EGBERITỊBỊ 40
DUMA 30 My Father, My God and Friend
Jehovah “Baratụa Pọwẹịgha Otubo Pịrịmịnị”
“Ómịnị baratụa pọwẹịgha otubo pịrịmịnị; ómịnị anị́ ịnọụbo zụọmịnị.”—PS. 147:3.
TOLUMỌ DỌỤMỊNỊ YEBO
Jehovah olomu bara ka kị tọrụtụa pọwẹịgha otubo dimịnị. Mị egberitịbịmị, omịnị Jehovah, omịnị enenị kẹrịmịnị ifieama wo kurọmọmịnị bara mọ bá wo barịwẹrị zịnịotu kpọ kụrọmọmịnị bara kị wo mọ tolumọmịnị.
1. Jehovah tebara ka kị ụ karimịnị otubo dimo wẹrịemi a o?
Jehovah kiriogbo bọọ ụ karimịnị kịmịbo dii daba teeki ẹrị mịnị a o? Jehovah wo pọwẹịmịnị ifie bá wo pọwẹịgha ifiebosẹ nimi wẹrịemi. (Ps. 37:18) Wo ịkịọụbo wo a bụụdọọnmịnị kị gbaa kpọ, Jehovah omịnị wo kụrọyosẹ akị ụ karimịnị bara ẹrịmịnị yọmị, ụ mịẹ pọwẹịmọ mịnị! Bịsẹyọ bụọmọ kpọ, Omịnị wo barịị bá wo kụrọmọmụ yomị dịsẹ kụrọmọ emi.
2. Mị tịẹkirimị Jehovah teeki mịẹ pọwẹịgha otubo pịrịmịnị a, bá omịnị Jehovah kekereyọ dụọ te arereama kị nana a paaemi a o?
2 Psalm 147:3 gbaamị Jehovah pọwẹịgha i otubo ‘ịnọụbo zụọmịnị.’ Mị Bible yọmị Jehovah ịkịọụ bụụdọọnmịnị otu kekere mịnị bara kị mịẹdia weriemi. Omịnị teeki mịẹweri Jehovah kekereyọ nana a paaemi a o? Mi tọnmọye dii, ebibara fịrịwẹnịmịnị dọọnzụọ-kịmị baratụa ịnọụ sụọemi kịmị zụọ a paaemi. Anịa ụbọmị angọkụrọ dọụmịnịsẹ, dọọzụọ-kịmị gbaa yebosẹ mịẹmịnị. Mị egberitịbịmị, omịnị Jehovah Bible duo gbaa akị ịkịọụ bụụdọọnmịnị otubo pịrị weriemi egberibo tolumọmịnị, bá omịnị wo tolumọye dii mịẹmụ bara kpọ tolumọmịnị.
JEHOVAH OMỊNỊ WÓ TỌRỤYỌ BỌỌ YELAA KỤRỌMỌ EMI BARA MỊẸ WO DỊAMỊNỊ
3. Teeki duonị zụa otu ámịnị ye a paagha bara iroromịnị a o?
3 Wo inyenrinmịnị akpọbị tarị fa, anịduonị biin kịmịama zịnịotu ye a paagha anịghakpọ kịmịotu disẹịmọ bara ka kị kịm-ịotu mọ inyerinmịnị. Helen tịịn-emi bịnaraụa gbaamị: “Ị dau mọ yin mọ i tarịgha. Ị daụ osịa fa kị timi-mị, bá ereinbosẹ ka omịnị yelaagha bara gbaa wo dịa timimị.” Kaanghaba ị́mịnị kpọ Helen bara, kịmịotu pịrị ifiebosẹ mịẹdẹrị, ị́ diseimọ, anịghakpọ ị́mịnị yelaagha bara gbaa ị́ pịrịmịnị. Bịsẹ bara aba , kịmị gesii bara ị́ tarị-emi bara peimụ yọmị kụrọ ị́ pịrị a paaemi.
