ANG ỌJẸ́JẸ 13
EJE 4 “Jehovah Is My Shepherd”
IJihova La Ọngịrị Nyọka Dang Ụbwọ
“Ịngịngịhyẹ ka jẹ-ẹ̀ chị ọngịrị nyam ọha la ọhọhọ myị-ị̄ị́?”—ỌWA. 11:23.
ẸHỊ NYA ẸLA
Ang ọjẹ́jẹ ọlẹ ka dahị ụbwọ nyọka dahịhile gụ ọọwa nyori iJihova ka họ ịbaba nyahị hahị.
1. Ányị iMosisi à tị́ mẹjẹ nyori ọ dahịhile iJihova ụka kọ wẹẹ gba ala Isirẹlụ kpehe bwu Ijipiti?
ỤPWỤ nya ala iHiburu ya ẹla u-uhye nya iru nya angịnyị ịlẹ kị la ọmyịmyị ẹ-ẹga nya iJihova. IMosisi, kọ ri ọngọhẹ lẹpwụ nyaa la ọmyịmyị ọnyọọngịrị yẹẹyẹẹ. (Hib. 3:2-5; 11:23-25) Ọ mẹ ọmyịmyị jẹ ụka kọ gba ala Isirẹlụ kpehe bwu ọpyị nya Ijipiti. Ọ́ ya ẹga da uhi ojuju nya iFero bala alẹwụ nyamwụ hwoo abwọ ka. Ọ dahịhile iJihova la ọkịlẹtụ nyamwụ wuu dudu kọ kpa ala Isirẹlụ ụgbẹyị bwu Ihu Ọnyẹẹgbẹgbụ, ene kọọ kpaa ju ka ugbileji ị-ịlahị nyọọwa. (Hib. 11:27-29) Ala Isirẹlụ lụmẹ-lụmẹ hwabwọ la ọ-dahịhile nyori iJihova ka kpahị jwaa, ma iMosisi kịnyaa la ọ-dahịhile Ohe nyamwụ. Ahị ọdahile ọọwa á tị ri ododu ka, chajị iJihova ya ang oriri bala enyi ha ala Isirẹlụ du kị jẹ́ hịhị myị́ u-ugbileji ọ-chọrụ kịra-kịra.a—Ehe. 15:22-25; Eje. 78:23-25.
2. Ịyẹ tị́ du ká Ohe tọ iMosisi wo nyori: “Ịngịngịhyẹ ka jẹ-ẹ̀ chị ọngịrị nyam ọha la ọhọhọ myị-ị̄ị́?” (Ọwawa 11:21-23)
2 Nanana nyori iMosisi la ọmyịmyị ọnyọọngịrị ụma ọlịịwẹ, lala ẹka ị-ịlahị nyọlẹ ká iJihova gba ala Isirẹlụ kpehe bwu Ijipiti kpá, ọ dọmwụ nyọka la ịwẹẹ ọdada kori ká iJihova á ka jẹ́-ẹ ya iyo ha angịnyị nyamwụ ri myị́. Ịwa wuu ju iru lala uku ịmányị tị myị́, ang oriri ọhẹ-lọhẹ á tị ji ugbileji ọwẹ ka. Lẹ, iMosisi ka kụ irya myị́ nyori, ányị iJihova à tị́ ka bwu yé iyo ha angịwẹ wuu ri wu ẹpwụ myị́? Ma iJihova tị tọọ wo yẹkẹẹ: “Ịngịngịhyẹ ka jẹ-ẹ̀ chị ọngịrị nyam ọha la ọhọhọ myị-ị̄ị́?” (Wa Ọwawa 11:21-23.) Omyi ẹla nya ala iHiburu ọlẹ kị kpa ya ẹla ẹ-ẹgẹwẹ ri, ‘ụbwọ nya iJihova.’ Etu nyamwụ ri olegu ịgọgọ nya Ohe lee ọngịrị ọlẹ kọ kaa kpa họ ụkụrwọ. Lẹ, iJihova wẹẹ byi iMosisi nyori: ‘M̀ la ọngịrị nwà nyọka họ ang myị́ ang ọlẹ kam tịtọ myị́.’
