Ma Mu Pọl Du Le Ti Rom

Ulẹ etakoya onukẹta ki Pọl le che Jerusalẹm i kpoji todu ma f’u mu ọmọ, ma la mu du t’unyi uga. Pọl li anẹ-ego ka odu, Jisọs la ka ñwu ef’anẹ-ego lẹ kakini: ‘Ẹ alo ti Rom, ẹ la anya gb’ibenu mi ọmọ.’ Oñ ma mu Pọl du kwi Jerusalẹm, ma la mu du le ti Sisẹria, ọmọ lẹ i ch’ọdọ meji ef’unyi uga. Alu ku ma di Pọl w’ọgba Igobina Fẹstọs ki k’ajọ-wñ, Pọl kakini: ‘Na tene ki Sisa ki k’ajọ mi Rom.’ Oñ Fẹstọs kakini: “Abu k’ẹ f’apili che t’ọgba Sisa-i, bak ugbo Sisa lẹ oñ ẹ lo ke.” Taku ma m’agba ko nyu Pọl, oñ ma mu du tef’ọkọ ejomi alo ti Rom, i la che n’amọmaye meji ku ma t’ọ ubi, amọmaye lẹ che Luku kpai Aristakọs.

Alu ku ma def’ọkọ alo ti Rom, afu bibi lile ka chanẹ eju, afu lẹ la da n gbogbo dabu ọjọ gwẹẹ. Amonẹ ku ma def’ọkọ lẹ chaka neju kaki ekwu ma anya kwu-i ke. Amaa, Pọl ka ñwu ma kakini: ‘Abokẹlẹ, onuchẹ Ọjọ ka kọla ñwu mi ef’ọna kakini: “Pọl, ẹ ki railo n. Ẹ tanẹ Rom, abo ku ma j’ef ọkọ kpuwẹ-i la an’ujadu gẹ.” Mẹ fẹdọ nẹ! Ẹnẹ duu efu wa akwu n.’

Afu lile lẹ ju gbogbo ọjọ mẹgwẹlẹ [14]. Otitala-wñ ma chanẹ eli ewo ku ma adọ Mọlta. Tak ọkọ lẹ lewa da nyu ẹlanyi lile ka, i la f’ọkọ lẹ gwuchẹ. Amaa, amonẹ ọgwọkọ ny’ẹtẹgwa nyoke mẹfa [276] ki def’ọkọ lẹ chakaa lewa tanẹ anẹgbẹ kp’ọlafia. I che n’abo ki gwaji daba at’anẹgbẹ, abo ki bọ la tanoji am’ẹgwuchẹ oli ọkọ lẹ daba at’anẹgbẹ. Abo ewo Mọlta la dejutẹ ma nyọnyọ, ma la f’una ko ñwu ọchaka ma ku ma wa.

Ochu mẹta anubi lẹ, amisoja ku ma di Pọl ny’uma ọwọ lẹ mu Pọl du tef’ọkọ omunẹ alo ti Rom. Alu ki Pọl na tanẹ ọmọ, amọmaye wa ledo. Oñ alu ki Pọl fu ma li, i ch’ugbede Jihofa tak i f’ẹdọ nẹ. Dagba ki Pọl ch’ẹnẹ amu, ma jẹñwu Pọl ki kpo gwugwu ef’unyi ka kp’ọla-wñ, isoja ka la adide-wñ. Pọl gwugwu ọmọ lẹ ọdọ meji, amonẹ la awa liu. Ẹgba duu ku ma la wa, i aj’uchẹnyọ ru ma lugbo Ojanẹ Ọjọ, i la añọ kọ ma lugbo Jisọs. Pọl la ñọ d’ọmọ ak’ilẹta r’amujeju abudọ ki dẹ Esia Mainọ kpai Judia. Ochochi, Jihofa di Pọl chekwu nyọnyọ k’uchẹnyọ ki neke t’ojanẹ wewe.