4. Psalm 34:18 gbaa bara didaba, Jehovah teeki gbaa pọwẹịgha otubo pịrịmịnị a o?
4 Zịnị otuama ị́ diseimọmịnị kpọ, Jehovah ị́ tarị, bá ị́mịnị wó tọrụyọbị yelaaemi bara nimi. Ómịnị ifiebosẹ “pọwẹịgha otubo mọ naịn-emi.” (Psalm 34:18 goo.) Ị́mịnị “bolouịmbẹlẹgha” ifiesẹ, ukie Jehovah iné ebi inyenrinbụọbo ẹrị wẹrịemi kị duonị ị́ kpụn bo wó mọ naịnmị. (John 6:44) Jehovah ị́ tarị-emi duonị ifiebosẹ baratụa ị́ pịrịmịnị.
5. Jesus akị á pịrị diseimọtimi otubo mọ inyenrin bara mị te ka kị wo tolumọ ma o?
5 Omịnị Jesus inyenrinbụọ duo Jehovah nimi a paaemi. Jesus kiriogboma tịịn ifiemị, ómịnị kịmịotu pịrị diseimọtimi otubo didụbamọmị, bá ebibara ka kị ámọ mó inyenrinmị. (Matt. 9:9-12) Kẹnị kụrọ dọọn nanawẹrị ere ánị dọọn zụọmụ peibolou nanawẹrị bo Jesus bịdẹ gbele ifiebị, Jesus ánị nana peibolou duonị á tokoni bá á kụrọmọmị. (Mark 5:25-34) Jesus ebibara ka kị Jehovah dimịẹmị. (John 14:9) Anịdounị Jehovah ị́mịnị ụ tarị wẹrịemi bara nimi wẹrịemi, ómịnị iné nana wẹrịemi peibolou mọ, bá zịnị ebi inyenrinbụọbo mọ ẹrịmịnị bara nimi.
6. Kịmị ye a paagha iroroye nanamịnị aba, teeki baratụa ụbọ pịrịmịnị a o?
6 Ị́mịnị zụa ifieama ye a paagha bara iroromịnị aba, teeki mịẹmịnị a o? Ị́mịnị Jehovah tọrụma yelaaemi bara gbaa wẹrịemi Bible yọama goodá kẹrị iroro.b (Ps. 94:19) Ị́mịnị laa iné mịẹ dịsẹ-emi ye mịẹgha bara kị paa kpọ, iné angọ kọn zịnịotu tọnmọ kụmọ. Jehovah ị́ nimi mịẹgha fa ye kọn iné bara duo biigha fa. (Ps. 103:13, 14) Bụọdẹ ifiebị, kịmị ị́ sọnlọ, ị́ famọ anịghakpọ iné ụyamọdaba, iné angọ seimọ kumọ! Ukie Jehovah ụgụlapẹlẹ seiyaị mịẹotu pịrịmịnị. (1Pet. 3:12) Sandra, kịmị pịrị sọnlọmị, ámịnị gbaamị, “Ịmịnị agbẹị bara, bá Jehovah ị dịmọ wẹrịemi bara akị angọ dimọ yọ kọn Jehovah tẹẹmị.”
7. Omịnị tebara ka kị wo paamọdẹ yebo akị ebi fịrị wẹnị Jehovah pịrị a paaemi a o?
7 Jehovah iné akị baratụa zịnịotu pịrị a paaemi bara nimi. Ị́mịnị kpọ bo Jehovah sụọmọwẹrị egberigbaa fịrị wẹnịmụ fomuun nanadẹ. (1Cor. 3:9) Ị́ paamọdẹ yebo baratụa ị́ pịrịwẹrị ebibara zịnịotu paamọmịnị bụụdọọnyebo a sụọtuu nimi-mịnị. Anịduonị, ị́mịnị laa ebibara baratụa á pịrị a paaemi. Helen, kịmịotu baratụa á pịrị yọ duonị, ámịnị kpọ laa baratụa zịnịotu pịrịmị. Ámịnị gbaa amọ: “Ịmịnị ye a paagha bara kị tọn wẹrịemi, anịa Jehovah ị tarị wẹrịemi bara mịẹdịamị bá ị́ kọn zịnịotu barịdẹ.” Bei tịẹkịrịbị, Helen bolouịmbẹlẹtimi beinmọ beinmọ ụwọụpẹlẹ firi kị wẹnịmịnị.
