Juwa Nwụlanọ Gbe Ahyẹẹnụ nya IJihova

1. Ẹlịyẹ ahị tị́ ka họ pyii chajị nyọka chịda la ahyẹẹnụ nya iJihova?

ỤKA ká ịBayịbụụ-ụ́ gu ẹnyị nya ‘ẹnụtụrụ nya iJihova,’ ọ wẹẹ ya ẹla rụ́ ụka ọlẹ ká iJihova ka ta aluji nyamwụ ayịreji bala ọ-chị angịnyị nyamwụ da. Lụka ọkẹkpẹ, iJihova yẹ alẹpwụma ịhyẹ akama. (Ayị. 13:1, 6; Isi. 13:5; Sef. 1:8) Lụka nyahị, ‘ẹnụtụrụ nya iJihova’ ka dọmwụ ụka ká alegbeju i-kpeji ka ta ịBabịlọn Ọtụka ayịreji bala ọ-ka cheju ẹ-ẹwụ nya Amagedọn. Ahị baba nyọka nwụlanọ lẹẹlẹẹ kahị ka jẹ́-ẹ yé ọchịda la “ẹnụtụrụ” ọwẹ. IJisọsị mẹjẹ́ẹhị nyori áhị ka nwụlanọ gbe akama ọtụka okpelego ịịwẹ kem ka, ma ahị ka ‘juwa nwụlanọ’ gboo ịnyịnyịịnyị.—Mat. 24:21; Luk. 12:40.

2. Ịyẹ tị́ du kahị ka yé apyobwuna bwu ụpwụ nya 1 Ala ịTẹsalonika?

² Ẹ-ẹpwụ nya ụpwụ ọhọhẹ ọlẹ ká olegu ịgọgọ kpa ọlẹrụ ịPọlụ da du kịla Ala ịTẹsalonika, ọ kpa ọ-chụ pwokwita lụmẹ-lụmẹ ya ẹla nyọka da angịnyị nya ịKịrayịsị ụbwọ kị ka juwa nwụlanọ gbe ahyẹẹnụ nya eje ọtụka nya iJihova. ỊPọlụ jẹ́ nyori ahyẹẹnụ nya iJihova á ka wẹ lụka ọwẹ lẹka. (2 Tẹs. 2:1-3) Ma, ọ ju aanamwụ ọhụ nyọka nwụlanọ gbe ẹnụtụrụ ọwẹ lala o-ri nyị ja ka wẹ la ahyẹẹnụ ọ-ba ọọwa ba, ahị tị ka jẹ́-ẹ kpa ẹla ọmẹjẹ nyamwụ ọwẹ họ ụkụrwọ ịnyịnyị. Ahị kụ ẹhị yẹ abwọlẹ kọ da ẹla ileji ịlẹ wụlẹ wẹẹ: (1) jaabwọ ká ahyẹẹnụ nya iJihova ka bwu pweeji, (2) owo anyị à tị́ ka la ọ-chịda la ahyẹẹnụ ọwẹ ka, bala (3) abwọlẹ kahị ka bwu nwụlanọ nyọka chịda.

ÁNYỊ AHYẸẸNỤ NYA IJIHOVA À TỊ́ KA BWU PWEEJI?

3. Ụgbẹyị oyina ahyẹẹnụ nya iJihova à tị́ ka bwu pweeji lala oloyi lepwodu? (Yẹ ifoto ịnyịnyị.)

³ “Jaabwọ ká oloyi kaa bwu ayịdẹpwa agaga lụka nya ẹpwụ odu.” (1 Tẹs. 5:2) Ọwẹ ri ọhọhẹ ẹ-ẹpwụ nya ọ-chụ pwokwita ịta ịlẹ kị kpa chabwọ nya abwọlẹ ká ahyẹẹnụ nya iJihova ka bwu pweeji. Ụka lụmẹ-lụmẹ, aleyi kaa họ ẹla lagaga bala alepwodu ụka ká angịnyị-ị́ yahị me ka. Ịnyịnyị ahyẹẹnụ nya iJihova à ka wẹ kpịraka bala o-bwu iru nya angịnyị agaga lẹ. Ọ dọmwụ ka la angịnyị nya ịKịrayịsị nyịlẹhị ẹbyẹbyị jaabwọ ká ẹlẹwẹ ka họ kpịraka myị́. Ma, áhị ka ta ayịreji jaabwọ kọ wẹẹ ka la ẹ-ẹga nya alọkwọ ka.

