Nọgide ‘Na-eme Ihe Ọma’
1 I mere ihe ọma mgbe ị ghọrọ ohu Jehova Chineke. Otú ọ dị, ugbu a, ihe ịma aka dị n’oge ndị a dị oké egwu bụ ịnọgide ‘na-eme ihe ọma.’ (Gal. 6:9) Ọ bụ ezie na nke a na-achọ ezi mgbalị, ị pụrụ ime ya. N’ụzọ dị aṅaa?
2 Zụlite Echiche Uche nke Jisọs: Dị ka Jisọs, ị pụrụ idi ule dị iche iche ma ọ bụrụ na i lekwasị anya n’olileanya Alaeze ahụ. (Hib. 12:2, 3) Nwee obi ike na Jehova hụrụ gị n’anya na ọ chọkwara ka ihe gaara gị nke ọma. (2 Pita 3:9) Tụkwasị ya obi gị nile, na-enwe obi ike na ọ ga-enyere gị aka. (1 Kọr. 10:13) Nọgidesie ike n’ekpere, na-arịọ Jehova ka o nyere gị aka ịtachi obi. (Rom 12:12) Na-aṅụrị ọnụ ná nkwenye ahụ bụ́ na ntachi obi gị ga-eduga n’ịbụ onye a nwapụtara n’anya Chineke. (Rom 5:3-5) Ikwesị ntụkwasị obi gị n’ịzụlite ‘otu ụzọ iche echiche ahụ nke Kraịst Jisọs nwere’ ga-eme ka i nwee afọ ojuju meekwa ka obi Jehova ṅụrịa.—Rom 15:5, NW; Ilu 27:11.
3 Nọgide Na-eme Ihe Ọma: Jiri ndokwa ndị Jehova meere ndị ya iji nyere ha aka ịnọgide na-eme ihe ọma mee ihe n’ụzọ zuru ezu. Nọgide na-enwe usoro onwe onye dị mma nke ịgụ Okwu Chineke na ịmụ mbipụta ndị dabeere na Bible, ndị òtù ohu ahụ kwesịrị ka a tụkwasị ya obi, nke nwekwara uche na-ebipụta. Na-akwadebe, na-aga, na-ekerekwa òkè mgbe nile ná nzukọ nile nke ọgbakọ. Soro ụmụnna gị ndị nwoke na ndị nwanyị n’ụzọ ime mmụọ na-akpachi anya, tupu nakwa mgbe nzukọ ndị Kraịst gbasasịrị. Setịpụ ihe mgbaru ọsọ ndị ezi uche dị na ha maka ozi gị iji na-ekere òkè dị mma n’ozi ubi nakwa iji meziwanye nkà gị nke ikwusara ndị ọzọ ozi ọma ahụ.
4 Nke a bụ otú ị pụrụ isi nọgide na-eme ihe ọma ma na-enweta ọṅụ dị ukwuu n’otu mgbe ahụ. Banyere nke a, otu nwanna nwoke n’Itali kwuru sị: “Mgbe o ruru n’uhuruchi, m wee lọta site n’ozi Jehova n’ụbọchị ahụ, ike na-agwụ m n’eziokwu. Ma obi na-adị m ụtọ, m na-ekelekwa Jehova ekele n’ihi inye m ọṅụ nke ọ na-adịghị onye pụrụ ịnapụ m.” N’ihi ya, nọgide na-eme ihe ọma, gị onwe gị kwa ga-enweta ọṅụ dị ukwuu.