Ị́ Kpọ Nimi Wẹrịemi A?
Bọlọụ kụraị sọnransi mị ịkịankụn-otubo, ịkịankụnmụ nama baadaba tebara ka kị asịịnbo mịẹtimi ma o?
Kụraịbosẹ Israel ibe ma timi ịkịankụn otubo biin nama-ama ka kị tịna ma ịkịankụn timimị. Paabụọdẹ ye gbaamịnị owei Josephus, gbaa baramị Asịbabẹịn oge teimịnị ifiemị 250,000 dẹịn-emi nama-ama ka kị yọụnmọ ịkịankụn timimị, anịduonị biin asiin-ama kị dẹsị paamọ timimị. (Lev. 1:10, 11; Num. 28:16, 19) Tebara ka kị bịsẹ asịịnbo mịẹtimi ma o?
Kirisou-otu Herold kẹrị wẹrị karịwarị yọ bọọ kiri soutimi ifiemị, zụa yeama erịmị. Ámịnị asịịnbo karịwarị bọọ emi tịna duo tẹịn bụọtimi opolomị ẹrịmị.
Wo wẹrị tịna mịẹ yalịtimi maa yeama ditụa:
Tịna kirianga ma emi opolo: Mị Mishnah tịịnmịnị fun mị maa opolo tịna kiri anga ma emi bara gbaamị, 200 years bụọdẹ ifie Jew otubo gẹẹ wẹrị oloko fun kpọ tịna kiri anga ma emi bara gbaamị. Ịkịan kụndẹ asịịnbo mọ benibo. . .mọ sụrụdaba, bịsẹ benibo tẹịn mú brook Kidron tịịnmịnị oba kị duo suomịnị.
Mishnah fun ma gbaa wẹrịemi tịna mọ naịnemi “opolo” mọ kirisou-otubo gbaa egberi mọ kẹnịsụọmọemi. The Cambridge History of Judaism fun kpọ “opu oba” tịna mọ naịnemi bara dọụ ẹrịmị. Fun mị gbaamị: “Kaanghaba tịna ma ịkịan-kụn siindaba, benibo mọ asịịnbo mọ kọn bịsẹ opolo kị duo dẹsị paamọ timi bara kị paaemi.”
Biin beni kị dọụ wẹrịemi: Ịkịankụn oweimị ịkịan kụn sindaba, yọ mịẹ yalịmụ yọ duonị biin benị kị dọụ wẹrịemi. Mị yelaa fịrị wẹnịmụ yọmị, ịkịankụn oweimị opu ama kị duo beni nana timimị. Anị ómịnị opu ama duo tẹịn bụọmịnị obabo kị duo beni nana timimị. Kirisou-owei Joseph Patrich gbaa amọ: “Bịsẹ ifiemị zịnị ịkịankụn timi karịwarị bịsẹ a paa oba nana wẹrị ịkịankụn sindaba akị tịna sụrụgha timimị.