UKỌCHẸ 15

Ẹnẹ Jisọs Che?

E-ku Ma Kọ Dufu

Jisọs ch’ẹnẹ ka k’amonẹ ma nyọnyọ efu ọhiala amonẹ igbele. Dagba k’amonẹ wewe m’odu Jisọs nyọnyọ, ma m’ọla ẹnẹ ki che jali n. Amonẹ che n’ibe ojoji ojoji lugbo ọla ẹnẹ ki Jisọs che. Ẹñwu Baibul ka lugbo-wñ?

1. Ẹnẹ Jisọs Che?

Jisọs ch’onuchẹ Ọjọ ki n’ukpahiu ki d’efojale. Owñ Ọjọ nyi ejodudu taki ny’ẹñwu duu. Todu e-lẹ, owñ “chʼọmọgba ugbo ẹwñ du kʼỌjọ nyi.” (Abo Kọlọse 1:15) Baibul kakini Jisọs che ‘ọma okpono’ Ọjọ todu owñ kate i nyi kp’ọla-wñ. (Jọn 3:16) Jisọs ch’ukọlọ kp’ata-wñ Jihofa, lugbo enyi amẹñwu duu ki bọ. (Gba Ita Ita 8:30.) Jisọs dọmọ ajura echukọlọ kpai ata-wñ at’eñini. Jisọs che “Ọla lẹ,” todu i aka ñwu amonẹ inabali ki kwugbo Ọjọ kpai amẹñwu k’Ọjọ atene ku ma che.—Jọn 1:14.

2. Ẹñwu chi ki Jisọs w’ilẹ-i?

Ad’iko ọdọ ichamu ny’ọgwọkọ ugbo meji (2,000) ki le gwudu-i, Jihofa n’afu-wñ kiafọ du d’ọlai Jisọs w’efu onobulẹ ki ma m’ẹnẹkẹlẹ mama ta n ku ma dọ ki Meri. Lefu e-ki dẹ, ma f’u Jisọs bi dab’onẹ. (Gba Luku 1:34, 35.) Jisọs w’ilẹ-i ki che Mẹsaya abẹki Kraist k’Ọjọ gbalu, ki f’amonẹ jadu.a Am’achẹ ki Baibul ka lugbo Mẹsaya wa chẹ oji-wñ. E-lẹ jẹñwu amonẹ ma Jisọs kaki owñ “chʼiKraisti, Ọma e-Ọjọ kʼi deju.”—Matiu 16:16.

3. Ugbo Jisọs dẹ abajọ-i?

Ubi k’ọlai Jisọs kpoji ef’ilẹ-i, i mu dajikwanẹ mud’afu. I la mu dabi t’efu ojale. Ọmọ, “Ọjọ ñọ hi owñ ne tʼatatẹ.” (Abo Filipai 2:9) Abajọ-i, i n’uña e-ọda lile. Jihofa kate n’ukpahiu tu Jisọs le.

N’UMA NYỌGBA

Kọchẹ manyu lugbo ẹnẹ ki Jisọs che jali kpai ẹñwu ki chi k’ekọchẹ lugbo-wñ chẹñwu ogbogaga.

Jisọs kpai Jọn k’i ache Baptism dago ef’omi anetiru omukọla ki kwefu ojale ubi ki Jisọs che baptism.

4. Jisọs ch’Ọjọ Chamachala n

Baibul kọ wa kaki dagba ki Jisọs ch’Afu ki n’ukpahiu lile ki defu ojale, i aleb’ọda Ata-wñ Jihofa. Ẹñwu chi k’a kabalẹ? G’IFIDIO-i k’ẹ neke li ẹñwu ki Baibul ka lugbo ojoji ki d’agbade Jisọs kpai Ọjọ chamachala.

IFIDIO: Jisọs Kraist ch’Ọjọ? (3:22)

Am’oji Baibul ki d’ọganẹ-i ajẹñwu wa ma ẹñwu ki d’agbade Jihofa kpai Jisọs. Gba okoke am’oji Baibul-i, ubilẹ mẹ ch’oluka oji am’ene-i.

Gba Luku 1:30-32.

Ẹñwu onuchẹ Ọjọ ka lugbo alu k’agbade Jisọs kpai Jihofa “Ọjọ Chamachala” dẹ?

Gba Matiu 3:16, 17.

Iko ki Jisọs ache baptism, ẹñwu omukọla ki kwefu ojale ka?
Omukọla ẹnẹ ẹ kpibe kaki i che?

Gba Jọn 14:28.

Ẹnẹ ch’ogijo manyu en’ọda tule? Ata abẹki ọma?
Alu ki Jisọs dọ Jihofa k’Ata-wñ, ẹñwu e-lẹ kọ wa?

Gba Jọn 12:49.

Dabalu ki dẹ oji Baibul-i, Jisọs akaki owñ kp’Ata-wñ ch’okate? Ẹñwu ch’ibe wẹ?

5. Jisọs du ña kaki owñ che Mẹsaya

I che n’amachẹ wewe ki defu Baibul ki ajẹñwu amonẹ neke m’ẹnẹ ki che Mẹsaya, ẹnẹ ki Jihofa tu ki jadu amonẹ. G’IFIDIO-i k’ẹ neke li am’achẹ ki Baibul ka, ki la wa chẹ oji Jisọs iko ki d’ilẹ-i.

IFIDIO: Amẹñwu Ki Baibul Ka Lugbo Jisọs Wa Chẹ Ochochi (3:03)

Gba okoke am’oji Baibul-i, ubilẹ mẹ ch’oluka oji am’ene-i:

Gba Maika 5:2 k’ẹ neke ma ugbo ku ma na bi Mẹsaya.b

Ma bi Jisọs ugbo k’oji Baibul-i ka?—Matiu 2:1.

Gba Eli Ekọ D’Ọjọ 34:20 kpai Zẹkaraya 12:10 k’ẹ neke ma ẹñwu ki Baibul ka lugbo alu ki Mẹsaya ana kwu le.

Am’achẹ ki dẹ-i wa chẹ?—Jọn 19:33-37.
Ẹ neju kaki elu Jisọs lu todu k’amachẹ-i ki neke wa chẹ?
Ẹñwu e-i du tejugede ñwẹ lugbo Jisọs?

6. A jile kwefu ekọchẹ lugbo ẹnẹ ki Jisọs che

Baibul kakini i chẹñwu ogbogaga k’onẹ ki kọchẹ lugbo Jisọs kpai ẹñwu k’Ọjọ atene ki Jisọs ki che. Gba Jọn 14:6 kpai 17:3, ubilẹ mẹ ch’oluka oji ene-i: