Jisọs Lulẹ Oji Omi

Jisọs che n’ukpahiu ech’ọga amonẹ kpa, ek’abo ki kwu dajikwanẹ, i la ñọ n’ukpahiu oji afu lile kpai omi ki alọ. Ubi ki Jisọs ch’adua kpa ojuwo, Jisọs d’eju ganẹ g’Ohimini Galili, i la li afu lile ki aju oji ohimini lẹ. Amẹnukpuchẹ-wñ def’ọkọ, ma la ach’ọbata alu k’akpoli arọ b’ọkọ lẹ ma. Taki Jisọs le wanẹ, i la chanẹ elulẹ oji omi aw’ugbo-ma. Alu k’amẹnukpuchẹ lẹ li onẹ ki alulẹ oji omi awa, oñ ma chanẹ ech’okpo. Amaa, Jisọs ka ñwu ma kakini: ‘Omi dẹ. Mẹ ki ch’okpo n.’

Pita kakini: ‘Ondu, ichẹñwu ki ch’uwẹ dẹ, ka ñwu mi k’u l’eju omi w’ugbo-wẹ.’ Taki Jisọs ka ñwu Pita kakini: ‘Le w’ugbo-mi.’ Oñ Pita kwef ọkọ dufu, i la chanẹ elulẹ eju omi alo t’ugbo Jisọs agbade afu lile ki aju lẹ. Amaa, alu ki Pita amẹru Jisọs, i m’eju du g’afu ki aju lẹ, okpo la f’u mu. I la li kaki omi chanẹ ed’owñ mẹ. Taki Pita kpogwu dufu kakini: ‘Ondu, mu mi gba!’ Taki Jisọs gwọnyu ọwọ Pita, i la kakini: ‘Ẹñwu chi k’ẹ chanẹ ech’ibe meji?’ Ugbo ẹdekono-wẹ dẹ?’

Jisọs kpai Pita mu tẹgwu tef’ọkọ lẹ, afu lile ki aju lẹ la hi-ẹdọ wanẹ ẹrẹrẹ. Abu ẹ neju kaki awuwu lẹ dẹ ọla amẹnukpuchẹ lẹ? Ma kakini: “Ochochi, Ọma Ọjọ ẹ che.”

I ch’ẹgba ki dẹ-i kate oñ Jisọs du ña kak i n’ukpahiu oji afu n. I ñọ che n’ẹgba omunẹ ki Jisọs kpai amẹnukpuchẹ-wñ def’ọkọ alo t’agwodaba ohimini, Jisọs la dachi ejubi ef’ọkọ lẹ alolu. Alu ki Jisọs alolu, afu lile chanẹ eju. Akpoli la na rọ b’ọkọ lẹ ma, ef’ọkọ la chanẹ ekọ ñwu omi. Amẹnukpuchẹ lẹ nya fu Jisọs jolu kwanẹ, ma na kwa kakini: ‘Akonẹwñ, elenyọ a lenyọ-i! Agba mu wa gba!’ Taki Jisọs kwanẹ, oñ i dejur’afu kpai ohimini kakini: “We, dago kaa!” Ẹrẹrẹ lẹ, afu kp’akpoli oji omi lẹ bọ lii. Taki Jisọs t’amẹnukpuchẹ-wñ ene kakini: ‘Ugbo ẹdekono mẹ dẹ taa?’ Ma chanẹ eka ñwu ọla-ma kakini: “Ichaka ch’afu kpai ohimini agb’ọla-wñ gbọ”. Amẹnukpuchẹ lẹ li kaki ichẹñwu ku ma kẹdọno Jisọs, i dukpẹ ku ma ch’okpo ẹñwu duu n.