ANG ỌJẸ́JẸ 19
Ányị Ahị tị́ ka Bwu Ju Ọmyịmyị Nyahị Ọngịrị ẹ-Ẹga nya Odehe Onyeewe Ọlẹ ká IJihova Chehe?
“Jaabwọ [ká iJihova á] ya, ịnyịnyị-ịnyịnyị ọ kaa họ lẹ.”—ỌWA. 23:19.
EJE 142 Ahị Yụbwọ Chị Ẹhị Ọrịrịị-rịrị Nyahị Gogo
ẸHỊ NYA ẸLAa
1-2. Ẹlịyẹ ahị tị́ baba nyọka họ jaabwọ kahị wẹẹ godayị gbe odehe onyeewe?
EHE ọlẹ ká Ohe chị nyọka kpa odehe onyeewe wẹ ka ku ọmwakpa nya odehe onyobyi ọlẹ myịhị lẹhị yẹẹyẹẹ. (2 Pit. 3:13) Ịlẹhị lẹ, áhị jẹ́ ụka ọlẹ ká odehe onyeewe ọọwa ka pwu eji ka, ma ang ịlẹ kị wẹẹ họ odehe mẹjẹ nyori ọ́ ja tata ene kaka.—Mat. 24:32-34, 36; Ụkụr. 1:7.
2 Jaabwọ myị́ abwọ kahị tị jam ẹ-ẹpwụ nya ẹlịlẹhị tata ka ba lẹ, ahị wuu baba nyọka ju ọmyịmyị nyahị ọngịrị u-uhye nya ehe ọchịchị ọwẹ. Ịyẹ tị́ du? Chajị ọmyịmyị ọlẹ kọ la ọngịrị yẹẹyẹẹ ene ka jẹ́-ẹ wẹ ka la dẹwụ-dẹwụ myị́ wẹẹ. Ọlẹrụ ịPọlụ dọmwụ wụrụ ọmyịmyị ọlala ka nya “ọhọbịrị ọlẹ kọ [kaa] wuhi kpanya-kpanya.” (Hib. 12:1) Nyọka họ ká ọmyịmyị nyahị ka la dẹwụ-dẹwụ ka, ahị baba nyọka wụla ang ẹjẹẹ ịlẹ kị mẹjẹ nyori odehe onyeewe ja ka wẹ lẹ yẹ ụka myị́ ụka.—Hib. 11:1.
3. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?
3 Ẹ-ẹpwụ nya ang ọjẹ́jẹ ọlẹ, ahị ka ya ẹla u-uhye nya agbẹyị ịta ịlẹ kahị ka jẹ́-ẹ bwu ju ọmyịmyị nyahị ọngịrị u-uhye nya odehe onyeewe. Agbẹyị ịịwa ri: (1) bwula ọ-kụ irya u-uhye nya iya ọkịlakịla nya iJisọsị, (2) bwula ọ-kụ irya u-uhye nya ọngịrị nya iJihova, bala (3) bwula ọ-kpa ụka nyahị họ ụkụrwọ nya ang nya olegu. Ọọwa lẹ, ahị ka ya ẹla u-uhye nya abwọlẹ ká ẹla ọlẹ ká iJihova byi ịHabakuku ka jẹ́-ẹ ju ọmyịmyị nyahị ọngịrị alẹ lẹlẹ. Ma ahị jene kụ ẹhị yẹ iwe-ahụrụ ịhyẹ ịlẹ kahị ka chịpwụrụ bwu ẹpwụ nyaa myị́ lẹẹlẹẹ du kọ ka baba nya ọmyịmyị ọnyọọngịrị u-uhye nya odehe onyeewe ọlẹ kọ wẹẹ warị wẹẹ.
