Itukonyo Dagiti Magasin iti Ministerioyo
1, 2. Ania ti epekto Ti Pagwanawanan ken Agriingkayo! iti biag dagiti tattao?
1 “Makapainteres, naintiempuan, ken makapabileg.” “Dagitoy pay laeng ti nabasak a magasin a makaparegta unay.” Dagitoy a komento iladawanna no kasano ti panagrikna dagiti agbasbasa iti Ti Pagwanawanan ken Agriingkayo! iti intero a lubong. Pudno, dagiti magasintayo ket napaneknekanen a nakapatpateg nga alikamen iti panangidanon iti naimbag a damag kadagiti “amin a kita ti tattao.”—1 Tim. 2:4.
2 Maysa a negosiante a lalaki ti nangala iti magasin nga Agriingkayo! maipapan iti topiko a paginteresanna. Kalpasanna, binasana ti naipakuyog nga isyu Ti Pagwanawanan, a naglaon iti artikulo a nangtignay kenkuana a mangusig a naimbag iti Trinidad a nabayagen a patpatienna. Daytoy ti nangtukay iti interesna. Nabautisaran kalpasan ti innem a bulan. Adda sabali pay a lalaki a kanayon nga umaw-awat kadagiti magasin ngem pulos a saanna a basbasaen dagita. Iti sabali a bangir, likliklikan ni baketna dagiti Saksi ngem basbasaenna dagiti magasin nga ibatbatida ken ni lakayna. Natukay ti pusona iti kari ti Biblia maipapan iti paraiso a daga a napno kadagiti nalinteg a tattao. Idi agangay, kaduana ti anakna a lalaki ken ti adingna a babai a nagbalin nga adipen ni Jehova.
3. Ania ti pagsayaatanna no agpada nga itukontayo dagiti magasin?
3 Agpada nga Itukonyo: Kas ipakita dagiti nadakamat nga ehemplo, saantayo a masierto no siasino dagiti mangbasa kadagiti magasintayo wenno no ania ti mangtukay iti interesda. (Ecl. 11:6) Gapuna makagunggona no agpada nga itukontayo Ti Pagwanawanan ken Agriingkayo! uray no maysa laeng a magasin ti itampoktayo iti presentasiontayo. Kadagiti dadduma a kasasaad, mabalin a maitutop no itukontayo ti sumagmamano a nadumaduma nga isyu ti magasintayo no sumarungkartayo.
4. Kasano ti panangyeskediultayo iti panagiwaras iti magasin?
4 Makagunggona no mangyeskediultayo iti maysa nga aldaw iti tunggal lawas a makiraman iti panagiwaras iti magasin. Iti 2005 Calendar of Jehovah’s Witnesses, amin a Sabado ket naituding kas “Magazine Day” (Aldaw a Panagiwaras iti Magasin). Ngem yantangay agduduma dagiti lokal ken personal a kasasaad, mabalin a mangyeskediul dagiti dadduma iti sabali nga aldaw a mangipamaysa iti panangitukon kadagiti magasintayo. Karaman kadi daytoy iti linawas nga eskediulyo?
5. Ania dagiti oportunidad a rumbeng a gundawayantayo tapno makaipaimatayo kadagiti magasin, ket ania ti makatulong kadatayo a mangaramid iti kasta?
5 Mangipasdek iti Personal a Kalat: Ti panangipasdek iti personal a kalat no mano a magasin ti ipaimatayo a binulan ket makatulong tapno ad-adda a maipamaysatayo ti panangipaima kadagiti magasin. Adda kadi rutayo iti magasin? Ituktukonyo kadi dagiti magasin kadagidiay masarakanyo iti ministerio? Mangituktukonkayo kadi kadagiti magasin iti lansangan, lugar ti negosio, ken kadagiti publiko a lugar? Mangitugtugotkayo kadi kadagiti magasin no agbibiahe, aggatgatang, wenno no mapankayo kadagiti nakitulaganyo? Gundawayanyo ti tunggal maitutop nga oportunidad a tumulong kadagiti sabsabali tapno magunggonaanda iti Ti Pagwanawanan ken Agriingkayo!
6. Kasano a mausartayo dagiti daanen nga isyu ti magasin?
6 Mabalin met nga aramidentayo a kalat ti panangipaima kadagiti daanen nga isyu ti magasin nga adda kadatayo. Uray no saan a naipaima dagiti magasin iti unos ti maysa wenno dua a bulan manipud iti petsana, napateg latta dagiti impormasion a linaonna. Ipaimayo dagita kadagiti interesado. Para kadagiti riniwriw a tattao, dagiti magasin a Pagwanawanan ken Agriingkayo! ket ‘sao . . . iti umiso a tiempo.’ (Prov. 25:11) Usarentayo dagita a mangtulong iti riniwriw pay a mangammo ken agserbi ken ni Jehova.