Otú E Si Eji Akwụkwọ Anyị Ezi Ozi Ọma n’Ebe Na-ekwo Ekwo

N’ebe ụfọdụ na-ekwo ekwo, a na-edosa akwụkwọ anyị n’elu tebụl ma ọ bụ n’ihe a na-akwagharị akwagharị. E sila otú a zie ọtụtụ ndị ozi ọma. (Jọn 6:44) N’ihi ya, a gwala ndị okenye ka ha mee ndokwa ka a na-ezi ozi ọma n’ebe ndị na-ekwo ekwo n’ókèala ha. Ebe ọ bụ na a na-akwagharị ihe ahụ a na-edosa akwụkwọ akwagharị, anyị ekwesịghị ịga nata ndị ọchịchị ike tupu anyị edowe ya. Olee ndị kwesịrị iji akwụkwọ anyị na-anọ n’ụdị ebe ahụ? Ọ bụ ndị nkwusa anya ruru ala, ndị na-eji ejiji dị mma, na ndị ma otú e si ekwu okwu ya eruo mmadụ n’obi. Ka anyị lee ihe ụfọdụ anyị kwesịrị ime na ihe ndị anyị na-ekwesịghị ime mgbe anyị na-ezi ozi ọma n’ebe na-ekwo ekwo.

Ihe Ndị Anyị Kwesịrị Ime:

Anyị kwesịrị ịna-emesapụrụ ndị na-agafenụ ihu, na-ekele ha, na-enyekwara ha aka. Ọ na-abụ ndị nkwusa ụfọdụ hụ ndị na-agafe, ha achịsara ha ọchị, keleekwa ha nke ọma. Ọ bụrụ na mmadụ elee anya n’ebe ahụ akwụkwọ anyị dị, anyị nwere ike ịgwa ya ka o were nke ọ chọrọ.
Anyị kwesịrị ịnọrọ n’ebe na-adịghị anya n’ebe ahụ akwụkwọ anyị dị. N’ebe ụfọdụ, ọ na-adịrị ndị na-agafe mfe ịkwụsị were akwụkwọ anyị ma ndị nkwusa nọrọ nso n’ebe ha dosara akwụkwọ. N’ebe ndị ọzọ, ọ na-esiri ha ike ịkwụsị ma ndị nkwusa nọrọ nso n’ebe ahụ. N’ihi ya, ha na-anọ n’ebe dịtụ anya na-ele mgbe mmadụ ga-akwụsị n’ebe ahụ. Ozugbo mmadụ kwụsịrị n’ebe ahụ akwụkwọ anyị dị, anyị kwesịrị ịgwawa ya okwu. Anyị nwere ike ịjụ ya, sị: “Ị̀ jụtụla ụdị ajụjụ ahụ?”
Anyị kwesịrị ịna-agụrụ ndị mmadụ Baịbụl.
Mmadụ were akwụkwọ anyị ji amụrụ ndị mmadụ Baịbụl, dị ka akwụkwọ Bible Na-akụzi, anyị kwesịrị ịgwa ya otú anyị si eji ya amụrụ ndị mmadụ ihe. Anyị ga-agwakwa ya na anyị ga-achọ iji ekwentị ma ọ bụ ihe ọzọ yiri ya kpọnyere ya vidio bụ́ Olee Uru Ịmụ Baịbụl Ga-abara Gị?
Anyị nwere ike ịnata onye ọ bụla nwere mmasị adres ya. Ọ bụrụ na o bighị n’ókèala anyị, anyị kwesịrị idejupụta fọm bụ́ Please Follow Up (S-43), nyekwa ya odeakwụkwọ ọgbakọ anyị ozugbo.

Ihe Anyị Na-ekwesịghị Ime:

Anyị ekwesịghị ịna-afụchi ihu. Anyị ekwesịghịkwa ịna-esi ọnwụ ma ọ bụ kwụrụ n’ebe ahụ akwụkwọ anyị dị, ka à ga-asị na anyị na-eche ya nche.
Anyị ekwesịghị iche na ọ bụ naanị akwụkwọ ka anyị na-enye ndị mmadụ. Anyị gaa ozi ọma, anyị na-agba mbọ ka anyị malite ịmụrụ ndị mmadụ Baịbụl. N’ihi ya, anyị ga-agba mbọ ka anyị zie onye ọ bụla bịara iwere akwụkwọ anyị ozi ọma.
Anyị ekwesịghị ịnọchi ebe ahụ akwụkwọ dị ma ọ bụkwanụ anyị na onye anyị na ya so ana-akpa nkata chefuo ihe anyị bịara. Ọ bụrụ na anyị achọọ ịza ekwentị ma ọ bụkwanụ ịkpọ mmadụ, ọ ga-aka mma ka anyị ghara ịnọ n’ebe ahụ akwụkwọ anyị dị.
Anyị na ndị na-enweghị mmasị n’ozi anyị ekwesịghị ịnọ na-arụ ụka na-enweghị isi. Ọ bụrụ na ụdị onye ahụ amalite ịkparị anyị, ọ ga-aka mma ka anyị si ebe ahụ pụọ gaa ebe ọzọ.