IWE-AHỤRỤ ỊLẸ KỊ BABA NYA ỌMYỊMYỊ ỌNYỌỌNGỊRỊ
4. Eje ọchịchị nya ẹlịyẹ à tị́ baba nya ọmyịmyị ọnyọọngịrị?
4 Ẹnụ myị́ ẹnụ, ahị kaa cheje nya ẹla ịlẹ kị baba nya ọmyịmyị ọnyọọngịrị. Ọ-chụ pwokwita, ahị kaa cheje nya ẹla u-uhye nya ogu ọlẹ kahị ka ji, ụya ọyaya, ube-ụpwụ ọkaka, awụlẹ oyeye, anjwo, bala ụkụrwọ. Ọ há kahị ka tọ ịlọhị wo nyori: ‘Eje ịlẹ kam kaa chị mẹjẹ nyori m̀ jẹ́ ká odehe ọlẹ á ka jam pyịyọọ ka bala o-ri odehe onyeewe ja ka wẹ ka ku ọmwakpa nyamwụ lẹ? Lee m̀ tị́ kaa chụ nyọka họ ẹla lala angịlẹ kị kaa ya nyori ịwa nyị́ gbu lẹ nyị tị́ myị́ lẹ?’ (Mat. 6:19, 20; Luk. 12:16-21) Kori kahị ju ọmyịmyị nyahị ọngịrị nyori odehe onyeewe ji ọnaabwọ lẹ, ahị ka jẹ́-ẹ cheje ịnyịịla.
5-6. Ịyẹ tị́ du kahị baba nya ọmyịmyị ọnyọọngịrị ụka nya ịmayẹ? Ọ-chụ pwokwita oyina à tị́ ji?
5 Ahị kaa la ịmayẹ ịlẹ kị kaa baba nya ọmyịmyị ọnyọọngịrị ịnyịnyị. Ahị ka la akama nya ọtụpyịpyị, ẹdụrụ ọnyọọngịrị, lee ang ịkịla ịlẹ kị ka jẹ́-ẹ kpụhị ọkịlẹtụ enyi myị́. Ụka nya ọgbanyẹ, ọ ka lahị lala o-ri ahị nyị la ọngịrị nyọka jẹ́-ẹ kụrụ akama ọọwa myị́. Ma ụka ká akama ịlịịwẹ á myị́ cheju ka, ahị ka baba nya ọmyịmyị ọnyọọngịrị nyọka jẹ́-ẹ bọhụ bala ọ-ka kịnyaa juwa gbịgba ha iJihova la ọkẹkẹnị.—Rom. 12:12; 1 Pit. 1:6, 7.
6 Ụka kahị juwa chịpwụrụ bwu ẹpwụ nya akama, ọ ka lahị lala o-ri odehe onyeewe ọlẹ ká iJihova chehe nyị́ ja wẹ ẹnẹnẹhẹ kaka myị́. Ọọwa mẹjẹ nyori ọmyịmyị nyahị la dẹwụ-dẹwụ? Ịnyị o ri pyii ka. Kụ ẹhị yẹ ọ-chụ pwokwita ọlẹ wẹẹ. Ụka ká ohu nya ogo á wu hyụụ kpoye, ọ ka lahị lala o-ri ụrwẹnụ nyị́ ka jẹ́-ẹ wẹ ẹnẹnẹhẹ kaka. Kpọkpọọkpọ ụrwẹnụ tị kaa wẹ. Ịnyịnyị-ịnyịnyị, ụka ká ẹla á kpụhị ọkịlẹtụ enyi kaka kpoye, ọ ka lahị lala o-ri odehe onyeewe nyị́ ka wẹ ẹnẹnẹhẹ kaka myị́. Ma kori ká ọmyịmyị nyahị á la ọngịrị, ahị ka jẹ́ nyori ọnụ ọmyịmyị nya Ohe ka họ jịra pyii lẹ. (Eje. 94:3, 14, 15; Hib. 6:17-19) Ụka kahị jẹ́ myị̀myị̀ ịnyị, ahị ka kịnyaa la ọ-hu ịgba ọgbagba nya iJihova kụ ịlahị ẹ-ẹpwụ nya ọhịhị nyahị.
7. Irya ọlanyị ahị tị́ baba nyọka yẹ abwọ hi?
7 Ahị baba nya ọmyịmyị ọnyọọngịrị ịnyịnyị nyọka jẹ́-ẹ họ ụkụrwọ nya ẹrụ ọnyịịla ọ-kpa pyẹ. Iru nya angịlẹ kahị kaa ya “ẹrụ ọnyịịla” je kaa me irya nyori odehe onyeewe ọlẹ ká Ohe chehe nyị́ ka jẹ́-ẹ chịkpẹẹ ka. (Mat. 24:14; Isi. 33:32) Ahị ka dụmwọ-dụmwọ kahị ka da ẹla ọlẹ ká iJihova mẹjẹ ịwẹẹ lala ịwa-ịwa ka. Nyọka ya iwe da kọ ka lịnyị ka, ahị ka ju ọmyịmyị nyahị ọngịrị pyii. Ahị kụ ẹhị yẹ agbẹyị ịta ịlẹ kahị ka jẹ́-ẹ họ ịnyị wẹẹ.
