“Sụụmị Jehovah Ye”

Kụraị 1990 sẹ kị bei egberibị emi, France daabụọ gbaa a mọ wo France branch officebị, wo bịnaotubo otuwodẹ sịlịbo duo tịbịsaa gbẹẹ á pịrị, ánị gbaa sịlị kpọ dubamị. Anịduonị omịnị egberibị akị France ebe ma emi ụgụlasụọ warịbo a múmị, ámịnị ụgụlapẹlẹ seimọ wo pịrịmị. Anịduonị France daabụọ mị, wo branch office bank account duo sịlịbo akịmị. Ánị akị sịlịbirimị 4.5 million euros ($6,300,000 U.S.) dẹịn-emi. Anịduonị omịnị egberibị akị ECHR a múmị. Anịa ámịnị gbaa wo pịrị a mọ, mịẹdẹkị ụgụla sụọmịnịbị, ámịnị bọlọụ wo mọ daabọụ otubo mọ tịịn petimiwẹrị ụgụla sụọgha bara egberi kẹrị ẹrẹteịmịnị.

ECHR a tịbịtịẹmọwẹrị wo mọ mọ ẹrẹmụ ụbọmị, omịnị zụa sịlịama gbẹẹ akị France daabụọ pịrị bara gbaa wo pịrị paaemi bara omịnị mọ iroromị. Anịa Bible gbaa bara diidaba omịnị kala sịlị kị gbẹẹ kpọ mịẹkiridẹ. Baratụa Daabụọ fịrị pịrịmụ kị duonị bịnaotubo bei sịlịbọ otuwomị, ámịnị otuwo akị daabụọ pịrịgha. (Matt. 22:21) Bịsẹ bara kị gbaa kpọ, omịnị mọkpọ ụgụlapẹlẹ warị diidụbamọ wẹrịemi duonị mú yọma paamị.

Wo mú yọ laamị, bọlọụ paa yebo ebikagha. ECHR a tịbịtịẹmọ erema bọlọụ gbaa amọ, omịnị zụạ sịlịama gbẹẹ akị France daabụọ pịrị. Jehovah yalịyalị tẹmẹmị wo dịnẹmọwẹrị omịnị erema biimị, “daabụọbị 4.5 million euros dẹịn-emi sịlịama akị wo bank account duo akịdẹ bara ị́ mọ nimi wẹrịemi?”

Yebị a mịẹ tamamamị. Anịduonị amịnị daabọụ otubo biimị, kọkọ bịsẹ bara kị paa bara ámọ gbaa a pịrị ifiebị amịnị boloukọnmị, amịnị ẹrẹ á pịrịsiindẹmị egberi bị akị bịsẹyọ dụụmị. Jehovah wo tọngha bara akị egberi kẹrịtịẹmọdẹ bara ịmịnị mọ nimimị. Anịduonị omịnị pọwẹịtimi bịsẹ yọ duo wẹnịserimị. Paayebị wo mịẹ tamamamị.

Timi June 30, 2011 laabị, ECHR ụgụlapẹlẹ wo bara ebimọmị. Daabụọ otubo wo bara duo akị sịlịbọsẹ kpọ waịmọ wo pịrị bara gbaamị! Bei paayemị, France ebe ma gesii karịbụọ kekeretimi bei erein laadẹ. Wo bisẹ bii biibịbịmị, Goliath baa kẹnị okuta kị dei-emi, yebosẹ deimị. Tetuu kị duonị omịnị ụgụla dẹịnmọ ma o? David gbaa Goliath pịrị egberi kị dei-emi, “suumị Jehovah kị ye.”—1Sam. 17:​45-47.

Omịnị zịnị ụgụla-ama kpọ dẹịnmọdẹ. Timi bei erein laabị, kụrọnana daakụrọama mọ karịbụọ gbelemọ ụgụla-ama mọ wo mọ dẹịnmọdẹ, gbaamaba 70 ebeama emi kụrọ ụgụlapẹlẹ warịama omịnị mọ a múwẹrị 1,225 ụgụla-ama dẹịnmọdẹ. Bei dẹịnmọdẹ ụgụlabo, baratụa wo pịrịwẹrị wo gesii karịbụọ kekeremịnị, fomuuntimi warị duo mú warị laa egberigbaa fịrị kpọ wẹnịmịnị, Bible mọ kẹnịsụọmọgha ogeama datịẹmọmịnị, bá asịịn akị angọ a tụagha egberi kpọ mịẹgaan paamọdẹ.

Ịmịnị Jehovah Iseriotu Fịrị-tịbịyọ New York, U.S.A emiyọ ka timi fịrị wẹnịmịnị kị gbaa kpọ, tebara kị mịẹtimi Europe bọọ sụọmịnị ụgụlamị ị gbele ma o?

