IGidiyọn Kụrụ Ala IMidiyan

Nyọlẹ kọ nọ chẹẹ, ala Isirẹlụ myịmyị ji ẹkpẹ da iJihova, kpụ ị dọmwụ nyọka gbịgba ha ihye nya ịnịịkịla. Ẹ-ẹpwụ nya ẹka irwiye, ala iMidiyan kaa go iyo ileji nya ala Isirẹlụ yoyi bala ọ-bịrị ang ịla ẹrụ nyaa. Nyọka jẹ́-ẹ bé bwu ụbwọ nya ala iMidiyan, ala Isirẹlụ kaa rụ ka kpịbaa ẹ-ẹpwụ nya ụgbụ bala ịgbọdọ. Ị bịlẹ iJihova kọ ka chaa da. Ọọwa iJihova à du olegu-ẹrụ ọhẹ kaka tọ okolobya ọhẹ ká ẹnyị nyamwụ ri iGidiyọn lẹlẹ. Olegu-ẹrụ ọọwa byoo yẹkẹẹ: ‘IJihova chụng ká ka ri ọgẹwụ ọtụka lẹ.’ IGidiyọn tọọ wo yẹkẹẹ: ‘Ányị m tị́ ka jẹ́-ẹ chị ala Isirẹlụ da? Ḿ nwà ịngịngịhyẹ koo.’

Ányị iGidiyọn à tị́ ka bwu jẹ́ nyori iJihova chwọọ lẹ? Ọ ya owu olewu-lewu ọhẹ neeji lẹ, o byi iJihova yẹkẹẹ: ‘Kori ká ahị á pyẹ, ká owu olewu-lewu ọlẹ á kpenyi chwẹẹ-chwẹẹ ọọlajị nya amwụ, ká ọpyị ọlụwa á tị chọhụ kịra-kịra aalẹ, m̀ ka jẹ́ ká ka kpam chị ala Isirẹlụ da.’ Ụka ká ahị pyẹ, owu ọọwa ju enyi chwẹẹ-chwẹẹ, ọpyị ọlụwa tị chọhụ! Ma iGidiyọn tị myịmyị ya nyori owu nyị chọhụ ká ọpyị nyị kpenyi chwẹẹ-chwẹẹ lụtụrụ ọkịla. Ụka kọ lịnyị, iGidiyọn jẹ́ myị̀myị̀ ugbẹnyị nyori Ohe chwọọ ịnyịlẹhị lẹ. Ọọwa ọ tụ́ alẹwụ nyamwụ guru nyọka dẹwụ ta ala iMidiyan lẹlẹ.

IJihova byi iGidiyọn yẹkẹẹ: ‘M̀ ka ya ọkụrụ-kụrụ ha ala Isirẹlụ. Ma nyọlẹ ká alẹwụ nyang ju iru lụmẹ wẹẹ, anụ ka me nyori anụ à kụrụ lịlọnụ lẹ. Byi ọng myị́ ọng ọlẹ kọ ju uhi kọ rụ ka ẹpwa mẹ.’ Ọọwa lẹ, alẹwụ angị 22,000 à rụ ka ẹpwa lẹ, ị hi angị 10,000 lẹlẹ. IJihova myịmyị yẹkẹẹ: ‘Alẹwụ ịwẹ myịmyị ju iru lụmẹ wẹẹ. Kpaa ka ẹga nya ọ̀bá, ká byaa nyị nwà enyi mẹ. Angịlẹ kị yẹhị reeji gbe aluji nyaa nanana nyori ị juwa nwà enyi à ka bang lẹ.’ Angịnyị angị 300 kem à gbeji giri-giri ụka kị wẹẹ nwà enyi lẹ. IJihova myị ọnụ nyori angị ịmanyị-ịmanyị ịwẹ nya-à ka kụrụ alẹwụ nya ala iMidiyan ịlẹ kị la angị 135,000 lẹ.

Lodu nya ẹnẹwẹ, iJihova byi iGidiyọn yẹkẹẹ: ‘Anụ gba mịla ala iMidiyan lẹẹlẹẹ mẹ!’ IGidiyọn ya ẹkụrẹ bala ọta ọlẹ kị ya ila ọ-kpa yọyị kpịbaa ẹ-ẹpwụ nyamwụ ha angịdẹwụ nyamwụ. Ọ byaa yẹkẹẹ: ‘Anụ kpẹhị bam, kanụ họ jaabwọ kam họ kpangga mẹ.’ IGidiyọn chị ẹkụrwẹ nyamwụ, ọ ya ọta nyamwụ bene, ọ nyí ila nyamwụ kile-kile, lẹ ọ dakọ gboo yẹkẹẹ: ‘Ẹma nya ẹwụ nya iJihova bala ịnya iGidiyọn!’ Angịnyị nyamwụ angị 300 à họ ịnyị ịnyịnyị lẹlẹ. Ala iMidiyan juhi ọtụka-ọtụka juwa rụnyẹ nyí epepe hi awụlẹ. Ẹ-ẹpwụ nya ojigi-jigi ọwẹ, ị dọmwụ nyọka nwụ awụlẹ lẹlẹ. IJihova da ala Isirẹlụ ụbwọ kpụ ị kụrụ aluji nyaa ụka ọwẹ myịmyị.