Manipud Kadagiti Agbasbasa

Panangisuro Kadagiti Ubbing a Mangayat iti Pinarsua Kas paset ti panangsanaymi kadagiti annakmi, ikagkagumaanmi a patanoren kadakuada ti panangapresiar iti natural a kinapintas a siaayat unay nga ipapaay ni Jehova. Kayatmi nga usaren dagiti artikulo a regular nga agparang iti Agriingkayo!, kas iti “Jenny Wren​—Bassit a Billit, Natibong ti Kantana.” (Setiembre 8, 1998) Magagaran unay dagiti annakmi! Makaparagsak nga iranud daytoy nga impormasion kadakuada.

K. A., Estados Unidos

Dagiti Batibat Talaga nga apresiarek dagiti singasing ti “Panangmatmat iti Lubong” iti benneg a “Gagangay ti Pannakabatibat Dagiti Ubbing.” (Setiembre 8, 1998) Kanayon a mabatibat dagiti annakko, ngem kanayon nga ibagak kadakuada a dida estoriaenen dagitoy no di ket basta agsublidan a maturog. Ita ta addan dagiti naisingasing, nasaysayaaten ti panangrisutko iti daytoy a parikut. Pangngaasiyo ta dikay isardeng ti mangipablaak kadagita a makatulong nga impormasion.

R. N., Zimbabwe

Dagiti Mammapatay a Leon Talaga a nagustuak ti artikulo a “Ti ‘Minamaag a Lugan’ ti Daya nga Africa.” (Setiembre 22, 1998) Ngem nagkamalikayo iti panangisuratyo a kalakian ken kabaian dagiti leon a mangmangan iti tao. Agpadpada a kalakian dagitoy.

K. B., Estados Unidos

Nagkamali ti “Agriingkayo!” iti daytoy a benneg, ken apresiarenmi ti panangilawlawagyo.​—ED.

Alzheimer’s Disease Idadauluak ti maysa a grupo dagiti managsirarak maipapan iti Alzheimer’s disease para iti dakkel a parmasiutikal a kompania. Isu a nagagaranak unay a nangbasa iti nagsayaat a seryeyo nga “Alzheimer’s Disease​—Panangep-ep iti Saemna.” (Setiembre 22, 1998) Apresiarek unay ti detalyado a panangilawlawagyo iti daytoy agraraira a sakit ti publiko. Kas panglakayen iti kongregasion, nautobko a nagpateg ti praktikal a balakad kadagitoy nga artikulo.

S. S., Estados Unidos

Pinikapik dagiti artikulo ti pusok agsipud ta nasurok a sangapulo a tawenen a sagsagabaen ni nanangko ti Alzheimer’s. Naimpusuan nga agyamanak iti naannad a panangtamingyo iti daytoy a tema ken ti panagraemyo kadagidiay agsagsagaba iti dayta.

E. M., Italia

Maysa a katrabahuak a suskritor iti Agriingkayo! ti nangipasublat kaniak iti dayta a ruar agsipud ta adda Alzheimer’s ni tatangko. Nagustuak a nangnangruna ti artikulo a “Panangsalimetmet iti Dignidad ti Pasiente.” Diak pagarupen a mabalin a sobra ti panangipangpangruna ti maysa a tao iti daytoy a punto. Pagyamanan kadagiti naintiempuan a singasingyo. Siguradok nga adu a tattao ti natulongan daytoy nga artikulo.

M. P., Canada

Naimpusuan nga agyamanak kadakayo gapu kadagiti artikulo. Tangay narekonoser nga adda Alzheimer’s ni nanangko idi 1986, adu a literatura ti nabasamin maipapan iti dayta. Nupay kasta, inartapan dagiti artikuloyo ti aniaman a nabasami no kinabara, pannakipagrikna, ken panangisakit ti pagsasaritaan. Hustokayo iti kunayo a kasapulan dagidiay naapektaran iti Alzheimer’s ti ayat ken nadungngo a panangaywan, agingga iti maudi a kanito. Saan a makapangan wenno makasao ni nanangko. Ngem pinabilegnakami ti artikulo a mangipakita iti ad-adu pay nga ayat ken panangdungngo kenkuana.

H. E., Austria

Kas presidente ti Brazilian Alzheimer’s Association, kayatkay a kablaawan kadagiti artikuloyo. Nalawag ti panangdeskribiryo iti Alzheimer’s ken ti epektona kadagiti pamilia. Siaannad a rinaemyo ti agsagsagaba kas indibidual, ket nangisalaysaykayo kadagiti primera klase a salaysay a mangpaneknek a kaskasdi a ti ayat ti kasayaatan a pangagas.

V. C., Brazil