4. Ụgbẹyị oyina ahyẹẹnụ nya iJihova à tị́ bwu lala abwọlẹ ká ang nya ọnyị ọmama kaa họ ọngịnyị?

⁴ “Jaabwọ ká ang nya ọnyị ọmama kaa wẹ chị ọnyang ọlẹnyị ọgụ.” (1 Tẹs. 5:3) Ọnyang ọlẹnyị á ka jẹ́-ẹ ya ụka ọlẹ kpangga ká ang nya ọnyị ọmama ka wẹ chọọ ọgụ ka. Ọọwa á tị du kọ la ịwẹẹ ọdada nyori nyị́ ka wẹ ka lẹ ka. Ụka ká ang nya ọnyị ọmama ọọwa á ka pweeji, ọ ka la kpịraka bala ọ-jụjụ, ị́ tị ka jẹ́-ẹ hwoo abwọ myị́ ka. Ụ-ụgbẹyị ọlịwịịwẹ, áhị jẹ́ ẹnụtụrụ lee ụka ọlẹ ká ahyẹẹnụ nya iJihova ka dọmwụ ka. Ma, ahị tị jẹ́ myị̀myị̀ nyori ọ juwa wẹ bala o-ri ayịreji ọtata nya alọkwọ ka la kpịraka, ị́ tị ka jẹ́-ẹ be myị́ ka ịnyịnyị.

5. Ụgbẹyị oyina akama ọtụka okpelego à tị́ bwu lala ụka nya ahị ọpyẹpyẹ?

⁵ Lala ụka nya ahị ọpyẹpyẹ. Ọ-chụ pwokwita nya ịPọlụ ọhata myịmyị gu abwọlẹ ká aleyi kaa yoyi lepwodu. Ma ugbẹnyị, ọ lala o-ri ịPọlụ chụ ahyẹẹnụ nya iJihova ka pwoku ụka nya ahị ọpyẹpyẹ. (1 Tẹs. 5:4) Aleyi ịlẹ kị kaa be ang ene lepwodu, ka juwa go ang yoyi gbee ká ahị ka gwaa pyẹ myị́. Ọ chịkpẹẹ ká ahịgboo nya ụtụrụ ka bwaa mwaa bala ọ-chaa ehe. Ịnyịnyị akama ọtụka okpelego à ka chị angịlẹ kị lala aleyi ehe lẹ. Angịlịnyị ri angịlẹ kị kịnyaa ẹ-ẹpwụ nya ukpowu bwula ọ-họ ang ịlẹ kịị wụ́ Ohe ẹjẹ ụka wuu. Ahị tị lẹ, ahị ka jẹ́-ẹ nwụlanọ bwula o-cheji ba hi ang ịlẹ kị ka wụ́ iJihova ẹjẹ bala ọ-la abwẹla nya “ọngịnyị ọnyịịla oriri bala abwẹla ọnyịịla ọlala bala ẹla nya ịlẹhị nya Ohe Oluhye ọlala jịra wuu.” (Efe. 5:8-12) ỊPọlụ myịmyị kpa ọ-chụ pwokwita imiiye ịlẹ kị me awụlẹ chabwọ nya angịlẹ kị ka chịda ka.

OWO ANYỊ À TỊ́ KA CHỊDA LA AHYẸẸNỤ NYA IJIHOVA KA?

