Dagiti Sangsangkamaysa a Managbangon ti Umok

Ti eksena ket isu ti maysa a nakapimpintas a kopji (bassit a turod) idiay katantanapan ti Sud Africa. Apaman latta ta, uppat a tumatayab, nga agkakasping ti langada, nagdissoda iti maysa a sanga iti asideg a puon ti kayo, a nakapimpintas, kumalangiking ti un-unida. Iti isu met laeng a sanga isut’ maysa a nakadaldalimanek ngem di pay nalpas nga umok a naaramid manipud kadagiti napirpirsay nga ubbak.

Maysa kadagiti tumatayab ti immuneg iti umok, nagtugaw, ket, babaen kadagiti babassit nga uni, nangnayon iti bassit a material. Babaen iti bagi ken sippitna, siaannad a pinormana ti umok, a ninaynayonan iti balay ti lawalawa tapno pagkakapeten a sititibker ti umok. Kalpasanna ti immuna a tumatayab ti rummuar, a palubosanna nga uliten ti maikadua, maikatlo, ken maikapat a tumatayab ti makakayaw a pamay-an. Idi agtayabdan, ti nagminar a nangisit ken puraw a dutdotda ken dagiti nasam-it nga aw-awagda ti nangnayon ti kinapintas ti eksena.

Sangapulo a minutos kamaudiananna, nagsublida nga addaan ti ad-adu manen a pagbangon ti umok a material nga adda kadagiti sippitda. Panunotenyo, uppat kadakuada ti agbangbangon ti isu met laeng nga umok! Ania a kita ti tumatayab dagitoy? Manipud kadagiti ngangani 900 a kita iti umabagatan nga Africa, ipanayag ti maysa a libro dagitoy a tumatayab nga isuda dagiti white helmet shrikes. Maipapan kadakuada, insurat ti maysa nga encyclopedia: “Isuda ti nalaing a makikadua ken makitunos iti panagaramid ti umok ken panangpakan kadagiti urbonda.”