Tolumọbịbị Pịrịmụ Barabị

1. Te ụbọ kị tolumọbịbị pịrị agbẹị-emi a o? Tuugbaa.

TOLUMỌBỊBỊ pịrịmụ yọbị tebara ka kị ị́ mịẹmịnị a o? Zụa kịmịama tolumọbịbị pịrịmịnị yọbị pọwẹịmịnị. Anịa zụa kịmịama tolumọbịbị pịrị dọụgha, pịrị kị pịrịmịnị kpọ pọwẹịgha bara ka kị pịrịmịnị. Paabara paabara wosẹ tolumọbịbị akị zịnịotu pịrịmụ fịrị nana wẹrịemi. Tetuu a o? Jesus gbaa amọ kịmịotu tarị ka kị wó tuuduo-otubo leleimịnị. (John 13:35) Anịduonị omịnị wo bịnaotubo tarị wẹrịemi bara mịẹdịamụ kẹnị ọwọu anị, omịnị agbẹị-emi tolumọbịbị kọn á pịrịmịnị yọmị. Bịble gbaa amọ omịnị “agbẹị-emi tolumọbịbịama pịrịmịnị yọmị” “ebi ikieama” nanamịnị.—Prov. 27:9.

2. Itu-kosuotu teeki nimi ebimọ agbẹị-emi a, bá tetuu a o? (“Week Ovurumị Yetolumọ Yọbị Pịrịmịnị Tolumọbịbị” ekpedi kpọ dii.)

² Itu-kosuotu kị tolumọbịbị pịrịmụ bara nimidẹịn agbẹị-emi. Jehovah, Jesus ka kị bei kịmịbo sẹlẹwẹrị itu kekeremịnị. (1Pet. 5:​2, 3) itu-kosuotubo akị itu kekeremịnị kẹnị ọwọụ anị ámịnị Bible duo ẹrẹbịbịama pịrịmịnị. Zụa ifieama omịnị tolumọbịbị dọụ wẹrịemisẹ ámịnị tolumọbịbị kọn wo pịrị, bá tẹmẹanga ma suusuodẹ otubo kpọ pịrịmịnị. Itu-kosuotubo mọ bá wo mọ tebara ka kị ebi tolumọbịbị pịrị a paaemi a o?

3. (a) Omịnị tebara ka kị ebi tolumọye pịrịmịnị kịmị a paamịnị a o? (Isaiah 9:6; “Jesus Tolumọbịbị Pịrị Bara Dimịẹ” ekpedi kpọ dii.) (b) Bei egberitịbịbị omịnị teeki tolumọ dọụmịnị a o?

³ Omịnị Bible bolou bọọ emi kịmịbo duo ebi tolumọbịbị pịrịmụ bara tolumọ akị a paaemi, anịa Jesus mịẹdịaye kị ebidẹịnye. Bible bị “Tamama kịmị tolumọ-owei” ka kị Jesus tịịn wẹrịemi. (Isaiah 9:6 goo.) Bei egberiṭbịbị, omịnị kịmịotu wo bara duo tolumọbịbị biidaba wo mịẹmụ yebo tolumọmịnị bá biigha ifie kpọ akị tolumọye pịrị agbẹị-emi bara kpọ wo mọ tolumọmịnị. Bịsẹyọ bụọmọ kpọ, agbẹị ifie bá agbẹị bara akị tolumọbịbị pịrịmịnị yọbị yelaaemi bara kpọ wo mọ tolumọmịnị.

KỊMỊ WO BARA DUO TOLUMỌBỊBỊ BIIDABA

4-5. Kịmị tolumọbịbị akị wo bara duo biidaba, omịnị te biibịbị kị kọn angọ bii agbẹị-emi a o? Ye akị tọnmọ gbaa.

⁴ Kịmị iné bara duo tolumọbịbị biidaba, ị́mịnị bọlọụ teeki mịẹ agbẹị-emi a o? Kaanghaba tolumọbịbị pịrịmụ yọmị wo dịsẹ kụrọmọ kpọ paaemi. Anịa bọlọụ angọ bii, ‘Ịmịnị kị bị tolumọbịbị pịrị agbẹị-emi?’ Zụa ifieama, tolumọbịbị kọn ụbọ pịrị a paaemi kịmị kọn ụ dịạmụ yọkị ebidẹịn-emi.

