Deuteronomio

22 “No makitayo a nakabulos ti kalakian a baka wenno karnero ti kabsatyo, diyo igagara a baybay-an.+ Isubliyo dayta iti makinkukua. 2 Ngem no adayo ti pagnanaedan ti kabsatyo wenno diyo am-ammo ti makinkukua, iyawidyo ti animal, ket agtalinaed kadakayo agingga a biroken ti makinkukua. Masapul nga isubliyo dayta.+ 3 Kasta met laeng ti aramidenyo iti asno, bado, ken aniaman a napukaw ti kabsatyo ngem nasarakanyo. Diyo baybay-an dayta.

4 “No makitayo a natumba iti dalan ti asno wenno kalakian a baka ti kabsatyo, diyo igagara a baybay-an. Tulonganyo a mangibangon iti tarakenna.+

5 “Saan koma nga isuot ti babai ti bado ti lalaki, ken saan met nga isuot ti lalaki ti bado ti babai. Ta kagura ni Jehova a Diosyo ti asinoman a mangaramid iti dayta.

6 “No adda makitayo nga umok ti billit iti dalan nga addaan iti annak wenno itlog, iti man kayo wenno iti daga, ket aguk-ukop ti ina wenno salsallukobanna dagiti sibongna, diyo alaen agraman dagiti sibongna.+ 7 Bulosanyo ti ina ngem mabalinyo nga alaen dagiti sibongna. Nasayaat ti pagbanaganyo ken napaut ti biagyo no aramidenyo daytoy.

8 “No mangipatakderkayo iti balay, masapul a barandiliasanyo* ti atepna,+ tapno dikay makabasol iti dara no adda matnag manipud iti dayta.

9 “Diyo mulaan ti kaubasanyo iti sabali pay a kita ti bin-i.+ Ta no saan, kukuanto ti santuario ti amin a patauden ti bin-i nga imulayo ken ti produkto ti kaubasan.

10 “Diyo pagkaduaen a pagarado ti kalakian a baka ken asno.+

11 “Dikay agusar iti bado a naaramid iti napaglaok a delana ken lienso.+

12 “Ikkanyo iti baruyboy ti uppat a suli dagiti kagayyo.+

13 “No mangala ti maysa a lalaki iti asawaenna ket dennaanna ngem guraennanto,* 14 sa akusaranna iti dakes nga aramid ken padaksenna babaen ti panangibagana, ‘Inasawa ken dinennaak daytoy a babai ngem saan met gayamen a birhen,’ 15 ti ama ken ina ti babai ket mangted kadagiti panglakayen idiay ruangan ti siudad iti ebidensia a birhen ti anakda. 16 Masapul nga ibaga ti ama ti babai kadagiti panglakayen, ‘Intedko ti anakko iti daytoy a lalaki kas asawana, ngem kagurgurana* 17 ken inakusaranna iti dakes nga aramid, nga imbagana: “Natakuatak a saanen a birhen ti anakyo.” Ita, daytoy ti ebidensia a birhen ti anakko.’ Kalpasanna, ukradenda ti lupot iti sanguanan dagiti panglakayen iti siudad. 18 Alaen dagiti panglakayen iti siudad+ dayta a lalaki ket disiplinaenda.+ 19 Multaenda iti 100 a siklo* a pirak ket itedda iti ama ti babai, ta imbabainna ti maysa a birhen iti Israel,+ ken agtultuloyto nga asawana ti babai. Saanna a mabalin nga idiborsio agingga a sibibiag.

20 “Ngem no agpayso ti akusasion, ket awan ti ebidensia a birhen ti babai, 21 ipanda ti babai iti ruangan ti balay ti amana, ket uboren dagiti tattao iti siudadda agingga a matay. Nakababain ti inaramidna+ iti Israel ta nangaramid iti seksual nga immoralidad* iti balay ti amana.+ Masapul nga ikkatenyo ti dakes iti tengngayo.+

22 “No adda lalaki a naduktalan a makidendenna iti asawa ti sabali, masapul a mapapatayda a dua, ti lalaki ken ti dinennaanna a babai.+ Masapul nga ikkatenyo ti dakes iti Israel.

23 “No naitulagen a makiasawa ti maysa a birhen, ket adda sabali a lalaki a naam-ammona iti siudadda sa nakidenna kenkuana, 24 iruaryo ida iti ruangan ti siudad ket uborenyo ida agingga a matayda, ta saan a nagriaw ti babai idiay siudad ken gapu ta dinennaan ti lalaki ti asawa ti padana a tao.+ Masapul nga ikkatenyo ti dakes iti tengngayo.

25 “Ngem no iti ruar ti nakasarakan ti lalaki iti babai a naitulagen a makiasawa ket puersaen ken ramesenna, ti laeng lalaki a nangrames ti mapapatay, 26 ngem diyo an-anuen ti babai. Awan ti basolna a maikari iti ipapatay. Kastoy met laeng ti aramidenyo iti lalaki a mangdangran ken mangpapatay iti padana a tao.+ 27 Ta nasarakanna iti ruar, ken nagriaw ti babai a naitulagen a makiasawa, ngem awan ti nangtulong kenkuana.

28 “No adda lalaki a makasarak iti maysa a birhen a saan a naitulag a makiasawa sa pinilitna a dennaan ket maduktalan ti inaramidda,+ 29 mangted ti lalaki iti 50 a siklo a pirak iti ama ti babai a dinennaanna, ken asawaenna ti babai.+ Saan a mapalubosan a mangidiborsio kenkuana agingga a sibibiag gapu ta rinamesna.

30 “Awan koma ti lalaki a mangala iti asawa ni amana, tapno saanna a maibabain ni amana.*+