Ti Kadi Panangtedyo Maysa a Sakripisio?
Maysa a Natimbeng a Panangmatmat kadagiti Kontribusion
KALPASAN ti panagisurona ti tattao kadagiti adu a bambanag idiay templo, ni Jesus “nagtugaw iti sanguanan ti pagidulinan kadagiti daton ket kinitana no kasano ti panangipisok dagiti umili ti pirak idi pagidulinan.” (Marcos 12:41) Ti simmaruno ket isut’ nalatak a salaysay iti bassit a kuarta ti balo a babai. Ngem apay a nagtugaw sadiay ni Jesus ket binuyana dagiti tattao a mangipaay kadagiti datonda? Saanna kadi nga imbaga kadagiti adalanna a saanda koma a palubosan uray ti makattigidda mangammo iti ar-aramiden ti makannawanda no impaayda dagiti sagut ti kinamanangngaasi?—Mateo 6:3.
Sakbayna, sipipinget a tinubngar ni Jesus dagiti relihiuso a papangulo gaput’ panangusarda kadagiti awanan prinsipio a pamay-an tapno alun-onenda “dagiti balbalay dagiti balo a babbai.” Kinunana a dagitoy a relihionista “awatendanto ti naing-inget a pannakaukom.” (Marcos 12:40) Tapnon makaisuro iti maysa a leksion, idin imbaw-ingna ti atensionna iti ar-aramiden dagiti tattao idiay pagidulinan kadagiti daton. Itatta, no adut’ mangngegtayo maipapan iti dakkel a kuarta a nairaman kadagiti organisasion ti iglesia, ti di umiso a panangusar kadagita a pundo, ken ti agsobsobra nga estilo ti panagbiag dagidiay a mangimaton, nasayaat no umimdengtay a nalaing no aniat’ makuna ni Jesus.—Pangngaasiyo ta basaenyo ti Marcos 12:41-44.
Ti Pagidulinan kadagiti Daton
Ti salaysay kunaenna a ni Jesus “nagtugaw iti sanguanan ti pagidulinan kadagiti daton.” Nalawag a daytoy ket iti Korte ti Babbai, a sadiay sumagmamano a pagidulinan, wenno kahon, ti naikabil kadagiti diding tapno pangipisokan dagiti tattao iti datdatonda. Ti nakaugalian dagiti Judio ibagana kadatayo nga adda 13 a kahon amin. Iti Hebreo maaw-awaganda iti trumpeta, agsipud ta adda babassit nga abut iti rabawda a sinan kampana iti maysa a trumpeta. Naikuna nga ‘awan ti simrek iti templo nga awan ti impisokna iti dayta.’
Ti propesor a Pranses a ni Edmond Stapfer, iti librona a Palestine in the Time of Christ (1885), nangted iti detaliado a panangiladawan kadagitoy a pagidulinan iti daton. Ti salaysayna ipaayannatayo iti pangripiripan iti narelihiusuan a kabibiag dagiti tattao iti dayta a tiempo, nangnangruna maipapan kadagiti kontribusionda kadagiti serbisio idiay templo.
“Tunggal pagidulinan ket para iti nagduduma a banag, naipakita babaen iti inskripsion a Hebreo. Ti umuna ket namarkaan iti: Siklo a baro; dayta ket, dagiti siklo a nailasin a gastosen iti agdama a tawen. Ti maikadua: Siklo a daan; dayta ket, dagiti siklo a maipaay kadagiti nagastos iti nalpas a tawen. Maikatlo: Pagaw ken urbon a kalapati; ti kuarta a maikabil iti daytoy a pagidulinan ket isut’ gatad nga ibayad dagidiay masapul a mangidaton iti dua a pagaw wenno dua nga urbon a kalapati, ti maysa kas iti daton a mapuoran, ket ti maysa kas daton para iti basol. Naisurat iti ngatuen ti maikapat a pagidulinan: Datdaton a mapuoran; daytoy a kuarta inramanna ti gastos iti dadduma a datdaton a mapuoran. Ti maikalima ket addaan iti naimarka a: Kayo, ket linaonna ti sagsagut ti matalek para iti pananggatang iti kayo a maipaay iti altar. Ti maikanem: Insienso (kuarta nga igatang iti insienso). Ti maikapito: Maipaay iti Santuario (kuarta para iti sentro ti kaasi) Ti innem pay a pagidulinan addaanda iti marka a: Datdaton a boluntario.”
