Juan

12 Ngarud ni Jesus, innem nga aldaw sakbay ti paskua, dimteng idiay Betania,+ nga ayan idi ni Lazaro+ nga imbangon ni Jesus manipud kadagiti natay. 2 Gapuna nangisaganada iti pangrabii a maipaay kenkuana sadiay, ket ni Marta+ ti nagserserbi,+ ngem ni Lazaro ti maysa kadagidiay agsadsadag idi iti panganan a kaduana.+ 3 Ngarud, nangala ni Maria iti maysa a libra ti bangbanglo a lana, pudpudno a nardo,+ a nangina unay, ket sinapsapuanna dagiti saka ni Jesus ket pinunasanna a pinamagaan dagiti sakana babaen iti buokna.+ Ti balay napno iti ayamuom ti bangbanglo a lana. 4 Ngem ni Judas Iscariote,+ a maysa kadagiti adalanna, a dandanin mangliput kenkuana, kinunana: 5 “Apay a saan a nailako daytoy a bangbanglo+ a lana iti tallo gasut a denario ket naited iti napanglaw+ a tattao?” 6 Kinunana daytoy, nupay kasta, saan a gapu ta maseknan kadagiti napanglaw, no di ket gapu ta maysa a mannanakaw+ ken adda kenkuana ti kahon ti kuarta+ ket al-alaenna dagiti kuarta a naikabil iti dayta. 7 Gapuna kinuna ni Jesus: “Baybay-anyo, tapno maalagadna daytoy maipaay iti aldaw ti pannakaitabonko.+ 8 Ta kankanayon nga adda kadakayo dagiti napanglaw,+ ngem saanakto a kankanayon nga adda kadakayo.”

9 Gapuna maysa a dakkel a bunggoy dagiti Judio naammuanda nga isu adda sadiay, ket immayda, saan a maigapu ken Jesus laeng, no di ket tapno kitaenda met ni Lazaro, nga imbangonna manipud kadagiti natay.+ 10 Ti panguluen a papadi itan nagnunumuanda a papatayen met ni Lazaro,+ 11 agsipud ta maigapu kenkuana adu kadagiti Judio ti napan sadiay ket naaddaanda iti pammati ken Jesus.+

12 Iti sumaganad nga aldaw, ti dakkel a bunggoy nga immay iti piesta, idi mangngegda a ni Jesus um-umayen idiay Jerusalem, 13 nangalada kadagiti sanga ti kaykayo a palma+ ket rimmuarda a mangsabet kenkuana. Ket rinugianda nga ipukkaw:+ “Mangisalakanka, ikararagmi kenka!+ Bendito daydiay umay iti nagan ni Jehova,+ ti mismo nga ari+ ti Israel!” 14 Ngem idi nakasarak ni Jesus iti urbon nga asno,+ nagsakay iti dayta, kas iti adda a naisurat: 15 “Dika agbuteng, anak a babai ti Sion. Adtoy! Ti arim um-umayen,+ a sisasakay iti urbon ti asna.”+ 16 Dagitoy a banag saan nga inkankano dagiti adalanna idi damo,+ ngem idi naipadayagen ni Jesus,+ iti kasta nalagipda a naisurat dagitoy a banag maipapan kenkuana ken inaramidda kenkuana dagitoy a banag.+

17 Ngarud ti bunggoy a naikuyog kenkuana idi inayabanna ni Lazaro+ manipud iti pakalaglagipan a tanem ket imbangonna manipud kadagiti natay nagtultuloyda a nangsaksaksi.+ 18 Gapu itoy simmabet met kenkuana ti bunggoy, agsipud ta nangngegda nga inaramidna daytoy a pagilasinan.+ 19 Gapuna kinuna dagiti Fariseo+ iti nagtetengngaanda: “Makitayo nga awan a pulos ti maaramidanyo. Kitaenyo! Ti lubong simmuroten kenkuana.”+

20 Itan adda idi sumagmamano a Griego+ kadagidiay simmang-at nga agdaydayaw idiay piesta. 21 Dagitoy, ngarud, inasitganda ni Felipe+ a taga Betsaida ti Galilea, ket rinugianda a kiddawen kenkuana, a kunkunada: “Apo, kayatmi a kitaen ni Jesus.”+ 22 Immay ni Felipe ket imbagana ken Andres. Immay da Andres ken Felipe ket imbagada ken Jesus.

