Olee Otú Ihe Ndị Dị Ndụ Si Malite Ịdị?

Baịbụl kwuru na “ọ bụ [Chineke] na-enye ndụ.” (Abụ Ọma 36:9) Ì kwetara ihe a o kwuru? Ụfọdụ ndị na-ekwu na ihe ndị dị ndụ nọkatara dịrị. Ọ bụrụ na ọ bụ eziokwu, ọ pụtara na e keghị anyị eke. Mana, ọ bụrụ na ọ bụ Jehova Chineke kere ihe ndị dị ndụ, a ga-enwerịrị ihe mere o ji kee ha.a Legodị ihe Baịbụl kọrọ gbasara otú ihe ndị dị ndụ si malite ịdị nakwa ihe mere anyị ji kwesị ikwere na ihe ọ kọrọ bụ eziokwu.

1. Olee otú eluigwe na ụwa si malite ịdị?

Baịbụl kwuru, sị: “Ná mmalite, Chineke kere eluigwe na ụwa.” (Jenesis 1:1) Ọtụtụ ndị sayensị kwetara na eluigwe na ụwa nwere oge ha malitere ịdị. Olee otú Chineke si kee eluigwe na ụwa? O ji ‘ike ya,’ ya bụ, mmụọ nsọ ya, kee eluigwe na ụwa na ihe niile dị n’ime ha, ma kpakpando ma ụyọkọ kpakpando ma ihe ndị ọzọ yiri ụwa a na-akpọ planet.—Jenesis 1:2.

2. Gịnị mere Chineke ji kee ụwa?

Jehova ‘ekeghị ụwa na nkịtị, kama o kere ya ka ndị mmadụ biri na ya.’ (Aịzaya 45:18) O kere ụwa anyị a otú ọ ga-adị anyị mma ibi na ya nakwa otú anyị ga-enwe ike ibi na ya ruo mgbe ebighị ebi. (Gụọ Aịzaya 40:28; 42:5.) Ndị sayensị achọpụtala na ụwa pụrụ iche. Ọ bụ ya bụ naanị planet mmadụ ga-ebili na ya ma dịrị ndụ na-aga.

3. Olee otú mmadụ si dị iche n’ụmụ anụmanụ?

Mgbe Jehova kechara ụwa, o kere ihe ndị dị ndụ dị na ya. O bu ụzọ kee ahịhịa na osisi dị iche iche na ụmụ anụmanụ. O mechakwara “kee mmadụ n’oyiyi ya.” (Gụọ Jenesis 1:27.) Olee otú mmadụ si dị iche n’ụmụ anụmanụ? Ebe ọ bụ na Chineke kere anyị n’oyiyi ya, anyị ga-emeli ka ya, dị ka ịhụ ndị ọzọ n’anya na ikpe ikpe ziri ezi. O kekwara anyị otú anyị ga-enwe ike ịna-amụta asụsụ dị iche iche, otú ịhụ ihe mara mma ga na-amasị anyị, nakwa otú egwú ga na-atọ anyị ụtọ. Anyị nwekwara ike ife Chineke, ma ụmụ anụmanụ enweghị ike ife ya.

MỤTAKWUO IHE

Chọpụta ihe na-egosi na e kere ihe ndị dị ndụ eke nakwa na ihe Baịbụl kọrọ gbasara otú e si kee ha rijuru afọ. Chọpụtakwa ihe àgwà dị iche iche ndị mmadụ na-akpa na-akụziri anyị gbasara Chineke.

4. E kere ihe ndị dị ndụ eke

A na-eto ndị mmadụ ma ha lere anya n’ihe e kere eke rụpụta ihe. Ònyezi ka e kwesịrị ito maka ihe ndị ahụ e kere eke ha leere anya rụpụta ihe? Kpọnyenụ VIDIO a. Unu lechaa ya, unu eleba anya n’ajụjụ a:

VIDIO: Ikwere na Chineke (2:43)

• Olee ụfọdụ ihe e kere eke ndị mmadụ leere anya rụpụta ihe?

Ọ bụ mmadụ na-ese ụlọ ọ bụla, rụọkwa ya. Ònyekwanụ kere ihe ndị dị n’ụwa? Gụọnụ Ndị Hibru 3:4. Unu gụchaa ya, unu eleba anya n’ajụjụ ndị a:

• Olee ihe ndị e kere eke na-amasị gị?

