Jehovah Baramị Kẹsị Bụọgha

1. Moses Israel otubo daá Egypt duo paatimi ifiemị, tebara ka kị eti kọn Jehovah atụa ma o?

HEBREWS funbị peibolou nana otuama kịẹn wẹrịemi Moses kpọ kẹnị ubọ, ómịnị peibolou nana kụrọmọmị. (Heb. 3:​2-5; 11:​23-25) Ómịnị Israel otubo daa Egypt duo paatimi ifiebị Mọses peibolou mịẹdịamị. Ómịnị Pharaoh mọ wó sụụ otubo mọ bụọmọ wẹrị ụ mịẹ malafagha. Ómịnị Israel otu kọn kwekwe abadị mọ ozubou mọ duo wẹnịtimi ifie kpọ ómịnị eti akị Jehovah ka tụamị. (Heb. 11:​27-29) Israel otubo ba eti akị Jehovah atụagha ifie kpọ Moses eti akị Jehovah kọọ tụamị. Moses nana peiboloumị benebene afẹn fagha, Ọkpọnanaowei ozubou mị fịyaị mọ beni mọ mịẹpaamọ wẹrị wó kịmịbo kekeremị.a—Ex. 15:​22-25; Ps. 78:​23-25.

2. Tetuu kị duonị: Jehovah wó “baramị kẹsị bụọemi a” bara akị Moses bii ma o? (Numbers 11:​21-23)

² Moses kụrọ peibolou kị nana wẹrịemị kpọ, tamamaa bara akị Israel otubo zụọbụọmọ wẹrị kẹnị kụraị laa ifiemị, Jehovah nama mịẹpaamọ wó kịmịbo pịrịmụ yọbị Moses tamanaịnyo nanamị. Israel otubo biin-emi duonị Jehovah tebara ka kị fịyaị mịẹpaamọ bei biin kịmịbosẹ pịrịmịnị bara ómịnị mọ iroromị. Jehovah Moses biimị: “Jehovah baramị kẹsị bụọemi a o?” (Numbers 11:​21-23 goo.), “Jehovah baramị” anị wó yalịyalị tẹmẹmị, anịghakpọ wó fịrịwẹnịmịnị kụrọmị. Anịduonị, Jehovah akị Moses biimịnị yọsẹ, ‘Ịmịnị laa ine gbaadẹ egberi mịẹbeinmọgha fa bara kị ị́mọ tọn mị?’

3. Tetuu kị duonị omịnị Moses mọ Israel otubo mọ paamọye ditụa agbẹị-emi a o?

³ Ị́mịnị Jehovah ị́ mọ iné warịbolou otubo mọ dọụ wẹrịemi mẹnịanga yebo mịẹgha fa bara irorodẹ anịghakpọ naa irorogha? Wo wẹrị Moses mọ bá Israel otubo mọ paamọye ditụa, ámịnị Jehovah ánị mẹnịanga yebo mịẹ á pịrịmụ yọbị tamanaịnyọ nanamị. Bịsẹ egberi gbelemọ Bible tolumọ yebo baratụa wo pịrịwẹrị Jehovah baratụa wo pịrịmịnị eti nanamịnị.

MOSES MỌ ISRAEL OTUBO MỌ DUO TOLUMỌYE NANA

4. Tetuu kị duonị Israel otubo Jehovah laa ánị mẹnịanga yebo mịẹ á pịrịgha fa bara iroro ma o?

⁴ Paayemị kẹrị ịroro. Israel otubo mọ bá “biin” Israel duo paagha kịmịbo mọ Egypt duo seriwẹrị ozubou duo wẹnị kikoromọ wẹrịemi ogbo ma múmịnị. (Ex. 12:38; Deut. 8:15) Bei biin Israel duo paagha kịmịbo mọ Israel otubo mọ manna fịmịnị yọbị dẹịnsụọwẹrị ụmbụbụrụmị. (Num. 11:​4-6) Ámịnị Egypt bọọ fịtimi fịyaịbo kị kẹrị ukiemị. Kịmịbo mịẹkụrọtimi bara duonị Moses bẹtịbị ánị dọụmịnị yebo mịẹ á pịrịmụ bara iroromị.—Num. 11:​13, 14.

