwasị ya obi.”—Aịsa. 54:13; Luk 12:42.
◼ Kwadebe tupu oge eruo. Tụleghachi ihe ndị a ga-atụle, jidekwa n’aka na i wetara Bible gị nakwa nke gị n’akwụkwọ a na-amụ.
◼ N’oge nzukọ ahụ, tinye mgbalị pụrụ iche ịtụkwasị uche n’ihe a na-amụ. I kwesịrị izere ikwunyere ndị gị na ha nọ okwu nakwa ikiri ihe ndị ọzọ na-ege ntị na-eme. Gbalịa ka a ghara ịdọpụ uche gị site n’iche echiche ihe ị ga-eme mgbe nzukọ gasịrị ma ọ bụ ihe ndị ọzọ dịịrị gị.
◼ Tụlee ihe a na-ekwu. Jụọ onwe gị, sị: ‘Olee otú nke a si metụta m? Olee mgbe m ga-etinye ya n’ọrụ?’
◼ Detuo ná mkpirikpi ihe ndị bụ́ isi na akụkụ Akwụkwọ Nsọ dị iche iche. Nke a na-enyere gị aka ime ka uche gị dịgide n’ihe a na-atụle ma na-eme ka i nwee ike icheta ihe ndị bụ́ isi maka iji ha mee ihe mgbe e mesịrị.
3 Kụziere Ụmụ Gị Ka Ha Na-ege Ntị: Ntụziaka ime mmụọ dị ụmụaka mkpa. (Deut. 31:12) N’oge ochie, “onye ọ bụla nke na-aghọta ịnụ ihe” n’etiti ndị Chineke aghaghị ige ntị mgbe a na-agụrụ ha Iwu ahụ. (Neh. 8:1-3) Ọ bụrụ na ndị mụrụ ụmụ na-etinye uche ná nzukọ ma na-ege ntị nke ọma, o yiri ka ụmụ ha hà ga-eme otú ahụ. Ọ bụghị ihe amamihe dị na ya iji ihe e ji egwuri egwu ma ọ bụ akwụkwọ e ji ese ihe bịa ka ụmụaka jiri ha na-egwuri egwu. Ije n’ụlọ mposi mgbe ọ na-adịghị mkpa na-egbochikwa ha ige ntị. Ebe ọ bụ na ọ bụ “uche gbagọrọ agbagọ ka e kekọtaworo n’obi nwata,” ndị mụrụ ụmụ kwesịrị itinye ezigbo mgbalị iji hụ na ụmụ ha nọ nwayọọ ma na-ege ntị ná nzukọ.—Ilu 22:15.
4 Site n’ịbụ ndị na-ege ntị nke ọma, anyị na-egosipụta na anyị maara ihe n’ezie ma na-achọ ‘ịtụkwasị ihe mmụta n’amamihe’ anyị.—Ilu 1:5.