Omịnị Bẹtịbị Fa

1-2. (a) Bụụdọọnye wo laadaba tetuu kị duonị omịnị bẹtịbị fa bara gbaa a paaemi a? (b) Mị egberitịbịmị omịnị te yeama kị tolumọnịnị a o?

KỤRỌ dadiyeama wo laadaba, omịnị kala arụ akị adawaịn paa kụrọmọmịnị abadị a yọụmịnị bara k’emi. Bịsẹbara kị gbaa kpọ, omịnị benebene bẹtịbị fa. Wo tarị nana agọnọ Daụ wo bụụdọọnyebosẹ ẹrị wẹrịemi bá baratụa wo pịrịmịnị bara kpọ gbaadẹ. Jehovah zụzụ bara gbaa ụ karịmịnị otubo pịrịmị: “Ịmịnị baratụa á pịrịmịnị.”—Isa. 41:10.

² Mị egberitịbịmị Jehovah baratụa wo pịrịmịnị nia ụwọụama wo mọ ditụamịnị (1) ómịnị wo tolumọ, (2) wo dọụmịnị yeama mịẹ wo pịrị, (3) wo kekere, bá (4) wo kụrọmọmịnị. Bụụdọọnyeama kị wo laa kpọ Jehovah gbaa wo pịrịdẹ, ómịnị wo ukie wẹrịemi bá benebene wo gbeinmọ-koromọgha fa. Anịduonị omịnị bẹtịbị fa.

JEHOVAH WO TOLUMỌMỊNỊ

3-4. Jehovah tebara ka kị wo tolumọmịnị a o? (Psalm 48:14)

³ Psalm 48:14 goo. Jehovah omịnị bẹtịbị angọ daamụ yọ dọụgha. Anịduonị mị tịẹkiri mị, ómịnị tebara ka kị mịẹmụye gbaa ụ karịmịnị otubo pịrịmịnị a o? Kẹnị ụwọụ anị Bible mị. (Ps. 119:105) Jehovah Bible duotolubị, omịnị bei tịẹkiribị pọwẹị nana bá bọlọụmị fagha fagha ụndụ nanamụyọ duonị, mịẹmụ yeama bá nana agbẹị-emi inyenrinbụọama gbaa wo pịrịmịnị.a Gbaamaba, ómịnị wo tolumọdẹ, omịnị ifiebosẹ kịmị bụọmọ inyenrinbụọ nana, aritụa kụmọ bá adụdụ duobo bara kịmịotu tarị. (Ps. 37:8; Heb. 13:18; 1Pet. 1:22) Omịnị bei ebi inyenrinbụọbo mịẹdịadaba, omịnị bo ebi daụ mọ yin mọ otu, taa mọ yei mọ otu, bá ikie-otu a paa zịnịotu pịrịmịnị.

⁴ Bịsẹyọ bụọmọ kpọ, Jehovah Bible bolou bọọ wo paamọmịnị yebo paamọdẹ kịmịama egberiama gbaa wẹrịemi. (1Cor. 10:13; Jas. 5:17) Omịnị bei yebo goo bá goo bara dimịẹdaba, maa tolumọyeama kọn wo pịrịmịnị. Bọlọụ yemị, mị kịmịbo kpọ mị yebo á paamọ wẹrị ámịnị inetimi bụọdẹ duonị, omịnị kpọ laa inemụ bara ka kị wo tolumọmịnị. (1Pet. 5:9) Maamụkaramọ yemị, omịnị bụụdọọnye laadaba kọn inemụ bara kpọ tolumọmịnị.—Rom. 15:4.

5. Jehovah te otuama ka kị baratụa wo pịrịwẹrị ụndụ ụwọụ ma timi wẹnịmịnị a o?

⁵ Jehovah wo tẹmẹanga bịnaotubo kpọ duo tolumọye akị wo pịrịmịnị.b Gbaamaba, teree diiowei ifiebosẹ itu ma bowẹrị wo kụrọmọmịnị. Ánị ẹrẹbịbịbo wo peiboloubo mọ wo kẹnịsụọmọ yọ mọ mịẹ kụrọmọmịnị. (Acts 15:40–16:5) Itu ma emi itu-kosuotubo ebibara tọrụtụa akị itu ma emi kịmịbo dimịnị. (1Pet. 5:2, 3) Daụ mọ yin mọ otu tolumoye akị ánị awoụbo pịrịwẹrị, ebibara ye-iroro bá ebi inyenrinbụọama nanamịnị. (Prov. 22:6) Kasụọdẹ bịnaerebo kpọ ánị ebimịẹdịaye mọ, tolumọbịbịbo mọ bá kụrọmọyebo mọ akị baratụa itu ma emi tọbụ-tọbụ bịnaerebo pịrịmịnị.—Titus 2:3-5.

