Tokoni Akị Jehovah Pịrị

1. Wo ifiebị biin otu te ka kị bọlọụdaamịnị a o?

BEI tịẹkirimị ị́ kpọ kịmịawọụ ánị angọbo didụbamọ zịnịotu dẹịn-emi bara ẹrịmịnị a o? Gbaamaba, zụaotu internet duo ánị mịẹmịnị yebo kọn angọserimọ bá tokonị kọn angọ pịrị dọụmịnị yọ duonị biin yeama kị mịẹmịnị. Bịsẹ bara kị gbaa kpọ, biingha kịmịama tokoni kọn Jehovah pịrịmịnị. Tokoni akị Jehovah pịrị gbaadaba, teeki wo tuu a, bá wo dịnẹmọwẹrị Jehovah tokonimụ tuu kpọ wo mọ kẹrị ẹrẹteimịnị. Omịnị Ọkpọnanaowei laa agbẹị-emi tokoni kọn ụ pịrịmụ bara mọ bá mị bọlọụmị Jehovah wó ẹrẹ mịẹ yalịyalịmụ bara kpọ wo mọ tolumọmịnị.

TOKONI AKỊ JEHOVAH PỊRỊ GBAADABA TEEKI WO TUU A O?

2. Jehovah tebara ka kị Sinai ogun ma omịnị tokoni nana agbẹị-emi bara mịẹdịa ma o? (Bọlọụ akpakpa dii.)

² Tokoni ba te ye a o? Bible mị tokoni gbaadaba, anị kịmị mịẹ didụbamọ nanamịnịye kị gbaamịnị. Israel otubo Egypt a barasiin ifiebị Jehovah alaghatimi wó kụrọ mịẹdịamị. Iroro dii: Biin Israel otuama Sinai ogun mọ naịnyọ a timi Jehovah gbaa á pịrị dọụmịnị egberi peị dọụtimi ifiebị, obudu ogunsẹ terifamọmị. Vurudumị, ogbo zigei paawẹrị ánị bụọbo yanrịnmị, agbarara-gbururu, bá egbelegbele kpọ fie kụrọmị. (Ex. 19:​16-18; 24:17; Ps. 68:8) Jehovah bịsẹ kụrọ yebo mịẹ ifiebị, Israel otubo mịẹ tamamamị, ámịnị kọkọ Jehovah tokoni agbẹị-emi bara nimimị.

3. Tebara ka kị Jehovah tokoni a paaemi a o?

³ Kịmịawọụ tokoni akị Jehovah pịrị a paaemi a o? Kọkọ paaemi. Kẹnị ụwọụ anị omịnị Jehovah nana wẹrịemi kụrọ mọ bá wó ebi inyenrinbụọbo mọ gbaa zịnịotu pịrịmịnị yọbị. Bịsẹ yọ bụọmọ kpọ, omịnị ebi fịrị wẹnịdaba, Jehovah kị baratụa wo pịrị bịsẹ fịrị wẹnị bara wọ mọ gbaa kịmịotu pịrịmịnịsẹ, omịnị Jehovah kị tokonimịnị. (Isa. 26:12) Pẹrẹowei David tokoni akị Jehovah pịrị baramị ebi mịẹdịaye ka paaemi. Ómịnị Israel otubo tọrụyọ bọọ tẹẹbịbị mịe Jehovah yarịmị, David gbaamị: “O Jehovah, ị́mịnị kị seridẹịn owei bá kụrọbosẹ nanaowei, ị́mịnị kị ebi ba dụbadẹịn emi, agọnọbọ mọ bá kiriogbo bọọ emi yebosẹ ị́mịnị kị nana wẹrịemi.” David tẹẹ siinbị, “yọ bọọ emi kịmịbosẹ Jehovah tokonimị.”—1Chron. 29:​11, 20.