3. Ịyẹ tị́ du kọ baba kahị ka kụ irya ju ẹla ọlẹ kọ họ ta iMosisi bala ala Isirẹlụ?
3 À chị uko kori ká iJihova á ka jẹ́-ẹ họ ịbaba nya ugbinyịrọ nyang bala ịnya ugbiyegu nyang myị́ ẹnẹnẹhẹ lẹ? Kori kọ lịnyị lee ọ́ lịnyị ka wẹwẹ, ahị kụ ẹhị yẹ ang odudu ká iMosisi bala ala Isirẹlụ á dahịhile nyori iJihova ka kpahị jwaa myị́ ka wẹẹ. Ahị ka myịmyị-ị̀ yẹ ụpwụ ịgọgọ ịhyẹ ịlẹ kị ka jẹ́-ẹ ju ahị ọdahile nyahị ọngịrị nyori iJihova ka dahị ụbwọ ụka wuu.
JẸ́ ANG BWU ẸGA NYA IMOSISI BALA ALA ISIRẸLỤ
4. Ịyẹ tị́ du ká iru nya ala Isirẹlụ dọmwụ nyọka da ịwẹẹ kori ká iJihova á ka họ ịbaba nyaa myị́?
4 Ịyẹ tị́ du ká ala Isirẹlụ lụmẹ-lụmẹ dọmwụ nyọka da ịwẹẹ kori ká iJihova á ka họ ịbaba nyaa haa? Ịwa bala “iru nya angịkịla datị-datị” ịlẹ kị baa rụ bwu Ijipiti jẹdịyẹ nyịlẹhị-ịlẹhị bwu ugbileji juwa yahị da ka Ọpyị ọ-Myọnụ Ha lẹ. (Ehe. 12:38; Ehile. 8:15) Ịmána oriri chị iru nya angịkịla ịịwa aga tụ́ ala Isirẹlụ ịnyịnyị lẹ, ọọwa ịwa wuu à dọmwụ nyọka cheru ju iMosisi lẹlẹ. (Ọwa. 11:4-6) Ang ịlẹ kị kaa ri ọ-ọpyị nya Ijipiti juwa maa ma. Chajị nyọlẹ kị wẹẹ cheru ju iMosisi ịịwẹ, ọ me nyori ọwa à ka maga nyọka ya iyo haa ịwa wuu ri lẹ, ma ọ́ jẹ́ abwọlẹ kọ ka bwu họ ịnyị myị́ ka.—Ọwa. 11:13, 14.
5-6. Ẹlịyẹ ahị tị́ ka jẹ́ u-uhye nya ụgbẹyị ọlẹ ká abwẹla nya angịkịla chị wu iru nya ala Isirẹlụ?
5 Olegu nya ang ọ-myaa lẹhị ka ọlẹ ká angịkịla mẹjẹ chị wu ala Isirẹlụ. Ọ tị ka jẹ́-ẹ lịnyị ẹ-ẹga nyahị ịnyịnyị myị́. Ụka ká angịlẹ kị dagaga juhi-í mẹjẹ nyori ang á myaa lẹhị ka, ang ịlẹ wuu ká iJihova ya hahị-ị́ ka myịhị lẹhị ka ịnyịnyị myị́. Ahị ka dọmwụ nyọka mama nya ang ịlẹ kahị la ene-ene ẹ-ẹpwụ nya ọhịhị nyahị lee ọ-yẹ ijiiji nya ang ịlẹ ká angịkịla la myị́. Ma, ahị ka chị ọkẹkẹnị gụ kori ká ang myị́ ang ọlẹ kahị la á nwahị.
6 Ala Isirẹlụ ịnọ chịla kị ka kpịtịya nyori Ohe ya ahị ọdahile haa nyọka ya ang nya ugbinyịrọ lụmẹ-lụmẹ haa ụka kị pwụ ẹpwa nyaa onyeewe. Ọnụ ọmyịmyị ọọwa ka họ jịra ụka kị pwụ Ọpyị ọ-Myọnụ Ha ịnyị, ụ-ụka kị juwa jẹdịyẹ bwu ugbileji wẹẹ ka. Ịnyịnyị-ịnyịnyị, ọkọkọ kahị ka juwa kụ irya ju ang ịlẹ kahị la odehe ọlẹ lẹẹlẹẹ ka, ahị baba nyọka ya irya nyahị wuu nọ u-uhye nya ang ịlẹ ká iJihova myọnụ nyọka ya hahị odehe onyeewe. Ahị tị ka jẹ́-ẹ me irya ju omyi ẹla ịhyẹ bwu ịBayịbụụ ịlẹ kị ka dahị ụbwọ nyọka dahịhile iJihova gụ ọọwa ịnyịnyị myị́.
