Nọgide Na-enwe Echiche nke Ịdị Ngwa!
1 Jizọs maara na oge o nwere n’ụwa iji rụzuo ọrụ Nna ya dị ntakịrị. (Jọn 9:4) N’ihi ya, o ji echiche nke ịdị ngwa jee ozi ya, ọ zụkwara ndị na-eso ụzọ ya ime otú ahụ. (Luk 4:42-44; 8:1; 10:2-4) O debere ihe onwunwe n’ọnọdụ nke abụọ. (Mat. 8:20) N’ihi ya, ọ rụchara ọrụ Jehova nyere ya.—Jọn 17:4.
2 Oge Dị Nta: Oge e nwere iji kwusaa ozi ọma ahụ “n’elu ụwa dum mmadụ bi” dịkwa ntakịrị. (Mat. 24:14) Amụma Bible na-egosi na anyị abamiela n’oge ọgwụgwụ. N’oge na-adịghị anya, “ndị na-amaghị Chineke na ndị na-adịghị erube isi n’ozi ọma banyere Onyenwe anyị Jizọs . . . ga-anata ntaramahụhụ ikpe ọmụma nke mbibi ebighị ebi.” (2 Tesa. 1:6-9) Ikpe ọmụma ahụ ga-abịa na mberede n’ụzọ dị ịrịba ama. (Luk 21:34, 35; 1 Tes. 5:2, 3) Ọ dị mkpa ka ndị mmadụ mara banyere ọnọdụ dị ize ndụ ha nọ na ya. Ọ bụ ibu ọrụ dịịrị anyị inyere ha aka ịchọ ihu ọma Jehova mgbe oge ka dị.—Zef. 2:2, 3.
3 Ime Ihe Nile Anyị Nwere Ike Ime: N’ịghọta na “oge fọdụrụnụ dị ntakịrị,” ndị ohu Chineke na-ebute ọrụ nkwusa ahụ ụzọ. (1 Kọr. 7:29-31; Mat. 6:33) Ụfọdụ ndị ahapụwo ohere ndị ha nwere ịkpata ego ma ọ bụ nchụso onwe onye ndị ọzọ iji mụbaa òkè ha na-ekere n’ozi. (Mak 10:29, 30) Ndị ọzọ anọgidewo na-enwe “ọtụtụ ihe mgbe nile ime n’ọrụ Onyenwe anyị” n’agbanyeghị ule ndị ha nọgidere na-enweta. (1 Kọr. 15:58) Ọtụtụ ndị anọwo na-akpọsa ozi ọma ahụ ruo ọtụtụ iri afọ n’amaghị jijiji. (Hib. 10:23) Jehova na-eji àjà ndị dị otú ahụ a na-achụ iji kwadoo ihe ndị metụtara Alaeze ahụ akpọrọ ihe nke ukwuu.—Hib. 6:10.
4 Ime ka ndụ anyị hiwe isi n’ofufe Jehova, bụ́ nke gụnyere ọrụ nkwusa ahụ, na-enyere anyị aka iburu nnọọ ụbọchị Jehova n’uche. Ọ na-eme ka anyị ghara ịbụ ndị ụwa Setan dọpụrụ uche ha, na-emekwa ka mkpebi anyị mere ịnọgide na-enwe àgwà dị nsọ sikwuo ike. (2 Pita 3:11-14) N’ezie, iji echiche nke ịdị ngwa na-eje ozi anyị pụrụ ịzọpụta ndụ, ma nke anyị ma nke ndị na-ege anyị ntị.—1 Tim. 4:16.