No Apay nga Agserserra Dagiti Kapilia

DAGITI simbaan, kapilia, kantor, ken uging​—kas iti kallabes a 50 a tawen, siguradoda a pagilasinan nga addaka idi kadagiti tanap a pagminasan ti South Wales. Kasla iti kada ginasut a metro, makakitaka iti man kapilia dagiti Welsh wenno Ingles a Baptist wenno katupag dagiti Metodista, Metodista ni Calvin, Kongregasionalista, Presbiteriano, ken dadduma pay. Tangay adu a tattao a taga Wales ti agsasao iti nailian a pagsasaoda, gistay amin a relihion ti addaan nagsisina a kapilia para iti tunggal pagsasao. Ti limapulo a tawen nga impluensia ti telebision ken dagiti agbalbaliwen a prinsipio ti sipapartak a nangbalbaliwen amin kadagita.

Binusbos ti taga Wales a ni Islwyn Jones, nga agnanaed idiay Blaenclydach sadi Rhondda Valley, ti adu a tawen a nangisurat iti nagbanagan ti pinulpullo a kapilia ti Rhondda. Ti lokal a periodiko, ti Rhondda Leader, nangipablaak iti listaan ti gistay sangagasut a kapilia, kaaduanna ti manipud pay maika-19 a siglo a mangipamatmat iti agdama a kasasaadda. Kinuna ti report: “Dagitoy a dadakkel a pasdek ti sentro ti Rhondda bayat a naglasat kadagiti narang-ay a tawen ti uging agingga iti kamaudianan a panagkupas dagitoy dua a sadiri [ti relihion ken uging] iti biag ti tanap.”

Agserbi ti listaan kas pagtuladan iti pannakarbek ti impluensia ti relihion, saan laeng nga idiay Wales no di pay ket iti adu a paset ti Europa. Innem a pulo ket walo a kapilia ti nailista a “narebban.” Sabalin ti pakausaran ti sangapulo ket siam. Dadduma a pagarigan: “naretubar kas club ti Aikido martial arts,” “naretubar kas flat [apartment],” “naretubar kas bodega,” “naretubar kas pagtagilakuan,” “naretubar kas botika.” Maysa a saan a nailista, idiay Penygraig, ti naretubar kas Kingdom Hall dagiti Saksi ni Jehova para iti rumangrang-ay a Kongregasion ti Rhondda.

Kas impadto ti Biblia maipapan iti “Babilonia a Dakkel,” ti sangalubongan nga imperio ti ulbod a relihion, maat-atiananen ti simboliko a dandanumna, ti sadiri ti tattao, iti adu a paset ti lubong. Asidegen a dagiti napolitikaan nga elemento ti lubong ti agtignayton a maibusor iti relihion bayat nga “itungpalda ti panunot [ti Dios]” a mangdadael iti ulbod a relihion, a sapasap a nangtabbaaw iti nagan ken panggep ni Jehova a Dios.​—Apocalipsis 17:5, 15-17.a

[Footnote]