6. Ụ-ụgbẹyị oyina iru nya angịnyị à tị́ juwa nune? (1 Ala ịTẹsalonika 5:6, 7)

⁶ “Angịlẹ kị [juwa] nune.” (Wa 1 Ala ịTẹsalonika 5:6, 7.) ỊPọlụ chụ angịlẹ kị ka chịda la ahyẹẹnụ nya iJihova ka kaka pwoku angịnyị ịlẹ kị juwa nune. Ị́ jẹ́ ang ọlẹ kọ juwa họ dagaga jwaa lee abwọlẹ ká ụka ja jẹ ka. Lẹ, ị́ kaa jẹ́ ụka ká ẹla ọkpọnchị kaa họ lee o-hu ẹta-ẹdịyẹ u-uhye nya ang ọọwa ka. Iru nya angịnyị alẹ lala angịlẹ kị juwa nune ịnyịnyị. (Rom. 11:8) Ị́ myọnụ ju ang-ẹjẹẹ ịlẹ kị mẹjẹ nyori ahị jam hịhị la ‘ahyẹẹnụ ohyẹẹkpẹ’ bala o-ri akama ọtụka okpelego ja ka dọmwụ lụka okpii lẹ ka. Ụka ká iwe-ahụrụ á yẹda nyịlẹhị-ịlẹhị odehe ọlẹ, ọ kaa gu angịhyẹ gbịla nyọka ke ụrụ wo ẹrụ ọnyịịla nya Ịpyị-Adịrahụ ọlẹ kahị kaa kpa pyẹ. Ma, iru nyaa kaa tịrẹkpẹ ka nune ọkọkọ nyọka kụ́ lahị. Angịhỵe ịlẹ kị dọmwụ myị nyori ahyẹẹnụ nya eje ja warị, kaa me irya nyori nyị ji lụrụ yẹẹyẹẹ wẹẹ. (2 Pit. 3:3, 4) Ma, ọ baba hahị gụ ọọwa nyọka kụ́ lahị ẹ-ẹpwụ nya ahyẹẹnụ ọnyị myị́ ọnyị ọlẹ kọ wẹẹ chịpwụrụ.

7. Ányị angịlẹ ká Ohe wẹẹ ka tayịreji à tị́ lala angị nwa ere juwa ya?

⁷ “Angịlẹ kị . . . nwa ere juwa ya.” Ọlẹrụ ịPọlụ chụ angịlẹ ká Ohe wẹẹ ka tayịreji kaka pwoku angị nwa ere juwa ya. Angị ịlịnyị á jẹ́-ẹ họ ẹla kpịra-kpịra u-uhye nya ang ọlẹ kọ juwa họ dagaga jwaa ka, ị tị kaa cheje i-pwoku ka ịnyịnyị. Ụ-ụgbẹyị ọlịnyị-ịnyị, alọkwọ á myị-ị̀ ke ụrụ wo ọna ọdada nya Ohe ka. Ị kaa chụ ụgbẹyị nya ọhịhị ọlẹ kọ ka kpa ayịreji ọtata waa. Ma, ị ju angịnyị nya Ohe ọhụ nyọka kpẹhị chịng nya ẹla bala ọ-kụ irya rige-rige. (1 Tẹs. 5:6) Ọngọ jẹ́ ang u-uhye nya ịBayịbụụ yẹẹyẹẹ ọhẹ ya nyori “ọngịnyị ọlẹ kọọ kpẹhị chịng nya ẹla nyị kaa kụ́ kpọọ bala o-juhi ka. Ọ kaa kụ ẹhị yẹ ẹla rige-rige chajị kọ ka jẹ́-ẹ cheje ọnyịịla.” Ịyẹ tị́ du kọ baba kahị ka kụ́ kpọọ bala o-juhi ka? Chajị kahị ka yụbwọ ju ẹla nya upe lee ojigi-ojigi ịlẹ kị jam odehe ọlẹ alẹ ka. Ị ka ya ẹla rịrịịhị gụ olene-ene nyọka ji oye ọhẹ lee ọkịla ẹ-ẹga nya ang ịlịịwẹ jaabwọ ká ahyẹẹnụ nya iJihova wẹẹ ju chwẹẹ gụ ọọwa. Ma áhị baba nyọka chị uko u-uhye nya ẹla ọlẹ kahị ka họ ka. Olegu ịgọgọ nya Ohe ka dahị ụbwọ nyọka kụ́ kpọọ bala o-juhi ka, ọ ka dahị ụbwọ cheje ịnyịịla ịnyịnyị.—Luk. 12:11, 12.