5-6. Israel duo paagha otu mịẹ yemị Israel otubo gbele baramị te ka kị wo tolumo ma o?

⁵ Israel duo paagha otubo ye a tọrụkẹrịgha inyenrinbụọ kị Isreal otubo kpọ gbelemị. Zịnịotu ye a tọrụkẹrịgha inyenrinbụọmị wo kpọ gbelewẹrị Jehovah mịẹ wo pịrịdẹ yebo tọrụkẹrịyọ mịẹdịa kpọ paaemi. Kaanghaba omịnị wo nana bụọmọdẹ yeama kẹrị-iroro anịghakpọ zịnịotu nana yeama a tọrụdọọn kpọ paaemi. Mọabịkpọ, wo nana wẹrịemi yebo wo a biribeinmịnị ifiesẹ, paabara paabara omịnị pọwẹị nanamịnị.

⁶ Israel otubo mú kikoromọ wẹrịemi ogbo laadaba Ọkpọnanaowei mịẹ á pịrịmụ ebi yebo kẹrị ukie agbẹị wẹrịmị. Ámịnị mú ánị aya ama laadaba, ánị dọụ wẹrịemi mẹnẹanga yebosẹ nanamịnị. Bịsẹ bara kị, wo kpọ wo ịkịọụsẹ akị ma akpọmị wo nanagha yebo ka tụamụ yọ dii a, Jehovah kikoromọdẹ aya akpọmị paamụ bara kị kẹrị iroro. Baratụa wo pịrịwẹrị eti kọn Jehovah atụamụ Bible yọama goo daa kẹrị iroro.

7. Tetuu kị duonị Jehovah baramị kẹsịgha eti wo mọ nana agbẹị-emi a o?

⁷ Omịnị mọkpọ iroro a paaemi, tetuu kị duonị “Jehovah baramị kẹsị bụọemi a” bara Ọkpọnanaowei mọ akị Moses bii ma o? Jehovah bei biibịbị akị Moses bii ifiemị ómịnị baratụa Moses pịrịwẹrị maa yekị nimi dọụmịnị, anị ómịnị kụrọnana wẹrịemi bá kịmị emiyọ emiyọ ómịnị wó kụrọbị akị baratụa bịsẹ ụbọ pịrị a paaemi. Israel otubo kịmị fa ozubou k‘emi kpọ Ọkpọnanaowei laa biin namama mịẹ á pịrị fị a paaemi. Ọkpọnanaowei “wó opu bara finimọ wẹrị,” wó kụrọbị akị baratụa wó kịmịbo pịrịmị. (Ps. 136:​11, 12) anịduonị omịnị bụụdọọnye bolou asụọdaba, Ókpọnanaowei baratụa wo pịrịmụ yọbị tamanaịnyọ nana kụmọ.—Ps. 138:​6, 7.

8. Teeki baratụa wo pịrịwẹrị Israel otubo mịẹbara mịẹgha fa o? (Foto kpọ dii.)

⁸ Jehovah alaghatimi nama mịẹpaamọ á pịrịmị; ómịnị biin quail tịịnmịnị ofoniama kị mịẹpaamọ á pịrịmị. Anịa Israel otubo tọrụkẹrịyọ mịẹdịagha, ámịnị kọkọ Jehovah mịẹ tamamaa fịrịmị tọrụkẹrịyọ mịẹdịamụ bara dii a, ámịnị mẹnẹmọtu kị tụamị. Ámịnị ba imba kpọ fougha bara ka kị, dein mọ erein mọ biin quailama bẹnịmọ akịmị. Ánị mịẹ yebị Jehovah mịẹ boloukọnmị, anịduonị ómịnị ụya pẹlẹ “mẹnẹmọtu tụa otubosẹ” pịrịmị. (Num. 11:​31-34) Omịnị bịsẹ paa ye duo yetolumọ akị a paaemi. Omịnị angọdidá mẹnẹmọtu tụạ inyenrinbụọ nana kụmọ. Omịnị pẹrẹ-emi bá pẹrẹgha kị gbaa kpọ, wo nana yebo akị “agọnọ ka gbaịn” bá wo aki Jehovah mọ Jesus mọ a nana wẹrịemi ikie mịẹ kụrọmọ. (Matt. 6:​19, 20; Luke 16:9) Omịnị bịsẹ bara mịẹdaba, Jehovah wo dọụ wẹrịemi yebo mịẹ wo pịrịmịnị.