MISSIONARY FỊRỊ WẸNỊMỊNỊ DAỤ MỌ YIN MỌ KỊ Ị ZIIMỊ

George mọ Lucille mọ kị ị ziimị, ámịnị 12th class of Gilead kị duo paamị, kụraị 1956 mị ogbobị á fịrịmọ Ethiopia kị egberigbaa fịrị wẹnịmị. Ámịnị ị ziibị, bọlọụ kụraị sọnransii Christtuuduo-owei ẹrẹ Philip ka kị ị tịịnmị. (Acts 21:8) Barịị kụraịmị, daabụọ otu wo fịrị tịẹmọmị. Ịmịnị mọkpọ kalatọbọụ, ị daụ lẹẹ yetolumọye mịẹtimi bara ịmọ ukie wẹrịemi. Ị zaụemi duonị ịmịnị bolou kị ịmbẹlẹtimimị! Bolou-ịmbẹlẹgha yọmị, 1960 kụraịmị daabụọ otu wo duo ebe duo serimị.

Omịnị kpe Wichita, Kansas, U.S.A. ka múmị, ị daụ mọ yin mọ kẹnị yelaa ye akị tụa bịsẹ yọ ma múmị—anị missionary fịrịwẹnị dịsẹnana yọmị. ámịnị gesiibị akị ịmịnị mọ, ine bọlọụ-araụ Judy mọ, bá inẹ tuu-owei Leslie mọ tolumọmị, wosẹ akị Ethiopia ka ziimị, ámịnị wo adụdụsẹ akị Jehovah tarị bá wó fịrị wẹnịmụ bara kọn wo tolumọmị. Ịmịnị 13 years ka timi benibilemị. Tara kụraị bụọbị, wo warịboloumị Arequipa, Peru, egberigbaa otu dọụ wẹrịemị yọ ka mú egberigbaa fịrị wẹnịmị.

Kụraị 1974 ịmịnị 18 years baịdẹ, Peru branchmị ịmọ zịnị nia bịnaotuama mọ fịrịmọ special pioneer fịrị wẹnị yọ a múmị. Wo fịrịmọ kịmịotu naa egberi gbaagha yọ ka múmị, bịsẹ yọmị ogun-ama biin-emi. Omịnị Quechua bá Aymara ebebo kị egberigbaa yọ a múmị. Omịnị Ark tịịnmịnị ogbo-arụ ka leiwẹrị bịsẹ amabo a múmị. Ịmịnị Bible kọn Jehovah alaghatimi dọọn bá fịị serisiinmụ bara kọn kịmịotu tolumọ yọmị ị mịẹ pọwẹị nanamị. (Rev. 21:​3, 4) Biin kịmịama kị bei Bible ebiegberi kẹrịakịmị.

AKPỌSẸ FỊRỊ-TỊBỊYỌ A MÚMỤ FOMUUN BO Ị LAAMỊ

Kụraị 1977 mú Peru laa ifiebị, Albert Schroeder, Governing Body owei, ịmịnị akpọyọrọ fịrịtịbịyọ a mú fịrịwẹnịmụ funtụa bara kọn ị kụrọmọmị. Ịmịnị bịsẹbara kị mịẹmị. Alaghatimi, June 17, 1977, ịmịnị Brooklyn Bethel a mú fịrịwẹnịmị. Nia kụraị ovurumị, ịmịnị Cleaning má Maintenance department ka fịrị wẹnịmị.

June 1978, New Orleans, Louisiana bọọ mịẹ opubẹnịịbị, ịmịnị Elizabeth Avallone mọ gbelemị. Elizabeth daụ mọ yin mọ kpọ Jehovah Iseriotuama. Elizabeth beinmọ beinmọ ụwọụpẹlẹ fịrị kị wẹnịtimi nia kụraị laadẹ, amịnị ánị ụndụsẹ akị ụwọụpẹlẹ fịrị wẹnịmụ dịsẹ nana wẹrịemi. Omịnị ifiebosẹ ẹrẹmịnị. Alaghatimi omịnị zọzọ tarị kụrọmọmị. Omịnị October 20, 1979 zọzọ nana-siinbị, Bethel ka fịrị wẹnịmị.