JEHOVAH ÓMỊNỊ WO BỤỌMỌDẸ BARA WO MỌ PEI KỊ DỌỤ WẸRỊEMI
8. Isaiah 1:18 te kụrọmọye ka kị wo pịrị wẹrịemi a o?
8 Zụa Jehovah Iseriotuama naa benibilegha timi mịẹ seiama anịghakpọ benibiledẹ kị mịẹ seiama, ánị adụdụbo a bụụdọọnmịnị. Anịa bịsẹ bara kị paa kpọ, ukie Jehovah wo tarị wẹrịemi kị duonị paru bụọmọ ịkịan mịẹpaamọmị. Jehovah dọụ wẹrịemi barasẹ omịnị dịẹpịrịye kẹrịakị. Omịnị bo Jehovah mọ “zọzọnaa.”c Bịsẹ bara wo mọ mịẹdaba, Jehovah gbaa amọ ómịnị ba wo mịẹ seibo akị wo kẹrị ụgụla sụọgha fa. (Isaiah 1:18 goo.) Jehovah ba wo mịẹdẹ seibo ukiegha yọmị, wó tarị kị mịẹdịamịnị! Bịsẹ kpeikẹnị baramị, Jehovah wo mịẹ ebi yebo kpọ baragha fa.—Ps. 103:9, 12; Heb. 6:10.
9. Pabụọdẹ yebo iroromụ bara dii a, tetuu kị duonị omịnị mị tịekiri mịẹmịnị yebo mọ bá bọlọụma emi ebi yebo kị kẹrị iroro agbẹị-emi a o?
9 Iné bụọdẹ mịẹkiri yeama ị́ mịẹ pọwẹịgha bara padaba, iné tịẹkiri bọọ mịẹmịnị yebo mọ bá bọlọụ bọọ mịẹmụ yebo mọ kẹrị iroro. Fịrịmopaaowei Paul paamọye kẹrị iroro. Omịnị Christtuuduo-otubo ụyamọtimi bara kẹrị iroro daba, ụ mịẹ pọwẹị nanagha, anịa Jehovah ụ bụọmọdẹ bara Paul mọ nimi-mị. (1Tim. 1:12-15) Paul mọkpọ ifiebosẹ bịsẹ mịẹ bụọmọdẹ seibo kị kẹrị irorotimi ma? Bịsẹ baragha, Omịnị Jew karịbụọ bọọ timi ifiebị, wọ mịẹ oroụpaamụ yebo ukiegha bara kị bịsẹ mịẹbụọmọdẹ sei yebo kpọ ukiegha. (Phil. 3:4-8, 13-15) Bịsẹ bara dii a, Paul angọtụa egberigbaa fịrị wẹnịmị bá bọlọụma emi yebo kị kẹrị iroromị. Ị́ kpọ Paul bara paabụọdẹ ye deigha paagha fa. Anịa bei tịẹkiri bị, ị́mịnị laa Jehovah tokonị, bá mị bọlọụmị Jehovah kikoromọdẹ yebo kẹrị iroro a paaemi.
10. Wo mịẹbụọdẹ sei zịnị otu gbele wẹrịemi aba teeki wo mọ mịẹmịnị?
10 Zụa ifieama iné mịẹbụọmọdẹ yeama duonị ị́mịnị bolouịmbẹlẹgha kpọ paaemi. Teeki baratụa ị́ pịrị a paaemi a? Iné kụrọyọ mịẹdá deiyọ mịẹpaamọ, bụọmọye kpọ bii. (2Cor. 7:11) Iné mịẹ seimị gbele otubo Jehovah baratụa á pịrị bara tẹẹ. Ómịnị laa baratụa ị́ mọ bá iné mịẹ seimị gbele otubo pịrịwẹrị ine bá dọọ nana mịnị.
