Yei-otu, Ánị Erebo Didụbamọ

1. Tetuu kị duonị Jehovah ere mọ owei mọ zọzọ nanayebị tẹmẹ ma o?

JEHOVAH “bolouịmbẹlẹ Ọkpọnanaowei,” anịduonị ifiebosẹ omịnị kpọ bolouịmbẹlẹ timi kị ómịnị mọ dọụmịnị. (1Tim. 1:11) Omịnị pọwẹị pọwẹị bara timi inyenrin kị Jehovah mọ dọụ wẹrịemi duonị ómịnị biin yeama ka kị wo pịrịdẹ. (Jas. 1:17) Bịsẹ dịẹpịrịyebo ere mọ owei mọ zọzọ nanayọ kpọ kẹnị. Ere mọ owei mọ zọzọ nanadaba, ámịnị zọzọ tarị bá zọzọ didụbamọmịnị avụọ fịmịnị. Ámịnị ifiebosẹ á kọn zọzọ a nana wẹrịemi tarị mịẹ kụrọmọdaba, á mịẹ pọwẹị kụrọmọmịnị.—Prov. 5:18.

2. Omịnị biin taa mọ yei mọ otu ditụa daba zụa ifieama te agbẹịgha yeama kị paamịnị a o?

² Bei akpọ mị wo mọ ditụa daba, biin zọzọ nanadẹ kịmịama bei zọzọ nana avụọbị akị ye dimọgha, anịduonị ámịnị bolouịmbẹlẹgha. Naa bei alabụọgha ifiemị World Health Organization tịịnmịnị ogbo gbaa barabị, biin yei-otuama ánị erebo weri bá á famụmịnị. Zụa ifieama patuu foto anịghakpọ vidio dimịnị yọ kpọ yei-otubo dịnẹmọ wẹrị bei sei yebo mịẹmịnị. Bịsẹ bara mịẹmịnị yei-otubo zụa ifieama zịnịotu emiyọ laadaba ánị erebo tarị wẹrịemi bara mịẹdịamịnị, anịa ámịnị mú warị laadaba agbẹịgha yeama kọn erema mịẹmịnị.

3. Te yeama kị yei-otu mịẹ ánị erebo diseimọ a paaemi a o?

³ Zụa yei-otu teeki duonị agbẹịgha bara kọn ánị erebo mịẹmịnị a o? Zụa otu zaụtimisẹ ere famụ daụ otuama kị pịrị zii wẹrịemi, anịduonị ámịnị bo dụbadẹmị bei ere ụyamọ inyenrinbụọmị akị seiye dimọgha. Zụa ibe-ama ba ere-otu diseimọ fa k’emi, anịduonị bịsẹ kịmịbị “owei laadẹ” bara mịẹdịa dọụmịnị ifiesẹ, erema penimọmịnị. Zụa kịmịama akị angọ kẹrịmụ bara anịghakpọ boloukọndaba mịẹ agbẹị-emi bara tolumọgha timi dụbamịnị. Zụa otu ba ifiemọsẹ patuu foto anịghakpọ vidio dimịnị duonị, ámịnị agbẹịgha bara kọn ánị nanadẹ erebo dii bá zọzọ anga yọ kpọ dimịnị. Wo naamịnị yebo mịẹgaan amọ, COVID-19 dọọn duo bosẹ bei bụụdọọnyebo biin bọlọụ dẹịndẹ. Anịa bịsẹ bara kị paa kpọ, yei-otu bịsẹ bara kọn ánị erebo mọ inyenrin agbẹịgha.

