Marcos

12 Kasta met, rinugianna ti agsao kadakuada kadagiti pangngarig: “Maysa a tao nagmula iti kaubasan,+ ket nangikabil iti alad iti aglikmut dayta, ket nangkali iti tangke a pagpespesan iti ubas ken nangpatakder iti torre,+ ket impaabangna kadagiti agtaltalon,+ ket nagdaliasat iti sabali a daga.+ 2 Itan iti naikeddeng a panawen nangibaon iti adipen a mapan kadagiti agtaltalon, tapno mangala koma iti sumagmamano kadagiti bunga ti kaubasan manipud kadagiti agtaltalon.+ 3 Ngem isu innalada, minalmaloda ket pinapanawda nga ima-ima.+ 4 Ket nangibaon manen kadakuada iti sabali nga adipen; ket dayta a tao kinabilda iti ulo ket pinabainanda.+ 5 Ket nangibaon iti sabali, ket dayta a tao pinapatayda; ken adu a sabali pay, sumagmamano ti minalmaloda ket sumagmamano ti pinapatayda. 6 Maysa pay ti adda kenkuana, maysa a dungdungnguen nga anak.+ Isu ti naudi nga imbaonna kadakuada, a kunkunana, ‘Raemendanto ti anakko.’+ 7 Ngem dagidiay nga agtaltalon kinunada iti bagbagida, ‘Daytoy ti agtawid.+ Umaykayo, papatayentayo, ket kukuatayto ti tawid.’+ 8 Gapuna innalada ket pinapatayda,+ ket impuruakda iti ruar ti kaubasan.+ 9 Anianto ti aramiden ti makinkukua iti kaubasan? Umayto ket dadaelenna dagiti agtaltalon, ket itednanto ti kaubasan+ iti sabsabali.+ 10 Saanyo aya a pulos nabasa daytoy a kasuratan, ‘Ti bato+ a linaksid dagiti managibangon, daytoy ket nagbalin a kangrunaan a bato a pasuli.+ 11 Manipud ken Jehova a naaramid daytoy, ket nakaskasdaaw dayta kadagiti matatayo’?”+

12 Iti kasta rinugianda nga impamuspusan ti panangkemmeg kenkuana, ngem nagbutengda iti bunggoy, ta nadlawda a sinaona ti pangngarig nga isuda ti adda iti panunotna. Gapuna isu pinanawanda ket napandan.+

13 Sumaganad imbaonda kenkuana ti sumagmamano kadagiti Fariseo ken kadagiti pasurot iti gunglo ni Herodes,+ tapno tiliwenda iti panagsasaona.+ 14 Idi simmangpetda kinuna kenkuana dagitoy: “Mannursuro, ammomi a napudnoka ket saanmo nga ikankano ti asinoman, ta saanka a kumita iti makinruar a langa dagiti tattao, no di ket isurom ti dalan ti Dios maitunos iti kinapudno:+ Nainkalintegan kadi ti agbayad iti panguluen a buis ken Cesar wenno saan? 15 Agbayadkami kadi, wenno saankami nga agbayad?”+ Yantangay nadlawna ti panaginsisingpetda, kinunana kadakuada: “Apay a subsubokendak? Iyegandak iti denario tapno kitaek.”+ 16 Nangyegda iti maysa. Ket kinunana kadakuada: “Makinladawan ken surat daytoy?” Kinunada kenkuana: “Ni Cesar.”+ 17 Idin kinuna ni Jesus: “Ibayadyo ken Cesar ti bambanag ni Cesar,+ ngem iti Dios ti bambanag ti Dios.”+ Ket nangrugida nga agsiddaaw kenkuana.+

18 Itan immay kenkuana dagiti Saduceo, nga agkunkuna nga awan panagungar, ket insaludsodda kenkuana:+ 19 “Mannursuro, insurat kadakami ni Moises a no matay ti kabsat a lalaki ti asinoman ket mapanawanna ti maysa nga asawa ngem saan a mangibati iti anak, ti kabsatna a lalaki+ rebbeng nga alaenna ti asawa ket mangpatanor iti putot manipud kenkuana maipaay iti kabsatna.+ 20 Adda idi pito nga agkakabsat a lallaki; ket ti umuna nangala iti asawa, ngem idi natay saan a nangibati iti putot.+ 21 Ket isu innala ti maikadua, ngem natay a di nangibati iti putot; ket kasta met laeng iti maikatlo. 22 Ket dagiti pito saanda a nakaibati iti aniaman a putot. Kaudian ti amin natay met ti babai.+ 23 Inton panagungar siasinonto kadakuada ti makin-asawa kenkuana? Ta isu innala dagiti pito kas asawa.”+ 24 Kinuna kadakuada ni Jesus: “Saan aya a daytoy ti makagapu nga agbiddutkayo, ti saanyo a pannakaammo uray kadagiti Kasuratan wenno ti pannakabalin ti Dios?+ 25 Ta inton bumangonda manipud kadagiti natay, saan a mangasawa dagiti lallaki wenno mayasawa dagiti babbai, no di ket kaslada kadagiti anghel iti langlangit.+ 26 Ngem no maipapan kadagiti natay, a maibangonda, saanyo aya a nabasa iti libro ni Moises, iti salaysay maipapan iti siitan a bassit a kayo, no kasano a kinuna kenkuana ti Dios, ‘Siak ti Dios ni Abraham ken Dios ni Isaac ken Dios ni Jacob’?+ 27 Isu ket Dios, saan a dagiti natay, no di ket dagiti sibibiag. Agbiddutkay unay.”+