KỤ IRYA JU IYA ỌKỊLAAKỊLA NYA IJISỌSỊ
8-9. Ányị irya ọ-kụ ju iya ọkịlaakịla nya iJisọsị à tị́ ka ju ọmyịmyị nyahị ọngịrị?
8 Ụgbẹyị ọhẹ ọlẹ kahị ka jẹ́-ẹ ju ọmyịmyị nyahị ọngịrị ri ọ-ka kụ irya ju iya ọkịlaakịla nya ịKịrayịsị. Iya ọkịlaakịla ọwẹ họ kahị jẹ́ myị̀myị̀ nyori ang ịlẹ ká Ohe chehe ka wẹ ka họ jịra. Ụka kahị kụ irya u-uhye nya ang odudu ká Ohe myọnụ nyọka hu ọnyị nyamwụ ha bala ụkụrwọ ọlẹ kọ ji ẹpwụ nya ẹlẹwẹ, ahị ka jẹ́-ẹ ju ọmyịmyị nyahị ọngịrị nyori ọhịhị ọmyịmyị-ka ọlẹ ká Ohe chehe kahị ka la odehe onyeewe ka họ jịra pyii. Ịyẹ tị́ du kahị ka jẹ́-ẹ ya ịnyị?
9 Ụkụrwọ oyina à tị́ ji ẹpwụ nya iya ọkịlaakịla ọwẹ? IJihova du Ọnyị ọlịkẹjẹ nyamwụ, kọ ri ọngọ bọọ i-iyo chii gụgụ wuu, ẹrụ bwu epwoohe du kị mọọ la abwụma nya ọngịnyị ọla kpẹẹkpẹẹ ám̀ odehe ọlẹ. Ụka ká iJisọsị jam odehe, ọ chịpwụrụ bwu ẹpwụ nya akama ịdatị-datị. Ọ myịmyị yẹ akama gbee kọọ gbu igu onyuujujwo. Ụkụrwọ ọtụka iJihova à họ wẹ ịlẹhị lẹ! Ohe nya ọháha á ka myị-ị̀ ya iwe da Ọnyị nyamwụ ka yẹ akama gbee kọ ka gbu chajị ká ọhịhị nyahị ka há lụka o-kpii kem ka. (Jọn. 3:16; 1 Pit. 1:18, 19) Nyọlẹ ká iJihova họ ụkụrwọ ọtụka ọlịịwẹ wuu wẹẹ, ọ ka họ kpụ ahị ka jẹ́-ẹ la ọhịhị ọmyịmyị-ka odehe onyeewe.
KỤ IRYA JU ỌNGỊRỊ NYA IJIHOVA
10. Jaabwọ ká Ala Efesọsị 3:20 ya, ịyẹ iJihova à tị́ ka họ myị́?
10 Ụgbẹyị oheeye ọlẹ kahị ka jẹ́-ẹ ju ọmyịmyị nyahị ọngịrị ri ọ-ka kụ irya ju ọngịrị nya iJihova. Ọ la ọngịrị nyọka họ ẹla myị́ ẹla ọlẹ kọ myọnụ jịra. Ịlẹhị lẹ, ọ-họ jịra nya ọhịhị ọmyịmyị-ka ọla odehe onyeewe ọlẹ ká Ohe myọnụ ka lala o-ri nyị́ ka jẹ́-ẹ chịkpẹẹ ẹ-ẹhị nya ọngịnyị ehe ka myị́. Ma ụka ọhẹ bala ụka ọkịla, iJihova kaa chehe nya ang ịlẹ ká angịnyị ehe ka jẹ́-ẹ họ myị́ ẹnẹnẹhẹ ka. Ọ jẹ́-ẹ họ ịnyị myị́ chajị ọwa à ri Ohe Agụgụ lẹ. (Job. 42:2; Mak. 10:27) Lẹ, ọ́ kaa lahị ẹbyẹbyị ụka kọ myọnụ nya ang ịlẹ kị kịla ọngịrị nyahị kịla ka!—Wa Ala Efesọsị 3:20.
