Otú Ị Ga-esi Eme Ka Ihe Ị Na-amụ Bakwuoro Gị Uru

IHE MERE O JI DỊ MKPA: Ọ bụrụ na anyị ana-amụ Okwu Chineke n’onwe anyị, ọ ga-enyere anyị aka ‘ịghọta ihe bụ́ ịdị obosara na ịdị ogologo na ịdị elu na ịdị omimi’ nke eziokwu Chineke. (Efe. 3:18) Ọ na-enyere anyị aka ịnọgide na-abụ ndị na-enweghị ihe a ga-eji taa ha ụta, ndị na-enweghị mmerụ n’ụwa ọjọọ a, na ndị “na-ejidesi okwu nke ndụ ike.” (Fil. 2:​15, 16) Ọ na-enyekwa onye ọ bụla n’ime anyị ohere ịhọrọ ihe ọ chọrọ ịmụ. Olee otú ị ga-esi mee ka ọmụmụ ihe gị bakwuoro gị uru?

OTÚ Ị GA-ESI EME YA:

• Katụ ihe ma ọ bụ detuo ihe ụfọdụ na Baịbụl gị ma ọ̀ bụ nke akwụkwọ ma ọ̀ bụ nke dị n’ekwentị

• Jụọ onwe gị ajụjụ ndị a gbasara ihe ị na-agụ na Baịbụl: ‘Ònye ka a na-ekwu banyere ya? Gịnị ka a na-ekwu? Olee mgbe ihe a mere? Olee ebe ihe a mere? Gịnị mere ihe a ji mee? Olee otú o si mee?’

• Chọpụta ihe ndị gbara ihe ị na-agụ gburugburu. Jiri ihe ndị e ji eme nchọnchọ matakwuo banyere ihe ị na-agụ. I mepee ihe i ji eme nchọnchọ, i nwere ike idenye amaokwu Baịbụl ma ọ bụ okwu ị na-agụ banyere ya

• Tụgharịa uche n’ihe ị gụrụ iji mata otú o si gbasa gị

• Na-eme ihe ị na-amụta kwa ụbọchị ná ndụ gị.​—Luk 6:​47, 48

LEE VIDIO BỤ́ NA-AMỤ IHE NKE ỌMA MA SI OTÚ AHỤ JIDESIE OKWU NKE NDỤ IKE, ZAAKWANỤ AJỤJỤ NDỊ A:

• Olee ihe ụfọdụ ndị kwuru gbasara ịmụ ihe?

• Gịnị mere anyị ji kwesị ikpe ekpere mgbe ọ bụla anyị chọrọ ịmụ ihe?

• Olee ihe nwere ike inyere anyị aka ịghọta amaokwu Baịbụl anyị gụrụ nke ọma?

• Olee ụdị ụcha ndị anyị nwere ike iji tejie ihe na Baịbụl anyị ji amụ ihe?

• Gịnị mere ịtụgharị uche ji dị ezigbo mkpa mgbe anyị na-amụ Okwu Chineke?

• Gịnị ka anyị kwesịrị iji ihe anyị mụtara mee?