9. Omịnị te eti ka kị Jehovah baratụa-pịrịye ma nana wẹrịemi a o?

⁹ Jehovah wo ifie kpọ baratụa wó odubo otubo pịrịmịnị. Bịsẹ bara gbaadẹ duonị, omịnị sịlị fa ifieama mọ mọụn a timimụ ifieama paagha fa bara kị gbaamịnị a o? Bịsẹ baragha.b Anịa Jehovah benebene wo gbeinmọ-koromọgha fa. Wo laamịnị bụụdọọn yebosẹ ómịnị baratụa wo pịrịmịnị. Wo wẹrị (1) sịlị bụụdọọnye nana wẹrịemi ifiebo mọ, bá (2) owadaba akị angọ kekeremụ iroro tọnmịnị ifie mọ eti akị Jehovah a tụa wẹrịemi bara mịẹdịamụ ụwọụama ditụa.

SỊLỊ BỤỤDỌỌNYE NANA WẸRỊEMI IFIE

10. Te sịlị bụụdọọn yeama kị wo mọ nana a paaemi a o?

¹⁰ Bei akpọ kunumọ ereinbo naịn dẹịnmịnịmị omịnị sịlị bụụdọọnye nana dẹịnmịnị. Eti akị tụa agbẹịgha daabụọ-ama, sụụ, vurudu paamịnị akpotuama, dọọn kpọ wo mịẹwẹrị, wo nana wẹrịemi fịrị, nanayeama, bá warị kpọ a barasin a paaemi. Omịnị aya fịrị dọụ kpọ paaemi anịghakpọ warị gbalịmụyọ duonị kpee zịnịyọ amú kpọ paaemi. Teeki baratụa wo pịrịwẹrị Jehovah baramị kẹsịgha eti nana wẹrịemi bara mịẹdịamịnị a o?

11. Ị́mịnị sịlị bụụdọọnye nanadaba teeki baratụa ị́ pịrịmịnị a o? (Luke 12:​29-31)

¹¹ Bọlọụ mịẹ agbẹị-emi yemị tẹẹbịbị mịẹ Jehovah yarị. (Prov. 16:3) Ị́mịnị ebi iroro tọnmụ kịlịkịlị-nimiye akị Jehovah bara duo bii bá paamịnị yebo ị́ “mịẹ kpeke-kpekemịnị bara duonị” dọọ adụdụ nanamụ bara kpọ bii. (Luke 12:​29-31 goo.) Nanaye biribein inyenrinbụọ nanamụ yọ kpọ akị Jehovah bara duo bii. (1Tim. 6:​7, 8) Jehovah ogbo mịẹpaamọdẹ funbo mọ bá vidiobo mọ duo sịlị bụụdọọnye dẹịnmọmụ bara a sụọtuu dọụ. Biin kịmịama jw.org duosụọwẹrị bịsẹ funbo mọ vidiobo mọ duo baratụa pịrịye nanadẹ.

