Ujẹñwu Anẹ Ondu

Ọdọ-ọdọ duu amiJu ch’ach’ucholo Elaloji ọjọ ẹkẹgwẹlẹ [14] ochu Naisan. Ucholo ki dẹ ajẹñwu ma rewa alu ki Jihofa gba-ma tanẹ kw’oko adu ojanẹ Ijipt, kpai alu ki nẹ ma w’Ojanẹ ki Gbalu ñwu ma. Ef’ọdọ 33 I.K., Jisọs kpai amẹnukpuchẹ-wñ ch’uyọ ucholo Elaloji ef’unyi-ojale ka Jerusalẹm. Ubi ku ma j’ujẹñwu lẹ kpa, Jisọs ka ñwu amẹnukpuchẹ-wñ kakini: ‘Ẹnẹ ka efu mẹ adu mi ñwu ma mu.’ Awuwu f’amẹnukpuchẹ-wñ mu, ma la chanẹ eti Jisọs ene kakini: ‘Ẹnẹ ch’ẹnẹ lẹ?’ Jisọs dohi kakini: ‘Ẹnẹ k’u na ad’ibrẹdi-i ñwu.’ Ubilẹ, i m’ibrẹdi lẹ du ñwu Judas Iskariọt. Ẹrẹrẹ lẹ, Judas kwanẹ i la dufu kw’ejefu ọmọ le.

Ubilẹ, Jisọs f’adua che, i la f’ibrẹdi lẹ kọda egini tak i mu du ñwu amẹnukpuchẹ ki bọ. Jisọs ka ñwu ma kakini: ‘Mẹ gb’ibrẹdi ku mẹ jẹ, e-kidẹ koji añọla-mi k’u na adu todu mẹ.’ Ubilẹ, i ch’adua oji ago omi achiwebẹtẹma gẹ, i la mu du ñwu amẹnukpuchẹ-wñ. Tak i kakini: ‘Mẹ ñm’omi ago achiwebẹtẹma ki dẹ. I koji ẹbiẹ-mi e-ku ma adu dafo todu k’Ọjọ ki neke t’ẹbiẹnẹ nọ ñwu amonẹ. U gbalu ñwu mẹ kaki mẹ aj’onu kp’omi ef’ofẹ ef’ojalẹ. Mẹ na ch’e-i ọdọ-ọdọ ki ch’urewa mi.’ T’eñini-i, amakọchẹ Jisọs awa jọ dama anẹ adiko lẹ ọdọ-ọdọ. Ujeju lẹ ma adọ Ujẹñwu Anẹ Ondu eñini.

Ubi k’amẹnukpuchẹ lẹ j’ujẹñwu kpa, ma chanẹ ejiñwa agbade ọla-ma lugbo ẹnẹ ki ch’ogbogaga tule. Amaa, Jisọs ka ñwu ma kakini: ‘Ẹnẹ ki tule agbade mẹ ch’ẹnẹ ki ali ọla-wñ dabẹnẹ kak owñ nya tule agbade mẹ.’

Jisọs ñọ ka ñwu ma kakini: ‘Onukwu-mi mẹ che. Amẹñwu chakaa k’Ata-mi atene k’u ka ñwu mẹ oñ u ka ñwu mẹ. I gbanẹ k’u na dabi t’ugbo Ata ef’ojale gẹ n. Amẹ muda ad’efilẹ-i, amaa amonẹ chakaa ama kak’akọchẹ-mi mẹ che ichẹñwu ku mẹ afẹdọ ọla-mẹ. Mẹ fẹdọ ọla-mẹ dabalu k’onugo mi fẹdọ mẹ le.’

Otitala-wñ, Jisọs ch’adua ru Jihofa, i la bi ki Jihofa ki dide amakọchẹ-wñ chakaa. Jisọs bi ki Jihofa ki ch’atẹko ma, ku ma na chẹñwu dama ef’urẹdọ. I ñọ ch’adua k’odu Jihofa ki na fọ. Ubilẹ, Jisọs kp’amẹnukpuchẹ-wñ k’eli jẹnyu ñwu Jihofa dama taku ma dufu kw’ọmọ le. Iko mẹr’ọwọ abajọ-i mẹ ku ma amu Jisọs.