4. Jesus tebara ka kị Jehovah tokoni ma o?

⁴ Jesus kiriogbo bọọ timi ifiebị, ụ Daụ kị kụrọ akị ụ pịrịwẹrị tamamaa yebo mịẹmịnị bara gbaamị. (Mark 5:​18-20) Jesus wó inyenrinbụọ mọ bá Jehovah emibara gbaa kịmịotu pịrị yọ mọ akị Jehovah tokonimị. Kẹnị ifie, Jesus karịwarị ka kịmịama tolumọ timimị. Kẹnị seitẹmẹ angọ a timi 18 years baịdẹ ere kpọ timi ụ peimịnị. Amịnị kụrọ dọọn kị nanawẹrịmị, sei-tẹmẹbo ánị angọ mịẹ seimọdẹ duonị amịnị ba ebibara nimi tịẹgha. Dieneni nana yọ duonị, Jesus mú á lawẹrị bọụbọụ bara, gbaa a pịrịmị: “Ereraụ, iné dọọnmị iné angọ duoseridẹ.” Ómịnị bara akị anị tịbị ma gbana ifiebị, amịnị bịsẹ tịẹkirimị angọ kụrọwẹrị ebibara tịẹmị bá “tokoni akị Ọkpọnanaowei pịrịmị.” (Luke 13:​10-13) Amịnị ebi tuu nanawẹrị tokoni kọn Jehovah pịrị baramị, omịnị kpọ Jehovah tokoni agbẹị-emi ebi tuama nana wẹrịemi.

TEEKI WO DỊNẸMỌWẸRỊ JEHOVAH TOKONIMỊNỊ A?

5. Tetuama kị duonị omịnị didụbamọye kọn Jehovah pịrịmịnị a o?

⁵ Omịnị Jehovah didụbamọ wẹrịemi kị duonị tokoni kọn ụ pịrịmịnị. Omịnị biin tuama kị nanawẹrị Jehovah didụbamọmịnị. Jehovah kị kụrọ nana dẹịn-emi; wó kụrọbị dụụ fa. (Ps. 96:​4-7) Wó tẹmẹ wẹrịemi yebo wo mọ didaba Jehovah kịlịkịlị-nimiye nana wẹrịemi bara mịẹgaan wẹrịemi. Jehovah kị ụndụ mọ bá wo dọụ wẹrịemi yebosẹ kọn wo pịrịmịnị. (Rev. 4:11) Ómịnị ụ karịmịnị otubo a barasingha. (Rev. 15:4) Wó mịẹmịnị yebosẹ bọlọụ bụọmịnị, bá ómịnị ifiebosẹ gbaa bara kị mịẹmịnị. (Josh. 23:14) Anịkị duonị bụrụowei Jeremiah Jehovah gbelemọ yọbị gbaamị: “Akpọ bọọ emi kịlịkịlị kịmịbo mọ bá ánị daabụọbo mọ didaba, kịlịkịlị ị́ laaemi kịmị fa”! (Jer. 10:​6, 7) Omịnị kọkọ biin tuama kị nanawẹrị wo agọnọ Daụ didụbamọ agbẹị-emi. Anịa omịnị Jehovah didụbamọ yọkị bụọmọ kpọ omịnị ụ tarị kụrọmọ wẹrịemi.

6. Tetuu kị duonị omịnị Jehovah kulemịnị a o?

⁶ Omịnị Jehovah tarị kụrọmọ wẹrịemi kị duonị ụ tokonimịnị. Jehovah ebi inyenrinbụọbo kị duonị omịnị ụ tarị kụrọmọmịnị. Ómịnị dieneni nana wẹrịemi. (Ps. 103:13; Isa. 49:15) Omịnị dọọn naamịnịsẹ Jehovah bolouịmbẹlẹgha. (Zech. 2:8) Ómịnị baratụa wo pịrịwẹrị ụ nimi bá wó ikie-otuama a paamịnị. (Ps. 25:14; Acts 17:27) Jehovah angọ-iyerimọmịnị; “Ómịnị angọ-iyerimọwẹrị agọnọ mọ kiri mọ diimịnị, suusụọmịnị otuama kụrọmọmịnị.” (Ps. 113:​6, 7) Bei yebosẹ wo mọ ditụa daba kịmịsẹ Ọkpọnanaowei tokoni agbẹị-emi.—Ps. 86:12.

7. Omịnị te bẹbẹpaa fomuun kị nana wẹrịemi a o?

⁷ Zịnịotu kpọ Jehovah nimi wo mọ dọụmịnị kị duonị omịnị ụ tokonimịnị. Biin kịmịama Jehovah gesii nimigha. Tetuu a o? Tuubị Satan Jehovah mịẹgha ekpe egberiama gbaawẹrị ánị ikịọụbosẹ seimọsiindẹ. (2Cor. 4:4) Satan ekpe kịmịama pịrị amọ Jehovah sei bụọmọgha, tọrụtụa wo diigha, bá ómịnị kị akpọ bọọ paamịnị bụụdọọnyebosẹ mịẹpaamọmịnị bara kị gbaamịnị. Jehovah gesii Ọkpọnanaowei bara omịnị mọ nimi wẹrịemi! Omịnị ba baratụa zịnịotuama kpọ pịrịwẹrị bo ụ nimi bá tokonị akị ụ pịrịmịnị. (Isa. 43:10) Psalm 96 tokoni akị Jehovah pịrị egberiama kị gbaa wẹrịemi. Omịnị psalm 96 ditụa mịnịbị, omịnị akị Jehovah tokonị agbẹị-emi bara kẹrị iroro.

