Ozi Ọma Anyị Na-ezi—Ọrụ Ọmịiko
1 Jizọs chọpụtara na ìgwè mmadụ ndị gere ntị n’ozi ya bụ ‘ndị a gbara akpụkpọ, chụsasịakwa dị ka atụrụ na-enweghị onye na-azụ ha.’ (Mat. 9:36) O ji olu dị nro na ịhụnanya kụziere ha ụkpụrụ Jehova, kasie ha obi, ma jiri ọmịiko gwa ha ihe ndị ha ga-eme ka ha na Chineke wee dị ná mma. Ka anyị na-atụgharị uche n’ihe ndị Jizọs mere, anyị na-amụta iche echiche ka ya na inwe ụdị mmetụta o nwere, àgwà ọmịiko a na-apụtakwa ìhè n’ozi anyị.
2 Tụgharịgodị uche n’ihe Jizọs mere mgbe ndị nọ n’ọnọdụ dị oké njọ bịakwutere ya maka enyemaka. (Luk 5:12, 13; 8:43-48) O chebaara ndị nwere mkpa pụrụ iche echiche. (Mak 7:31-35) Ọ maara mmetụta ndị ọzọ na-enwe, o gosikwara na ya na-eche banyere ha. O leghị ihe anya otú mmadụ si ele ihe anya. (Luk 7:36-40) N’ezie, Jizọs gosipụtara nnọọ ụdị ọmịiko Chineke anyị nwere.
3 “O Nwere Ọmịiko”: Jizọs ejeghị ozi ya ka ọ bụkwara nnọọ na o mezuru iwu. “O nwere ọmịiko” n’ahụ́ ụmụ mmadụ. (Mak 6:34) N’otu aka ahụ taa, ihe anyị na-eme abụghị nanị ịhụ na anyị ziri ozi a gwara anyị zie, kama anyị na-agbalị ịhụ na a zọpụtara ndụ dị oké ọnụ ahịa. Gbalịa ịghọta ihe mere ndị mmadụ ji azaghachi otú ha si azaghachi. Gịnị mere ha ji enwe nchegbu ma ọ bụ nchekasị? Ọ̀ ga-abụ na ndị ndú okpukpe ụgha duhiere ha ma lefuru ha anya? Ezi mmasị anyị nwere n’ebe ndị ọzọ nọ pụrụ ime ka ha gee ntị n’ozi ọma ahụ.—2 Kọr. 6:4, 6.
4 E gosi mmadụ ọmịiko, ọ na-emetụ onye ahụ n’obi. Iji maa atụ: Nwatakịrị nwanyị dị ọnwa atọ nwụnahụrụ otu nwanyị. Mgbe Ndịàmà abụọ rutere n’ụlọ nwanyị a, ọ nabatara ha. Ihe mekwaranụ o ji nabata ha bụ ka o gosi ha na ihe ha na-ekwu na ọ bụ ya mere Chineke ji kwere ka nhụjuanya dịrị, abụghị eziokwu. Ma, nwanyị ahụ mechara kwuo, sị: “Ha ji nnọọ ọmịiko gee m ntị, mgbe ha na-apụkwa, obi dị m ụtọ nke ukwuu nke na m kwere ka ha bịa ọzọ.” Ị̀ na-agba mbọ igosi na i nwere ọmịiko n’ebe onye ọ bụla i zutere n’ozi ubi nọ?
5 Inwe ọmịiko ga-enyere anyị aka ịkasi ndị ọzọ obi nke ọma. Ọ bụrụ na anyị na-eme ya, anyị na-eto “Nna nke obi ebere,” bụ́ Jehova.—2 Kọr. 1:3.