Ti Pagwanawanan ken Agriingkayo!—Maapresiar
Maysa a kolumnista a nagsurat iti diario a Dutch nga NRC Handelsblad a Hulio 24, 1990, kastoy ti makunana maipapan iti Agriingkayo! ken ti kaduana a magasin, a Ti Pagwanawanan:
‘Dagidiay a, kas kaniak, nga iti duapulo a tawen imbilangda dagiti magasin nga Agriingkayo! ken Ti Pagwanawanan [nga ipabpablaak dagiti Saksi ni Jehova] a saan a mabalin a matmatan ngem naiparparna a nasarakanda ida iti nabiit pay masdaawdanto. Nagbalbaliwdan iti kasta unay, agpadpada iti format ken iti linaon.
‘Dati, kadagita dua a pagiwarnak, ti ad-adda a mangawis iti maysa isu dagiti drowing: dagiti ladawan a maymaysa ti kolorna ken naiprenta iti newsprint a papel. Dagiti estoria, no umiso ti pannakalagipko, ket kasla iti Readers Digest dagiti naimbag a damag ket maiparna laeng a sagidenna dagiti naririkut a parikut iti lubong, kas iti gubat, droga, sekso, ken politika.
‘Interamente a nasukatan daytan. Dagita dua a pagiwarnak ket kas iti bassit a komentario dagiti agdama a paspasamak. Dagitoy aglaplapusanan ti pannakailadawanda kadagiti de kolor a retrato . . . Maulit-ulit dayawen pay ti maysa ti kasla makapabileg nga aramid ti arte, kas iti pannakailadawan dagiti apostol iti Maudi a Pangrabii (iti Ti Pagwanawanan a Hulio 1, 1990), ket no mabalin, dagiti retrato ti mausar. Nakadkadlaw a ti Agriingkayo! tamingenna dagiti adu maipaay iti siensia. Iti Hulio 8 a bilang, adda salaysay maipapan iti kalipse ti bulan idi Agosto 16 idi napan a tawen, dagiti ababa a surat maipapan iti panagpasuso ken ti pakainaigan ti osteoporosis ken ti kaadu ti manganese iti dara, ken ti maudi ngem napateg met, isut’ tallo paset nga artikulo isu a nakaiparangan dagiti panangmatmat nga umanamong ken di umanamong iti panagsirarak babaen iti animal.’
Kastoy pay ti kapaliiwan ti mannurat: ‘Babaen iti sirkulasionna nga 11,930,000 a kopia iti 61 a pagsasao [nga itan 12,980,000 a kopia iti 64 a pagsasao], ti Agriingkayo! buklenna ti maidaydayaw a gubuayan iti sientipiko a damdamag agpaay iti nakaad-adu a managbasa iti publiko.’
Siempre, Ti Pagwanawanan ken Agriingkayo! ‘adun ti nagbaliwanda’ iti laeng itsura—saan nga iti linaon. Iti pinulpullon a tawen, dagiti dua a magasin nangiparparangdan kadagiti nagsayaat ti pannakasirarakna nga artikulo a mangitudtudo iti Pagarian ti Dios a kas ti kakaisuna a namnama ti sangatauan. Ngem mainanama a ti pimmintas nga itsura dagiti magasinmi agbanagto iti ad-adu nga indibidual nga agbasa kadagiti pagiwarnakmi ket magunggonaanda iti makaited-biag a mensahe.
[Dagiti Ladawan iti panid 9]
Dagiti Dutch nga edision “Ti Pagwanawanan” ken “Agriingkayo!”