OMỊNỊ TEBARA KA KỊ JEHOVAH LAA AGBẸỊ-EMI TOKONI KỌN Ụ PỊRỊ A PAAEMI A O?

8. Omịnị tebara ka kị Jehovah tokoni a paaemi a o? (Psalm 96:​1-3)

⁸ Psalm 96:​1-3 goo. Omịnị wo gbaamịnị egberibọ mọ bá mịẹmịnị yebo mọ kọn Jehovah tokonimịnị. Mị Bible yọmị, Jehovah wo tịịn bo “duma tuun wó ẹrẹ tokoni,” “wó zụọbụọmọye pịrịmịnị ebiegberi gbaa,” bá “wó ebi gbaa ibebosẹ pịrị” bara kị gbaa wẹrịemi. Omịnị bịsẹ bara mịẹdaba wo agọnọ Daụ tokonimịnị. Peibolou nana Jew-otubo mọ bá bọlọụ kụraị sọnransii Christtuuuo-otubo mọ ifie famọgha bara kị Jehovah ebi inyenrinbụọbo mọ wó mịẹ á pịrịdẹ ebi yebo mọ gbaa zịnịotu pịrịmị. (Dan. 3:​16-18; Acts 4:29) Omịnị tebara ka kị á dimịẹ a paaemi a o?

9-10. Ị́mịnị te ka kị Angelena paamọye duo tolumọ akị ma o? (Foto kpọ dii.)

⁹ Wo wẹrị Angelena paamọye dii,a bei bịnarauma United States ka inyenrinmịnị. Amịnị malafagha bara ánị fịrịwẹnịmịnị yọbị Jehovah ebi inyenrinbụọbo gbaa á mọ mọ́ fịrịwẹnịmịnị otubo pịrịmị. Amịnị aya ka bịsẹ yọ ma fịrịwẹnịmịnị duonị, Fịrị tịbị-otubo Angelena mọ zịnị aya fịrịwẹnịmịnị otuama mọ tịịnwẹrị, ánị angọ gbelemọ yeama gbaa yọ a múmị. Angelena amịnị bo Jehovah Iseri-araụ a paayọmị á mịẹ pọwẹị nana duonị, fotoama akị tuugbaa kịmịbo pịrịmụ bara kọn angọ tọlọmọmị. Anịa, Angelena ẹrẹmụ ifiebo naịnbị, kẹnị kịmị kị bọlọụ ẹrẹmị, ómịnị Jehovah Iseriotu warịbolou kị duo paaemi. Anịa ọ́mịnị Jehovah Iseriotu mịẹgha ekpe egberiama gbaamị. Angelena gbaamị: “Yebị ị mịẹ malafamị. Ị gbaa angọ pịrịmị: ‘Ịmịnị kọkọ bei kịmị bụọmọ wẹrị ekpe egberiama gbaa Jehovah ẹrẹ seimọmịnị a? Anịghakpọ ịmịnị laa gesii gbaa á pịrịmịnị?’”

¹⁰ Kịmịbị ẹrẹsiindẹ bị, Angelena ánị adụdụ bọọ kẹsị tẹẹbịbị mịẹmị. Ámịnị didụbamọye nana bara kọn gbaa kịmị pịrịmị: “Jehovah Iseriotu kị ị kpọ sibe paamọmị, anịa ịmịnị mọkpọ Jehovah Iseri-araụ.” Paa yemị á gbele kụrọmọ kị gbaa kpọ, Angelena ánị tẹmẹanga yeama mịẹmịnị ifieama asụọ fotoama akị á dịa bá didụbamọye nana bara akị ánị peibolou kpọ gbaa á pịrịmị. (1Pet. 3:15) Kunumọbị teeki paa ma o? Angelena gbaa egberibo, bịsẹ owei gbele kụrọmọmị. Ómịnị Jehovah Iseriowei a timi ifiebị ukie wẹrị zụa ebi yeama gbaamị. Angelena gbaamị: “Omịnị ifiebosẹ Jehovah ebi gbaa paamọ agbẹị-emi. Omịnị Jehovah ẹrẹ gbaa paamọmịnị yọbị ebi fomuun kị wo laaemi.” Kịmịama kị Jehovah ẹrẹ gbaseimọmịnị kpọ omịnị wó ebi inyenrinbụọbo gbaa. Omịnị Jehovah tokonimịnị yọbị ebi fomuun kị wo laaemi.