⁵ Wẹrị kẹrị iroro dii. Kaanghaba iné ikieowei kụrọ dọọn nana wẹrịemi. Ómịnị akị wó dọọn zụọmụ bẹbẹ ọwọụama tuudọụdẹ, ómịnị tẹ kị ị́ dịsẹdẹịn emi a bara kọn ị́ biidaba, kẹnị ị́ dịsẹdẹịn kpọ paaemi. Anịa ị́mịnị dọọnzụọ oweigha bá bịsẹ fịrị kpọ tolumọgha ifiesẹ, laa baratụa ụ pịrị a paaemi kịmị kọn ụ dịa, anị ị́mịnị akị baratụa ụ pịrị a paaemi ebidẹịn ụwọụmị.

6. Tetuu kị duonị omịnị etipou dẹkị tolumọbịbị pịrị agbẹị-emi a o?

⁶ Omịnị kọkọ tolumọbịbị pịrị agbẹị-emi bara kị paaemi kpọ, omịnị dọlọ etipou dẹkị tolumọbịbị pịrịmụ yọbị ye laaemi. Tetuu a o? Proverbs 15:28 gbaa amọ “kịrịịye mịẹmịnị kịmịmị ebibara ye iroro dẹkị parụbịbị pịrịmịnị.” Anịa omịnị kọkọ parụbịbị nimi wẹrịemi bara kị paaemi kpọ teeki mịẹmịnị a o? Omịnị mọkpọ yemị a sụọtuu dọụ, tẹẹ, bá yebị kẹrị iroro agbẹị-emi. Bịsẹbara wo mọ mịẹdaba wo gbaamịnị egberimị, Jehovah kị duobo emibara mịẹgaan paamọdẹ. Wo bụrụowei Nathan mịẹdịa yebị ditụa.

7. Bụrụowei Nathan paamọ yebị te ka kị ị́ tolumọ ma o?

⁷ Bụrụowei Nathan mọ, ibe-daaowei David mọ ẹrẹtimi ifiemị, ómịnị karịwarị kẹrị Jehovah pịrị dọụmịnị bara Davịd mọ gbaa ụ pịrịmị. Nathan bịsẹ tịẹkirimị David mịẹ a paaemi bara gbaa David pịrịmị. Anịa Nathan bọlọụ Jehovah bii dẹkị parụbịbị pịrị agbẹị timimị. Tetuu a o? Jehovah, David kị karịwarị kẹrịmụyọ dọụgha. (1Chron. 17:​1-4) Bị paa yebị wo mọ didaba, kịmị tolumọbịbị akị wo bara duo biidaba, omịnị “izoumọ izoumọ bara” akị mịẹ kụmọ—Jas. 1:19.

8. Tetuu kị duonị ebibara ye iroro dẹkị tolumọbịbị pịrị agbẹị-emi a o?

⁸ Omịnị ebibara ye iroro dẹkị tolumọbịbị pịrị agbẹị-emi zịnịtuu mọkpọ emi: Omịnị etipougha timi tolumọbịbị pịrịwẹrị ụbọ mú akpotu a sụọdaba, wo ẹrẹ kpọ bolou bọọ sụọmịnị. Anịduonị, omịnị ebibara ye iroro dẹkị tolumọbịbị pịrị agbẹị-emi.

KỊMỊ BIIGHA BARA TOLUMỌBỊBỊ PỊRỊ DỌỤMỊNỊABA

9. Itu-kosuotubo tolumọbịbị pịrị dọụmịnịsẹ te ka kị ikịọụ a wẹrị agbẹị-emi a o? (Galatians 6:1)

⁹ Kịmị “agbẹịgha ye mịẹdẹ ifiesẹ” itu-kosuotubo mú ụbọ laa wẹrị tolumọbịbị pịrịmịnị. (Galatians 6:1 goo.) Bịsẹyọ gbelemọ study note gbaa amọ “bịsẹ ụbọmị naa kụrọsei kị mịẹgha kpọ,” ómịnị agbẹịgha bara wẹnịdẹ. Anịa itu-kosuotubo baratụa bịsẹ ụbọ pịrịwẹrị fagha fagha ụndụ nanamụ yọ ka kị ịkịọụ a tụawẹrị mú ụbọ laamịnị. (Jas. 5:​19, 20) Jehovah kịmịsẹ ánị sei mọ ebi mọ nimi ịkịọụ kị dii iroro tọnmụ fomuun kọn wo pịrịdẹ. Anịduonị itu-kosuotubo, ụbọ kọkọ agbẹịgha ye mịẹbara nimi pẹlẹdẹ kị mú ụ laamịnị, bịsẹ bara ámọ mịẹdaba ánị tolumọbịbịmị ụ gbele a paadẹ. (Rom. 14:​1-4) Anịa, ụbọmị kọkọ agbẹịgha ye mịẹ wẹrịemi bara itu-kosuotubo mọ nimi daba, itu-kosuotubo tebara ka kị tolumọbịbị pịrị agbẹị-emi a o?