23 Ngem simmungbat kadakuada ni Jesus, a kunkunana: “Ti oras dimtengen tapno maipadayag ti Anak ti tao.+ 24 Pudno unay kunak kadakayo, Malaksid no ti maysa a bukel ti trigo agtinnag iti daga ket matay, agtalinaed dayta a maymaysa laeng a bukel; ngem no matay dayta,+ iti kasta mangpataud iti adu a bunga. 25 Ti agayat iti kararuana madadaelna dayta, ngem ti manggura iti kararuana+ iti daytoy a lubong masaluadannanto dayta a maipaay iti agnanayon a biag.+ 26 No ti asinoman agserbi kaniak, surotennak koma, ket no sadino ti ayanko addanto met sadiay ti agserbi kaniak.+ No ti asinoman agserbi kaniak, isu padayawanto ti Ama.+ 27 Ita mariribukan ti kararuak,+ ket ania ti sawek? Ama, isalakannak iti daytoy nga oras.+ Nupay kasta, daytoy ti makagapu a dimtengak iti daytoy nga oras. 28 Ama, padayagem ta naganmo.” Gapuna adda timek+ a naggapu iti langit: “Agpadpada a pinadayagko dayta ken padayagekto manen dayta.”+

29 Gapuna ti bunggoy a nagtakder iti aglawlaw ken nakangngeg iti dayta rinugianda a kunaen a naggurruod. Rinugian a kunaen ti dadduma: “Nagsao kenkuana ti maysa nga anghel.” 30 Kas sungbat kinuna ni Jesus: “Daytoy a timek napasamak, saan a maigapu kaniak, no di ket maigapu kadakayo.+ 31 Ita adda panangukom iti daytoy a lubong; ita ti agturay iti daytoy a lubong+ maparuarto.+ 32 Ken kaskasdi, no maipangatoak+ manipud iti daga, guyugoyekto kaniak ti amin a kita ti tattao.”+ 33 Pudno a kinunkunana daytoy tapno ipamatmatna no ania a kita ti ipapatay ti dandaninan pakatayan.+ 34 Gapuna simmungbat kenkuana ti bunggoy: “Nangngegmi manipud iti Linteg a ti Kristo agtalinaed iti agnanayon;+ ket kasano a kunaem a ti Anak ti tao masapul a maipangato?+ Siasino daytoy nga Anak ti tao?”+ 35 Ngarud kinuna kadakuada ni Jesus: “Ti silaw agyanto iti tengngayo iti bassit pay a kanito. Magnakayo bayat nga adda kadakayo ti silaw, tapno saannakay a maringbawan ti sipnget;+ ket ti magna iti sipnget saanna nga ammo no sadino ti papananna.+ 36 Bayat nga adda kadakayo ti silaw, watwatenyo ti pammati iti silaw, tapno agbalinkayo nga annak ti lawag.”+

Sinao ni Jesus dagitoy a banag ket pimmanaw ket naglemmeng manipud kadakuada. 37 Ngem nupay nakaaramid iti nakaad-adu a pagilasinan iti sanguananda, saanda a naaddaan iti pammati kenkuana, 38 iti kasta natungpal ti sao ni Isaias a mammadto a kinunana: “Jehova, siasino ti naaddaan iti pammati iti banag a nangngegan babaen kadakami?+ Ket no maipapan ti takiag ni Jehova, iti siasino ti nakaipanayaganna?”+ 39 Ti rason no apay a saanda a nabalinan ti mamati isu daydiay kinuna manen ni Isaias: 40 “Binulsekna dagiti matada ken pinatangkenna dagiti pusoda,+ tapno saanda a makakita kadagiti matada ken maawatan ti kaipapananna kadagiti pusoda ket agbaw-ingda ket paimbagek ida.”+ 41 Kinuna ni Isaias dagitoy a banag agsipud ta nakitana ti dayagna,+ ken nagsao maipapan kenkuana. 42 Nupay kasta, iti kinapudnona adu uray pay kadagiti agtuturay ti naaddaan iti pammati kenkuana,+ ngem gapu kadagiti Fariseo isu saanda nga ipudno, tapno saanda a maparuar manipud iti sinagoga;+ 43 ta inayatda ti dayag dagiti tattao nga ad-adda pay ngem iti dayag ti Dios.+

44 Nupay kasta, nagpukkaw ni Jesus ket kinunana: “Ti addaan iti pammati kaniak addaan iti pammati, saan a kaniak laeng, no di ket iti daydiay met a nangibaon kaniak;+ 45 ket ti makakita kaniak makitana met daydiay nangibaon kaniak.+ 46 Immayak kas maysa a silaw iti lubong,+ tapno tunggal maysa nga addaan iti pammati kaniak saan nga agtalinaed iti sipnget.+ 47 Ngem no ti asinoman dumngeg iti sasaok ket saanna a salimetmetan ida, isu diak ukomen; ta immayak, saan a tapno ukomek ti lubong,+ no di ket tapno isalakanko ti lubong.+ 48 Ti di mangikankano kaniak ken saanna nga awaten ti sasaok adda maysa a mangukom kenkuana. Ti sao+ a sinaok isunto ti mangukom kenkuana iti kamaudianan nga aldaw; 49 agsipud ta saanak a nagsao iti bukodko a pannakatignay, no di ket ti met laeng Ama a nangibaon kaniak inikkannak iti bilin maipapan iti ibagak ken iti sawek.+ 50 Kasta met, ammok a ti bilinna kaipapananna ti agnanayon a biag.+ Gapuna ti bambanag a sawek, kas iti Ama imbagana ida kaniak, kasta met a sawek ida.”+