11. Ya ọ-chụ pwokwita ọhẹ nya ehe ịchịchị ịlẹbyẹbyị nya Ohe wẹẹ. (Yẹ akpa ọlẹ kọ ri, “Ehe Ịchịchị Ịlẹbyẹbyị Ịhyẹ Ịlẹ kị Họ Jịra.”)
11 Kụ irya ju ang ịhye ịlẹ ká iJihova chị angịnyị nyamwụ ehe lụka onyogo kọ lala o-ri nyị́ ká jẹ́-ẹ chịkpẹẹ ka lẹẹ wẹẹ. Ọ byi Ebiraham bala iSera nyori nyị ka ma ọnyị lụka nya okwirichi nyaa. (Ọmwụ. 17:15-17) Ọ myị́myị́ byi Ebiraham nyori ọwa nyị ka ya ọpyị nya iKenan ha anyị ịtụma nyamwụ. Ẹ-ẹpwụ nya ẹka lụmẹ-lụmẹ ịlẹ ká ala Isirẹlụ ịlẹ kị ri anyị ịtụma nya Ebiraham ri anyịhị ọ-ọpyị nya Ijipiti, ọ ka laa lala o-ri ọnụ ọmyịmyị ọwẹ nyị́ ka jẹ́-ẹ họ jịra ẹnẹnẹhẹ kaka. Ma ọ tị́ họ jịra. Ụka ọkịla, iJihova ya dodehe nyori Elisabeti nyị ka ma ọnyị nanana nyori ọ chị okwirichi lẹ. Ọ myịmyị byi iMeri kọ jẹ́ ọlẹng ka, nyori nyị ka ma Ọnyị nyọwa. Ọwẹ tị ka ri ọ-họ jịra nya ehe ọhẹ ọlẹ ká iJihova chị ẹka ụnọ ịmanyị tị́ kẹkpẹ i-iku nya Iden!—Ọmwụ. 3:15.
12. Ẹlịyẹ ụpwụ nya iJochuwa 23:14 bala Ayịsaya 55:10, 11 à tị́ họ kahị jẹ́ myị̀myị̀ u-uhye nya ọngịrị nya iJihova?
12 Ụka kahị kụ irya ju ehe ịlẹ ká iJihova chị bala abwọlẹ kọ haa jịra, ahị ka jẹ́ nyori ọ la ọngịrị ọtụka-ọtụka. Ọọwa ka du ká ọmyịmyị nyahị u-uhye nya odehe onyeewe ọlẹ kọ chehe ka la ọngịrị. (Wa iJochuwa 23:14; Ayịsaya 55:10, 11.) Ịnyịnyị, ọọwa ka du kahị ka jẹ́-ẹ nwụlanọ gụ́ ọọwa nyọka da angịkịla ụbwọ kị ka jẹ́ nyori odehe onyeewe ọlẹ ká Ohe chehe á ri ẹla nya ụlaa lee ujwo ka. IJihova la ịlọmwụ ya dodehe u-uhye nya epwoohe bala odehe onyeewe yẹkẹẹ: “Ala . . . ịlẹ ri ala ịchịla o-hu ọkịlẹtụ ha bala o-ri ẹla nya ịlẹhị.”—Ọwụ. 21:1, 5.
HỌ ANG ỌLẸ KỌ KA TỤNG JU IJIHOVA CHWẸẸ
ỌJỊRA-JỊRA ỌKAKA
Ányị ang nya olegu ọwẹ à tị́ ka jẹ́-ẹ ju ọmyịmyị nyang ọngịrị? (Yẹ ọgba 13)
13. Ányị ọjịra-jịra à tị́ kaa ju ọmyịmyị nyahị ọngịrị? Dọọ wụlẹ wẹẹ.