10-12. Itu-kosuotubo tolumọbịbị akị biigha ụbọ pịrị dọụmịnịsẹ teeki mịẹ agbẹị-emi a o? Tọnmọdịaye gbaa. (Foto kpọ dii.)

¹⁰ Itu-kosuotubo, kịmị tolumọbịbị biigha timi tolumọbịbị pịrị dọụmịnịaba bụụdọọnye nanamịnị. Tebara o? Fịrịpaaowei Paul gbaa amọ kịmị agbẹịgha ye mịẹ dẹkị angọ nimi a paaemi. Anịduonị itu-kosuotubo bọlọụ baratụa ụbọ pịrị wẹrị tolumọbịbị kẹrịakịmụ bara kọn angọ tọlọmọmịnị.

¹¹ Kịmị biigha timi tolumọbịbị pịrịmịnị yọbị kụrọemi kiri gboromịnị bara k’emi. Ómịnị kiri mịẹ bọụbọụ dẹkị, yebo gboromịnị. Gboro sindaba yebo sọụmụyọ duonị beni dẹsịmọmịnị. Bịsẹ bara kị, kịmị biigha bara ka kị tolumọbịbị pịrị dọụmịnị aba, ómịnị baratụa ụbọ pịrịwẹrị tolumọbịbị kẹrịakịmụ bara kị mịẹmịnị, gbaamaba agbẹị ifie bá ụbọ dịsẹ-emiyọ ka ẹrẹteimịnị, itu-kosuoweimị ụbọ bọọ dịsẹ nana bá ye akị ụbọ mọ ẹrẹtei dọụmịnị bara kpọ gbaa ụ pịrịmịnị. Kịmị ifiebosẹ tarị nana bara ka kị tolumọbịbị pịrịmịnịsẹ, egberi peimịnị ụbọmị kẹrịakịmụ yọmị ba kụrọgha fa.

¹² Itu-kosu-owei mị bịna-ụbọ mọ ẹrẹteimịnị ifiemị kịmịsẹ mịẹkirimịnị bara kọn wó ukiemọmịnị, bịsẹ yọmị baratụa ụ pịrịwẹrị laa tolumọbịbị karịakị a paaemi. (Rom. 3:23) Ómịnị ụbọ mọ ẹrẹmịnị ifiemị, dọọ bá didụbamọ bara Bible gbaa wẹrịemi bara ka kị ụbọ mọ ẹrẹteimịnị. Bịsẹ yọbị baratụa bịna ụbọ pịrịwẹrị mịẹkiridẹ bara akị angọ nimimịnị, bịsẹ bina-ụbọ mị mịẹkiridẹ bara akị angọ nimidaba itu-kosu-owei mị bọụbọụ bara ụ mịẹ agbẹị-emi yebo gbaa gaan ụ pịrịmịnị. Kunumọbị, itu-kosu-owei mị ụbọ nana wẹrị ebi inyenrinbụọbo gbaa u pịrịmịnị, bá wó mọ tẹẹmịnị, bịsẹ yọbị baratụa ụbọ pịrịwẹrị tolumọbịbị kẹrịakị a paadẹ.—Jas. 5:15.

13. Itu-kosuotubo teeki mịẹ dẹkị ụbọmị ụ tolumọmịnị tolumọbịbị a sụọtuu nimimịnị a o?

¹³ Zụa ifieama, kịmị ebibara ụ pịrịmịnị tolumọ egberibo sụọtuu nimigha kpọ paaemi. Anịa bịsẹ bara paagha mọ yọ duonị itu-kosuotubo teeki mịẹmịnị a? Ámịnị tarị nana bara kịlịkịlị biibịbịama bii a paaemi. (Eccl. 12:11) Ụbọmị biibịbịbo parụmịnị bara mị baratụa á pịrịwẹrị ụbọmị kọkọ ụ tolumọmịnị tolumọbịbịbo a sụọtuu nimiwẹrị bara nimimịnị.