6. Omịnị teeki mịẹwẹrị Jehovah tolumọ yebo duo arere nanamịnị a o?

⁶ Jehovah wo nimi agbẹị-emi yebosẹ akị wo tolumọdẹ. Omịnị ba tebara ka kị Jehovah mịẹ wo pịrịdẹ yebosẹ wo a tọrụkẹrịemi bara mịẹdịamịnị a o? Proverbs 3:5, 6 gbaa amọ: “Iné etisẹ akị Jehovah a tụa, iné bẹtịbị nimiye a sẹsẹrẹ kụmọ.” Omịnị bịsẹ bara mịẹdaba, “ómịnị [wo] wẹnị ụwọụbosẹ mịẹ gọmụmịnị,” gbaamịnị barasẹ, ómịnị baratụa wo pịrịwẹrị biin bụụdọọnyeama asụọgha fa, bá pọwẹị kpọ nanamịnị. Jehovah tarị nana bara bei tolumọyebo akị wo pịrị yọbị, omịnị ụ kule kamị!—Ps. 32:8.

JEHOVAH WO DỌỤMỊNỊ YEBO MỊẸ WO PỊRỊMỊNỊ

7. Jehovah tebara ka kị baratụa wo pịrịmịnị a o? (Philippians 4:19)

⁷ Philippians 4:19 goo. Jehovah Bible duo wo tolumọmịnị yọ bụọmọ kpọ, wo dọụ wẹrịemị fịyaị, tụamụ bidẹ bá timimụ yọ mịẹpaamọ wo pịrịmịnị. (Matt. 6:33; 2Thess. 3:12) Omịnị kịmịawọụama duonị bei yebo bụọmọ wẹrị wo mịẹ kpeke-kpeke a paaemi, anịa Jehovah omịnị ifiebosẹ bei yebo wo mịẹ kpeke-kpekemụ yọ dọụgha. (Matthew 6:25 bọọ emi study note dii.) Tetuu a o? Ómịnị benebene ụ karịmịnị otubo bụụdọọnye bolou emi ifie á gbeinmọ-koromọgha fa. (Matt. 6:8; Heb. 13:5) Jehovah kọkọ wo dọụ wẹrịemi yebo mịẹ wo pịrịmịnị bara gbaa wẹrịemi, omịnị eti akị bịsẹ egberibo a tụa a paaemi.

8. Jehovah teeki mịẹ David pịrị ma o?

⁸ Jehovah akị baratụa David pịrị bara kẹrị-iroro. David baịntimi ifiemị bọụbọụ ụ pịrịgha, anịa Jehovah ụ mọ wó kịmịbo mọ dọụ wẹrịemi yebo kọn á pịrịmị. David, Jehovah bịsẹ ifiemị akị baratụa ụ pịrị bara kẹrị-iroromị, ụ gbaamị: “Ịmịnị asịyaịpesi ka timimị, mị tịẹkirimị ịmịnị owadẹ, anịa ịmịnị naa kịrịịye mịẹ kịmị gbeinmọ-koromọdẹ anịghakpọ wó awọụbọ fịyaị kị bii fịmịnị bara ẹrịgha.” (Ps. 37:25) Ị́mịnị kpọ iné ụndụmị, Jehovah ụ karịmịnị otubo kekeremịnị bara ẹrịdẹ kpọ paaemi.

9. Bị ifiebị Jehovah tebara ka kị baratụa wó kịmịbo pịrịmịnị a o? (Fotobo kpọ dii.)

⁹ Vurudu akpotu paadaba Jehovah wó kịmịbo dọụ wẹrịemi yebo mịẹpaamọ á pịrịmịnị. Gbaamaba, bọlọụ kụraị sọnransii bị mọụn koro ifiemị, bẹbẹ ibe a emi christtuuduo-otuama bịnaotubo dọụ wẹrịemi yebo saị á yarịmị. (Acts 11:27-30; Rom. 15:25, 26) Bei tịẹkiri kpọ Ọkpọnanaowei kịmịbo bịsẹbara ka kị bara finimọ inyenrinbụọ mịẹdịamịnị. Akpotu yọ apaadaba, Jehovah wó kịmịbo akị fịyaị, beni, bịdẹ bá diriama mịẹpaamọ bịsẹ akpotu gbele-emi otubo pịrịmịnị. Ogbo ma warị kẹrịmịnị bịnaotubo kpọ mú seidẹ warịbo mọ bá Kingdom Hall bo mọ kẹrị anịghakpọ mịẹ ayamọmịnị. Bịṣe yọ buọmọ kpọ, Jehovah kịmịbo ifie famọgha bara ka kị Bible duo kụrọmọye mịẹpaamọ bei bịnaotubo pịrịmịnị.c

