Manipud Managbasatayo

Naapgad nga Inumen a Mangispal Biag

Kayatko nga iyebkas iti panangapresiarko iti naintiempuan nga artikulo a “Naapgad nga Inumen a Mangispal Biag!” (Pebrero 22, 1986) Dagiti dua nga annakko a babbai masansan a maospitalda gapu iti pannakamaga ti bagi gapu iti sakit a maawagan A. G. Syndrome. Pinadasko daytoy nga inumen iti inaudi nga anakko a babai idi isut’ nagsakit. Daytoy ti inumen a naited kadakuada iti ospital, ket inispalna ti biagda iti namin-adu a daras. Agyamanak manen kadakayo a maipaay iti daytoy nga impormasion, a makatulong unay kaniak ken kadagiti adu a sabsabali pay.

C. R. G., Indiana

Ti Iglesia Katolika ken Panagasawa

Ti panangmatmatyo iti sasaaden ti Katolicismo maipapan iti sekso ket biddut ken, dakdakes pay, makaipababa ken makainsulto. (Marso 8, 1986) Kasta unay ti biddutyo ta daytat’ nakakatkatawa. Iladawanyo dagiti amin a Katoliko a nagbasol iti kasta unay iti sekso, a naan-anay a nakakatkatawa met.

F. P., Colorado

Dagiti artikulo maipapan iti “Ti Iglesia Katolika​—Ti Panangmatmatna iti Sekso” ket makalawlawag. Daytoy a magasin ti nangkigtot kadagiti adu. Naiyallatiwyo ti puntoyo a naimbag babaen ti panangusaryo kadagiti reperensia a liblibro ti Katoliko. Pangngaasiyo ta patulodandak iti ad-adu pay a detaliado nga impormasion maipapan iti sursurat a Katoliko. Ti magasinyo ti kankanayon a basbasaen daytoy a napasnek a Katoliko.

P. W., Alabama

Kayatko laeng nga ibaga no kasano ti panangapresiarko iti artikulo a “Panangmatmat ti Biblia kadagiti Bambanag Maipapan iti Sekso.” Napadakkelak a maysa a Katoliko, ket idi tin-edyerakon, pampanunotek no ania ti tarigagayak iti biagko, makiasawa ken maaddaan iti pamilia wenno agserbi iti Dios babaen ti panagbalin a madre. Pinilik ti makiasawa, ngem uray pay no kasta mariknak a nagbiddutak iti pannakidennak iti asawak. Daytoy nga artikulo ti nangtulong kaniak a mangbigbig kadagiti dadduma a rason no apay a kastoy ti riknak. Pagarupek a dagiti kasuratan iti daytoy nga artikulo tulongannakto nga agbalin nga ad-adda a natimbeng.

B. J., Arkansas

Iti ruaryo maipapan iti “Ti Iglesia Katolika​—Ti Panangmatmatna iti Sekso” impakitayo ti maysa a kapsion a kunana, “Ti simbolo ni Maria inaigna ti Kinakristiano kadagiti ina a diosa dagiti relrelihion idi ugma,” ngem impakitayo met ti kapsion a kakuyog ti ladawan ni Santa Teresa.

P. G., France

Dumawatkami iti pammakawan. Ti di umiso nga ilustrasion ti napili a maipaay iti daytoy a kapsion.​—ED.

Panangabuso ti Ubing ken Krimen

Pangngaasiyo ta mangipatulodkayo iti 30 a kopia iti ruaryo maipapan iti “Panangabuso iti Ubing.” (Hunio 22, 1985) Ti kapitan a detektib iti departamento ti polis iti ilimi naawis a naimbag iti artikulo ket kayatna ti mangiwaras iti dayta iti youth bureau. Ti sabali pay a kapitan ibatbatayna ti adu a palawagna iti ruaryo maipapan iti krimen. (Enero 8, 1986) Adu kadagiti kameng ti patrolia ken ti hepe ti nakaawat iti kopia dagiti dua a magasin.

D. G., Connecticut

“Agimtuod dagiti Agtutubo . . . ”

Dagitoy nga artikulo ti pudno a nakatulong a nangparang-ay iti panagsasarita iti nagbaetan dagiti agtutubo ken dagiti nagannak. Pudno unay, no awan dagitoy a naisangsangayan nga artikulo, dagiti agtutubomi saanda koma a mannakisarita a kas idi.

L. C., Arkansas