13 Ụgbẹyị ọhata ọlẹ kahị ka jẹ́-ẹ ju ọmyịmyị nyahị ọngịrị ri ọ-ka kpa ụka nyahị họ ụkụrwọ nya ang nya olegu. Ọ-chụ pwokwita, kụ irya u-uhye nya abwọlẹ kahị kaa yé apyobwuna bwu ọjịra-jịra ọkaka wẹẹ. Anna, kọ kaa kpa ụka nyamwụ wuu họ ụkụrwọ nya iJihova ẹ-ẹpwụ nya ẹka iwo ịmanyị tị́ lẹ yẹkẹẹ: “Ọjịra-jịra ọkaka dam ụbwọ du ká ọmyịmyị nyam la ọngịrị. Ọ́ dọmwụ riri ká ọngọ ya ẹla á ri ọngọ jẹ́ mẹ ang jẹ lụmẹ ka lee ọ́ ya ẹlẹhẹ onyeewe ka wẹwẹ, m̀ kaa wo ẹlẹhẹ ọlẹ kọ kaa du kam ka wo etu nya ẹlịlẹhị ịla ịBayịbụụ gụ́ olene, ọọwa tị kaa ju ọmyịmyị nyam ọngịrị.”b Ọmyịmyị nyahị kaa la ọngịrị gụ́ ọọwa ụka kahị wo ẹla ọwẹwẹ nya aanahị alẹng bala anyang ịnyịnyị.—Rom. 1:11, 12; 10:17.
ẸLA OHE OYAYA
Ányị ang nya olegu ọwẹ à tị́ ka jẹ́-ẹ ju ọmyịmyị nyang ọngịrị? (Yẹ ọgba 14)
14. Ányị ẹrụ ọnyịịla ọ-kpa pyẹ à tị́ kaa ju ọmyịmyị nyahị ọngịrị?
14 Ahị kaa ju ọmyịmyị nyahị ọngịrị ịnyịnyị ụka kahị ya ụbwọ ju ụkụrwọ nya ẹrụ ọnyịịla ọ-kpa pyẹ. (Hib. 10:23) Barbara, kọ kaa gbịgba ha iJihova gụ ẹka 70 myị́ lẹ yẹkẹẹ: “M̀ kaa yẹ ụka myị́ ụka nyori ụkụrwọ nya ẹla Ohe oyaya kaa ju ọmyịmyị nya ọngịnyị ọngịrị. Jaabwọ kam wẹẹ ya ẹla u-uhye nya ang ịnyịịla ịlẹ ká iJihova chehe gụ́ ọọwa, ịnyịnyị ọmyịmyị nyam à kaa la ọngịrị gụ́ olene lẹ.”
ANG ỌJẸ́JẸ NYA ỊLỌNG
Ányị ang nya olegu ọwẹ à tị́ ka jẹ́-ẹ ju ọmyịmyị nyang ọngịrị? (Yẹ ọgba 15)
15. Ányị ịBayịbụụ ọjẹ́jẹ nya ịlọhị à tị́ kaa ju ọmyịmyị nyahị ọngịrị? (Yẹ ifoto ịnyịnyị.)
15 Ang ọkịla ọlẹ kọ kaa ju ọmyịmyị nyahị ọngịrị ri ịBayịbụụ ọjẹ́jẹ nya ịlọhị. Susan yẹ nyori nyị kaa dụbwọ nyọka hu ụka nya ịBayịbụụ ọjẹ́jẹ nya ịlọmwụ nọ. Ọ yẹkẹẹ: “Ẹnụ nya ịSọndị, m̀ kaa jẹ́ Ẹpwang ọ-Kụ Gbeji ọjẹ́jẹ nya epwihi ọkịla neeji. Ẹnụ nya ịMọndị bala iTusdee, m̀ kaa nwụla ọjịra-jịra ọla ẹpwarịrị nya epwihi nọ. M̀ kaa kpa ahyẹẹnụ ihihi họ ụkụrwọ u-uhye nya ịBayịbụụ ọjẹ́jẹ nya ịlọm.” Nyọlẹ ká Susan kaa ba ụka ọlẹ kọ hu nọ nya ang ọjẹ́jẹ nyamwụ jẹ wẹẹ, ọ kịnyaa la ọ-ju ọmyịmyị nyamwụ ọngịrị. Irene, kọ kaa họ ụkụrwọ e-egbeju ẹpwa nyahị ọla odehe wuu ẹ-ẹpwụ nya ẹka iwo ịmanyị tị́ lẹ, yẹ nyori ang ọjẹ́jẹ u-uhye nya ọmwụ ọyẹyẹ ịla ịBayịbụụ nyị kaa ju ọmyịmyị nya ọngịnyị ọngịrị. Ọ yẹkẹẹ: “Ọ kaa kpụm ịpyọ nyọlẹ ká ẹla myị ẹla ọla uhye nya ọmwụ ọyẹyẹ nya iJihova kaa họ jịra.”c