10-11. Borys paamọ yebị te ka kị ị́ tolumọ ma o?

¹⁰ Jehovah barafinimọ bara ka kị naa ụ karịgha otubo dọụ wẹrịemi yebo kpọ mịẹ á pịrịmịnị. Bịsẹ kpekẹnị bara kị, omịnị kpọ naa Jehovah karịgha otubo baratụa-pịrịye dọụ wẹrịemiaba, baratụa á pịrịmịnị. (Gal. 6:10) Bịsẹ yọmị baratụa wo pịrịwẹrị iseritịe á pịrị a paaemi. Wẹrị Borys paamọye dii, ómịnị Ukraine k’emi school tịbịowei. Borys Jehovah Iserioweigha kị gbaa kpọ, ómịnị wó school bọọ emi Jehovah Iseri awọụbo didụbamọmị. Borys Ukraine sụụ duonị baịn zịnị yọ amú ifiemị, wo bịnaotubo baratụa ụ pịrịmị. Tuu ifie laamị, Borys Memorial kpọ amúmị. Ómịnị waị ụ paamọye kẹrị-iroro ifiemị, Borys gbaamị: “Jehovah Iseriotubo ebibara ị pei bá torụtụa ị dii yọmị, ịmịnị á kule kamị.”

¹¹ Omịnị kpọ wo dieneni nana agọnọ Daụ dimịẹ wẹrị, baratụa naa Jehovah karịgha otubo kpọ pịrị a paaemi. (Luke 6:31, 36) Wo mịẹ á dịamịnị tarịbị kaanghaba á dịnẹmọ wẹrị bo Jehovah karị kpọ paemi. (1Pet. 2:12) Anịa ye akị kịmị pịrịmịnị yọmị pọwẹị akị kẹrị akịmịnị yọ dẹịn-emi duonị, á bo Jehovah karị bá karịgha kị gbaa kpọ, omịnị pọwẹị nanamịnị.—Acts 20:35.

JEHOVAH WO KEKEREMỊNỊ

12. Jehovah te kekere yọkị mịẹpaamọ wó kịmịbo pịrịmụ bara kị gbaa wẹrịemi a o? (Psalm 91:1, 2, 14)

¹² Psalm 91:1, 2, 14 goo. Mị ifie kpọ, Jehovah temeanga kekere yọ mịẹpaamọ wo pịrịmụ bara gbaa wẹrịemi. Ómịnị benebene Satan bụọmọ wẹrị gesii karịbụọ seimọgha fa. (John 17:15) “Opu akpotu” laadaba, Jehovah tẹmẹanga mọ mẹnẹanga mọ wó kịmịbo kekeremụ bara gbaa wẹrịemi, omịnị eti akị bịsẹ gbaa egberi ma atụa wẹrịemi.—Rev. 7:9, 14.

13. Jehovah te ụwọụama ka kị wo kẹnị-ụbọ kẹnị-ụbọ kekeremịnị a o?

¹³ Jehovah tebara ka kị wo kẹnị-ụbọ kẹnị-ụbọ kekeremịnị a o? Ómịnị Bible duo baratụa wo pịrịwẹrị, ebi mọ sei mọ leleipẹlẹmịnị. (Heb. 5:14) Omịnị Bible tolumọ yebo diwẹnịdaba, wo mịẹ Jehovah dọụgha ye mịẹgha fa bá mẹnẹanga akpotu kpọ duo wo zụọmịnị. (Ps. 91:4) Bịsẹyọ bụọmọ kpọ, Jehovah itu kpọ kọn wo kekeremịnị. (Isa. 32:1, 2) Omịnị wo angọbo akị Jehovah tarị bá wó gbaabara diwẹnịmịnị otubo mọ naịndaba, baratụa wo pịrịwẹrị biin dadiyeama datịẹmọmịnị.—Prov. 13:20.

