Iné Tolumọdẹ yebo Drawmịnị Yọmị Baratụa Ị́ Pịrịwẹrị Iné Tolumọdẹ Yebo Ukiemịnị

Biin ifie wo goodẹ yebo ukiemọ yọmị kụrọ wo pịrịmịnị. Anịa, Jesus tọnmọdịa yeama mọ bá tẹmẹ wẹrịemi yeama mọ akị kịmịotu tolumọ baramị baratụa wo pịrị a paaemi a? Ị́mịnị iné ịkịọụma bịsẹ fotobo ẹrẹmịnị ifiesẹ, baratụa ị́ pịrịmịnị. Bịsẹ bara kị, ị́mịnị iné tolumọdẹ yebo akịtụa iroroye mịẹmịnịsẹ baratụa ị́ pịrịmịnị. Tebara ka kị bịsẹ bara mịẹmịnị a o? Iné yetolumọmịnị ifiesẹ fotoama draw koromọ.

Aya yeama tolumọwẹrị, bịsẹ tolumọyebo akị fotoama drawmịnị yọmị baratụa biin kịmịama pịrịwẹrị ifiebosẹ bịsẹ tolumọyebo ukiemịnị. Bịsẹ yemị baratụa ị́ pịrịwẹrị gẹẹ wẹrịemi yebo bẹtịbị a sụọtuu nimigha anịa gẹẹ wẹrịemi tuu kpọ nimimịnị. Tolumọmịnị egberitịbịsẹ draw bara gbaa a—yelaadẹịn yobo kụmọ draw. Drawmịnị fotobo baratụa okosudẹ otubo kị pịrị dẹịn-emi.

Iné barịị yetolumọ angọ pịrịmụ ifiemị, iné tolumọdẹ yebo zụa fotoama draw. Bịsẹ yebị baratụa ị́ pịrịwẹrị iné tolumọdẹ yebo ukiemịnị bara bị ị́ mọ ẹrịdaba, ị́ mịẹ tamamaa kpọ paaemi!