No Apay Adu Dagiti Nakautang

SINELEBRARAN da Michael ken Reena ti umuna nga anibersario ti panagkasarda babaen ti panagsublida idiay nag-honeymoonanda. Ngem idi pangrugian ti maikadua a tawen ti panagasawada, sinangodan ti nakalkaldaang a kinapudno. Uray kasano ti panagsalimetmetda, dida makabayad iti amin nga utangda.

Usigenyo ti sabali pay a pagassawaan. Bassit laeng ti maaw-awat ni Robert a pinansial a tulong kas estudiante idi inkasarna ni Rhonda, ket ni Rhonda addaan iti pagtintinnagna laeng iti kotsena. Kuna ni Robert: “Nagtrabahokami a dua iti amin-tiempo, ket nakateggedkami laeng iti $2,950 iti binulan. Ngem awan met nagrang-ayanmi.” Kuna ni Rhonda: “Awan pay nagatangmi a nabalor wenno karkarna a napundarmi. Diak la ammo no pappapanan ti kuartami.”

Saan a nasadut da Robert ken Rhonda. Kasta met da Michael ken Reena. Ania ti parikutda? Panagutang babaen iti credit-card. Iti umuna a tawen ti panagasawada, nakautang da Michael ken Reena iti $14,000 babaen iti credit card-da. Kalpasan ti dua a tawen a panagasawada, agdagupen iti $6,000 ti utang da Robert ken Rhonda iti credit card-da.

Ni Anthony, maysa nga agkabannuag a padre de pamilia, sinangona met ti pinansial a krisis iti biagna. Ngem dagiti parikutna saan a mainaig kadagiti credit card. Idi 1993, nagkissay ti kompania a pagtartrabahuanna, ket naikkat ni Anthony iti posisionna a kinamanedyer a pagsuelduanna iti $48,000 iti makatawen. Kalpasan dayta, nagbalinen a dakkel a karit kenkuana ti panangbiagna iti pamiliana nga uppat ti miembrona. Umasping iti dayta, ni Janet, maysa nga agsolsolo a naganak nga agindeg idiay New York City, dandani dina mayanay ti makatawen a mateggedanna nga agarup $11,000 kadagiti paggastosanna.

Nupay pudno a kaaduan kadagiti parikut iti kuarta ti mabalin a mapalag-an babaen ti umiso a panangiggem, iti kinapudnona ket agbibiagtayo iti tiempo nga adut’ marigrigatan gapu iti pannagna “iti kinaawan pakagunggonaan dagiti pampanunotda.” (Efeso 4:17) Kuna ni Grace W. Weinstein, iti librona a The Lifetime Book of Money Management: “Adu a pagalagadan ti pananggun-od iti kuarta ti nagbaliwen gapu iti di mapakpakadaan a kasasaad ti ekonomia, dagiti baro a kababalin ti panaggasto ken panagsalimetmet, ken ti agbaliwbaliw nga estilo ti panagbiag.” Iti nakirokiro a lubong a pagbibiagantayo, umad-adu a tattao ti marigrigatan unay a mangtaming kadagiti personal a paggastosanda ken paggastosan ti pamiliada.

Naimbag ta nabaelan da Michael ken Reena, Robert ken Rhonda, Anthony, ken Janet a tinaming a sibaballigi dagiti paggastosanda. Sakbay nga usigentayo ti nakatulong kadakuada, sukimatentayo no ania ti nalaka a pakagun-odan ti kuarta a nangdegdeg iti pakarigatan ti adu​—wen, dagiti credit card.