Anyị Bụ Ndịàmà Mgbe Niile
1. Gịnị ka anyị na-amụta n’otú Jizọs si zie otu nwaanyị ozi ọma n’olulu mmiri?
1 Jizọs agaala ije ọtụtụ awa. Ike gwụrụ ya, akpịrị na-akpọkwa ya nkụ. Mgbe ndị na-eso ụzọ ya gara ịzụta nri, ọ nọdụrụ ala na-ezu ike n’akụkụ otu olulu mmiri dị n’otu obodo dị na Sameria. Jizọs abịaghị Sameria izi ozi ọma; o si obodo ahụ na-agafe mgbe ọ na-aga Galili ịga zie ozi ọma. N’agbanyeghị nke ahụ, o ji ohere ahụ zie otu nwaanyị bịara isere mmiri ozi ọma. (Jọn 4:5-14) Gịnị mere o ji zie nwaanyị ahụ ozi ọma? Ọ bụ n’ihi na o nwetụbeghị mgbe Jizọs kwụsịrị ịbụ ‘ezi onye àmà Jehova nke kwesịrị ntụkwasị obi.’ (Mkpu. 3:14) Anyị na-eṅomikwa Jizọs ma anyị bụrụ Ndịàmà Jehova mgbe niile.—1 Pita 2:21.
2. Olee otú anyị ga-esi jikere ịgba àmà mgbe anyị na-anọghị n’ozi?
2 Jikere Ejikere: Otu ụzọ anyị si egosi na anyị jikeere ejike ịgba àmà n’oge anyị na-anọghị n’ozi bụ ịhụ na anyị ji akwụkwọ anyị mgbe ọ bụla. Ọtụtụ ndị nkwusa na-eji traktị ha ga-enye ndị na-ere ahịa, ndị na-agbanyere ndị mmadụ mmanụ ụgbọala, na ndị ọzọ ha hụrụ n’ụbọchị. (Ekli. 11:6) Otu nwanna nwaanyị nke na-emekarị njem na-ahụ na ya tinyere obere Baịbụl na akwụkwọ Bible Na-akụzi na pọọsụ ya, ọ na-agbalịkwa ikwunyere onye nọ ya n’akụkụ okwu.
3. Olee otú anyị nwere ike isi malite nkwurịta okwu?
3 Kwulite Otu Ihe: Anyị gbawa àmà mgbe anyị na-anọghị n’ozi, ọ dịghị mkpa na anyị ga-eji ihe dị na Baịbụl malite. Mgbe Jizọs ziri nwaanyị ahụ ọ hụrụ n’olulu mmiri ozi ọma, o bughị ụzọ gwa ya na ya bụ Mesaya. Naanị ihe o mere bụ ịgwa ya ka o nye ya mmiri ka ya ṅụọ, nke mekwara ka nwaanyị ahụ jụọ ya ajụjụ. (Jọn 4:7-9) Otu nwanna nwaanyị chọpụtara na ime ụdị ihe a Jizọs mere na-enyere ya aka ịmalite mkparịta ụka. Ọ bụrụ na mmadụ ajụọ ya ma ọ̀ na-agba Krismas ma ọ bụ Ista, kama ịsị na ihe mere ya anaghị agba ya bụ n’ihi na ya bụ Onyeàmà Jehova, ihe ọ na-ekwu bụ: “Ekpebiri m na agaghị m eso na-eme ya.” Onye ahụ jụrụ ya ajụjụ ahụ ga-achọzi ịma ihe mere na ọ naghị agba ya, nwanna nwaanyị ahụ na-ejizi ohere ahụ gbaara ya àmà.
4. Gịnị mere ihe e kwuru na Matiu 28:18-20 ji eme ka ị na-anụ ọkụ n’obi?
4 Ọ bụ eziokwu na Jizọs ji ịnụ ọkụ n’obi kwusachaa ozi ọma ọ bịara n’ụwa ikwusa, ọ ka nwekwara nnọọ mmasị n’ọrụ ikwusa ozi ọma a na-arụ taa otú ahụ o si rụọ ya. (Mat. 28:18-20) N’ihi ya, dị ka Jizọs, bụ́ Onye anyị na-eso ihe nlereanya ya, anyị bụ Ndịàmà ndị dị njikere ikwupụta okwukwe anyị n’ihu ọha n’oge ọ bụla.—Hib. 10:23.