4. Christ tuuduomịnị yei-ụbọ teeki duo angọ kekere agbẹị-emi a o, bá tetuu a?

⁴ Jehovah karimịnị yei-otubosẹ akpọmị kọn ere-otu dimọ wẹrịemi bara kọn ánị erebo dii agbẹịgha.a Tetuu a o? Kịmịsẹ ánị ye-iroromịnị bara kị inyenrin paamọmịnị. Fịrịmọpaaowei Paul berifaanye akị Rome bọọ timi sẹlẹdẹ Christtuuduo-otubo pịrịmị, “bei akpọ bụọmọ á dei kụmọ.” (Rom. 12:​1, 2) Paul bei ye gẹẹ Rome itu pịrị ifiemị, itumị paa ifiebị dọlọ aladẹ. Mọabịkpọ, Paul dọụ ẹrị amọ zụa bịnaotuama mọkpọ akpọ otubo ye-iroromịnị bara mọ bá ye mịẹmịnị bara kị dimịẹmịnị. Anịkị duonị Paul ámịnị ánị ye-iroromịnị bara mọ bá ánị inyenrinbụọbo mọ dei bara kọn á kụrọmọmị. Paul bei gbaa yebị bei tịẹkirimị wo kpọ gbele-emi. Kịmị mịẹ bolouịmbẹlẹgha yọbị, zụa Christ tuuduomịnị yei-otuama kpọ akpọ ye-iroromịnị bara kị diwẹrị ánị erebo ụyamọmịnị.b Yei-otu tebara ka kị ánị erebo mọ inyenrin kị Jehovah mọ dọụ wẹrịemi a o? Parụbịbịmị 1Peter 3:7 bọọ emi.

5. Omịnị 1Peter 3:7 gbaa bara didaba, yei-ụbọ tebara ka kị ụ taa mọ inyenrin agbẹị-emi a o?

⁵ Wo wẹrị 1Peter 3:7 Goo. Yei-otubosẹ didụbamọ bara ka kị ánị erebo mọ inyenrin kị Jehovah mọ dọụ wẹrịemi. Didụbamọye mịẹdịamịnị yei-ụbọsẹ ebi bá tarị nana bara ka kị ụ taa mọ inyenrinmịnị. Bei egberitịbịmị, yei-ụbọ ụ taa didụbamọmụ bara kị kẹrị ẹrẹteimịnị. Anịa omịnị bọlọụ, yei-ụbọ mịẹwẹrị didụbamọye kọn ụ taa pịrịgha fa yebo kị ditụamịnị.

DIDỤBAMỌYE KỌN Ị́ TAA PỊRỊGHA FA INYENRINBỤỌAMA

6. Jehovah tebara ka kị taa famụmịnị otubo dimọ wẹrịemi a o? (Colossians 3:19)

⁶ Ere famụ kụmọ. Jehovah akpotu dọụmịnị kịmị dịsẹgha. (Ps. 11:5) Yei-ụbọ ụ taa famụmịnị ifiesẹ, Jehovah benebene dịsẹgha. (Mal. 2:16; Colossians 3:19 goo.) Wo tolumọmịnị egberitịbị duo boemi Bible yọ didaba, 1Peter 3:​7, yei-ụbọ nẹ ebibara akị ụ taa mọ inyenringha yei-ụbọbị, Jehovah mọ nana wẹrịemi ikie kpọ seimọmịnị bara kị gbaa wẹrịemi. Jehovah wó tẹẹbịbịbo parụgha kpọ paaemi.

7. Ephesians 4:​31, 32 gbaa bara didaba, te ẹrẹbịbịama kị yei-otubo mọ datịẹmọ agbẹị-emi a o? (“Tuugbaa Wẹrịemi Egberi” anga kpọ dii)

⁷ Ị́ taa weri anịghakpọ gịa á pịrị kụmọ. Zụa yei-otuama boloukọndaba ánị erebo weri bá á dọọn kụrọmọmịnị egberiama gbaamịnị. Anịa Jehovah “boloukọn, osịa, okukaị, bá kịmị weri ẹrẹbịbịama” nana inyenrinbụọ golu wẹrịemi.c (Ephesians 4:​31, 32 Goo.) Jehovah yebosẹ kị naamịnị. Yei-ụbọ kịmị fa yọ kpọ akị ụ taa mọ ẹrẹmịnị bara Jehovah mọ ditụamịnị. Laabara-laabara ẹrẹ wó taa pịrịmịnị yei-ụbọmị ánị maa kịmị zọzọ nanayọ seimọ bá ụ mọ Ọkpọnanaowei mọ ikie kpọ seimọmịnị.—Jas. 1:26.

8. Jehovah tebara ka kị patuu foto anịghakpọ vidio dimịnị yọ dimọ wẹrịemi a, bá tetuu a?

⁸ Patuu foto anịghakpọ vịdio dii kụmọ. Jehovah tebara ka kị patuu foto anịghakpọ vidio dimọ wẹrịemi a o? Ómịnị benebene dịsẹgha. Anịduonị patuu foto anịghakpọ vidio dimịnị yei-ụbọmị, ụ mọ Jehovah mọ ikie seimọ bá ụ taa kpọ didụbamọgha.d Jehovah dọụ wẹrịemi barabị, yẹị-otubosẹ ánị ere-otubo mọ kpẹkpẹrẹẹ timi bá zịnị kịmị mọ angamụ yọ kpọ irorokụmọ. Jesus gbaa amọ, ịkịọụsẹ akị zịnị ere dii wẹrị, á mọ mọ́ anga dịsẹmịnị kịmịbị “wó ịkịọụ bọọ” á mọ mọ́ agbẹịgha bara anga siindẹ.e—Matt. 5:​28, 29.