12. Te biibịbị kị baratụa Christtuuduo kịmị pịrịwẹrị ebi iroroama tọn wó warịbolou pịrịmịnị a o?

¹² Zụa kịmịama ánị warị otubo a barasin wẹrị alayọ amú fịrị wẹnịmịnị, anịa biindẹịn ifieama akpotu kị bịsẹ bolou duopaamịnị. Mịẹdẹ kị fịrị kẹrị akịmịnịmị, gbẹẹmị dụba-emi bara bẹtịbị ditua kụmọ, anịa Jehovah karịmụyọ gbelemụ bara kpọ dịtụa. (Luke 14:28) Angọ bii: ‘Ịmịnị fịrị duonị alaayọ amú daba tebara ka kị wo zọzọ nanayọ gbelelmịnị a o? Ịmịnị laa yetolumọyọ, egberigbaayọ bá bịnaotubo mọ kẹnịsụọmọ wẹnịmịnị?’ Awọụ ziidaba, mị yelaa biibịbịmị kọn angọ bii: ‘Ịmịnị laa baratụa á pịrịwẹrị “Jehovah mọ naịn bá wó gbaa bara dimịe” a paamịnị a o?’ (Eph. 6:4) Wo Jehovah karịgha bịnaotubo mọ bá ikie-otubo mọ gbaa bara kị dii yemịẹmụ bara dii a, Jehovah ye-iroromịnị bara kị diwẹrị iroro tọn.c Tony, zịnị ibe a mú wẹrị dụba gbẹẹ fịmụ dadịye nanamị. Anịa ómịnị tẹẹ Jehovah yarị bá ụ taa mọ ẹrẹteisinmị, ómịnị fịrị kẹrị akịgha, ámịnị ánị ụndụ kị mịẹ bọụbọụ mị. Tony waị wó ụndụ ditụa ifiemị, ụ gbaamị: “Ịmịnị fomuun nanawẹrị biin kịmịama mịẹbo Jehovah nimidẹ, wo awọụbo kpọ gesii bọọ pọwẹị pọwẹị k’emi. Wo warịbolousẹ Matthew 6:33 gbaa egberi duo tolumọye nanadẹ, Jehovah ifiebosẹ wo kekeremịnị.”

OWA DABA AKỊ ANGỌ KEKEREMỤ IRORO TỌNMỊNỊ IFIE

13. Omịnị te yeama kị mịẹwẹrị owa daba baratụa wo pịrịmịnị a o?

¹³ Omịnị owadaba akị angọ kekeremụ iroro tọnmịnị ifiemị wo akị Jehovah a nana wẹrịemi etimị dadiye a sụọ a paaemi. Bible, omịnị angọtụa fịrịwẹnị anịkị tuu ifie laadaba laa angọ kekeremụ bara ka kị wo kụrọmọ wẹrịemi. (Prov. 6:​6-11) Anịduonị mịẹ ka paaemiaba, sịlị gbaịn wẹrị tuu ifie laadaba akị angọ gbaalịmụ yọmị seigha. Kọkọ sịlị zụa ifieama wo kekere a paaemi. (Eccl. 7:12) Anịa, omịnị wo ụndụsẹ kọn nanayeama kị dọụmụ bara mịẹkụmọ.

14. Owadaba kọn angọ kekeremụ iroro wo mọ tọnmịnị ifiemị, tetuu kị duonị Hebrews 13:5 kẹrị ukie agbẹị-emi a o?

¹⁴ Kịmị sịlị bẹtịbị gbaịnmịnị, anịa “Ọkpọnanaowei tọrụyọ bọọ yelaaye” mịẹgha ifiesẹ Jesus bịsẹ kịmịbị akị ayẹbẹ kịmị kị tọnmọmị (Luke 12:​16-21) Deinbaị nimi kịmị fa. (Prov. 23:​4, 5; Jas. 4:​13-15) Jesus tuuduo-otubosẹ bụụdọọn yeama laamịnị. Jesus gbaa amọ wó a tuuduo dọụmịnị kịmịsẹ nanayeama “barasin” wẹrị wo a tuuduomụ bara akị angọtọlọmọ. (Luke 14:​33, ftn.) Judea ma timi bọlọụ kụraị sọnransii Christtuuduo otubo pọwẹịtimi ánị nanayebo a barasin wẹrị Jesus tuuduo-otu a paamị. (Heb. 10:34) Wo ifie kpọ bịnaotuama Politics a sụọdọụgha duonị, ánị fịrịbo kpọ a barasindẹ. (Rev. 13:​16, 17) Teeki baratụa á pịrịwẹrị bịsẹ bara mịẹ ma o? Ámịnị eti kọn Jehovah kikoromọ wẹrịemi egberi ma tụamị: Jehovah gbaa amọ “Ịmịnị benebene ánị a barasingha fa, bá á gbein koromọgha fa.” (Hebrews 13:5 goo.) Omịnị wo kụrọsẹ ka kị angọtọlọmọ wẹrị wo owamụ ifie korumịnị, anịa tọngha yekị paa kpọ Jehovah baratụa wo pịrịmụ eti wo mọ nana wẹrịemi.