• Mmadụ ò kwesịrị ikwere na e kere eluigwe na ụwa na ihe niile dị n’ime ha eke? Maka gịnị?

Ị̀ ma ihe a?

Ị gaa na jw.org, ị ga-ahụ isiokwu na vidio ndị kọwakwuru ihe a. Ị ga-ahụ ha n’ebe abụọ a kpọrọ “È Kere Ya Eke?” na “Ihe Ndị Mmadụ Kwuru Mere Ha Ji Kwere na Chineke Dị.”

“N’eziokwu, ụlọ ọ bụla nwere onye rụrụ ya, ma onye rụrụ ihe niile bụ Chineke”

5. Ihe Baịbụl kọrọ gbasara otú e si kee ihe enweghị mgbagha

VIDIO: Vidio si na vidio bụ́ È Kere Eluigwe na Ụwa Eke? (3:51)

• Baịbụl ò kwuru na ọ bụ ụbọchị isii nkịtị ka e ji kee ụwa na ihe ndị dị ndụ dị na ya?

• Ì chere na ihe Baịbụl kwuru gbasara otú e si kee ihe dabara adaba, rijuokwa afọ? Gịnị mere i ji zaa ihe ị zara?

Gụọnụ Jenesis 1:1. Unu gụchaa ya, unu eleba anya n’ajụjụ a:

• Ndị sayensị na-ekwu na eluigwe na ụwa nwere mmalite. Olee otú ihe a ha na-ekwu si akwado ihe anyị gụrụ n’amaokwu a?

Ụfọdụ ndị na-eche na ọ ga-abụ na Chineke kere otu ihe, ihe ahụ aghọzie ụdị ihe dị iche iche. Gụọnụ Jenesis 1:21, 25, 27. Unu gụchaa ya, unu eleba anya n’ajụjụ ndị a:

• Baịbụl ọ̀ sịrị na Chineke kere otu obere ihe dị ndụ, ihe ahụ aghọzie azụ̀, anụmanụ dị iche iche, na mmadụ? Ka ọ̀ sịrị na ọ bụ Chineke kere ihe niile dị ndụ “n’ụdị ha dị iche iche”?

6. Chineke kere mmadụ otú pụrụ iche

Anyị dị iche n’ụmụ anụmanụ Jehova kere. Gụọnụ Jenesis 1:26. Unu gụchaa ya, unu eleba anya n’ajụjụ a:

• Ebe ọ bụ na Chineke kere anyị n’oyiyi ya, olee ihe otú anyị si ahụ ndị ọzọ n’anya na otú anyị si emetere ha ebere na-akụziri anyị gbasara ụdị onye Chineke bụ?

NCHỊKỌTA

Ọ bụ Jehova kere eluigwe na ụwa na ihe niile dị ndụ.

Ajụjụ ndị e ji echeta ihe a mụrụ

• Gịnị ka Baịbụl kwuru gbasara otú eluigwe na ụwa si malite ịdị?

• Chineke ò kere otu obere ihe dị ndụ, ihe ahụ aghọzie ihe ndị ọzọ dị iche iche dị ndụ, ka ọ̀ bụ ya kere ihe niile?

• Olee otú mmadụ si dị iche n’ụmụ anụmanụ?

IHE Ị GA-ELEBAKWU ANYA

Lee ihe ndị e kere eke gosiri na e nwere onye kere ihe.

“Gịnị Ka Ihe Ndị E Kere Eke Na-akụziri Anyị?” (Teta!, Septemba 2006)

Lee otú nna nwere ike isi kọọrọ obere nwa ya ihe Baịbụl kọrọ gbasara otú e si kee ihe.

“Jehova . . . Kere Ihe Niile” (2:37)

Baịbụl sịrị na Chineke kere ihe niile, ma ụfọdụ ndị na-ekwu na Chineke kere obere ihe dị ndụ, ihe ahụ aghọzie ihe ndị ọzọ dị ndụ. Chọpụta ma ihe abụọ a hà bụcha eziokwu.

“Chineke Ò Kere Obere Ihe Dị Ndụ, Ihe Ahụ Aghọzie Ihe Ndị Ọzọ Dị Ndụ?” (Isiokwu gbara n’Ịntanet)