9. Zọzọ anga gbelemọ yọbị tetuu kị duonị yei-ụbọ ụ taa penimọmịnị yọbị Jehovah dịsẹgha o?

⁹ Zọzọ anga gbelemọ yọbị ị́ taa pẹnịmọ wẹrị á dịsẹgha ye mịẹkụmọ. Zọzọ angamịnị ifiemị, zụa yei-otuama ánị erebo penimọ wẹrị zụa yeama mịẹmịnị. Bịsẹ yebo erema mịẹ ye a paagha anịghakpọ yei-ụbọmị á tarịgha bara iroromịnị, bá ánị ịkịọụ kpọ bụụdọọnmịnị. Jehovah bịsẹ tarị fa inyenrinbụọ dịsẹgha. Jehovah dọụ wẹrịemi baramị yei-ụbọ ụ taa tarị, á didụbamọ bá a dịsẹgha yebo dii wẹrị á mọ mó inyenrin. (Eph. 5:​28, 29) Anịa Christ tuuduomịnị yei-ụbọ ụ taa diseimọ, á weri bá patuu foto anịghakpo vidio dimịnị inyenrinbụọ nana wẹrịemi aba, teeki baratụa ụ pịrịwẹrị wó ye-iroromịnị bara mọ bá ye-mịẹmịnị bara mọ dei a paaemi a o?

BARATỤA YEI-ỤBỌ PỊRỊWẸRỊ BỊSẸ SEI INYENRINBỤỌBO DẸỊNMỌMỤ YEBO

10. Jesus mịẹdịa yebị tebara ka kị baratụa yei-otu pịrị a paaemi a o?

¹⁰ Yei-ụbọ ụ taa dịdụbamọgha anịghakpọ werimịnị inyenrinbụọ nana wẹrịemi aba teeki baratụa ụ pịrịmịnị a o? Ómịnị angọtụa wẹrị Jesus dimịẹ a paaemi. Jesus ere nanagha, mọabịkpọ ómịnị wó tuuduo-otubo mọ inyenrin baramị baratụa yei-ụbọ pịrịwẹrị ụ taa mọ ebibara inyenrinmịnị. (Eph. 5:25) Wo wẹrị, yei-otu Jesus kọn wó fịrịmọpaa-otubo mọ ẹrẹ bá inyenrintimi bara duo tolumọ akị a paaemi yebo ditụa.

11. Jesus tebara ka kị wó fịrịmọpaa-otubo mọ inyenrin ma o?

¹¹ Jesus ifiebosẹ ebi bá didụbamọ bara ka kị wó fịrịmọpaa-otubo mọ inyenrintimi mị. Ómịnị osịa anịghakpọ ịkịọụ-sei bara kọn á mọ mọ́ inyenringha. Ómịnị kụrọ nana á dẹịn-emi kị gbaa kpọ, Jesus wó nana wẹrịemi kụrọ kọn ánị esisimọ bá á diseimọgha. Anịa, ómịnị angọ kị iyerimọ á pịrịmị. (John 13:​12-17) Jesus gbaa wó tuuduo-otubo pịrịmị: “Ị duo yetolumọ akị, ịmịnị bọụbọụ bá angọ-iyerimọ adụdụ kị nana wẹrịemi, bá ámịnị ị duo kụrọmọye nanamịnị.” (Matt. 11:​28-30) Jesus bọụbọụ kị timimị. Bọụbọụ emi kịmị suugha, anịa ye paadaba ómịnị laa angọ kẹrịmịnị. Kịmị ụ mịẹ boloukọnmọ-daba, ómịnị dọọ bá wó iroro yebo kpo kẹrị-tịẹmọmịnị

12. Jesus tebara ka kị kịmịotu mọ ẹrẹtimi ma o?

¹² Jesus wó ẹrẹmịnị egberibo kọn kịmịama kụrọmọmị. Ómịnị kẹnị ifie kpọ gịa wó tuuduo-otubo pịrịgha. (Luke 8:​47, 48) Wó ụyamọmịnị otubo ụ weri bá ụ mịẹ boloukọn kụrọmọ kpọ, “ómịnị waị á weri akịgha.” (1Pet. 2:​21-23) Zụa ifieama, Jesus gịa á pịrịmụ bara diya ómịnị kperein kị timimị. (Matt. 27:​12-14) Christ tuuduomịnị yei-otu bei ebi mịẹdịaye dimịẹ agbẹị-emi!