28 Ita ti maysa kadagiti eskriba nga immasideg ken nakangngeg kadakuada nga agsusupiat, ta ammona a sinungbatanna ida iti nasayaat a wagas, nagimtuod kenkuana: “Ania a bilin ti umuna iti amin?”+ 29 Ni Jesus simmungbat: “Ti umuna ket, ‘Denggem, O Israel, ni Jehova a Diostayo ket maymaysa a Jehova,+ 30 ket masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo ken buyogen ti intero a pigsam.’+ 31 Ti maikadua isu daytoy, ‘Masapul nga ayatem ti padam a tao a kas iti bagim.’+ Awanen ti sabali a bilin a dakdakkel ngem kadagitoy.” 32 Kinuna kenkuana ti eskriba: “Mannursuro, naimbag ti panangikunam maitunos iti kinapudno, ‘Isu ket Maymaysa, ket awanen ti sabali no di Isu’;+ 33 ket daytoy panagayat kenkuana buyogen ti intero a puso ti maysa ken buyogen ti intero a pannakaawat ti maysa ken buyogen ti intero a pigsa ti maysa ken daytoy panagayat ti maysa iti padana a tao a kas iti bagina ket adayo a napatpateg ngem kadagiti amin a sibubukel a daton a mapuoran ken sakripisio.”+ 34 Gapu itoy ni Jesus, idi mailasinna nga isu simmungbat a sisasaririt, kinunana kenkuana: “Saanka nga adayo iti pagarian ti Dios.” Ngem awanen ti asinoman a makaitured nga agsaludsod kenkuana.+

35 Nupay kasta, idi mangipaay iti sungbat, rinugian a kunaen ni Jesus bayat a mangisursuro idiay templo: “Kasano a dagiti eskriba kunaenda a ti Kristo ket anak ni David?+ 36 Babaen iti nasantuan nga espiritu+ kinuna ni David a mismo, ‘Kinuna ni Jehova iti Apok: “Agtugawka iti makannawanko agingga nga ikabilko dagiti kabusormo iti baba dagiti sakam.”’+ 37 Isu awagan a mismo ni David iti ‘Apo,’ ngem kasano a mapasamak nga isu anakna?”+

Ket siraragsak nga agim-imdeng idi kenkuana ti dakkel a bunggoy.+ 38 Ket iti panangisurona intuloyna a kunaen: “Siputanyo dagiti eskriba+ a kayatda ti agpagnapagna a nagpagan-anay iti nagayad ket kayatda dagiti kablaaw kadagiti plasa 39 ken dagiti makinsango a pagtugawan kadagiti sinagoga ken dagiti katan-okan a puesto kadagiti pangrabii.+ 40 Isuda dagidiay mangal-alun-on iti balbalay+ dagiti balo a babbai ket kas pambar agkarkararagda iti atiddog; awatento dagitoy ti nadagdagsen a pannakaukom.”+

41 Ket isu nagtugaw a makitkitana dagiti baul ti gameng+ ket rinugianna a pinaliiw no kasano a ti bunggoy mangipispisokda iti kuarta kadagiti baul ti gameng; ket adu a nabaknang a tattao mangipispisokda iti adu a sinsilio.+ 42 Ita ti maysa a napanglaw a balo a babai immay ket nangipisok iti dua a babassit a sinsilio, a bassit unay ti pategna.+ 43 Gapuna inayabanna dagiti adalanna ket kinunana kadakuada: “Pudno kunak kadakayo a daytoy napanglaw a balo a babai nangipisok iti ad-adu ngem dagidiay amin a mangipispisok iti kuarta kadagiti baul ti gameng;+ 44 ta isuda amin nangipisokda manipud kadagiti teddada, ngem isu, manipud iti panagkasapulanna, impisokna ti isuamin nga adda kenkuana, ti intero a pagbiagna.”+