Nkwusa Alaeze Na-enye Aka Azọpụta Ndụ!
1 Ọ bụ ọrụ kasị mkpa a na-arụ n’ụwa n’oge a. Jehova Chineke, Jizọs Kraịst, na imerime ndị mmụọ ozi atụkwasịwo uche ha na ya. Gịnị ka ọ bụ, n’ihi gịnịkwa ka o ji dị oké mkpa? Ọ bụ nkwusa Alaeze, ọ na-enyekwa aka azọpụta ndụ!—Rom 1:16; 10:13, 14.
2 Ụfọdụ ndị pụrụ iche na anyị pụrụ inyere ndị ọzọ aka karị ma ọ bụrụ na anyị etinye aka n’ịgbalị ime ka ụwa gbara anyị gburugburu ka mma. Ọtụtụ ndị mikpuru onwe ha ná mgbalị iji weta udo, gwọọ ọrịa dị iche iche, ma ọ bụ mee ka ọnọdụ akụ̀ na ụba ka mma. Ma gịnị ga-enyere ndị mmadụ aka karịsịa?
3 Ọrụ Dị Oké Mkpa: Ọ bụ nanị ozi Alaeze ahụ na-akọwa nzube nke ndụ, ihe kpatara nhụjuanya ụmụ mmadụ, nakwa ihe bụ nanị olileanya a pụrụ ịdabere na ya maka ọdịnihu. Ozi ọma ahụ na-eme ka ndị mmadụ nwee ike ịghọ ndị enyi Jehova ma si otú ahụ nweta “udo nke Chineke nke karịrị echiche nile.” (Fil. 4:7) Ọ bụ nanị ozi Alaeze ahụ na-enye nduzi dị irè iji nyere ndị mmadụ aka ịnagide nsogbu nke ndụ ugbu a, na-akọwakwa otú mmadụ pụrụ isi bụrụ onye e chebere mgbe a ga-ebibi ajọ ụwa a n’ọdịnihu. (1 Jọn 2:17) Nke ahụ ó kwesịghị mgbalị nile anyị pụrụ itinye ná nkwusa Alaeze ahụ?
4 Iji maa atụ: Olee ụzọ kasị mma isi nyere obodo na-ehi ụra aka bụ́ nke nọ n’ihe ize ndụ n’ihi ihe mgbochi mmiri na-achọ ịgbawa agbawa? Ọ̀ bụ site n’ikupụsịwa mmiri site n’ihe mgbochi mmiri ahụ na-esighịzi ike? Ịchọ obodo ahụ ọdachi na-eche ihu mma? Ee e! A ghaghị ịkpọte ndị obodo ahụ, dọọ ha aka ná ntị banyere ọdachi na-achọ iwere ọnọdụ, ma nyere ha aka ịgbapụ! Ndị na-ehi ụra n’ụzọ ime mmụọ taa nọ n’oké ihe ize ndụ. (Luk 21:34-36) Ebe ọ bụ na usoro ihe a ga-agabiga n’oge na-adịghị anya, ka anyị gbalịsie ike iji ịdị ngwa kasịnụ na-eme nkwusa nye mmadụ nile ruo n’ókè ọ pụrụ ikwe mee!—2 Tim. 4:2; 2 Pita 3:11, 12.
5 Nọgidesie Ike na Ya: Ka anyị chọọ ụzọ ndị anyị ga-esi jiri ozi ọma a jekwurukwuo ndị nwere ezi obi—n’ebe obibi ha, n’okporo ámá, na telifon, nakwa n’ụzọ mberede. Ọrụ Jehova nyeworo anyị ịrụ bụ ọrụ kasị mkpa anyị pụrụ ịrụ. Ọ bụrụ na anyị ejiri ịnụ ọkụ n’obi rụọ ya, anyị ‘ga-azọpụta ma onwe anyị ma ndị na-ege anyị ntị.’—1 Tim. 4:16.