ỊYẸ AHỊ TỊ́ KA HỌ NYỌKA NWỤLANỌ GBE AHYẸẸNỤ NYA IJIHOVA?

8. Ányị ụpwụ nya 1 Ala ịTẹsalonika 5:8 à tị́ bwu chabwọ nya abwẹla ịlẹ kị ka dahị ụbwọ nyọka kụ́ lahị bala ọ-kpẹhị chịng nya ẹla? (Yẹ ifoto ịnyịnyị.)

⁸ ‘Hu ọkụmada o-ke ọkịlẹtụ bala okpo o-ke egbeju kụrụ.’ ỊPọlụ chụhị kaka pwoku angịdẹwụ ịlẹ kị kụ́ giri-giri bala o-ju agidi nya ẹwụ. (Wa 1 Ala ịTẹsalonika 5:8.) Angịnyị kaa yahị guru nyori ọngọdẹwụ baba nyọka nwụlanọ ụka wuu nyọka ma uya ụka ká ẹwụ á kpeji. Ịnyịnyị ọ la ẹ-ẹga nyahị lẹ. Ahị kaa nwụlanọ gbe ahyẹẹnụ nya iJihova ụka wuu bwula ọ-kụrụ akụmada o-ke ọkịlẹtụ nya ọmyịmyị bala ọháha bala okpo o-ke egbeju nya ẹhị ọrịrịị-rịrị. Abwẹla ịwẹ ka dahị ụbwọ yẹẹyẹẹ.

9. Ányị ọmyịmyị nyahị à tịị chewu keehi?

⁹ Akụmada o-ke ọkịlẹtụ kaa chewu ke ọkịlẹtụ nya ọngọdẹwụ. Ịnyịnyị ọmyịmyị bala ọháha à kaa chewu ke ọkịlẹtụ nya olegu nyahị lẹ. Ị ka dahị ụbwọ nyọka kịnyaa la ọ-gbịgba ha Ohe bala ọ-ba iJisọsị jẹ. Ọmyịmyị du kahị jẹ́ myị̀myị̀ nyori iJihova ka wahị kụrụụhị nyọlẹ kahị tịtọ nyamwụ la ọkịlẹtụ nyahị wuu. (Hib. 11:6) Ọ ka guhi gbịla nyọka godayị giri-giri ha iJisọsị, Olegbeju nyahị kori kahị dọmwụ la akama wẹwẹ. Ahị ka jẹ́-ẹ ju ọmyịmyị nyahị ọngịrị chajị kahị ka bọhụ ẹ-ẹpwụ nya akama myị́ bwula ọ-jẹ́ ang bwu ọgụ-ẹpẹtẹ nya angịnyị ịlụka nyahị ịlẹ kị godayị giri-giri ẹ-ẹpwụ nya ọtụpyịpyị lee okpoko ọ-lala ka. Ahị tị ka jẹ́-ẹ cheji ba hi okpoko bala ang-ụdụ ọ-ka háahị lụmẹ kpoye kori kahị gbịla angịlẹ kị hu ọhịhị nyaa hukee chajị nyọka hu ẹla nya Ịpyị-Adịrahụ kụ ịlahị ọ-ọhịhị nyaa.b

10. Ányị ọháha ọ-lala ẹ-ẹga nya Ohe bala angịnyị à tịị dahị ụbwọ nyọka bọhụ?

¹⁰ Ahị baba nya ọháha ịnyịnyị chajị nyọka kụ́ lahị bala ọ-kpẹhị chịng nya ẹla. (Mat. 22:37-39) Ọháha ọ-lala ẹ-ẹga nya Ohe kaa dahị ụbwọ nyọka bọhụ ẹ-ẹrụ ọnyịịla ọ-kpa pyẹ kori ká ọ-họ ịnyị á ka dọmwụ kpa akama ọhẹ-lọhẹ wahị wẹwẹ. (2 Tim. 1:7, 8) Chajị nyọlẹ kahị la ọháha ẹ-ẹga nya angịlẹ kị dọmwụ kaa gbịgba ha iJihova lẹka wẹẹ, ahị kaa kịnyaa la ọ-kpa ẹrụ ọnyịịla pyẹ o-oye nyahị yẹẹyẹẹ, dọmwụ kaa ya ẹla nya Ohe bwu ifon bala ileta ọdada. Ẹhị ọrịrịị-rịrị nyori angịnyị ka yẹda ka họ ang ọnyịịla wẹẹ, á kaa gụụhị myị́ ka.—Isi. 18:27, 28.