7. Ịyẹ tị́ du kahị ka dahịhile nyori iJihova ka jẹ́-ẹ dahị ụbwọ ụka wuu?
7 Tị wẹẹ, ịyẹ tị́ du ká iJihova tọ iMosisi wo nyori, “ịngịngịhyẹ ka jẹ-ẹ̀ chị ọngịrị nyam ọha la ọhọhọ myị-ị̄ị́?” Ọ ka tịtọ ká iMosisi ka kụ irya u-uhye nya ang imiiye myị́: (1) Ọngịrị nyamwụ-ụ́ la ọbaba ka. (2) Ọ ka jẹ́-ẹ kpa ọngịrị nyamwụ họ ụkụrwọ ẹ-ẹga myị́ ẹga myị́. Lẹ, nanana nyori ala Isirẹlụ juwa u-ugbileji ọlụrụ hwẹẹ, iJihova ka jẹ́-ẹ ya iyo haa ri wu ẹpwụ kpọng-kpọng myị́. Ohe mẹjẹ nyori ọ ka jẹ́-ẹ da angịnyị nyamwụ ụbwọ ẹ-ẹga myị́ ẹga kị ji bwula “ụbwọ ọnyọọngịrị bala ugburubwọ ọlọngịrị nyamwụ.” (Eje. 136:11, 12) Lẹ, ụka myị́ ụka kahị juwa ẹ-ẹpwụ nya akama, ahị ka jẹ́-ẹ dahịhile nyori iJihova ka da ọngọngọọng nyahị ụbwọ ẹ-ẹga myị́ ẹga kahị ji myị́.—Eje. 138:6, 7.
8. Ịyẹ à tị́ ka dahị ụbwọ kahị ka họ ụma nya ẹla ọtịpyọ ọlẹ ká iru nya ala Isirẹlụ họ u-ugbileji ka? (Yẹ ifoto ịnyịnyị.)
8 IJihova ya iyo nya ikpekpile-ẹwa lụmẹ-lụmẹ haa jaabwọ kọ ya ịnyịlẹhị. Ma, ala Isirẹlụ ịwẹ á ji Ohe obe ọhọhọ nya ụkụrwọ ẹbyẹbyị ọwẹ ka. Ọkọkọ nyọọwa, iru nyaa tịtọ kị ka la iyo yẹẹyẹẹ gụ abwọlẹ kị dọmwụ baba. Ị họ ụkụrwọ nya iyo o-go ju ang lụtụrụ gbee da ka alepwodu. IJihova ju agbama nyịlẹhị-ịlẹhị tọ angịlẹ kị “họ ìwò nya iyo” bala ọ-yaa akama. (Ọwa. 11:31-34) Ahị ka jẹ́-ẹ jẹ́ ang bwu oja nyaa. Ahị baba nyọka dụmwọ-dụmwọ kahị ka chabwọ kpa ẹpwụ nya ụnya nya ẹhị ọ-chị nya-nya ka. Ọkọkọ nyọọwa, kori kahị ri ọlẹbyahị lee ahị ri ọlụdụ wẹwẹ, ahị ka ya irya nyahị wuu nọ u-uhye nyọka ‘nwụla ụdụ nyahị nọ ka epwoohe’ jene-jene. Ahị ka jẹ́-ẹ họ ịnyị bwula ọ-kịnyaa ja họ ụkụrwọ ju igu oriri nyahị bala iJihova tụ́ iJisọsị ịnyịnyị, chajị kahị ka tụ́ jwaa chwẹẹ gụ ọọwa. (Mat. 6:19, 20; Luk. 16:9) Ụka kahị họ ịnyị, ahị ka jẹ́-ẹ dahịhile nyori iJihova ka họ ịbaba nyahị hahị.
