Sungbat iti “Ti Panangbiruk ti Sangatauan iti Dios”
MAYSA kadagiti tampok iti “Nadalus a Pagsasao” a Kumbension Distrito, nga inangay dagiti Saksi ni Jehova manipud tengnga ti 1990 aginggat’ rugi ti 1991, isut’ pannakairuar ti libro a Ti Panangbiruk ti Sangatauan iti Dios. Mangted ti napaababa a panangilawlawag iti namunganayan, pakasaritaan, ken pampammati dagiti kangrunaan a relihion iti lubong, ken ibagana kadatayo no kasano a masarakan ti pudno a Dios. Kasanot’ reaksion dagiti managbasa iti intero a lubong?
“Sipapasnek a komendarak Ti Panangbiruk ti Sangatauan iti Dios,” inkomento ni E. G., maysa a di-Saksi manipud Alemania. “Ti kasta a detaliado ken kompleto a panangusig kadagiti indibidual a relihion ket pudno a naisangsangayan ken pagbalinenna ti panagbasa a makakayaw. Mainayon pay, ti libro ket di agkurang iti lohika—no di ket ti kasumbangirna. Ti laeng mabalinko nga irekomenda isut’ ti panangusig dagiti tattao iti relihionda a naibatay itoy a libro.”
Maysa a managbasa manipud Flushing, Nueva York, E.U.A., insuratna: “Maysaak a Muslim, ken Al-Islaam ti relihionko. Apresiarek ti baro a libroyo a Ti Panangbiruk ti Sangatauan iti Dios. Nangnangruna nga apresiarek ti impormasion nga impaayyo maipapan iti relihionko.”
Idiay Netherlands, ni A. v. D., agtawen ti 17, nakaipaima ti maysa a kopia ti libro iti padana nga estudiante, a nangusar iti dayta a nangisagana iti maysa nga asainmen iti eskuelaan. Ti maestro tinarigagayanna nga ammuen ti gubuayan ti materialna. Idi nakitana ti libro, nagkiddaw iti tallo a kopia. Itultuloy ni A. v. D.: “Iti sumaganad nga aldaw impaimak ti tallo a baro a libro iti maestro, nga impakitana a dagdagus kadagiti dadduma a mannursuro. Di nagbayag kalpasanna, kinunana kaniak, ‘Mayat. Adda kaniak ti anamong ti administrasion ti eskuelaan nga agkiddaw ti 35 kadagitoy a libro.’”
Manipud British Columbia, Canada, maysa nga agassawa ti nagsurat: “Ti Panangbiruk ti Sangatauan iti Dios mabalin nga apektaranna ti ad-adu pay a tattao manipud ad-adu a kultural a kasasaad ngem ti aniaman a napalabas a publikasion ti Watch Tower.”
Manipud Le Havre, Francia, ni M. H. nagsurat: “Masapul nga ibagak a daytoy a libro namimpinsan a linab-awanna dagiti inanamak; nakalawlawag, umiso, ken makaay-ayo iti mata. Magnifique!”
Ni H.W.W. manipud Texas, E.U.A., insuratna: “Daytoy a libro ket makapainteres unay ken makakayaw, diak pulos maibbatan. Agbasbasaak uray iti tengnga ti rabii. Nagsayaat unay ti kualidad ti pannakaisuratna. Saritaen ti libro dagiti pammati ti dadduma a tattao iti rasonable ken naraem a pamay-an, bayat a parparegtaenna ida nga agtultuloy iti panangbirukda iti pudno a Dios, ni Jehova. Ken dagiti sasao nausarda iti nainggayyeman a pamay-an, a kasla adda maysa a makisarsarita kenka iti sibaymo.”
Maysa nga agassawa manipud Panama, da G. ken S., kinunada: “Dagiti Español-pagsasaoda a tattao sidadaan nga awatenda ti libro. Maay-ayatanda kadagiti de-kolor a retrato dagiti templo ken dagiti idolo.”
Ni D. M., maysa nga aglaylayag iti U.S. Navy insuratna: “Nasabatko ti maysa a babai iti maysa nga aldaw a nangikuna, ‘Kayatmo kadi ti naespirituan a libro?’ ket kinunak, ‘Wen,’ ngem diak ammo no ania a kita ti libro dayta idi. Iti panagsiddaawko nagtungpalanna nga isut’ libro a sinapsapulkon iti sumagmamano a tiempo.”
Maysa a propesor a nangisuro ti world religion iti maysa nga unibersidad ti America nagsurat: “Ti napaababa a kinalawag ti ebkas ken ti pangkaaduan a kinaumiso ti panangilawlawag kadagiti kangrunaan a sursuro dagiti nagduduma a relihion ti makapasiddaaw. Ti pannakaisitar ti nakaad-adu a mabigbigbig a mannurat iti dayta a tay-ak pagbalinenna a nalawag a ti autor ket sipapanunot iti moderno ken maus-usar. Adda ti kompleto a kinapudno ket awan ti nailemmeng nga impormasion.”
Maysa nga agtutubo a babai, ni N. Y., nagsurat manipud Nagoya City, Japan: “Agtawenak iti 12 ken agad-adalak iti historia idiay eskuelaan. Daytoy a libro saritaennat’ maipapan kadagiti relihion ti Japan a detaliado. Kasta met, tinagiragsakko a naan-anay ti panagbasbasa maipapan ti mahika ken espiritismo idiay kapitulo 4 ken ‘Ti Panagsubli iti Pudno a Dios’ idiay kapitulo 15.”
Adu a sabsabali pay a surat ti apresasion ti naawat manipud Argentina, Columbia, España, Inglatera, ken Puerto Rico, kasta met iti dadduma pay a pagpagilian. No kayatyo ti maaddaan ti kopia iti Ti Panangbiruk ti Sangatauan iti Dios, a naipablaak itan iti 26 a pagsasao, kitaenyo ti panid 32.