Omini Brooklyn Spanish itu ka timimị, bịnaotubo ánị adụdụsẹ ka kị wo kẹrị-akịmị. Kụraịbo bụọmịnịbị, zịnị tara itu kpọ tarị mịẹ wo dịa, bá wo Bethel ma wẹnịmịnị fịrị kpọ baratụa-pịrịye kọn wo pịrịmị. Omịnị tọrụkẹrịemi bara mịẹdịamị, bá bịnaotubo mọ ikieotubọ mọ baratụa wo okosudẹ daụ mọ yin mọ pịrịmịnị yọ kpọ wo a tọrụkẹrịmị

ỤGỤLAPẸLẸ GBELEMỌ FỊRỊAMA WẸNỊ OGBO PỊRỊMỊ

Ị mịẹ tamamaa yọmị, January 1982 mị Bethel Legal Department ámụ fịrị wẹnịmụ fun ine bara duo sụọmị. Tara kụraị bụọmị, ụgụlapẹlẹ otu fun nanamụ yọ duonị, ịmịnị Law School amú bara ámọ gbaa ị pịrịmị. Law school ị ma timi ifie kị Jehovah Iseriotu dẹịnmọdẹ ụgụlabo kị baratụa United States mọ akpọrọyọ mọ kịmịama pịrịwẹrị peree nana wẹrị zụa yeama mịẹmịnị bara ị mọ a sụọtuu nimimị. Omịnị fun warịbị yelaadẹịn ụgụlabo kị tolumọ dẹịnmị.

Kụraị 1986, ịmịnị 30 years ka timi, Legal Department ma bọlọụdaamịnị owei a sụọmị. Anịa ịmịnị asịyaịpesi duonị biin yeama nimigha, anịa Jehovah mị fomuunbị akị ị pịrị yọmị ị mịẹ pọweị nanamị.

Ịmịnị 1988 lawyer-owei a paamị, anịa bei yebị ine tẹmẹ-anga inyenrinbụọ gbele kụrọmọmụ bara ịmịnị mọ nimigha. Opu school a mú yọmị kịmị mịẹ angọ-serimọ a paaemi. Ị taa Elizabeth baratụa ị pịrịmị. Amịnị baratụa ị pịrịwẹrị ine tẹmẹ-anga bọọ mịẹtimi dẹkị law school amú yebo waịmọ mịẹmị. Anịa waị tẹmẹ-anga yebo kẹrị mịẹmụ yọbị ifie akịmị. Dọlọ dọlọ ịmịnị waị tẹmẹ-anga yeama kẹrị mịẹ yọ bọọ dịsẹ nanamị. Opu funwarị amú fun nimi yọkị ebi ụndụ kọn kịmị pịrịmịnị bara fa, ebi ụndụ mịẹpaamọ kịmị pịrịmịnị yemị anị Jehovah ebi ikie kịmị a paa, bá olomu tarị akị Jehovah mọ wó kịmịbo mọ a nanamịnị yọkị ebi ụndụ kọn kịmị pịrịmịnị.

EBI EGBERI GBAA BỌLỌỤ AMÚ MỌ YỌ DUONỊ ỊMỊNỊ OLOKO WARỊAMA MÚ ISERITỊẸMỊ

Ịmịnị oloko goodẹ duonị, ịmịnị inẹ ịkịọụsẹ akị baratụa legal department pịrịmụ bara mịẹmị bá baratụa Jehovah ogbo pịrịwẹrị ebiegberi gbaa bọlọụ amú mọ bara mịẹmị. Jehovah ogbomị bọlọụ bọlọụ ka múmịnị, ịmịnị kpọ laa baratụa ogbo pịrịmịnị yọmị ị mịẹ bolou-ịmbẹlẹmịnị, anịa bụụdọọnyeama emi. Legal Department mị kụraị 1990, fun dịẹ kịmị pịrịdaba sịlị akịmịnị yọ ditụa bara gbaamị. Bịsẹ egberimị ẹrẹsiinbị, Jehovah Iseriotu fun dịẹ kịmị pịrịdaba sịlị akịtimi yọ tịẹmọmị. Bei yemị baratụa Bethel mọ wo egberigbaa fịrị mọ pịrịwẹrị gbẹẹ agbẹịgha tịbịsaabo kpọ tịẹmọmị. Zụa otu bei deiyọ mịẹdaba egberigbaa fịrịbị ba bọlọụ a múgha fa bara iroro timimị. Anịa ánị iroro bara paagha. Kụraị 1990 duobosẹ Jehovah karịmịnị kịmibo biin bọlọụ dẹịn kụrọmọdẹ, kịmị bá sịlị gbẹẹgha bara ka kị tẹmẹ-anga fịyaịbo fịmịnị. Ogbo ma deịmịnị yebo mọ Jehovah yalịyalị tẹmẹbị peibolou nana odubo-owei gbelewẹrị tolumọmịnị yebosẹ Jehovah kị duo bomịnị bara ịmọ nimimị.—Ex. 15:2; Matt. 24:45.