13. Matthew 19:​4-6 gbaa bara didaba, yei-ụbọ tebara ka kị ụ “taa mọ palịtimi” a paaemi a o? (Foto kpọ dii.)

¹³ Yei-otu ifiebosẹ ánị erebo mọ kpẹkpẹrẹẹ timi kị Jesus mọ gbaamị. Ómịnị wó Daụ gbaa egberi kị gbaamị, Jesus amọ yei-ụbọ “ụ taa mọ palịtimi.” (Matthew 19:​4-6 Goo.) Greek bẹẹlị mị “palịtimi” gbaadaba anị super glue kọn “kẹrị palịmọ” wẹrịemi ye bara kị gbaamịnị. Anịduonị, taa mọ yei mọ otu nana wẹrịemi tarị bị kakaị palịmọ wẹrịemi ye bara kị timi agbẹị-emi. Kẹnị ye kpọ bụọmọ ánị ovuru pumọ kụmọ. Bịsẹ bara kọn wó taa mọ inyenrimịnị yei-ụbọmị patuu foto anịghakpọ vidio diigha fa. Bịsẹpaa ye paadaba ómịnị kialị wó tọrụbo kọn “agbẹịgha ye diimụ yọ duo serimịnị.” (Ps. 119:37) Gbaamịnị yebị, ómịnị wó tọrụbo mọ avụọ fịwẹrị wó adụdụ ma zịnị ere mọ anga mọ bara irorogha fa.—Job 31:1.

14. Ere weri anịghakpọ famụmịnị yei-ụbọ te yeama kị mịẹwẹrị waị ụ mọ Jehovah mọ bá ụ taa mọ ikie mịẹ ebimọmịnị a o?

¹⁴ Ere famụ anịghakpọ werimịnị yei-ụbọ zụa yeama mịẹdẹ kị waị ụ mọ Jehovah mọ bá ụ taa mọ ikie mịẹ ebimọmịnị. Ómịnị teeki mịẹmịnị a o? Bọlọụ yebị, ómịnị kụrọ bụụdọọnye kị nana wẹrịemi bara nimi angọ pịrịmịnị. Kẹnị ye kpọ Jehovah tọrụ a sọwẹịgha. (Ps. 44:21; Eccl. 12:14; Heb. 4:13) Maamụkaramọ yebị, ómịnị angọtụadá ụ taa famụ anịghakpọ werimịnị yọ tịẹmọ bá wó inyenrinbụọ kpọ dei. (Prov. 28:13) Tarụkaramọ yebị, ómịnị bụọmọye kọn Jehovah mọ bá ụ taa bara kpọ duo biimịnị. (Acts 3:19) Ómịnị Jehovah dọụ wẹrịemi bara ka kị ye-iroro, ẹrẹ, bá inyenrinmụ bara kpọ tẹẹmịnị. (Ps. 51:​10-12; 2Cor. 10:5; Phil. 2:13) Neinkaramọ yebị, ómịnị wó tẹẹdẹ bara inyenrin paamọdá taa weri bá famụ yọ golu. (Ps. 97:10) Sọnrọnkaramọ yebị, ómịnị mú itukosuotubo laadá baratụapịrịye bii. (Jas. 5:​14-16) Sondiekaramọ yebị, ómịnị baratụa ụ pịrịwẹrị bei bọlọụmị ba bịsẹ yebo mịẹgha fa yeama kọn angọ tọlọmọmịnị. Patuu foto anịghakpọ vidio dimịnị yei-ụbọ kpọ bei gbaadẹ yebo kị mịẹ. Jehovah baratụa ụbọ pịrịwẹrị wó inyenrinbụọ deimịnị. (Ps. 37:5) Yei-ụbọ ụ taa didụbamọgha fa yeama mịẹgha fa, ómịnị á didụbamọmụ yeama kị mịẹmịnị. Te yeama kị baratụa ụ pịrị a paaemi a o?