Ányị iru nya ala Isirẹlụ à tị́ họ nyọlẹ ká iJihova ya iyo haa? Ẹlịyẹ ẹlẹwẹ à tị́ mẹjẹ́ẹhị? (Yẹ ọgba 8)
9. Ẹlịyẹ ahị tị́ ka dahịhile yẹẹyẹẹ myị́?
9 IJihova nwụlanọ nyọka da angịnyị nyamwụ ụbwọ ịnyịnyị alẹ. Ọọwa mẹjẹ nyori ahị ka la okpoko bala ang oriri ụka wuu? Ehe.b Ma, iJihova-á ka nyẹẹkpẹ dahị ẹnẹnẹhẹ ka. Ọ ka dahị ụbwọ ụka wuu, jaabwọ myị́ abwọ ká akama nyahị-ị́ lụmẹ kaka ba wẹwẹ. Ányị ahị tị́ ka bwu mẹjẹ nyori ahị dahịhile iJihova nyọka họ ịbaba nyahị hahị? Ahị kụ ẹhị yẹ iwe-ahụrụ imiiye ịhyẹ wẹẹ; (1) ụka kahị baba nya okpoko bala (2) ụka kahị ja kụ irya nya ịbaba nyahị ịla ijuju.
ỤKA KAHỊ BABA NYA OKPOKO
10. Akama nya ẹla nya okpoko iyina à tị́ ka chịhị ọgụ myị́?
10 Jaabwọ ká odehe ọlẹ wẹẹ jẹ tụ ju ocheju chwẹẹ gụ ọọwa, ahị ka yahị guru nyori akama nya ang ọlala-ka ka tịpyọ gụ olene. Igomenti ọ-yẹda, ẹwụ, ayịreji o-bwu agaga bala ẹdụrụ o-bene yịrị ẹga yịrị ka du kahị ka rụ hi ẹpwa nyahị lee ká ụkụrwọ bala ang ị-lala nyahị ka myị́ la ọ-yahị me ka myị́. Ọ tị ka lujwo gụ ọọwa hahị nyọka yé ang ịlẹ kahị baba ịnyịnyị myị́. Ọhẹka, ahị ka kpahị nya ụkụrwọ onyeewe lee ọ-kụ irya nyọka mwụ́ bala ugbiyegu nyahị rụ ka ẹga ọkịla nyọka jẹ́-ẹ họ ịbaba nyaa haa. Ịyẹ à tị́ ka dahị ụbwọ nyọka cheje ọlẹ kọ ka mẹjẹ nyori ahị dahịhile iJihova?
11. Ịyẹ à tị́ ka jẹ́-ẹ dang ụbwọ ụka ka la akama nya okpoko? (ILuku 12:29-31)
11 Ang ọkpọnchị ọhẹ ọlẹ ká ka jẹ́-ẹ họ, kọ tị ka dang ụbwọ ịnyịnyị ri ọ-ka ya ẹla ta iJihova u-uhye nya uko ọchịchị nyang. (Etu 16:3) Bịlọọ kọ ya ẹla ọjẹ́jẹ ọlẹ ká baba nyọka jẹ́-ẹ cheje ịnyịịla hang bala ọ-ya olegu ọdụmwọọ hang chajị ká ka “la uko ọchịchị” lụmẹ u-uhye nya iwe-ahụrụ nyang ka. (Wa iLuku 12:29-31.) Kịnyaa la ọ-bịlọọ kọ dang ụbwọ chajị ká ang ị-baba ịlẹ ka la, ka nwang. (1 Tim. 6:7, 8) Mwahị nya egbeju nya ẹla bwu ẹpwụ nya apwụ nyahị ịlẹ kị ka jẹ́-ẹ ya irya hang u-uhye nya ang ọlẹ ká ka họ ụka ká la akama nya okpoko. Angịnyị lụmẹ-lụmẹ ya nyori ifim bala egbeju nya ẹla ịla jw.org ịlẹ kị ya ẹla u-uhye nya akama nya okpoko nyị daa ụbwọ.
12. Ịtọ ẹla ịlányị à tị́ ka jẹ́-ẹ da ọngịnyị ụbwọ nyọka cheje ọnyịịla ha ugbiyegu nyamwụ?