AGBẸỊ IFIE MỌ AGBẸỊ BARA MỌ KA KỊ TOLUMỌBỊBỊ PỊRỊ

14. Omịnị boloukọnmịnị ifie tolumọbịbị pịrị agbẹị-emi a o? Tuugbaa.

¹⁴ Wosẹ yalịgha duonị, ẹrẹbịbị mọ inyenrinbụọ mọ kọn ye mịẹ zịnị kịmị dọọnmọ a paaemị. (Col. 3:13) Zụa ifieama omịnị zọzọ mịẹ boloukọn kụrọmọ kpọ paaemi bara Bible mọ gbaamị. (Eph. 4:26) Anịa omịnị boloukọn emi ifie kị tolumọbịbị pịrịmụ bara mịẹkụmọ. Tetuu a o? Tuubị “kịmị tọbọụ boloukọn emi ifie Ọkpọnanaowei dọụbara mịe a paagha.” (Jas. 1:20) Anịduonị omịnị boloukọn emi ifie kị tolumọbịbị pịrịdaba, yebị sei bọlọụ ifie dẹịn kpọ paaemi. Bịsẹ bara gbaadẹ duonị yebị wo mịẹ boloukọnmịnị bara gbaa ụbọ pịrị kụmọ bara gbaagha. Anịa, etipou timi iné boloukọn yọbị iyeri dẹkị ụbọ mọ ẹrẹtei. Bịsẹyọ gbelemọ yọbị wo wẹrị Job ikieowei, Elihu mịẹdịaye duo tolumọye nana.

15. Omịnị Elihu duo teeki tolumọ akị ma o? (Foto kpọ dii.)

¹⁵ Job wó ekpe ikieotubo gbaa egberibo duonị ẹrẹtimi zụa erein-ama baịmị, anịa bịsẹ ifiesẹ Elihu kperein kị timi ụ peimị. Ómịnị dieneni akị Job a nanamị. Job, Jehovah mịẹgha yeama gbaa bá ómịnị sei mịẹgha bara kpọ gbaa duonị Elihu boloukọnmị. Mọabịkpọ, Elihu etipou bara korutimi agbẹị ifie kị ẹrẹmị, ómịnị bọụbọụ bá didụbamọye nana bara ka kị Job mọ ẹrẹmị. (Job 32:2; 33:​1-7) Elihu mịẹ yebị kẹnị yelaa ye ka kị wo tolumọ wẹrịemi: Omịnị tarị nana bá boloukọngha ifie kị tolumọbịbị pịrịmụ yọbị ebi-dẹịnmịnị.—Eccl. 3:​1, 7.

PẸLẸGHA BARA TOLUMOYE PỊRỊ BÁ KERỊAKI

16. Psalm 32:8 te ka kị wo tolumọ ma o?

¹⁶ Bei egberitịbị duo boemi Bible yọmị gbaa amọ ‘Jehovah tọrụtụa wo diwẹrị tolumọbịbị kọn wo pịrịmịnị.’ (Psalm 32:8 goo.) Mị gbaa egberimị Jehovah ifiebosẹ baratụa wo pịrịmịnị bara kị mịẹgaan wẹrịemi. Ómịnị tolumọbịbị bẹtịbị pịrịgha anịa baratụa wo pịrịwẹrị bịsẹ tolumọbịbịbo akịtụa inyenrinmịnị. Anị kọkọ ebi mịẹdịaye! Omịnị kpọ tolumọbịbị kọn zịnịotu pịrịmụ fomuun nana daba, pebidá Jehovah kị dimịẹ, wo tolumọ dọụmịnị otubo tarị bá baratụa á pịrịwẹrị bọlọụ bụọyọ nana.

17. Bible duo tolumọbịbị pịrịdaba te ye mọ kị lei-emi a o? Tuugbaa. (Isaiah 32:​1, 2)

¹⁷ Omịnị tolumọye pịrị bá kẹrịakị agbẹịdẹịn ifie kị laadẹ. (2Tim. 3:1) Beni fa yọ paaemi tọrụ beni kịmịotu mịẹ pọwẹị nanamịnị bara kị, itu-kosuotubo Bible duo tolumọbịbị pịrịmịnịsẹ, kịmịotu mịẹ pọwẹị nanamịnị. (Isaiah 32:​1, 2 goo.) Wo ikieotu wo dọụ wẹrịemi tolumọbịbịbo kọn wo pịrịmịnị yọbị wo mịẹ pọwẹịmịnị, ánị tolumọbịbịbo “silver kọn mịẹ wẹrịemi kara wẹrịemi yeama bolou emi Gold apple-ama kị dei-emi.” (Prov. 25:11) Pebidá wosẹ kịlịkịlị timi ebi tolumọye pịrị bá kẹrịakịmịnị kịmịama ka paa.