14. (a) Tetuu kị duonị Jehovah wo laamịnị dadiyebosẹ duo wo zụọgha o? (b) Psalm 9:10 te kụrọmọye ka kị wo pịrị wẹrịemi a o? (Footnote dii.)

¹⁴ Bụọdẹ ifiemị Jehovah akpotu anịghakpọ fịị duo wó kịmịbo zụọtimimị. Anịa, ifiebosẹ ka bịsẹbara mịẹtimi bara fa. Zụa ifieama “tọngha yeama” wo paamọmịnị. (Eccl. 9:11) Bịsẹyọ bụọmọ kpọ, Satan ikpe owei bara mịẹdịamụ yọ duonị, Jehovah wó kịmịbo bụọmọ ụyamọye bá fịị bolou kpọ duo sụọmịnị. (Job 2:4-6; Matt. 23:34) Wo ifie kpọ bịsẹbara k’emi. Anịa Jehovah wo laamịnị dadiyebo kị kọnsiingha kị gbaa kpọ, Jehovah benebene wó kịmịbo gbeinmọ-koromọgha fa eti omịnị mọ nana wẹrịemi.d—Ps. 9:10.

JEHOVAH WO KỤRỌMỌMỊNỊ

15. Tẹẹbịbị, Bible bá wo bịnaotubo mọ tebara ka kị wo kụrọmọmịnị a o? (2Corinthians 1:3, 4)

¹⁵ Wo wẹrị 2Corinthians 1:3, 4 goo. Zụa ifieama, wosẹ eneni kẹrị, kpeke-kpeke bá pọwẹịgha ifieama paamịnị. Kaanghaba mị tịẹkirimị, ị́mịnị bịsẹbara k’emi aba, ị́mịnị bẹtịbị k’emi bara iroro kpọ paaemi. Anịa kịmị ị́ paamọmịnị yebị asụọtuu nimi wẹrịemi a? Jehovah nimi wẹrịemi. Ị́ laaemi yebị ụ kpọ gbele-emi, anịduonị ómịnị “wo laamịnị bụụdọọnyebosẹ wo kụrọmọmịnị.” Tebara o? Omịnị tẹẹbịbị mịẹ Jehovah pịrịdaba, “Ọkpọnanaowei duo bomịnị dọọ mị wo laamịnị, mị dọọ mị dụba akị kịmịawọụ sụọtuu nimi yebosẹ dẹịn-emi.” (Phil. 4:6, 7) Omịnị Bible goomịnị yọ kpọ duo kụrọmọye nanamịnị. Bible bolou ma emi kịlịkịlị nimiye mọ, tarị mọ bá ukiemọye mọ kụrọmọye akị wo pịrịmịnị. Bịsẹyọ bụọmọ kpọ wo yetolumọ yọbo kpọ omịnị kụrọmọye akị bịnaotubo mọ bá Bible mọ duo nanamịnị.

16. Nathan mọ Priscilla mọ paamọ yebị te ka kị ị́ tolumọ ma o?

¹⁶ Nathan mọ Priscilla mọ United States k’emi, á paamọ yebị Jehovah Bible duo kịmị kụrọmọmịnị bara mịẹgaan paamọ wẹrịemi. Zụa kụraịama bụọdẹ ifie, ámịnị egberigbaa otu dọụ kụrọmọ wẹrịemi yọ amú egberigbaamị. Nathan gbaa amọ “Jehovah wo angọtụa yọbị tarịama akị wo pịrịmụ eti wo mo nanamị.” Anịa, ámịnị mú bịsẹyọ laa ifiemị, ámịnị tọngha bara dọọn bá sịlị bụụdọọnye nanamị. Anịduonị ámịnị waị ama a múmị, mú ama lade kpọ ámịnị mọkpọ sịlị bụụdọọnye nanatimimị. Nathan gbaamị “ịminị iroromị, Jehovah tetuu kị duonị tarịama akị wo pịrịgha o.” Kaanghaba “ịmịnị ye mịẹkiri wẹrịemi bara kpọ ịmọ iroromị.” Anịa, ifie bụọmịnịmị, Nathan mọ Priscilla mọ Jehovah naa benebene á gbeinmọ-koromọgha bara erịmị. Nathan mọkpọ gbaamị “bịsẹ kụrọ ifiebo, Bible kị kịlịkịlị ikie-owei a paa wẹrị kụrọmọye akị wo pịrịmị.” “Wo paamọmịnị yebo kị kẹrị-iroromụ yọ dii a, omịnị Jehovah baratụa wo pịrịwẹrị inemịnị bara kị kẹrị-iroromị, bịsẹ yọmị baratụa wo pịrịwẹrị bei bọlọụ ma bomịnị bụụdọọnyebo kpọ Jehovah baratụa wo pịrịmịnị eti nanamị.”