12 Angịhyẹ myọnụ nyọka họ ụkụrwọ ọlẹ kọ kpaa rụ lụrụ hwẹẹ hi alugbiyegu nyaa. Iru nyaa tị wẹ ka yẹ ụka ohyẹẹkpẹ nyori eje ọchịchị ọọwa nyị tịpyọ. Ene á ka yé ụkụrwọ ọhẹ myị́, a ya irya nyang nọ u-uhye nya okpoko ọlẹ ká ka yé bwu ụwa kem ka. Ma, kụ irya họhẹ-họhẹ kori ká ụkụrwọ ọọwa á ka dang ahụ bala alugbiyegu nyang ụbwọ nyọka tụ ju iJihova chwẹẹ. (Luk. 14:28) Tịlọng wo nyori: ‘Ẹlịyẹ à tị́ ka họ ẹ-ẹga nya awụlẹ oyeye nyahị kori kahị ji lụrụ hi awụlẹ? M̀ ka jẹ́-ẹ ka ọjịra-jịra wuu, kpehe ka ya ẹla Ohe bala ọ-yé ụka yẹ jula aanahị ịkịla?’ Kori ka tị ma anyị aalẹ, à baba nyọka tịlọng ịtọ ẹla ọkpọnchị ọlẹ ịnyịnyị: ‘M̀ ka jẹ́-ẹ da anyị nyam ụbwọ nyọka tụ ju iJihova chwẹẹ bala ọ-jwoo ihi kori kam juwa balaa ka?’ (Efe. 6:4) Ụka ka juwa ka cheje, ba ẹla ọlẹ ká iJihova ya jẹ, ọkọkọ nya ẹla ọlẹ ká alugbiyegu lee aligu nyang ịlẹ kịị ju ihi nya ẹla ọla ịBayịbụụ ka ya.c Ị ya akụrwọ ịnyịịla-ịnyịịla ha Tony kọ kụ ọmwẹnụ-obyi nya Asia nyọka họ ẹ-ẹpwụma ọkịla. Okpoko nya akụrwọ ịịwa lụmẹ yẹẹyẹẹ. Ma, nyọlẹ kọ raabwọ u-uhye nya ẹla ọọwa bala ọ-ya je ahụ nyamwụ kpá, ọ cheje nyori ọ́ ka ye ọhẹ-lọhẹ nyaa myị ka. Ọkọkọ nyọọwa, ị kụ irya jaabwọ kị ka bwu nwụhọ ugbiyegu nyaa chajị kị ka bịrị okpoko lụmẹ ka. Lẹẹlẹẹ, Tony yẹkẹẹ: “Chajị nyọlẹ kahị cheje ọwẹ, m̀ jẹ́ da angịnyị lụmẹ-lụmẹ ụbwọ nyọka jẹ́ iJihova, anyị nyahị tị la ọháha ẹ-ẹga nya iJihova yẹẹyẹẹ ịnyịnyị. Ugbiyegu nyahị wẹ ka jẹ́ nyori ụka kahị kpa ẹla ọlẹ ká iJisọsị ya ụ-ụpwụ nya ịMatiyu 6:33 họ ụkụrwọ, iJihova ka kpẹhị rịrịịhị.”
ỤKA KAHỊ JA KỤ IRYA NYA ỊBABA NYAHỊ ỊLA IJUJU
13. Ịyẹ ahị tị́ ka jẹ́-ẹ họ lẹẹlẹẹ nyọka nwụlanọ gbe ụka kahị ka chị okwirichi?
13 Ahị ka jẹ́-ẹ mẹjẹ jaabwọ kahị dahịhile iJihova kaka ba ịnyịnyị ụka kahị ja kụ irya jaabwọ kahị ka nwụlanọ gbe ụka kahị ka chị okwirichi. ỊBayịbụụ juhi ọhụ nyọka ri angị jụ ang họ chajị kahị ka la ang ịlẹ kị baba nyọka kpa kpịlọhị ị-ịlahị. (Etu 6:6-11) Ọ há nyọka ya okpoko nọ ang gbe ijuju kori kahị ka họ ịnyị myị́. Ịlẹhị lẹ, okpoko ka jẹ́-ẹ dahị ụbwọ ụka kahị la ọbaba. (Ọngọ. 7:12) Ma, áhị ka tịtọ ká okpoko ọ-lala à ka ri ang ọlẹ kọ ka baba gụgụ wuu ọ-ọhịhị nyahị ẹnẹnẹhẹ ka.