Omịnị ebi ụgụlapẹlẹ-otu nana wẹrịemị kị duonị ụgụla-ama dẹịnmọmịnị bara fa. Jehovah Iseriotu ebi inyenrinbọụbo kị biin ifie daabọụbo mọ ụgụlapẹlẹ otubo mọ dịnẹmọwẹrị baratụa wo pịrịmịnị. Kụraị 1998 Cuba a mịẹ special covention mị, tara Governing Body otu mọ bá ánị erebo mọ bẹnịị yọmị bei inyenrinbụọ mịẹdịa bara ịmọ ẹrịmị. Ámịnị didụbamọ bara, ebibara kịmịotu mọ inyenrin yọmị, omịnị akpọ daabụọ mọ kẹnị sụọmọgha bara mịẹgaan akpọ daabụọ otubo kpọ pịrị ẹrịmị.

Ebiegberi gbelemọ yọmị omịnị dọọ bara kọn daabụọ otu mọ laa mịẹ bụọmọghasẹ, omịnị ụgụlapẹlẹ-warị amú iseritịẹ ebiegberi pịrịmịnị. (Phil. 1:7) Gbaamaba, biin kụraịama bụọdẹ Europe mọ South Korea mọ wo bịnaotubo penimọ wẹrị sụụ yọ a múmịnị bara mịẹmịnị. Wo bịnaotubo mú dọụgha duonị, bịsẹ ifiemị Europe mị 18,000 bịnaoweiama bá South Korea mị 19,000 bịnaoweiama á mọ kẹrị ikoli-warị a kaịdẹ.

Kunumọ yọmị, July 7, 2011, ECHR Bayatyan v. Armenia ụgụlapẹlẹmị, Europe mị bẹtịbị ụbọ kị sụụ yọ a múmụ bara sẹlẹ angọ pịrịmụ ụgụlapẹlẹmị. Bịsẹ bara kị June 28, 2018 South Korean kpọ sụụ yọ a múmụ yọmị bẹtịbị ụbọ kị sẹlẹ angọ pịrịmụ ụgụlapẹlẹmị. Wo asịyaị-pesibo zụayaị kị sụụ yọ a múwẹrị kpọ egberimị zịnị bara kị paamọ timimị.

Wo Jehovah Iseriotu fịrị-tịbịyọ mọ, branch officebo mọ emi legal departmentbo daabụọ egberimị bọlọụ bụọmụ yọ duonị, ifiebosẹ ụgụlawarị ma mú isertịẹ ebiegberi pịrịmịnị. Omịnị wo bịnaotubo a tịbị-tịẹmọwẹrị ụgụlawarị a mú iseritịẹ ebiegberi pịrịmịnị yọmị opu fomuun kị wo laaemi. Omịnị dẹịnmọ, bá dẹịnmọgha kị gbaa kpọ, omịnị egberibị akị ụgụlapẹlẹ warị a múmịnị yọmị iseritịẹ akị daabụọ emi otu, ebe daa-otu bá ebebosẹ kị pịrịmịnị. (Matt. 10:18) Ụgụlapẹlẹ otubo mọ, daabọụ a tịbị-tịẹmọ wẹrịemi otubo mọ, bá internet kpọ, wo gbaamịnị egberibosẹ Bible kị duo bomịnị bara kẹrị iroromịnị. Gesii adụdụ nana wẹrịemi otubo Jehovah Iseriotu pei wẹrịemi yebosẹ Bible kị duobomịnị bara nimidẹ. Bịsẹ kịmịbo zụayaị bo bịnaotuama ka paadẹ.

JEHOVAH ỤMBANA!

Bụọdẹ 40 years bo, ịmịnị fomuun nanawẹrị akpọyọrọ branch officebo a múwẹrị biin ụgụla-warịama mọ bá ye-nimi kụrọmọ ụgụlapẹlẹ otuama mọ ẹrẹteidẹ. Ịmịnị akpọyọrọ fịrị-tịbịyọ ma emi Legal Department ma emi bịnaotubo mọ bá akpọyọro branch officebo legal department bọọ fịrị wẹnịmịnị bịnaotubo mọ tarị kụrọmọmị. Bịsẹ fịrị wẹnịmịnị yọmị biin tarịama kị ị laadẹ.

Elizabeth mị 45 years ovurumị opubara ka kị baratụa ị́ pịrịdẹ, kụrọ ifieama mọ ebi ifieama mọ, tarị nana bá kpẹkpẹrẹẹ bara ị mọ mọ timi mọ laade. Dọọn yọama duonị amịnị ba kụrọ nanawẹrị biin fịrịama kị wẹnịgha kpọ, amịnị baratụa ị pịrịmịnị yọmị ine a tọrụkẹrịmị.

Wo dẹịnmọmịnị ụgụlabo wo nana wẹrịemi kụrọ duo bogha bara wo mọ dọụ ẹrịmị. David gbaa bara k’emi, “Jehovah kị kụrọ kọn wó kịmịbo pịrịmịnị.” (Ps. 28:8) Anịduonị, “sụụmị Jehovah ye.”