11. Omịnị te ka kị bụrụowei Jonah paamọye duo tolumọ akị a paaemi a o? (Bọlọụ foto dii.)
11 Bụọdẹ mịẹkiri yeama duo tolumọye nana, bá Jehovah bụọmọ iné akị wó dọụdẹ fịrịsẹ wẹni. Bụrụowei Jonah paamọ yemị ukie. Ọkpọnanaowei Jonah fịrịmọ Nineveh amú ifiemị, Jonah zịnị yo ka múmi. Jehovah Jonah zezemọmị, Jonah wó mịẹkiriye duo tolumọye nanamị. (Jonah 1:1-4, 15-17; 2:7-10) Jehovah Jonah gbein koromọgha. Ọkpọnanaowei Nineveh amúmụ zịnị fomuun akị Jonah pịrịmị, Jonah gbaa bara kị mịẹmị. Ómịnị bụọdẹ mịẹkiri yeama bụọmọwẹrị Jehovah akị ụ pịrị fịrị wẹnịgha bara gbaagha.—Jonah 3:1-3.
Jehovah Jonah akị opu indi amba duo zụọ tẹịmọ siin bị, Jehovah mọkpọ fomuun akị wó pịrịwẹrị Nineveh amú wo ebi egberigbaa mị (Gooyo 11 dii)
JEHOVAH WÓ YALỊYALỊ TẸMẸ KỌN WO KỤRỌMỌMỊNỊ
12. Kụrọ dadiye wo paamọdaba Jehovah tebara ka kị baratụa wo pịrị a paaemi a o? (Philippians 4:6, 7)
12 Wo tarị wẹrịemi kịmị fịịdaba, Jehovah wó yalịyalị tẹmẹmị akị wo kụrọmịnị. Wo wẹrị Ron mọ Carol mọ paamọye dịtụa. Ánị 39 kụraị baịdẹ tọbọụ ditụa fiimị. Á gbaamị: “Bụọdẹ ifiemị biin dadiyeama kị wo laadẹ, anịa bei paa yemị kụrọ ásẹsẹ dẹịnmị. Biin bụnụgha dein-ama omịnị tẹẹmị, anịa Philippians 4:6, 7. (Goo) gbaa wẹrịemị dọọmị wo laamị.” Kụrọ dadiyeama ị́ paamọdaba, ị́mịnị laa ifiebosẹ iné adụdụ duo tẹẹ Jehovah pịrị a paaemi. (Ps. 86:3; 88:1) Pẹlẹgha bara Jehovah yalịyalị tẹmẹ bii. Jehovah iné tẹẹbịbị parụmịnị.—Luke 11:9-13.
13. Jehovah yalịyalị tẹmẹmị tebara ka kị baratụa ị́ pịrịwẹrị peibolou nana bara ụ karị timi dụụ laamịnị a o? (Ephesians 3:16)
13 Kụrọ dadiye ị́ mịẹ suusụọ ifieama paadẹ a? Yalịyalị tẹmẹ baratụa ị́ pịrịwẹrị peibolou nana bara Jehovah karịtimi dụụ laamịnị. (Ephesians 3:16 goo.) Flora tịịnmịnị bịnaraụ paamọyẹ dii. Ámọ á yei mọ kị missionary fịrị wẹnị timi-mị anịa á yei zịnị ere mọ bụnụmị, ámịnị zọzọ a barasiin mị. Á gbaamị: “Bei paa yebị ine ụndụ gbele kụrọmọmị. Jehovah wo yalịyali tẹmẹbị akị baratụa ị pịrịwẹrị laa inemụ bara ị mọ tẹẹmị. Jehovah baratụa ị pịrịwẹrị bịsẹ paa yebị ine baramị ye akị tọnm kpọ paagha.” Ámịnị eti akị Jehovah ghọ nana bá ómịnị baratụa á pịrịwẹrị á laamịnị dadiyebosẹ inemụ peibolou nanamị. Jehovah kị baratụa á pịrịwẹrị bịsẹ eti nana bara kị Flora mọ gbaamị. Ámịnị mọkpọ gbaamị: “Psalm 119:32 gbaa wẹrịemi egberimị, gbaa ịmịnị kị pịrịmịnị: ‘Ịmịnị iné olokobo kị dii wẹnịmịnị tuubị ị́mịnị ịnẹ adụdụ mịẹ gbeinmịnị.’”