Ị “KA HỌ JỊRA PYII”
16. Ịyẹ tị́ du ká ẹla ọlẹ ká iJihova ya je ịHabakuku ju apyobwuna hahị alẹ? (Ala iHiburu 10:36, 37)
16 Angịhyẹ nya anchẹ nya iJihova godayị gbe ocheju nya odehe ọlẹ lụka ọtata lẹ. Ẹ-ẹhị nya ọngịnyị ehe lẹ, ọ ka lala o-ri ọ-họ jịra nya ọnụ ọmyịmyị nya Ohe ọwẹ nyị ja họ atịmẹ lẹ myị́. Ma iJihova jẹ́ jaabwọ kọ la anchẹ nyamwụ. Ọ dọmwụ họ ká ọlọmwụ ịHabakuku jẹ́ myị̀myị̀ yẹkẹẹ: “Ang ịlẹ kam wẹẹ wụrụ mẹjẹng juwa ka họ jịra, ụka kị ka họ jịra kpangga-á pwụ lẹka. Ụka ọọwa tị juwa wẹẹ lagaga kị ka họ jịra pyii. Ó-ri ká ụka ọọwa-á họ atịmẹ wẹwẹ, à ju ugbodu godayị gbe ọ-họ jịra nyaa mẹ, ọ́ ka tata lụmẹ ene ká ụka ọọwa ka họ kaka.” (Hab. 2:3) Ohe họ ká ịHabakuku ụbwọọmwụ à ka jẹ́ ẹlẹwẹ myị̀myị̀ ịnyị? Lee ẹla ọlẹ kọ ya tị́ ju apyobwuna hahị alẹ? IJihova byi ọlẹrụ ịPọlụ nyị ya ẹlẹwẹ ju Angịnyị nya ịKịrayịsị ịlẹ kị wẹẹ godayị gbe odehe onyeewe ịnyịnyị. (Wa Ala iHiburu 10:36, 37.) Ee, ahị ka jẹ́ myị̀myị̀ nyori kori ká ọchịda ọlẹ ká Ohe chịhị ehe á lala o-ri nyị ja họ atịmẹ wẹwẹ, ọ “ka họ jịra pyii. . . . Ọ́ ka tata lụmẹ ene ká ụka ọọwa ka họ kaka.”
17. Ányị ọọnahị ọnyang ọhẹ à tị́ kpa ẹla ọlẹ ká iJihova byi ịHabakuku họ ụkụrwọ?
17 Iru nya anchẹ nya iJihova kaa ju ihi nya ẹla ọlẹ ká iJihova ya nyori nyị “godayị gbe ọ-họ jịra.” Angịhyẹ nyaa dọmwụ họ ịnyị ẹ-ẹpwụ nya ẹka lụmẹ-lụmẹ lẹ. Ọ-chụ pwokwita, Louise dọmwụ nyọka gbịgba ha iJihova la 1939. Ọ yẹkẹẹ: “Ụka ọwẹ, m̀ me nyori Amagẹdọn ka wẹ ene kam ka họ ube-ụpwụ kpá. Ọ́ tị lịnyị ka. O-wa oja nya angịlẹ kị godayị gbe iJihova nyọka họ ọnụ ọmyịmyị nyamwụ jịra dam ụbwọ nyọka godayị gbe iJihova ịnyịnyị ẹ-ẹpwụ nya ẹka ịlẹ kị chịpwụrụ wẹ. M̀ kaa wa oja nya iNuwa, Ebiraham, iJosẹfụ, bala angịkịla ịlẹ kị baba nyọka godayị gbe iJihova lụka ọtata ene kị ka yé uri ọlẹ ká iJihova chehe. Ọ-ya ẹhị rịrị ụka myị́ ụka nyori ọnụ ọmyịmyị nya Ohe ka họ jịra dam am bala angịkịla ụbwọ nyọka jẹ́ myị̀myị̀ nyori odehe onyeewe ji ọnaabwọ lẹ.” Iru nya angịkịla ịlẹ kị gbịgba ha iJihova lụka ọtata lẹ myị ju ẹlẹwẹ ịnyịnyị!
