Agha Na-akpa Mkpamkpa
Agha so n’ihe ndị kacha emesi ndị mmadụ ike. Ndị agha na ndị nkịtị nọtụrụla n’ebe ndị a lụrụ agha n’ụwa ma otú agha si akpa ndị mmadụ aka ọjọọ.
NDỊ AGHA
“Agha na-akpa mkpamkpa. Ị ga na-ahụ ka ọtụtụ ndị na-emerụ ahụ́, ozu ana-adakwa n’aka nri na n’aka ekpe. Obi na-ekoro mmadụ n’elu mgbe niile.”—Gary, Briten.
“Mgbọ tụrụ m n’azụ nakwa n’ihu. Ahụkwara m ọtụtụ ndị e gburu, ma ụmụaka ma ndị agadi. Agha na-eme ka ihe gharazie ịna-emetụ mmadụ n’ahụ́.”—Wilmar, Kolombia.
“A gbagbuo mmadụ n’ihu gị, ị ga na-echeta otú o si nwụọ. Ị ga na-anụ mkpu ọ na-eti na ude ọ na-asụ mgbe ọ na-anwụ. Ị gaghị echefu onye ahụ echefu.”—Zafirah, Amerịka.
NDỊ NKỊTỊ
“Ọ dị m ka emekataghị m nwee obi ụtọ ọzọ ná ndụ m. Ụjọ na-atọ m mgbe niile maka ndụ m, ma karịchaa, maka ndụ ndị ezinụlọ m na ndị enyi m.”—Oleksandra, Yukren.
“Ịkwụ n’ahịrị n’ebe a na-eke nri malite n’elekere abụọ n’isi ụtụtụ ruo n’elekere iri na otu nke abalị abụghị obere ihe. Ị maghịdị ma ị̀ ga-anọ ebe ahụ mgbọ e si ebe o si bịa tụọ gị.”—Daler, Tajikistan.
“Agha gburu nne na nna m. Aghọziri m nwa na-enweghị nne na nna, nwa na-enweghị onye ga-akasi ya obi ma ọ bụ lekọta ya.”—Marie, Rụwanda.
N’agbanyeghị otú agha si kpaa ha aka ọjọọ, obi eruola ndị kwuru ihe ndị a ala. Ihe ọzọ bụ na ha kwetasiri ike na agha ga-akwụsị n’oge na-adịghị anya. Ụlọ Nche a ga-eji Baịbụl kọwaa otú ihe a ga-esi eme.