14. Omịnị tebara ka kị Ọkpọnanaowei yalịyalị tẹmẹ bụọmọ baratụa wo pịrịmịnị a o?
14 Ị́mịnị tebara ka kị yalịyalị tẹmẹ mọ fịrị wẹnịmịnị a o? Ọkpọnanaowei yalịyalị tẹmẹ dọụ wẹrịemi fịrịbọ kị wẹnị. Bịsẹ yebo zụa anị yetolumọyọ amú, egberigbaa zịnịotu pịrị, Ọkpọnanaowei egberi goo angọ pịrị bá kọn tụa iroroye mịẹ. (Phil. 4:8, 9) Ímịnị Bible goomịnị ifiesẹ, Bible ifiema dadiye laa otubo lelei bá Jehovah baratụa á pịrịwẹrị ine bara kpọ akị tụa iroro. Biin dadiyeama duonị, Sandra biin akpotuama ka asụọmị. Á gbaamị: “Joseph paamọ yebị ị gbele kụrọmọmị. Ómịnị ụ laa dadiyebo mọ bá kịrịgha ụgụla pẹlẹ ụ pịrị yọ mọ bụọmọ wẹrị wó Jehovah mọ nana wẹrịemi ikie seimọgha.”—Gen. 39:21-23.
JEHOVAH WO BỊNAOTUBO DUO WO KỤRỌMỌMỊNỊ
15. Te kịmịama kị wo kụrọmọ a paaemi a, bá ámịnị tebara ka kị barịị a paaemi a o? (Foto kpọ dii.)
15 Omịnị ụyafịmịnị ifiesẹ, wo bịnaotubo “opu kụrọmọye” ka paa wo pịrịmịnị. (Col. 4:11) Jehovah wo bịnaotubo ka kị wo tarị wẹrịemi bara mịẹdịamịnị. Ámịnị wo warịma bowẹrị omịnị wo bụụdọọnyebo gbaa á pịrị peimịnị yọ kpọ, opu kụrọmọye ka paaemi. Ámịnị ye gbaagba bara wo mọ mọ́ emịyọ betịbị kpọ wo kụrọmọmịnị. Ámịnị Bible duo wo kụrọmọmịnị, bá wo mọ mọ́ tẹẹmịnị.d (Rom. 15:4) Zụa ifieama, wo bịna-ụbọ Jehovah inyenrinbụọbo gbaa wo pịrịdaba, bịsẹ yọmị baratụa wo pịrịwẹrị inemịnị. Akpotu wo ladaba, wo bịnaotubo baratụa wo pịrị a paaemi, gbaamaba laa fịyaị kpọ kọn wo pịrịwẹrị wo kụrọmọ a paaemi.
Eti akị tụa agbẹị-emi, kasụọdẹ ikie-otuama ị́ kụrọmọ bá baratụa ị́ pịrịmịnị (Gooyọ 15 dii)