15. Jehovah karịmịnị daụ mọ yin mọ otu tebara ka kị ánị awọụbo dii agbẹị-emi a o? (Foto kpọ dii.)

¹⁵ Zụa yọama, taa mọ yei mọ otu owadaba awọụbo sịlị baratụa pịrịye mịẹ á pịrịmụ yọkị duonị tọbọụ ziimịnị. Ánị iroromịnị barasẹ, ámịnị owadaba ánị awọụbo kị á kekeremịnị. Bible didaba daụ mọ yin mọ otu ánị awọụbo kekere kị gbaa wẹrịemi. (2Cor. 12:14) Mọabịkpọ, daụ mọ yin mọ otu awọụ ziidaba ánị awọụbo duo baratụa-pịrịye dọụ wẹrịemi, kọkọ biin awọụama pọwẹịtimi bịsẹ bara mịẹmịnị. (1Tim. 5:4) Anịa Jehovah karịmịnị daụ mọ yin mọ otu, ánị awọụbo sịlị nanawẹrị baratụa á pịrịmụ yọkị dụbadẹịn pọwẹị mịẹpaamịnị bara irorogha, anịa ánị awọụbo Jehovah karịmịnị yọkị dụbadẹịn pọwẹị mịẹpaamọ á pịrịmịnị bara kị iroromịnị.—3John 4.

16. Daụ mọ yin mọ otu tebara ka kị baratụa ánị awọụbo tolumọ wẹrị, angọ gbaalịmụ bara kọn angọtọlọmọmịnị a o? (Ephesians 4:28)

¹⁶ Daụ mọ yin mọ otu, ánị ebi mịẹdịa yebo akị ánị awọụbọ tolumọ dá eti akị Jehovah a tụa, bá baratụa ánị angọbo pịrịmụ bara kpọ kọn angọtọlọmọ. Ánị zaụ-emi ifiesẹ, angọtụa fịrịwẹnimụ yọbị yelaaemi bara kọn á tolumọ. (Prov. 29:21; Ephesians 4:28 goo.) Ámịnị sọụ dụbamịnịmị, baratụa á pịrịdá school yọbị angọtụa fun goo. Daụ mọ yin mọ otu ebibara tuudọụ dá Bible tolumọ yebo akị baratụa ánị awọubo pịrị. Anịkị ámịnị laa agbẹị bara kọn school amú yọ dimọwẹrị, laa fomuun nanawẹrị Jehovah karịmụ yeama tolumọwẹrị angọ gbalị a paadẹ.

17. Te eti kị wo mọ nana wẹrịemi a o?

¹⁷ Jehovah wo dọụ wẹrịemi yebo mịẹ wo pịrịmụ kụrọ mọ dịsẹ mọ nana wẹrịemi, Jehovah karịmịnị kịmịbosẹ eti akị bịsẹ yọma tụa wẹrịemi. Omịnị kunumọ ereinbo duo suodẹịnmịnịbị, wo akị Jehovah atụa wẹrịemi etimị dadiye a sụọdẹịnmịnị. Anịa paaye paaye, pebidá wosẹ Jehovah wo mẹnẹanga dọụ wẹrịemi yebo mịẹ wo pịrịmụ eti nana. Jehovah barabị kẹsị bụọgha duonị ómịnị ifiebosẹ wó opu barabị akị baratụa wo pịrịmụ eti omịnị mọ nana wẹrịemi.