11. Ányị ọháha ọlala ẹ-ẹga nya aanahị ịla ọjịra-jịra à tịị dahị ụbwọ? (1 Ala ịTẹsalonika 5:11)

¹¹ Ahị kaa la ọháha ẹ-ẹga nya aanahị ịla ọjịra-jịra ịnyịnyị. Ahị kaa mẹ ọháha ọlịnyi jẹ bwula o-juwa “ju awụlẹ ọhụ kịlahị-ịlahị bala o-juwa kpa ọmyịmyị nya awụlẹ wule.” (Wa 1 Ala ịTẹsalonika 5:11.) Lala isoja ịlẹ kị kaa ma uya logu-logu, ahị kaa ju awụlẹ ọhụ. Ịlẹhị lẹ, isoja ọhẹ ka họ angịkịla nyamwụ ang ụka ká ẹwụ á chila lụmẹ myị́, ma ọ́ tị́ ka tọchị-tọchị họ ịnyị ẹnẹnẹhẹ ka. Ịnyịnyị, áhị kaa mamachịng họ ẹla jụ aanahị lee o-waa uri nya ang ọlẹ kị họhị ka. (1 Tẹs. 5:13, 15) Ahị ka mẹ ọháha jẹ bwula o-ju angị kaa kpẹhị rịrị ọjịra-jịra ihi. (1 Tẹs. 5:12) Ụka ká ịPọlụ da ileta ọwẹ, ọjịra-jịra ọla ịTẹsalonika á gu ẹka okpokpo kpẹẹ lẹka. Ọ lala o-ri angịgbahị nya ọjịra-jịra ọwẹ á jẹ́ ang chajị nya ẹhị ọ-kpa rịrị nwà lẹka, lẹ ị ka chị ụchụụ myị́. Kpọkpọọkpọ, ọ baba kị ka jwaa ihi. Jaabwọ ká akama ọtụka okpelego wẹẹ ju chwẹẹ, ahị ka baba nyọka kpụnịrọ ụgbẹyị ọkpakpa nya angịgbahị ịla ọjịra-jịra nyahị gụ́ ọlẹẹlẹẹ myị́. Ẹla o-wo bwu egbeju ẹpwa á ka chịkpẹẹ ụka ọwẹ ka myị́, lẹ ọ baba kahị ka la ọháha ẹ-ẹga nya angịgbahị nya ọjịra-jịra bala o-jwaa ihi lẹẹlẹẹ. Jaabwọ myị́ abwọ kọ ka la, ahị kụ́ giri-giri, kahị kpịtịya nyori iJihova à wẹẹ kpa aanahị ịwẹ ụgbẹyị bwula iJisọsị lẹ, ọkọkọ nyọka yẹhị rịrị u-uhye nya ọkpẹẹkpẹẹ ọlala-ka nyaa.

12. Ányị ẹhị ọrịrịị-rịrị nyahị à tị́ kaa chewu ke irya nyahị?