16. Teeki omịnị mọ mịẹ wẹrị zịnịotu laa baratụa wo pịrị a paaemi a o?
16 Baratụapịrịye wo mọ dọụmịnịsẹ, omịnị bii agbẹị-emi. Wo bịnaotubo wo tarị wẹrịemi duonị baratụa wo pịrị dịsẹ-emi. (Prov. 17:17) Anịa ámịnị wo bụụdọọnyebo mọ bá wo dọụ wẹrịemi yebo nimigha. (Prov. 14:10) Ị́mịnị bụụdọọnye bolouemi aba, gbaa akị kasụọdẹ ikie-ụbọ pịrị. Ị́mịnị baratụapịrịye dọụ wẹrịemi bara kpọ gbaa á pịrị. Ímịnị laa ị́ mọ mọ́ naịn-emị itu-kosuowei mọ kpọ ẹrẹtei a paaemị. Zụa bịnaereama itu bọọ kasụọdẹ bịnaere mọ ẹrẹmụ yọ kị á dịsẹ dẹịn-emi, bịsẹ yọbị á kụrọmọmịnị
17. Te yeama kụrọmọye nanamụ yọ kimọ a paaemi a, bá teeki baratụa wo pịrịwẹrị bịsẹyo dẹịnmọ mịnị a o?
17 Ifiebosẹ bẹtịbị timimọ yọ kị ebidẹịn emi bara iroro kụmọ. Zụa ifieama yebị ị́ dọọn kụrọmọemị kpọ zịnịotu mọ ẹrẹteidaba ị́ kụrọmọmịnị. Zụa ifieama, wo bịnaotubo naa ebibara wo nimi ebimọgha duonị, agbẹịgha egberiama gbaa wo pịrị kpọ paaemi. (Jas. 3:2) Bịsẹ yeama bụọwẹrị iné kụrọmọye nanamụ yọ tịẹmọ kụmọ. Kẹnị Gavin tịịnmịnị ye-iroro dọọn laaemi itu-kosuowei, gbaamị: “Ịmịị ine ikieotubo mọ kpọ ẹrẹtei dọụgha.” Ania, Gavin angọtụa bịsẹ bụụdọọnye dẹịnmọwẹrị bịnaotubo mọ ye mịẹ gbeleiwẹrị biin arereama nanamị. Amy tịịnmịnị bịnaraụ gbaamị: “Pabụọdẹ yebo duonị, Ịmịnị ba eti kọn kịmị-otu ghọ nanagha. Anịa Jehovah tarị nanaemi bara ị mọ tolumọ nimi yọmị baratụa ị pịrịwẹrị eti kọn ine bịnaotubo ghọ nanadẹ. Bịsẹ yemị ị mịẹ pọwẹị nanamịnị bá Jehovah kpọ pọwẹịmịnị bara ị mọ nimi wẹrịemi.”
JEHOVAH KIKOROMỌ WẸRỊEMI YE DUO KỤRỌMỌYE NANA
18. Omịnị bei bọlọụbị timi teeki korumịnị a, bá teekị mịẹtimi korumịnị a o?
18 Bei bọlọụmị Jehovah alaghatimi bụụdọọnyeama mịẹ paamọ kịmịawọụ pịrịmịnị yebosẹ serisiinmụ eti wo mọ nana wẹrịemi. (Rev. 21:3, 4) Bịsẹ ifie ladaba, kịmị awọụ adụdụ mịẹ dọọn naamịnị yebosẹ ba wo “adụdụ duo sụọgha fa.” (Isa. 65:17) Wo ẹrịdẹ baramị, Jehovah mị ifie kpọ ‘wo ịnọụbo zụọmịnị.’ Pebidá wosẹ Jehovah akị wo kụrọmọmịnị yebo kẹrịakị. Jehovah wo kekeremịnị yọmị benebene tamanaịnyọ nana kụmọ.—1 Pet. 5:7.
DUMA 7 Jehovah, Our Strength
a Zụa ẹrẹ-ama deidẹ.
b “Ị́mịnị Jehovah Tọrụyọ Bọọ Yelaa Emi” ekpedi dii.
c Omịnị Jehovah mọ “zọzọnaa” dọụmiṇisẹ, omịnị wo miẹmịnị seibo a barasin bá bụọmọye akị Jehovah bara bọọ biimịnị. Omịnị kụrọ sei kị mịẹ wẹrịemi aba, mú itu-kosuotubo laa, ámịnị baratụa ị́ pịrịmịnị.—Jas. 5:14, 15.