18. Ányị ang ịlẹ ká Ohe họ à tị́ ka jẹ́-ẹ ju ọmyịmyị nyahị ọngịrị u-uhye nya odehe onyeewe?
18 Ịlẹhị lẹ, odehe onyeewe á pwụ eji lẹka. Ma kụ irya u-uhye nya ang ịlẹ kị jam odehe lẹẹlẹẹ lala ịdịchụ, ekeji, iyo ileji, bala angịnyị ehe aanang wẹẹ. Nanana nyori ụka ọhẹ ji kẹkpẹ ká ang ịwẹ wuu á ji ka, ọngọngọhẹ á ka jẹ́-ẹ da ịwẹẹ nyori ịngịịwẹ nyị́ ji lẹẹlẹẹ ka lẹ ka. Ị jam lẹẹlẹẹ chajị nyori iJihova haa lẹ. (Ọmwụ. 1:1, 26, 27) Ohe nyahị chehe nyori ọwa nyị ka ya odehe onyeewe yeji. Ọ ja họ ọnụ ọmyịmyị ọọwa jịra. Ẹ-ẹpwụ nya odehe onyeewe ọọwa, angịnyị ka la ọhịhị ọmyịmyị-ka ẹ-ẹpwụ nya ịnyịrọ ogogo. Ahị jẹ́ myị̀myị̀ nyori odehe onyeewe ka wẹ ụka ká Ohe hu nọ chajị nyamwụ.—Ayị. 65:17; Ọwụ. 21:3, 4.
19. Ányị a tị́ ka bwu ju ọmyịmyị nyang ọngịrị?
19 Ọlẹẹlẹẹ, kpa iwe ọnyị myị́ ọnyị ká la ju ọmyịmyị nyang ọngịrị. Āhị nya iya ọkịlaakịla nya iJisọsị a myịng lẹhị ụka wuu. Kụ irya ju ọngịrị nya iJihova. Họ ang ọlẹ kọ ka tụng ju iJihova chwẹẹ. Bwula ọ-họ ịnyị, à ka juwa ẹ-ẹpwụ nya “angịlẹ wuu kị . . . kpa ọmyịmyị ọlala bala ugbodu ojuju nyaa ye ugu nya ọ-họ jịra nya ọnụ ọmyịmyị” ịwẹ.—Hib. 6:11, 12; Rom. 5:5.
EJE 139 Yẹ Ịlọng Odehe Onyeewe
a Iru nya angịnyị alẹ á la ọmyịmyị u-uhye nya odehe onyeewe ọlẹ ká Ohe myọnụ ka. Ị kaa yọọ lala ẹla nya ụlaa, ujwo, ọlẹ kọ há kpoye nyọka ri ẹlịlẹhị. Ma, ahị jẹ́ myị̀myị̀ nyori ehe ọchịchị nya iJihova wuu ka họ jịra. Ọ lịnyị kpá odu lẹ, ahị baba nyọka kpahị ju ọmyịmyị nyahị kọ ka la ọngịrị kịlahị-ịlahị. Ányị ahị tị́ ka bwu họ ịnyị? Ang ọjẹ́jẹ ọlẹ ka wụlẹ ya jehi.
b Ị yẹ ẹnyị ịhyẹ da.
c Ang ọjẹ́jẹ lụmẹ-lụmẹ ji kahị ka yẹ u-uhye nya ọmwụ ọyẹyẹ ịla ịBayịbụụ kori kahị mwahị e-ekpeleji nya egbeju nya ẹla ọlẹ kọ ri “Prophecy” ẹ-ẹpwụ nya Watch Tower Publications Index. Ọ-chụ pwokwita, yẹ egbeju nya ẹla ọlẹ kọ ri “What Jehovah Foretells Comes to Be” ẹ-ẹpwụ nya Ẹpwang ọ-Kụ Gbeji nya Ọya Ọhọhẹ 1, 2008.