UKỌCHẸ 37

Ẹñwu Ki Baibul Ka Lugbo Ukọlọ kpai Ọkọ

E-ku Ma Kọ Dufu

I n’iko k’ihianyi ọl’ọkọ kpai ukọlọ jẹñwu ẹ kpibe abẹki eyaye mama mẹ? I neke gbiti ñwu wa echukọlọ k’a n’ẹñwu k’a tene k’a la ñọ rẹ Jihofa ọna ki dukpẹ. Baibul ad’ibe ọmẹmẹlẹ ki neke ch’atẹko wa ñwu wa.

1. Ẹñwu Baibul ka lugbo ukọlọ eche?

Ọjọ atene k’a n’ẹnyọ ef’ukọlọ wa. Baibul kakini “i n’ẹñwu du ki nyọ tule ñwu onẹ tu . . . k’onugo-wñ ki li ẹnyọ efu ukọlọ akanya-wñ le n.” (Akọla ñw Ujeju 2:24) Ach’ukọlọ ẹgbiti owñ Jihofa che. Ichẹñwu k’a ch’ukọlọ nyọnyọ dabu Jihofa, e-lẹ ajẹñwu ẹdọ-wñ bọ ru wa, ẹdọ e-wa onugo la abọ gẹ.

Ukọlọ chẹñwu ogbogaga. Ama, a ki jẹñwu ki chẹñwu ogbogaga t’arẹ Jihofa le n. (Jọn 6:27) I gbalutanẹ ñwu wa kaki ichẹñwu k’a d’arẹ-wñ chẹñwu ejodudu efu ọlai wa, i ana k’amẹñwu ekwu wa ñwu wa.

2. Ẹñwu Baibul ka lugbo ọkọ?

Ochochi, Baibul kakini ọkọ neke dide wa. Ama, i ñọ d’ufeti ñwu wa kaki ọkọ kate neke jẹñwu wa n’uyọ n. (Akọla ñw Ujeju 7:12) Todulẹ, Baibul d’ibe ñwu wa k’a we ch’ẹñọ ọkọ, chai k’a jẹñwu ‘ẹñwu ki d’ugbo wa abu k’a jọ-i ki na bu wa jọ.’ (Gba Abo Hibru 13:5.) Ichẹñwu k’a jẹñwu ẹñwu k’a nẹ ki bu wa jọ, e-lẹ ajẹñwu wa k’a we d’ọla wa tefu ihianyi todu k’a tene k’a n’amẹñwu nana manyu. A la ñọ d’ọla wa tefu ọmẹ ki ma dukpẹ n. (Ita Ita 22:7) E-lẹ ajẹñwu wa k’a we na t’ichacha abẹki ed’ọwọ tunyu ẹñwu ki ajẹñwu wa n’ọkọ ule-ule abẹki achigili.

3. Abu a neke d’ọkọ chekwu lọna ọmẹmẹlẹ?

Jihofa ch’Ọjọ ki ach’ọwọ, ichẹñwu k’awa onugo ‘ach’ọwọ ñwu onẹ k’a la n’ibe onẹ efamọla’ e-lẹ adu ña kaki a ch’awọli Jihofa. (1 Timoti 6:18) Ọna ka k’a neke ch’e-lẹ che ed’ọkọ wa ch’atẹko ujeju abudọ kpai abo k’ekwu akwu ma, ololo-wñ ch’abo k’awa kp’ama arẹ Jihofa dama. I ch’onu k’a du tanẹ ch’ogbogaga eju Jihofa n, chai ẹñwu ki jẹñwu wa che. Ichẹñwu k’a ch’ele kwefu ẹdọ wa, e-lẹ ajẹñwu ẹdọ Jihofa bọ, ẹdọ wa onugo la añọ bọ gẹ.—Gba Ẹwñ 20:35.

N’UMA NYỌGBA

K’a g’ujiwe am’ile k’a nẹ ichẹñwu k’a d’eju g’ukọlọ ọna ki dukpẹ k’a la jẹñwu ẹñwu k’a nẹ ki b’uwa jọ.