Ti naipanagan kadagiti umuna a dua a pagidulinan ket naibasar iti guddua a siklo (dua a drakma iti kuarta ti Grecia) a buis ti tunggal nataengan a lalaki a kalikaguman ti linteg a bayadan para iti pannakamantener ti templo, dagiti serbiso a maipaay idiay, ken ti inaldaw a datdaton a maipaay para iti intero a nasion. Daytoy a buis ket masansan a nakolektar iti lokal komunidad ket kalpasanna naipan iti templo.—Mateo 17:24.
Ti Linteg kinalikagumanna met dagiti tattao a mangipaay iti nadumaduma a datdaton para iti bukodda a pakaseknan. Sumagmamano ket para iti basbasol a naramidda, dadduma ket maigapu iti naseremoniaan a pangpanggep, ken kaskasdi a ti dadduma ket maipaay iti debosion ken panagyaman. Dagiti kahon a namarkaan iti “Pagaw ken urbon a kalapati” ken “Datdaton a mapuoran” ket maipaay kadagita a pangpanggep. “Iti Trumpeta III,” kuna ti libro a The Temple, Its Ministry and Services, “dagidiay a babbai a kasapulan a mangiyeg kadagiti pagaw para iti daton a mapuoran ken daton para iti basol impisokda dagiti katupag a gatadda iti kuarta, nga inaldaw a mairuar ket ti maiyataday a bilang dagiti pagaw ti naidaton.” Mabalbalin a daytoy ti inaramid dagiti nagannak ni Jesus idi isut’ maladaga.—Kitaenyo ti Lucas 2:22-24; Levitico 12:6-8.
Kalpasanna adda met dagiti daton para iti kayo ken insienso a nausar iti altar ken para iti datdaton a boluntario. Manen, sigun ken Propesor Stapfer, “no asinoman ti nangted iti kuarta para iti kayo wenno insienso, adda iti kabassitan a naikeddeng, ket ti nababbaba iti daytoy ket mabalin a saanto a maidaton. Kasapulan a ti kabassitan a maited ket kas iti presio iti sangarakem nga insienso, wenno dua a troso a kayo a sangasiko ti kaatiddogna a dakkel ti pammagina.”
Aniat’ maadaltayo manipud amin kadagitoy? Nalawag a dagiti Israelitas ket aduanda kadagiti responsabilidad iti panangmantener iti tabernakulo ken kalpasanna ti templo idiay Jerusalem, ti sentro iti pudno a panagdaydayaw. Dagiti sakripisio ken datdaton ket naskenda a paset iti panagdaydayawda. Kinapudnona, ti Linteg ibilinna a “didanto agparang nga ima-ima iti sango ni Jehova.” (Deuteronomio 16:16) Ngem aniat’ panangmatmatda kadagitoy nga annongen?
Nagduduma a Panangmatmat
Ti salaysay ti Biblia ipakitana a dagiti tattao ket managparaburda unay ken nasayaat ti panagpuspusoda idi panawen da Moises ken David ken kalpasanna kabayatan ti panagturay da Joas ken ni Josias. (Exodo 36:3-7; 1 Cronicas 29:1-9; 2 Cronicas 24:4-14; 34:9, 10) Maragsakanda a maaddaan iti paset iti panagibangon iti balay ni Jehova ken iti panangmantener iti dayta agraman iti panangiyadelantar iti pudno a panagdaydayaw. Ti riknada ket nagsayaat ti pannakaiyebkasna babaen iti sasao ni David idi a kinunana: “Naragsakanak idi kinunada kaniak: ‘Intayon idiay balay ni Jehova.’”—Salmo 122:1.
Daytoy nga espiritu ti kinamanagparabur, nupay kasta, ket saan nga impakita ti amin. Kas pangarigan, mabasatayo nga idi kaaldawan ni Malakias, dagiti seserdote agidatdatonda ken Jehova iti “bambanag a rinabsut, ken ti pilay, ken ti masakit.” Imbes a pagragsakanda ti pribilehio a panagserbida, kinunada: “Kitaenyo! Anian a pannakabannog daydiay!”—Malakias 1:13.