¹² Jaabwọ ká okpo o-ke egbeju kaa chewu ke egbeju nya isoja, ẹhị ọrịrịị-rịrị nya ọchịda nyahị kaa chewu ke irya nyahị. Ẹhị ọrịrịị-rịrị ọnyọọngịrị nyahị kaa dahị ụbwọ nyọka jẹ́ nyori ịngịngịhyẹ ọlẹ ká odehe ọlẹ ka ya hahị á ju apyobwuna ka. (Filip. 3:8) Ẹhị ọrịrịị-rịrị nyahị kaa dahị ụbwọ nyọka kụ kpọọ bala ọ-kịnyaa ka ịlahị. Ọ lịnyị ẹ-ẹga nya Wallace bala Laurinda, kị kaa da ụbwọ Africa. Ẹ-ẹpwụ nya epwihi ịta, adịda nya ọngọhẹ gbu, ịnịna nya ọngọkịla gbu ịnyịnyị. Ẹdụrụ nya COVID-19 ọlẹ kọ bene ẹ-ẹga myị́ ẹga du kị jẹ́ ka ẹpwa ka yẹ alugbiyegu nyaa ka. Wallace da ụpwụ yẹkẹẹ: “Ẹhị ọrịrịị-rịrị nya owuleji bwula igu dam ụbwọ nyọka kụ irya u-uhye nya abwọlẹ kị ka la ahyẹẹnụ ọhọhẹ odehe onyeewe, ọkọkọ nyọka kụ irya u-uhye nya abwọlẹ kị la lụka nya ahyẹẹnụ ihyẹẹkpẹ nyaa odehe ọlẹ. Ẹhị ọrịrịị-rịrị ọwẹ kaa kpụ́m ẹjẹ ụka ká ọjụjụ nya igu ọọwa á ja kpụm ọkịlẹtụ enyi.”

13. Ịyẹ ahị tị́ ka họ ká olegu ịgọgọ ka wẹ uhye nyahị?

¹³ ‘Anụ chị́ enyi mịrị ila nya olegu ịgọgọ ka.’ (1 Tẹs. 5:19) ỊPọlụ chụ olegu ịgọgọ kaka pwoku ila ọlẹpwụ nyahị. Ụka ká olegu nya Ohe á ji uhye nyahị, ọ kaa chịhị kpákpá nyọka họ ang ọnyịịla bala ọ-la ọngịrị nyọka họ ụkụrwọ ha iJihova. (Rom. 12:11) Ịyẹ ahị tị́ ka họ ká olegu ịgọgọ ka wẹ uhye nyahị? Ahị ka jẹ́-ẹ raabwọ chajị nyamwụ, jẹ́ Omyi Ẹla nya Ohe, bala ọ-yẹ jula ogu nya Ohe ọlẹ ká olegu nyamwụ à wẹẹ kpa ụgbẹyị. Ọ-họ ịnyị ka dahị ụbwọ nyọka nwụ ‘ugbe nya olegu ịgọgọ.’—Gal. 5:22, 23.

14. Ịyẹ ahị tị́ ka cheji ba hi pyii kori ká olegu nya Ohe á ka kịnyaa la ọ-wẹ uhye nyahị? (Yẹ ifoto ịnyịnyị.)

¹⁴ Ụka ká Ohe á ya olegu ịgọgọ nyamwụ hahị kpá, ahị ka dụmwọ-dụmwọ chajị kahị ka ‘chị́ enyi mịrị ila nya olegu’ ọọwa ka. Angịlẹ ká irya ọkụkụ bala abwẹla nyaa la cheri-cheri, Ohe à kaa ya olegu nyamwụ ha kem lẹ. Kori kahị kaa kụ irya u-uhye nya ang ọtịpyọ bala o-hu ẹla ọọwa họ aalẹ, Ohe á ka myị-ị̀ ya olegu nyamwụ hahị kịnyaa ka. (1 Tẹs. 4:7, 8) Kori ká olegu ịgọgọ á ka ji uhye nyahị kịnyaa aalẹ, áhị ka ‘yẹhị da ọmwụ ọyẹyẹ bwee kpong-kpong ka’ ịnyịnyị. (1 Tẹs. 5:20) “Ọmwụ ọyẹyẹ” ọlẹ kị ya ẹla rụ ẹ-ẹpwụ nya ọgba ọwẹ ri ẹla ọlẹ ká Ohe kaa ya tahị bwula olegu ịgọgọ nyamwụ, tụ́ ẹla u-uhye nya ahyẹẹnụ nya iJihova bala abwọlẹ ká ụka nyahị ọlẹ ju agaga ẹ-ẹpwụ kaka ba. Áhị kaa kụ irya nyori ahyẹẹnụ nya iJihova, lee Amagẹdọn nyị́ ka wẹ lụka nyahị ka lẹ ka. Ọkọkọ nyọọwa, ahị kaa yahị guru gboo bwula ọ-kpa abwẹla ọnyịịla ọhọhọ nyahị kpọọ bala ọ-kịnyaa la “ọhịhị nya ịgọgọ ọlala bala ịnya ọngịnyị nya Ohe Oluhye oriri nya ịlẹhị-ịlẹhị” ahyẹẹnụ ọnyị myị́ ọnyị.—2 Pit. 3:11, 12.

