Usoro Ihe Omume Ọhụrụ Maka Mgbakọ Sekit

N’ụbọchị ndị ikpeazụ nke ụwa ochie a rụrụ arụ, ọ dị oké mkpa na anyị ga-anọgide na-eyikwasị uwe ime mmụọ anyị ma na-echekwa ihe e ji mara anyị dị ka Ndị Kraịst. (Mkpu. 16:15) N’ihi ya, ọ dabara adaba na isiokwu mgbakọ sekit maka afọ 2006 bụ “Yikwasịnụ Onwe Unu Ụdị Mmadụ Ọhụrụ Ahụ.”—Kọl. 3:10.

Ụbọchị nke Mbụ: Okwu mbụ ọtụtụ ndị ga-ekwu bụ́, “Igosipụta Àgwà Ndị E Ji Mara Ụdị Mmadụ Ọhụrụ Ahụ,” ga-atụle otú igosipụta ụdị mmadụ ọhụrụ ahụ si abara anyị uru n’akụkụ nile nke ndụ anyị. Olee otú anyị si egosipụta ụdị mmadụ ọhụrụ ahụ? A ga-atụle nke ahụ n’okwu abụọ ndị ikpeazụ a ga-ekwu n’ụbọchị nke mbụ, bụ́, “Zụọ Onwe Gị Ịdị Na-atụgharị Uche nke Ọma” na “Mmụta nke Na-akpụzi Ụdị Mmadụ Ọhụrụ Ahụ.”

Ụbọchị nke Abụọ: N’okwu nke abụọ ọtụtụ ndị ga-ekwu nke isiokwu ya bụ, “Ịzụlite Ire Ndị Maara Ihe,” a ga-atụle mmetụta ụdị mmadụ ọhụrụ ahụ na-enwe n’otú anyị si eji ire anyị eme ihe. “Ị̀ Na-emeri Ajọ Onye Ahụ?” bụ isiokwu nke okwu ihu ọha a ga-ekwu. Ọ ga-eme ka mkpa ọ dị ịnọ na nche megide ụzọ aghụghọ nile nke Setan pụta ìhè. Okwu abụọ ndị ikpeazụ a ga-ekwu ná mgbakọ ahụ bụ́, “Nọrọ n’Enweghị Ntụpọ Site n’Ụwa” na “Ime Ka Mmadụ Anyị Bụ n’Ime Na-adị Ọhụrụ Kwa Ụbọchị,” ga-enyere anyị aka ịjụ àgwà na omume ndị na-ekwekọghị n’ụzọ ezi omume Chineke nakwa ịnọgidesi ike n’ofufe anyị na-efe Jehova.

Lee nnọọ ka anyị si na-atụ anya inweta agbamume a bụ iyikwasị ụdị mmadụ ọhụrụ ahụ ma nọgide na-eyi ya!