Umasping iti dayta, idi panawen ni Jesus sumagmamano ti nanggundaway iti kasasaad tapno parang-ayen ti bukodda nga interes. Dagiti nalatak nga agsuksukat iti pirak idiay templo, kas pangarigan, saanda nga adda idiay tapno basta agsukat. Imbes ketdi, ginundawayanda ti kinapudno a dagiti laeng siklo a Hebreo ti maawat a kas datdaton, ket amin dagidiay addaan iti pirak a Romano wenno Griego masapul nga isukatda dayta. Sigun ken ni Alfred Edersheim, maysa nga autoridad iti historia dagiti Judio, “dagiti managbanko ket mapalubosanda a mangsingir iti maysa a meah a pirak, wenno maysa a kakapat ti denariu [wenno denarius, sueldo ti trabahador iti maysa nga aldaw] iti tunggal guddua ti siklo.” No umiso daytoy, saan a narigat a makita nga anian a nagsayaat a panguartaan daytoy a negosio ken no apay a dagiti papangulo ket makasuronda unay idi a pinagtalaw ni Jesus dagiti agsuksukat ti pirak.
“Iti Panagtarigagayna”
Amin dagitoy ipaganetgetna ti ilustrasion ni Jesus maipapan iti bassit a kontribusion ti pobre a balo a babai, nga awan duadua nga impisokna iti kahon a namarkaan iti “Datdaton a boluntario.” Kas maysa a balo a babai, saan a makalikaguman a mangited iti buis, ken gaput’ limitado a kabaelan, nalabit a saanna a mabaelan ti kabassitan a kasapulan para iti datdaton a mapuoran wenno ti datdaton a kayo wenno insienso. Kaskasdi, tarigagayanna ti mangipamuspusan tapno ipakita ti ayatna ken Jehova. Dina kayat ti mailaksid wenno basta ipabiang laengen kadagidiay ‘makabael iti dayta.’ Kinuna ni Jesus: “Ngem daytoy a babai, iti kinapanglawna, inkabilna ti amin nga adda kenkuana, ken amin a pagtaraonna.”—Marcos 12:44.
Adu a napapateg a leksion ti maadaltayo manipud iti daytoy a salaysay. Ti maysa a kangrunaan unay, nalabit, ket nupay no addaantay amin iti pribilehio a sumuportar iti pudno a panagdaydayaw babaen kadagiti namaterialan a sanikuatayo, ti pudno a napateg iti imatang ti Dios ket, saan a ti panangted kadagiti aniaman a ditay kasapulan, no di ket ti panangted iti aniaman a napateg kadatayo. Iti sabali a pannao, mangmangtedtay kadi iti maysa a banag a saantayto a talaga a sapulen? Wenno ti kadi panangtedtayo ket pudno a maysa a sakripisio?
Panangiyadelantar iti Pudno a Panagdaydayaw Itatta
Itatta, daigiti Saksi ni Jehova iyadelantarda ti pudno a panagdaydayaw babaen iti naregta a panangikaskasaba “daytoy naimbag a damag ti pagarian . . . iti amin a mapagnaedan a daga.” (Mateo 24:14) Ti panangibanag iti daytoy a sangalubongan a trabaho ramanenna saanna laeng a ti naipamaysa a panagregget, panawen, ken pigsa ngem kasta met ti dakkel a gastos. Ti 1987 Yearbook of Jehovah’s Witnesses ireportna a “kabayatan ti 1986, $23,545,801.70 ti dagup ti nagastos para iti pinansial a tulong kadagiti . . . 2,762 a misionero, 13,351 nga espesial payunir, ken dagiti manangaywan ken dagiti assawada kadagiti 3,353 a sirkito ken distrito iti sangalubongan.” Daytoy ket kanayonan ti “naruay a gastos iti panaggatang, panagibangon, ken panangpabaro kadagiti sanikua; iti panangipaay kadagiti kasapulan dagiti pagimprentaan ken opisina idiay hedkuarters ken kadagiti 93 a sanga ti Sosiedad; ken iti panangipaay kadagiti namaterialan a kasapulan dagiti 8,920 a boluntario nga agserserbi kadagiti pamilia ti Bethel.”