14. Ịyẹ tị́ du kahị ka kpa ụpwụ nya Ala iHiburu 13:5 i-irya ụka kahị ja nwụlanọ gbe ijuju?
14 IJisọsị ja oja ọhẹ ọlẹ kọ mẹjẹ nyori ọngịnyị ọlẹ kọ tụ́ okpoko guru kọ tị “kpụ ụdụ nya ẹla nya Ohe Oluhye” ka, nyị ri oluchi. (Luk. 12:16-21) Ọngọngọhẹ-ẹ́ jẹ́ jaabwọ ká ijuju ka la ka. (Etu 23:4, 5; Jem. 4:13-15) IJisọsị tị ya ịnyịnyị nyori angịlẹ wuu kị tịtọ nyọka ri angịjụgbẹyị nyamwụ nyị ka nwụlanọ nyọka “tụụbwọ hi” ang-ụdụ ịlẹ kị la. (Luk. 14:33) Ẹla ọlịnyị họ ta angịjụgbẹyị nya iJisọsị ịla iJudiya lụka nya oyi ọhọhẹ. Ị tị nwụlanọ nyọka tụụbwọ hi ang myị́ ang ịlẹ wuu kị la ịnyịnyị. (Hib. 10:34) Lụka nyahị ọlẹ, ụkụrwọ nya aanahị lụmẹ-lụmẹ gwaa myị ọọlajị nyọlẹ kị myọnụ nyọka kpa ụbwọ ka akpa ha ebwo nya upe ọhẹ-lọhẹ ka. (Ọwụ. 13:16, 17) Ịyẹ à tị́ daa ụbwọ nyọka jẹ́-ẹ họ ịnyị myị́? Ị dahịhile ọnụ ọmyịmyị nya iJihova la ọkịlẹtụ nyaa wuu. Ọnụ ọmyịmyị ọọwa ri: “Am Ohe Oluhye á ka kpanụ anụ angịnyị nyam keji kpong-kpong ka lee ọ-tụụbwọ hiinu kpá ẹnẹnẹhẹ kaka.” (Wa Ala iHiburu 13:5.) Lẹ, ahị kaa họ jaabwọ kahị ka jụ họ ba myị́ nyọka nwụla ang nọ gbe ijuju. Ahị tị kaa dahịhile la ọkịlẹtụ nyahị wuu ịnyịnyị nyori kori ká ẹlẹhẹ ọlẹ kahị yahị me ka á họ tahị wẹwẹ, iJihova ka kpẹhị rịrịịhị.
15. Irya ọlányị adịda bala ịnịna ịlẹ kị ri angịnyị nya Ohe à tị́ ka la ẹ-ẹga nya anyị nyaa? (Yẹ ifoto ịnyịnyị.)
15 Ẹ-ẹga ịhyẹ, ang ọkpọnchị ọlẹ kọ du ká angịnyị kaa tịtọ nyọka ma anyị ri ọchajị ká anyị ịịwa ka kpẹhị rịraa ụka kị ka chị okwirichi. Ma, ịBayịbụụ tị ya nyori adịda bala ịnịna nya-à ka kpẹhị rịrị anyị nyaa lẹ. (2 Kọr. 12:14) Ịlẹhị lẹ, ụka ká adịda bala ịnịna à ja ri angịgbahị lẹ, ị ka baba ká anyị nyaa ka daa ụbwọ la okpoko bala ang ịkịla ịlẹ kị baba, ọ tị kaa kpa iru nya anyị ịpyọ nyọka ya ang ịlẹ ká adaa bala ịnaa baba haa. (1 Tim. 5:4) Ma, adịda bala ịnịna ịlẹ kị dahịhile iJihova jẹ́ nyori ị ka yé ọkẹkẹnị gụ ụka kị da anyị nyaa ụbwọ nyọka ri anchẹ nya iJihova, ọkọkọ nyọka kpaa nwà la irya nyori ị ka la okpoko yẹẹyẹẹ nyọka kpa kpẹhị rịraa ụka kị ka ri angịgbahị.—3 Jọn. 4.
