Panangiparang ti Naimbag a Damag—Babaen Dagiti Magasina
1 Awan ti sabali a pagbasaan iti historia ti naaddaan iti puersa a maipaay iti naimbag a kabibiag dagiti tattao ngem iti adda kadagiti Ti Pagwanawanan ken Agriingkayo! Kada ruar iti napno kadagiti makaited ti biag a naespirituan a taraon. Ti resulta iti panagsukisok a naidatag a buyogen iti Nainkasuratan a suportar isut’ mangilamina iti mensahe ti kinapudno iti panunot ken puspusotayo.
2 Kadagiti pinanidna, Ti Pagwanawanan, ilawlawagna dagiti sursuro ti Biblia ken awisenna ti asikasotayo iti kaitungpalan dagiti padto ti Biblia. Paregtaenna dagiti amin a mabisinan iti naespirituan nga agbalbaliw iti panunotda ken isuotda iti baro a kinatao. (Roma 12:2; Efe. 4:22-24) Ti Agriingkayo! isut’ mangpaalerto kadagiti managbasana iti kaipapanan dagiti paspasamak ditoy lubong. Dagiti makaatrakar nga ilustrasionna a nangiladawan kadagiti nakaskasdaaw a parparsua isudat’ mangtukay iti interes idiay baro a lubong ken paunegenna ti panangipateg iti Namarsua.
SAAN A KAS KADAGITI SEKULAR A MAGASINA
3 Dagiti sekular a magasina ket saanda nga ipakita kadagiti tattao no kasano a masagrap iti makapnek a biag iti daytoy a lubong. Awan ti maitukonda a namnama a maipaay iti masakbayan ken natungdayda a nangisuro kadagiti tattao no kasano a magun-od iti biag nga agnanayon. Dagitoy a nailubongan a magasina ti nadisenio a mangitandudo iti bambanag daytoy a lubong. Anian ti pannakaiduma iti Ti Pagwanawanan ken Agriingkayo!—1 Juan 2:15-17.
4 Awan duadua a dakayo a mismo ket mariknayo iti napasnek a panagyaman iti kada ruar Ti Pagwanawanan ken Agriingkayo!—dagiti magasina a naglaon iti sayamusom ti kinapudno manipud “iti matalek a mayordomo.” (Luc. 12:42) Ania ti maaramidtayo a pangpasayaat pay iti panangipaima kadagitoy a magasina tapno matulongan iti ad-adu pay a magunggonaan kadagitoy a pagbasaan?
PANANGARAMID ITI PASETTAYO
5 Sakbay iti maitutop a pammaregta kadagiti nasingpet ti panagpuspusoda a managbasa iti magasina, masapul nga ammotayo nga umuna no ania iti linaon ti tunggal maysa. Kaipapananna daytoy ti panangbasa iti kada ruar sakbay nga usaren iti ministerio. No kabisadotayo dagiti linaonda, mabalintayo nga usaren iti panagbalaybalay a ministerio, panagtrabaho iti lansangan, ken iti impormal a panangasaba a maipaay iti pannakaiwaras dagiti magasina.
6 Mainayon pay, babaen ti kaadda dagiti agdama a magasina no mapantayo aggatang, no agbiahetayo iti bus ken jeepney, idiay pagadalan, iti lugar ti pagtrabahuan, wenno iti sadinoman a papanantayo, mabalintayo a gundawayan iti mamaneknek. Ti maysa a napili nga introduksion manipud iti libro a Panakirinnason a maisinggalut iti maysa a punto manipud kadagiti artikulo ti mabalin a mangargari iti tarigagay ti maysa a tao a bumasa kadagiti magasinatayo.
7 Nupay ti pannakisaotayo ket ababa no itukontayo dagiti magasina, ditay koma kedngan ti diskusiontayo iti maysa wenno nasursurok a minutos. Kayattayo ti agpaut a mangeddeng no ania iti pudno a paginteresan ti maysa a tao iti mensahe ken no kayatna a basaen dagiti magasina. No tumanor dagiti saludsod, kanayon nga ikagumaantayo a sungbatan dagiti panagsaludsod babaen iti Biblia ken ti Panakirinnason a librotayo. Babaen ti nasagana a panangdepensa iti pammatitayo, makaapittayo kadagiti nakaskasdaaw a bendision.—1 Ped. 3:15.
8 No tunggal maysa ket kumanunong a bumasa iti magasina, mabalin a sawentayo maipapan iti sasaaden ti trabahotayo ken no kasano a dagiti magasina ket naimalditda iti mamindua ti makabulan a kas paset iti sangalubongan a Nabibliaan nga edukasion a trabaho. Ti impormasion iti panid 2 idiay Ti Pagwanawanan wenno iti panid 4 iti Agriingkayo! isudat’ mangilawlawag a sisasayaat iti dayta. Idinto ta ti linaon iti sumaruno a ruar ket kanayonda a mailanad, mabalin a patauden dagiti saludsod a mangawis ti asikasoda kadagiti sumaruno nga artikulo. Daytoy ti mabalin a mangpakatay iti ganas ti maysa a tao ken mangtignay kenkuana a mangiyebkas iti tarigagayna a mangala manen kadagiti sumaruno a ruar no mabalinen a maala. Mabalin a daytoyen ti rugi iti maysa a rota ti magasina.
9 Bayat nga umadanin iti panagngudo daytoy a sistema, papartakentayo koma iti addang ti panangtulongtayo kadagiti nasingpet ti panagpuspusoda a tattao a pumanawen manipud iti Babilonia a Dakkel. (Apoc. 18:4) Sapay koma ta agtultuloy iti bendision ni Jehova iti nalawa a panangusar iti Ti Pagwanawanan ken Agriingkayo! iti sangalubongan a Nabibliaan nga edukasional a trabahotayo!