Ime Nkwusa Na-enyere Anyị Aka Ịtachi Obi
1 Okwu Chineke na-agba anyị ume ‘iji ntachi obi na-agba ọsọ ahụ e setịpụrụ n’ihu anyị.’ (Hib. 12:1) Dị nnọọ ka o si adị onye na-agba ọsọ mkpa ịtachi obi iji gbata ihe n’ọsọ, n’otu aka ahụ, ọ dị anyị mkpa ịtachi obi iji nweta ihe nrite ahụ nke bụ́ ndụ ebighị ebi. (Hib. 10:36) Olee otú ozi anyị na-eje dị ka Ndị Kraịst pụrụ isi nyere anyị aka iji ikwesị ntụkwasị obi na-atachi obi ruo ọgwụgwụ?—Mat. 24:13.
2 Ndị E Wusiri Ike n’Ụzọ Ime Mmụọ: Anyị ịkpọsa nkwa dị ebube Bible na-ekwe banyere ụwa ọhụrụ ezi omume na-enyere anyị aka inwekwu olileanya. (1 Tesa. 5:8) Mgbe anyị na-agachi ozi ubi anya, anyị na-enwe ohere nke ime ka ndị ọzọ mara eziokwu ahụ anyị mụtaworo site na Bible. Anyị na-enwekwa ohere nke ịgbachitere ihe ndị anyị kweere, bụ́ nke na-enyezi aka eme ka anyị gbasie ike n’ụzọ ime mmụọ.
3 Iji na-akụziri ndị ọzọ eziokwu Bible nke ọma, anyị onwe anyị aghaghị ịghọta ya nke ọma. Anyị aghaghị ime nnyocha ma na-atụgharị uche na ya. Mgbalị siri ike anyị na-eme na-eme ka anyị nwekwuo ihe ọmụma, mee ka okwukwe anyị sikwuo ike, ma nye anyị ume ọhụrụ n’ụzọ ime mmụọ. (Ilu 2:3-5) N’ụzọ dị otú a, anyị na-ewusi onwe anyị ike ka anyị na-agbalị inyere ndị ọzọ aka.—1 Tim. 4:15, 16.
4 Ikerechi òkè anya n’ozi ubi so nnọọ ‘n’ekike agha zuru ezu nke sitere na Chineke,’ bụ́ nke dị anyị mkpa iji guzogide Ekwensu na ndị mmụọ ọjọọ. (Efe. 6:10-13, 15) Anyị ịdị na-ejechi ozi ọma anya na-enyere anyị aka ime ka uche anyị dịrị n’ihe ndị na-ewuli elu ma zere ịbụ ndị ụwa Setan merụrụ. (Kọl. 3:2) Ka anyị na-akụziri ndị ọzọ ụzọ Jehova, a na-echetara anyị mgbe nile banyere mkpa ọ dị anyị ịnọgide na-eme omume dị nsọ.—1 Pita 2:12.
5 Ndị Chineke Na-enye Ike: N’ikpeazụ, anyị iso na-arụ ọrụ nkwusa ahụ na-eme ka anyị mụta ịdabere n’ebe Jehova nọ. (2 Kọr. 4:1, 7) Lee ngọzi nke ahụ bụ! Anyị ịmụta inwe ntụkwasị obi dị otú ahụ abụghị nanị na ọ na-ewusi anyị ike ijezu ozi anyị kamakwa, ọ na-ewusi anyị ike ịnagide ọnọdụ ọ bụla anyị pụrụ ịnọ na ya ná ndụ. (Fil. 4:11-13) N’ezie, ịmụta ịdabere kpamkpam n’ebe Jehova nọ bụ isi ihe na-eme ka e nwee ntachi obi. (Ọma 55:22) Ime nkwusa na-enyere anyị aka n’ọtụtụ ụzọ ịtachi obi.