“WỤLA ANG MYỊ́ ANG WUU YẸ MYỊMYỊ”

15. Ányị ahị tị́ ka họ ká ụgbaa bala ịnịịkịla nya alegu inyibyi ka hụhị ahị ka? (1 Ala ịTẹsalonika 5:21)

¹⁵ Ụ-ụwa ị-ịlahị, ọ lala o-ri aluji nya Ohe nyị ka ya dodehe nyori “okpunyi ji lẹ, ahị ka hụhụ la o-kem lẹ.” (1 Tẹs. 5:3) Ọnọọkịla o-bwu ẹga nya alegu inyibyi ọwẹ ka pyẹ yịrị odehe yịrị, kpụ ọ ka hụ iru nya angịnyị ahị. (Ọwụ. 16:13, 14) Ahị tị bẹ? Kori kahị “wụla ang myị́ ang wuu yẹ myịmyị” aalẹ, ị́ ka hụhị ahị́ myị́ ka. (Wa 1 Ala ịTẹsalonika 5:21.) Omyi ẹla nya ala iGiriki ọlẹ kị yẹda kaka ri ‘wụla yẹ myịmyị’ ri ụgbẹyị ọlẹ ká angịnyị kaa mẹ oje lala okpoko ịgọm bala okpoko onyoowuru yẹ nyọka jẹ́ ọnyịịla nyamwụ. Lẹ, ahị baba nyọka mẹ ẹla ọlẹ kahị wo lee ọ-wa yẹ nyọka jẹ́ kori ká ẹla ọọwa á ri ẹlịlẹhị. Ẹlẹwẹ baba ha ala ịTẹsalonika, ọ tị dọmwụ ka baba hahị gụ jaabwọ ká akama ọtụka okpelego wẹẹ ju chwẹẹ gụ ọọwa. Ọkọkọ nyọka myị ju ẹla myị́ ẹla ọlẹ ká angịnyị-ị́ ya, ahị ka kpa ẹla ọjẹ́jẹ nyahị chụ ẹla ọlẹ kahị wa lee o-wo ka pwoku ẹla ọlẹ ká ịBayịbụụ bala ogu nya iJihova ya. Bwula ọ-họ ịnyị, ọnọọkịla lee ijẹẹhị nya alegu inyibyi ọhẹ-lọhẹ á ka hụhị ahị́ myị́ ka.—Etu 14:15; 1 Tim. 4:1.

16. Ịyẹ ahị tị́ wẹẹ ya ẹhị rịrị gbe kọ tị la kpakpa? Ẹlịyẹ ahị tị́ cheje nyọka họ?

¹⁶ Ahị jẹ́ nyori angịnyị nya iJihova ka be bwu akama ọtụka okpelego. Ma, áhị tị jẹ́ jaabwọ ká ijuju ka la ha ọngọngọọng nyahị lẹka. (Jem. 4:14) Kpọkpọọkpọ, kori kahị ji lahị pwụ ụka ọọwa lee ahị gbugbu ene nya ụka ọwẹ, Ohe ka ya ọhịhị ọmyịmyị-ka hahị kori kahị tụụbwọ hi ọmyịmyị nyahị ka. Angịlẹ ká Ohe ya ida wụ́ ka juwa bala ịKịrayịsị e-epwoohe. Angịlẹ kị ri ịkpịlọ ịkịla ka jam ị-ịparadayịsị odehe. Ahị wuu a ya ẹhị nịrọ ẹhị ọrịrịị-rịrị nyahị bala ọ-nwụlanọ gbe ahyẹẹnụ nya iJihova mẹ!