4. Bumọ Jihofa lefu ọna k’ẹ ch’ukọlọ wẹ

Ufẹdọ k’a nẹ ñwu Jihofa dukpẹ ki na tejugede efu ọna k’a g’ukọlọ wa. G’IFIDIO-i, ubilẹ mẹ ch’oluka oji am’ene-i.

IFIDIO: Ch’ukọlọ Ñwu Jihofa Kp’ẹdọ Ka (4:39)

Ef’ifidio-i, ẹñwu ẹ ñeju lugbo ali Jason kpai ọna ki ach’ukọlọ-wñ le?
Ẹñwu i che ki neke d’ukọlọ t’uña ki dukpẹ ki dẹ?

Gba Abo Kọlọse 3:23, 24, ubilẹ mẹ ch’oluka oji ene-i:

Ẹñwu chi k’ọna k’a g’ukọlọ chẹñwu ogbogaga?

Am’ifoto: Ẹnẹkẹlẹ ka ad’ukọlọ-wñ chẹñwu ejodudu efu ọlai-wñ. 1. I na ch’ukọlọ ef’unyi ukọlọ-wñ ọrọka. 2. I d’ukọlọ gbogbo gb’anẹ. 3. I d’ọmọ na ch’ukọlọ alo iko k’abo-wñ ki bọ lo t’unyi. 4. Owñ kate aj’ujẹñwu anẹ.

Ukọlọ chẹñwu ogbogaga. Ama, a ki jẹñwu ukọlọ ki chẹñwu ogbogaga t’arẹ Jihofa le n

Am’ifoto: Ẹnẹkẹlẹ lẹ na d’iko tanẹ ñwu ẹñwu ki chogbogaga tule. 1. I na ch’ukọlọ ef’unyi ukọlọ-wñ ọrọka. 2. I kw’ojukọlọ-wñ iko ki dukpẹ. 3. I d’ọwọ nyatẹ efu unyi ujeju abudọ. 4. I aj’ujẹñwu anẹ kp’ọya-wñ manyu am’ọma-wñ meji.

5. A jile nana ichẹñwu k’ẹñwu k’a nẹ ab’uwa jọ

Amonẹ wewe achẹñwu duu ku ma neke che ku ma n’ọkọ. Ama, ibe ki Baibul du ñwu wa ch’ojoji. Gba1 Timoti 6:6-8, ubilẹ mẹ ch’oluka oji ene-i:

Ẹñwu Baibul d’ibe ñwu wa k’a che?

Dagba k’ẹñwu k’a nẹ ki chẹ nya, a neke n’ẹdẹbọ. G’IFIDIO-i, ubilẹ mẹ ch’oluka oji ene-i.

IFIDIO: ‘‘Ẹñwu Ki Dugbo Mẹ Ki Na B’umẹ Jọ” (3:20)

Dagba k’abo akwọra unyi-i ma n’ọkọ nana n, ẹñwu jẹñwu ma n’ẹdẹbọ?

Ichẹñwu k’a n’ọkọ nana k’a muda atene manyu ha? Jisọs d’ujiwe akanya ki neke kwefu-wñ. Gba Luku 12:15-21, ubilẹ mẹ ch’oluka oji ene-i:

Ẹñwu ẹ kọchẹ kwef ujiwe ki Jisọs ka-i?—G’ọgba 15.

Gba Ita Ita 10:22 kpai 1 Timoti 6:10. Ubilẹ mẹ ch’oluka oji am’ene-i:

Ẹñwu ẹ neju kaki i ch’ogbogaga tule, ech’onukwu kpai Jihofa abẹki en’ọkọ nana? Ẹñwu chi k’ẹ kabalẹ?
Am’ihianyi ẹñwu onẹ neke nẹ ichẹñwu k’onẹ atene ki n’ọkọ nana?

6. Jihofa ad’amẹñwu ekwu wa ñwu wa

Ichẹñwu k’a n’ihianyi kp’ukọlọ abẹki a n’ọkọ ki b’uwa jọ n, e-lẹ ajẹñwu wa ma ichẹñwu k’a kẹdọno Jihofa abẹki a kẹdọno n. G’IFIDIO-i k’ẹ neke li ẹñwu k’a neke che ichẹñwu k’a defu ihianyi abalẹ. Ubilẹ, mẹ ch’oluka oji am’ene-i.