‘Sadino ti paggapuan dagita a pundo?’ daytat’ kadarato maisaludsod. Maisupadi kadagiti iglesia ti Kakristianuan, dagiti Saksi ni Jehova saanda a mangolekta wenno mangipatulod kadagiti sobre tapno dumawat kadagiti donasion. Imbes ketdi, dagiti kahon para iti kontribusion—kas kadagiti pagidulinan iti daton idi panawen ti pannakaisurat ti Biblia—ti masarakan kadagiti Kingdom Hall da. No dadduma, dadduma a kahon ti mabalin a maipaay para iti nainaganan a pangpanggep, kas iti panangibangon kadagiti Kingdom Hall, wenno Assembly Hall wenno tapno tumulong kadagiti misionero tapno makatabunoda kadagiti kumbension iti pagilianda. Dagiti kontribusion mabalinda met a direkta a maipatulod iti Watch Tower Society idiay 25 Columbia Heights, Brooklyn, New York 11201, wenno iti sanga nga opisina ti Sosiedad iti pagilianyo, para iti panangiyadelantar iti panangasaba a trabaho iti sangalubongan.
Kasanot’ panangmatmatyo kadagitoy adu ken nagduduma a wagas ti panangipaay iti kontribusion? Dakayo kadi, kas kadagiti dadduma idi kaaldawan ni Malakias, matmatanyo dayta a kas makabannog a babantot, a nalabit kunkunayo iti pusoyo: “Kitaenyo! Anian a makabannog!”? Wenno dakayo kadi, kas iti “napobre a babai a balo,” matmatanyo ida a kas gundaway a panangipakita iti kinaregta ken pannakaseknan para iti pudno a panagdaydayaw ken iti panagreggetyo a mangdayaw ken Jehova babaen kadagiti sanikuatayo? Saanyo a liplipatan ti maiyataday a saludsod: Ti kadi panangtedyo maysa a sakripisio?
“‘Padasendak ita iti daytoy,’ kuna ni Jehova dagiti buybuyot, ‘no siak diakto luktan kadakayo dagiti tawtawa ti langit ket ibuyatkonto kadakayo ti bendision nga awanto ti lugar a makalaon nga umawat.’” (Malakias 3:10) Ti kinarang-ay iti naespirituan ken ti sangalubongan a panagsaknap iti ili ni Jehova paneknekanna nga ar-aramidenen dayta ni Jehova. Sapay koma ta itultuloytay ti panangted ken Jehova iti daton a pudno a maysa a sakripisio.
[Kahon iti panid 30]
NO KASANO A TUMULONG DAGITI DADDUMA ITI TRABAHO TI PAGARIAN
◻ REGALO: Dagiti boluntario a donasion a kuarta ti mabalin a maipatulod a direkta iti Watch Tower Bible and Tract Society of Pennsylvania, 25 Columbia Heights, Brooklyn, New York 11201, wenno iti lokal a sanga nga opisina ti Sosiedad. Dagiti sanikua a kas iti real estate, kasta met kadagiti alahas wenno dadduma pay a napapateg a sanikua, ti mabalin a maidonar. Maysa nga ababa a surat a mangipakita a dayta ket maysa a naimpusuuan a donasion ti masapul a maipakuyog kadagitoy a kontribusion.
◻ URNOS TI DONASION NGA ADDAAN KONDISION: Ti kuarta mabalin a maited iti Watch Tower Society a maidulin a kas naitalek, nga addaan iti probision a no rumsua ti personal a panagkasapulan, maisublinto iti nangited.
◻ SEGURO: Ti Watch Tower Society mabalin a mainaganan a kas benepisiario iti life-insurance policy wenno iti plano para iti panagretiro/pension. Masapul a mapakaammuan koma ti Sosiedad iti aniaman kadagita nga urnos.
◻ NAITALEK: Dagiti savings account iti banko ti mabalin a maitalek a para iti Sosiedad. No maaramid daytoy, pangngaasiyo ta pakaammuanyo ti Sosiedad. Dagiti stocks, bonds, ken sanikua ket mabalin met a maidonar iti sidong ti urnos a pakagunggonaaan ti nangidonar bayat iti panagbiagna. Daytoy a pamay-an ikkatenna ti gastos ken ti mapagduaduaan a panangusig ti korte iti kinaumiso ti testamento, bayat a maipasigurado iti Sosiedad a maawatna ti sanikua apaman a dumteng ti ipapatay.
◻ TESTAMENTO: Ti sanikua wenno kuarta ti mabalin a maipatawid iti Sosiedad babaen iti legal ti pannakaaramidna a testamento. Maysa a kopia ti masapul a maipatulod iti Sosiedad.
Maipaay iti ad-adu pay nga impormasion ken pammalakad maipapan kadagita a bambanag, agsurat iti Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, wenno iti lokal a sanga nga opisina ti Sosiedad.