Ahụ bala ọrụ ịlẹ kị dahịhile iJihova kaa kpa ẹla ọla ịBayịbụụ họ ụkụrwọ ẹ-ẹpwụ nya eje ọchịchị nyaa (Yẹ ọgba 15)d
16. Ányị adịda bala ịnịna à tị́ ka bwu nwụla anyị nyaa nọ kị ka jẹ́-ẹ kpẹhị rịrị ịlaa ị-ịlahị? (Ala Efesọsị 4:28)
16 Mẹjẹ anyị nyang nyọka dahịhile iJihova bwula ọgụ-ẹpẹtẹ nyang jaabwọ ka wẹẹ daa ụbwọ nyọka kpẹhị rịrị ịlaa ị-ịlahị. Mẹjáa bwu ụka kị ri anjwo nyori ụkụrwọ ọ-họ la ila ọchịchị nyị ri ang ọnyịịla. (Etu 29:21; wa Ala Efesọsị 4:28.) Jaabwọ kị wẹẹ nwà, daa ụbwọ nyọka maga nyịlẹhị-ịlẹhị u-ube ụpwụ. Adịda bala ịnịna tị ka jẹ́-ẹ wa apwụ nyahị yẹẹyẹẹ nyọka jẹ́ itiwe nya ehile ịla ịBayịbụụ chajị kị ka jẹ́-ẹ ju anyị nyaa irya nyọka cheje ịnyịịla u-uhye nya abwọlẹ kị ka kà ube-ụpwụ kaka ba. Ọọwa ka da anyị nyaa ụbwọ nyọka jẹ́-ẹ kpẹhị rịrị ịlaa bala ọ-yé ụka kpa ẹrụ ọnyịịla pyẹ yẹẹyẹẹ ịnyịnyị, lee ọ dọmwụ ka ye ịlahị nya ụgbẹyị.
17. Ẹlịyẹ ahị tị́ ka jẹ́ myị̀myị̀?
17 Angịlẹ kị kpa ẹla ọlẹ ká iJihova ya họ ụkụrwọ, ka jẹ́-ẹ dahịhile nyori ọ ka họ ịbaba nyaa haa myị́, ọ tị nwụlanọ nyọka họ ịnyị ịlẹhị. Jaabwọ kahị wẹẹ jẹ ju ocheju nya odehe ọlẹ chwẹẹ gụ olene, ịnyịnyị ahị baba nyọka dahịhile iJihova gụ ọọwa lẹ. Ma jaabwọ myị́ abwọ kọ ka la, ahị dahịhile yẹẹyẹẹ nyori iJihova ka kpa ọngịrị nyamwụ họ ịbaba nya ugbinyịrọ nyahị hahị. Ahị ka jẹ́-ẹ la ọ-jẹ́ myị̀myị̀ nyori ọ la ọngịrị nyọka dahị ụbwọ ẹ-ẹga myị́ ẹga kahị ji.
EJE 150 Ji Ẹga ny’Ohe Nyọka Chịda
a Yẹ “Ịtọ Ẹla Bwu Ẹga nya Angị Wa Apwụ Nyahị” ọla Ẹpwang ọ-Kụ Gbeji nya Ọya Okiriwo 2023.
b Yẹ “Ịtọ Ẹla Bwu Ẹga nya Angị Wa Apwụ Nyahị” ọla Ẹpwang ọ-Kụ Gbeji nya Ọya Ohikichu 15, 2014.
c Ka jw.org ká yẹ ifim ọlẹ ko ri, “Ang Myị́ Ang Ọlẹ Kanụ La Juwa . . . A Nwanụ Ba ụ-Ụwa Mẹ.”
d ABWỌ ỌCHỊCHỊ NYA IFOTO: Ahụ bala ọrụ ịhyẹ ịlẹ kị ri angị dahịhile iJihova wẹẹ ya ẹla bwu ifon bala ọnyị nyaa. Ọnyị nyaa ọọwa bala ọrụmwụ wẹẹ dụbwọ ẹ-ẹga nya ụkụrwọ nya Ube nya Ịpyị-adịrahụ ọnwụnwụ.