IHE ỌMỤMỤ NKE 13

Mee Ka Uru Ihe Ị Na-ekwu Bara Doo Anya

Aịzaya 48:17

IHE Ị GA-EME: Nyere ndị na-ege gị ntị aka ịghọta otú ihe ị na-ekwu si gbasa ndụ ha, gosikwa ha otú ha ga-esi jiri ihe ha mụtara nyere onwe ha aka.

OTÚ Ị GA-ESI EME YA:

Chebara ndị ị na-agwa okwu echiche. Chebara ihe mere ndị na-ege gị ntị ji kwesị ịnụ ihe ị chọrọ ịgwa ha echiche nakwa ihe ndị ga-abara ha ezigbo uru n’ihe ndị ị ga-agwa ha.
N’oge niile ị na-eme ihe omume gị, gosi ndị ị na-agwa okwu ihe ha ga-eme. Ozugbo i bidoro okwu gị, mee ka onye ọ bụla na-ege gị ntị ghọta na ihe ị na-ekwu gbasara ya. Mee ka ndị na-ege gị ntị ghọta otú ha nwere ike isi mee isi ihe nke ọ bụla ị na-ekwu. Na-akpọrọ ha okwu aha.

Mgbe ị na-akọwa otú e kwesịrị isi mee ihe Baịbụl kwuru, kọwaa ya otú ga-egosi ndị ị na-agwa okwu na ị hụrụ ha n’anya ma na-echebara ha echiche. Kama ime ka obi mawa ha ikpe, kwuo okwu otú ga-eme ka ha hụkwuo Jehova n’anya, okwukwe ha esikwuo ike. Ka obi sie gị ike na ha ga-eme ihe ziri ezi.