Ti Maikadua a Cronicas
16 Iti maika-36 a tawen ti panagturay ni Asa, bimmusor ni Ari Baasa+ ti Israel iti Juda ket rinugianna a tarimaanen* ti Rama,+ tapno lapdanna ti asinoman a rummuar wenno sumrek a mapan ken* Ari Asa ti Juda.+ 2 Gapuna, inruar ni Asa dagiti pirak ken balitok kadagiti pagidulinan iti gameng iti balay ni Jehova+ ken iti balay* ti ari sa impatulodna ken Ari Ben-hadad ti Siria,+ nga agnanaed idi idiay Damasco, ket kinunana: 3 “Adda tulaganta ken adda met tulagan dagiti ammata. Nangipatulodak kenka iti pirak ken balitok. Umayka ket waswasem ti tulagmo ken Ari Baasa ti Israel tapno umatras.”
4 Dimngeg ni Ben-hadad ken ni Ari Asa ket imbaonna dagiti panguluen ti armadana a rumaut kadagiti siudad ti Israel. Sinakupda ti Ijon,+ Dan,+ Abel-maim, ken ti amin a pagidulinan nga adda kadagiti siudad ti Neftali.+ 5 Idi nadamag dayta ni Baasa, dagus nga insardengna a tarimaanen* ti Rama ket pinanawanna ti ar-aramidenna sadiay. 6 Pinaayaban ni Ari Asa dagiti umili ti Juda ket binunagda dagiti bato ken kayo ti Rama+ nga us-usaren ni Baasa a pagbangon.+ Inusar dagita ni Asa a pangtarimaan* iti Geba+ ken Mizpa.+
7 Iti daydi a tiempo, napan ni Hanani+ a pumaparmata ken ni Ari Asa ti Juda ket kinunana: “Gapu ta nagtalekka* iti ari ti Siria ket saanka a nagtalek* ken Jehova a Diosmo, nakalibas iti imam ti armada ti ari ti Siria.+ 8 Saan kadi a nagdakkel ti armada dagiti Etiope ken Libyano ken nagadu ti karuahe ken kumakabalioda? Ngem gapu ta nagtalekka idi ken Jehova, inyawatna ida ita imam.+ 9 Ta sipsiputan dagiti mata ni Jehova ti intero a daga+ tapno ipakitana ti pigsana* kadagidiay naan-anay ti pusoda* kenkuana.+ Minamaag ti inaramidmo, ket manipud ita, gubatendakanto dagiti kabusormo.”+
10 Ngem narurod ni Asa iti imbaga ti pumaparmata isu nga imbaludna* ta nakapungtot kenkuana. Rinugian ni Asa a maltratuen ti dadduma pay nga umili iti daydi met laeng a tiempo. 11 Ti pakasaritaan ni Asa, manipud rugi agingga iti ngudona, ket naisurat iti Libro ti Ar-ari ti Juda ken ti Israel.+
12 Iti maika-39 a tawen ti panagturay ni Asa, naaddaan ti sakana iti sakit agingga a kimmaro dayta. Uray masakit, saan a nagpatulong ken Jehova no di ket kadagiti mangngagas. 13 Idi agangay, naginana ni Asa a kas kadagidi ammana,+ iti maika-41 a tawen ti panagturayna. 14 Intabonda iti nadayag a pagitaneman nga impaaramidna para kenkuana iti Siudad ni David,+ ket impaiddada iti lungon a naikkan iti lana ti balsamo ken espesial a sapsapo a naaramid iti nagduduma a ramen.+ Nangaramidda pay iti naisangsangayan a pamumpon a panagpuor para kenkuana.*