17. Bịnaraụ Helga tebara ka kị kụrọmọye nana ma o? (Foto kpọ dii.)

¹⁷ Bịnaotubo kpọ kụrọmọye akị wo pịrịmịnị. Tebara o? Wẹrị Helga, Hungary inyenrinmịnị bịnaraụ paamọye dii. Amịnị biin kụraịama ka kị bụụdọọnyeama duonị ye apaagha bara irorotimịmị. Anịa amịnị waị a paamọye ditụa ifiebị, Jehovah itu bọọ emi bịnaotubo duo kụrọmọye á pịrịmịnị bara ámọ dọụ ẹrịmị. Á gbaamị: “Ine wẹnịmịnị fịrị mọ, ine dọọnmịnị tọbọụ diimịnị yọ mọ bá zịnị bụụdọọn yeama ị laamịnị ifiemị, Jehovah ẹrịwẹrị baratụa ị pịrịmị. Bei bụọdẹ 30 years bo Jehovah ereinbosẹ ị kụrọmọmịnị bara ịmọ dọụ ẹrịmị. Ómịnị biin ifieama, bịnaotubo gbaamịnị ebi egberibo ka kị ị kụrọmọmịnị. Ámịnị agbẹị ifie letter-ama, cardi-ama bá kulebịbịama akị ị pịrịmị.”

18. Omịnị tebara ka kị zịnịotu kụrọmọ a paaemi a o?

¹⁸ Omịnị Jehovah dimịẹ wẹrị zịnịotu kụrọmọ a paaemi. Tebara a o? Omịnị etipou bara á pei, kịmị kụrọmọ egberiama gbaa á pịrị, bá zịnị ụwọụama akị baratụa á pịrị a paaemi. (Prov. 3:27) Omịnị baratụa ụyafịmịnị kịmịbosẹ kị pịrịmịnị, Jehovah karịgha otubo kpọ sụọemi. Wo mọ kẹnịyọ inyenrinmịnị otu, eneni-kẹrị, dọọn, bá á mịẹ kpeke-kpekemụ ye paadaba, omịnị mú á dii, ebibara á pei, bá Bible duo kịmị kụrọmọ egberiama gbaa á pịrịmịnị. Omịnị wo “kịmị kụrọmọ daụ” Jehovah dịmịẹdaba, baratụa wo tẹmẹanga bịnaotubo pịrịwẹrị ụya inemịnị bá Jehovah karịgha otubo adụdụbo kpọ gbele wẹrị bo Jehovah karị a paaemi.—Matt. 5:16.

JEHOVAH IFIEBOSẸ BARATỤA WO PỊRỊMỊNỊ

19. Jehovah teeki mịẹ wo pịrịmịnị a, omịnị ba tebara ka kị ụ dimịẹ a paaemi a o?

¹⁹ Jehovah tọrụtụa ụ karịmịnị kịmịbosẹ dimịnị. Omịnị bụụdọọnye bolou emi ifiebị ómịnị benebene wo gbeinmọ-koromọgha fa. Tarị nana wẹrịemi daụ mọ yin mọ otu tọrụtụa ánị awọụbo dimịnị bara kị, Jehovah kpọ torụtua ụ karịmịnị otubo dimịnị. Ómịnị wo tolumọ, wo dọụ wẹrịemi yebo akị wo pịrị, wo kekere, bá wo kụrọmọmịnị. Omịnị kpọ baratụa bụụdọọnye bolou emi otu pịrịmịnị ifiesẹ, wo tarị nana agọnọ Daụ kị dimịẹmịnị. Wo mịẹ enenị-kerịmụ bụụdọọnyeama wo laa kpọ paaemi, anịa Jehovah wo mọ emibara omịnị mọ nimi wẹrịemi. Ómịnị gbaa wẹrịemi: “Benebene malafa kụmọ, ịmịnị á mọ mọ́ emi.” (Isa. 41:10) Jehovah bei gbaa egberi bị! Omịnị kọkọ bẹtịbị fa.