Ị́ TAA DIDỤBAMỌMỤ BARAMỊ

15. Yei-ụbọ te ụwọụama ka kị ụ taa tarị wẹrịemi bara mịẹdịa a paaemi a o?

¹⁵ Á tarị wẹrịemi bara mịẹdịa. Zụa bịnaotuama ere nanabị aladẹ, ámịnị mọkpọ pọwẹị pọwẹị kị inyenrinmịnị. Bei yei-otubo ereinbosẹ ye mịẹwẹrị ánị erebo tarịemi bara mịẹdịamịnị. (1John 3:18) Zụa ifieama bei mịẹmịnị yebo dụbagha yeama, gbaamaba zọzọ bara kẹrị bá zọzọ gbẹịnmọ. Ómịnị ifiebosẹ phone dụọ zụa yeama gẹẹ á yarị wẹrị gbaa a paaemi, “ị́mịnị kị ị mịẹ zuzumịnị” anịghakpọ “ị́ tebara k’emi a?” bara akị á bii. Ifiebosẹ, ómịnị á tarịemi bara kọn fun a gẹẹ á pịrị. Bei yebo mịẹmịnị yei-ụbọsẹ, wó taa didụbamọ wẹrịemi bara kị mịẹdịamịnị bá ánị maa kịmị zọzọ nanayọ kpọ mịẹ kụrọmọmịnị.

16. Tetuu kị duonị yei-ụbọ kulebịbị kọn wó taa pịrị agbẹị-emi a o?

¹⁶ Tọrụkẹrịyọ mịẹdịa. Ere didụbamọ wẹrịemi yei-ụbọsẹ ụ taa mịẹ pọwẹị nanamụ egberiama kị ẹrẹ á pịrịmịnị. Kọn bịsẹ bara mịẹmụ kẹnị ụwọụ anị ị́ taa baratụa ị́ pịrịmịnị ụwọụbosẹ kọn á kule. (Col. 3:15) Yei-ụbọ adụdụ duobo bara kọn ụ taa kule bá á tokonidaba, á mịẹ bolouịmbẹlẹmịnị. Á yei á tarị bá á didụbamọ wẹrịemi bara ámịnị mọ nimi, bá gbein adụdụ kpọ nanamịni.—Prov. 31:28.

17. Yei-ụbọ tebara ka kị wó taa didụbamọ wẹrịemi bara mịẹdịa a paaemi a o?

¹⁷ Ebimịẹdịa bá á didụbamọ. Taa tarị wẹrịemi yei-ụbọ ụ taa kọn zorugha fa bá ámịnị yelaaemi bara ka kị á diimịnị. Bá ámịnị Jehovah bara kị duo boemi yelaa dịẹpịrịye bara ka kị á dimọmịnị. (Prov. 18:22; 31:10) Bịsẹ bara mịẹdẹ ifiesẹ, ámịnị zọzọ angamịnị ifie kpọ ómịnị laa ebibara bá didụbamọ bara ka kị á mọ mó mịẹmịnị. Zọzọ angamịnị ifiemị, Ómịnị á penimọ wẹrị á mịẹ ye a paagha anịghakpọ ómịnị á tarịgha bara iroromụ yeama mịẹgha fa, bá ụ taa ịkịọụ bọọ bụụdọọnmịnị yeama kpọ biigha fa.f Ómịnị kpọ Jehovah mọ peree ịkịọụ nanamụ yeama kị mịẹ.—Acts 24:16.

18. Yei-otu teeki gbinipẹlẹ agbẹị-emi a o? (“Taa Dịdụbamọemị Yei-ụbọ Mịẹ Agbẹị-emi Nia Yeama” ekpedi kpọ dii)

¹⁸ Yei-otu, ámịnị ifiebosẹ ánị ẹrẹmịnị egberibo mọ bá mịẹmịnị yebo mọ kọn ánị erebo didụbamọ daba Jehovah pọwẹị á pịrịmịnị. Á dọọnmụ yesẹ mịẹgha fa bara gbinipẹlẹ. Ebimịẹ á pịri, á didụbamọ, bá á tarịemi bara mịẹdịa. Ị́ bịsẹ bara mịẹdaba, ámịnị yelaa ị́ pịrịemi bara kị mịẹdịamịnị. Ị́mịnị ị́ taa didụbamọdẹ ifiesẹ, ị́mịnị iné yelaa dẹịn ikie kị kekeremịnị—anị ị́ mọ Jehovah mọ ikie bị.—Ps. 25:14.