Jisọs K’ujẹñwu Ñwu Ọwọ Amonẹ Jẹ

Taku ma ch’ucholo Elaloji e-ọdọ 32 I.K., amẹnukpuchẹ Jisọs dabi wa kwugbo ku ma lo nya j’uchẹnyọ. Ọla-ma la chẹ kpa nyọnyọ, oñ ama kpai Jisọs kpo tef’ọkọ ej’omi alo tu Bẹtsaida todu ku ma nya ñmi. Amaa, alu ku ma mẹru eti aji ugbo ku ma atanẹ, Jisọs li kaki amonẹ wewe kpo t’ọ ubi w’ọmọ mẹ. Dagba ki Jisọs atene ki dẹ kp’amakọchẹ-wñ kate, i gb’amonẹ lẹ nyi kp’ẹdọ ka. I ch’ọga abo ku ma ach’ọga kpa, tak’i la chanẹ ekọ ma ẹñwu ki lugbo Ojanẹ Ọjọ gbogbo w’ẹgba k’ọjọ du. Alu k’ọjọ du, amẹnukpuchẹ-wñ w’ugbo-wñ, ma la ka ñwu kakini: ‘Ebi adọmọ akp’amonẹ-i mẹ, jẹñwu ma ku ma nya l’ujẹñwu ku ma ajẹ.’

Jisọs dohi ñwu ma kakini: ‘I ch’otila ku ma lo n, mẹ d’ujẹñwu ñwu ma ku ma jẹ.’ Tak amẹnukpuchẹ-wñ t’ọ ene kakini: ‘Ẹ tene k’a lo nya l’ujẹñwu ñwu ma jẹ?’ Filip ki ch’ẹnẹ ka ef’amakọchẹ-wñ kakini: ‘Dagba k’a n’ọkọ nana, a neke l’ujẹñwu ki ab’ọwọ amonẹ-i jọ n.’

Oñ Jisọs t’uma ene kakini: ‘Abu ujẹñwu k’a nẹ nana kade?’ Oñ Andru dohi kakini: ‘Ibrẹdi mẹlu kpai ẹja meji kate a nẹ-i, i la neke b’uma jọ n.’ Taki Jisọs kakini: ‘Mẹ d’ibrẹdi kp’ẹja lẹ ñwu mi.’ Taki Jisọs ka ñwu amonẹ lẹ ku ma gw’anẹ uchẹ uchẹ onẹ ooje ooje [50] kp’uchẹ uchẹ onẹ ogwumẹlu ogwumẹlu [100]. Taki Jisọs m’ibrẹdi kp’ẹja lẹ kọ n’ọwọ, i k’eju r’ojale, i la f’adua che r’Ọjọ. Oñ i ko ñwu amẹnukpuchẹ-wñ ku ma kpẹ ñwu amonẹ lẹ. Abokẹlẹ ichamu ny’ọgwọkọ ugbo mẹlu [5,000] kpai abobulẹ manyu abimọtọ chakaa j’ujẹñwu, efu-ma la kọ. Ubi ku ma f’ujẹñwu jẹ kpa, amẹnukpuchẹ Jisọs m’ujẹñwu ki bọ ko dama todu k’e-duu ki we chihi. Ujẹñwu ki bọ alu ku ma ko dama lẹ la ch’ẹkọ agba megweji [12]! Ẹñwu awuwu lile i che, abẹk i ch’abalẹ n?

Ẹñwu ki Jisọs che-i che r’amonẹ lẹ eju nyọnyọ, e-lẹ la jẹñwu ma atene ku ma mu du j’onu. Amaa, Jisọs che ma kak i w’iko ki Jihofa ad’owñ j’onu ta n. Jisọs jẹñwu amonẹ lẹ le, tak i ka ñwu amẹnukpuchẹ-wñ ku ma kpo t’ọkọ ku ma d’ọgba alo t’agwodaba Ohimini Galili. Alu ku ma alo, Jisọs mu tẹgwu t’ojuwo. Ẹñwu jẹñwu Jisọs ch’abalẹ? Todu i atene ki ch’adua r’Ata-wñ ki def’ojale. Jisọs ad’iko tanẹ ki ch’adua iko duu dagba k’ọwọ-wñ chẹ gbaji.