11. Gesii bara Jehovah karịmịnị otubo tebara ka kị Psalm 96:8 gbaa bara dimịẹmịnị a o?

¹¹ Psalm 96:8 goo. Omịnị wo nana yebo akị Jehovah tokoni a paaemi. Gesii Ọkpọnanaowei karịmịnị otubo bịsẹ bara kị mịẹmịnị. (Prov. 3:9) Gbaamaba, Israel otubo sịlị bá zịnị yelaa yeama otuowẹrị karịwarị kẹrị bá tọlọmọ fịrịama wẹnịmị. (2Ki. 12:​4, 5; 1Chron. 29:​3-9) Zụa Christtuuduo-otuama kpọ “nana yeama” otuo Christ mọ bá fịrịmọpaa-otubo mọ pịrịwẹrị egberigbaa fịrịwẹnị bọlọụ amúmị (Luke 8:​1-3) Bọlọụ kụraị sọnransii Christtuuduo-otubo kpọ ánị bịnaotubo ụya bolou emibara naa ifiemị, yelaa yeama saị á yarịmị. (Acts 11:​27-29) Mị ifiemị, omịnị kpọ wo nana yeama akị otuoye mịẹwẹrị Jehovah tokoni a paaemi.

12. Wo otuoyebo tebara ka kị Jehovah tokonimịnị a o? (Foto kpọ dii.)

¹² Wo otuoyebo kọkọ tokoni akị Jehovah pịrịmịnị, kẹnị paaye wo mọ dii. Kụraị 2020 reportbị gbaa amọ kụrọ mọụn Zimbabwe tịịnmịnị ibe bọọ paamị. Biin kịmịama fịyaị nanagha yọ duonị mọụn pịrị baamụ bara kị paamị, yebị Prisca tịịnmịnị bịnaraụ kpọ gbelemị. Ámịnị Wednesday bá Friday ereinbo egberigbaayọ amúmịnị. Anịa mọụn k’emi kpọ bá kiri gboro ifie kị laadẹ kpọ Prisca pẹlẹgha bara bịsẹ ereinbo egberigbaayọ amúmịnị. Amịnị egberigbaayọ amúmịnị ifiesẹ ánị ovị-otubo á dẹrịmịnị bá gbaa á pịrịmịnị, “Mọụn ị́ baamịnị o.” Prisca peibolou nana bara a parụmịnị, “Jehovah benebene wó odubo otubo gbein-koromọgha fa.” Alaghatimi Jehovah ogbobị fịyaịama saị mú bịnaotubo pịrịmị, fịyaịbo akị Prisca kpọ pịrịmị. Wo otuoyebo kị duo fịyaị mọ zịnị yeama mọ saị bei bịnaotubo yarịmị. Paa yebị Prisca dẹrịtimi otubo gbelemị, anịduonị ámịnị gbaa á pịrịmị, “Ọkpọnanaowei kọkọ ị́ gbeinmọ koromọgha, anịduonị omịnị kpọ ụ tolumọ nimi dọụmịnị.” Bịsẹ otubo sọnọma kịmị yetolumọyọ amúmịnị.

13. Wo inyenrinbụọbo tebara ka kị tokoni kọn Jehovah pịrị a paaemi a o? (Psalm 96:9)

¹³ Psalm 96:9 goo. Omịnị wo inyenrinbụọbọ kọn Jehovah tokoni a paaemi. Jehovah karịwarị bọọ emi ikịankụn otubo angọ yalịtimi agbẹị-emi. (Ex. 40:​30-32) Anịa wó inyenrinbụọbo yalịtimimụ yọ kị yelaa akị angọ yalịtimimụ yọ dẹịn-emi. (Ps. 24:​3, 4; 1Pet. 1:​15, 16) Omịnị angọtụadá “oru inyenrinbụọbo akị angọ duo serii.” Gbaamịnị barasẹ, omịnị wo mịẹtimi sei yebo gbein-koromọ, akị wo adụdụbo kpọ duo kọnsiindá “aya inyenrinbụọ kọn angọ a tụa.” Omịnị wo iroromịnị yebo mọ wo mịẹmịnị yebo mọ akị Jehovah ebi inyenrinbụọbo mịẹdịa. (Col. 3:​9, 10) Jehovah baratụa wẹrịemisẹ, kụrọ seiama mịẹtimi kịmị kpọ wó seibo a barasiinwẹrị aya inyenrinbụọ nana a paaemi.

