Na-agbarịtanụ Ibe Unu Ume
1. Olee ohere pụrụ iche nleta ndị nlekọta na-ejegharị ejegharị na-eme ka anyị nwee?
1 Pọl onyeozi degaara ọgbakọ dị na Rom akwụkwọ, sị: “N’ihi na ọ na-agụsi m agụụ ike ịhụ unu, ka m wee nyetụ unu onyinye ime mmụọ ka e mee ka unu guzosie ike; ma ọ bụ, kama nke ahụ, ka unu wee gbarịta onwe unu ume, onye nke ọ bụla site n’okwukwe nke ibe ya, ma nke unu ma nke m.” (Rom 1:11, 12) Nleta ndị nlekọta na-ejegharị ejegharị na-eleta anyị taa na-eme ka anyị nweekwa ohere ịgbarịta ibe anyị ume.
2. Olee ihe mere e ji ama ọkwa n’oge na onye nlekọta sekit na-abịa?
2 Ọgbakọ: A na-adịkarị amara ọgbakọ ọkwa na onye nlekọta sekit na-abịa ma ọ fọdụ ihe dị ka ọnwa atọ tupu ya abịa. Nke a na-enye anyị ohere ịhazi ihe omume anyị nke ọma iji nwee ike irite uru zuru ezu ná nleta ya. (Efe. 5:15, 16) Ọ bụrụ na ị na-arụrụ mmadụ ma ọ bụ gọọmentị ọrụ, ikekwe, i nwere ike ịrịọ ka e nye gị ohere ịhapụ ọrụ n’ime izu iji soro gaa ozi ọma. Ụfọdụ na-eme ndokwa ịrụ ọrụ ọsụ ụzọ inyeaka n’ọnwa ahụ ọ ga-abịa. Ọ bụrụ na i meela atụmatụ ime njem n’izu ahụ, ọ́ gaghị adị mma ka i megharịa ya ka i wee nọrọ ya?
3. Olee ihe onye ọ bụla n’ime anyị nwere ike ime iji nweta agbamume ma onye nlekọta sekit bịa?
3 Otu n’ime nzube bụ́ isi onye nlekọta sekit ji abịa ileta ọgbakọ bụ iji gbaa ụmụnna ume, nyekwa ha ọzụzụ n’ozi ubi. Ọ́ gaghị adị mma ka i denye aha gị ka gị na ya ma ọ bụ nwunye ya, ma ọ bụrụ na ọ lụọla nwanyị, rụọ n’ozi? Ọ na-atọ ndị nlekọta sekit ụtọ ka ha na ndị nkwusa dị iche iche na-arụ n’ozi, tinyere ndị na-enwechaghị ahụmahụ ma ọ bụ ndị na-enwechaghị nkà n’izi ozi ọma. Onye ọ bụla nwere ike ịmụta ihe n’otú o si ezi ozi ọma ma tinye aro ndị ọ ga-eji obiọma tụọ n’ọrụ. (1 Kọr. 4:16, 17) Ịkpọ ya ka ọ bịa ka gị na ya rie nri ga-enyekwu unu ohere ịgbarịta ibe unu ume. (Hib. 13:2) Ebe ọ bụ na okwu ya ga-elebara mkpa ọgbakọ unu anya, gee ya ntị nke ọma.
4. Olee otú anyị nwere ike isi gbaa onye nlekọta sekit anyị ume?
4 Onye Nlekọta Sekit: Pọl onyeozi adịghị iche n’ebe ụmụnna ndị o letara nọ n’ihi na o nwere ihe ndị mara okwukwe ya aka, nyeekwa ya nsogbu n’obi. Agbamume dị ya mkpa. O nwekwara obi ekele mgbe o nwetara ya. (2 Kọr. 11:26-28) Mgbe ọgbakọ dị na Rom nụrụ na Pọl, onye bụ́zi onye mkpọrọ, na-abịa, ụfọdụ n’ime ha gara n’Ahịa Apịọs izute ya—bụ́ ebe dị kilomita iri asaa na anọ site na Rom! “Ozugbo Pọl hụkwara ha, o kelere Chineke ma nwee obi ike.” (Ọrụ 28:15) Gị onwe gị nwekwara ike ịgba onye nlekọta sekit unu ume. Nye ya “nsọpụrụ okpukpu abụọ” site n’iji ịnụ ọkụ n’obi kwado nleta ya. (1 Tim. 5:17) Jiri obi gị nile gwa ya na i nwere obi ekele maka mbọ ọ na-agba n’ihi gị, gosikwa ya n’omume. Obi ga-adị ya na nwunye ya ụtọ mgbe ha na-ahụ okwukwe gị, ịhụnanya gị, na ntachi obi gị.—2 Tesa. 1:3, 4.
5. Gịnị mere agbamume ji dị anyị nile mkpa taa?
5 ‘N’oge ndị a pụrụ iche nke siri ike obibi,’ olee onye n’ime anyị nke agbamume na-adịghị mkpa? (2 Tim. 3:1) Kpebie ugbu a iso n’ihe nile a ga-eme n’izu pụrụ iche onye nlekọta sekit ga-eleta ọgbakọ unu. Anyị nile—ma ndị nlekọta na-ejegharị ejegharị ma ndị nkwusa ọgbakọ—nwechara ike iji ọṅụ na-agbarịta ibe anyị ume. Anyị ga-esi otú a ‘na-akasirịta ibe anyị obi ma na-ewulirịta ibe anyị elu.’—1 Tesa. 5:11.