14. Jack paamọ yebị te ka kị ị́ tolumọ ma o? (Foto kpo dii.)

¹⁴ Wo wẹrị Jack paamọye dii, omịnị akpotu-gbein olotu. Kịmịama Seitẹmẹ ka kị ụ tịịntimimị. Wo akpotu-gbein inyenrinbụọ duonị, Jack kẹrị ugula sụọmị, ụgụla pẹlẹ ifiemị ụ kọn mú baa bara kị gbaamị. Anịa, timi ụ baámụ ifie korumịnịbị, Jack ikoliwarị amú kịmịotu mọ Bible tolumọmịnị owei mọ koro Bible tolumọmị. Jack kụrọ seiama kị mịẹbụọmọdẹ kị gbaa kpọ, ómịnị deiwẹrị aya inyenrinbụọ nanawẹrị benibile Jehovah Iseri-kịmị a paamị. Jack dei waị ebi kịmị a paayọ duonị ụ baa dọụmịnị erein laabị, ụ mọ mọ́ ikoliwarị ma emi otubo youmị. Ikoliwarị ma fịrịwẹnịmịnị police-owei gbaamị: “Ikoliwarị bị Jack kị tịbịkụrọ-dẹịn timimị, anịa ómịnị waịbo ebidẹịn kịmị a paamị.” Jack baadẹbị barịị wiki bị, bịnaotubo waị ikoliwarị bọọ Bible tolumọyọ amúbị zịnị ikoliwarị emi owei kpọ bọ á sụọmọ Bible tolumọmị. Teeki ụ dịnẹmọ wẹrị Bible tolumọ ma o? Jack dei barabị wó angọ duosụọ duonị ómịnị Jehovah tolumọ nimi bá ụ karị dọụmị. Gaan yọbị, wose ebi inyenrinbụọ nanadaba tokoni akị Jehovah pịrịmịnị!—1Pet. 2:12.

JEHOVAH TEBARA KA KỊ ALAGHATIMI TOKONI KỌN WÓ ẸRẸ PỊRỊMỊNỊ A O?

15. Jehovah alaghatimi tebara ka kị beinmọ-beinmọ bara tokoni kọn wó ẹrẹ pịrịmịnị a o? (Psalm 96:​10-13)

¹⁵ Psalm 96:​10-13 goo. Psalm 96 kunumọ angamị Jehovah akị Pẹrẹowei bá kịrịị Ụgụlapẹlẹ-owei kpọ tịịn wẹrịemi. Jehovah tebara ka kị wó ẹrẹ tokonimịnị a? Anị wó kịrịị ụgụlapẹlẹ inyenrinbụọmị. Alaghatimi Jehovah wó ẹrẹ gbaseimọmịnị opu Babylon erema gbein-gọgọlọmịnị. (Rev. 17:​5, 16; 19:​1, 2) Jehovah opu Babylon gbein-gọgọlọ daba, zụa kịmịama boloudei wẹrị bo ụ karị kpọ paaemi. Kunumọ yebị, Armageddon laadaba, Jehovah Satan sei akpọ mọ bá wó ẹrẹ gbaseimọmịnị otubosẹ gbein-gọgọlọmịnị, anịa ómịnị ụ tarị, wó gbaa bara diwẹnị, bá tokoni akị ụ pịrịmịnị otubo zụọbụọmọmịnị. (Mark 8:38; 2Thess. 1:​6-10) Christ daatimi Kụraị Kẹnị Ogịzị bụọdaba, Jehovah beinmọ-beinmọ bara wó ẹrẹ mịẹ yalịyalịmịnị. (Rev. 20:​7-10) Bịsẹ ifie laadaba, “Jehovah nimiye bị kiriogbosẹ beinmịnị, beni abadị tọrụ bein-emi barami.”—Hab. 2:14.

16. Omịnị teeki gbinipẹlẹdẹ a o? (Foto kpọ dii.)

¹⁶ Bịsẹ ifiebị kịrịogbo ma timimịnị otubosẹ Jehovah ẹrẹ laa agbẹị-emi tokonimị akị ụ pịrịmịnị. Anị kọkọ bolouịmbẹlẹ ifie! Bịsẹ ifie naá laagha duonị, omịnị ifiebosẹ Ọkpọnanaowei ebi egberigbaa bá tokonị akị ụ pịrịmụ ebi inyenrinbụọama mịẹdịa. Bei yelaa fịrị mịẹmụ yọ duonị, Governing Body Psalm 96:8 sẹlẹ akị 2025 kụraị egberitịbị mịẹdẹ: “Jehovah ẹrẹ laa agbẹị-emi tokoni bị akị u pịrị.”