Talaga Kadi a Nesesita ti Panangyalison iti Dara?
KASTA ti inyimtuod ni Dr. Ciril Godec a tserman ti urology idiay Long Island College Hospital, sadi Brooklyn, New York iti artikulo ti maysa a periodiko itay napalabas a Nobiembre. Kastoy ti insuratna: “Kadagitoy nga aldaw, nalabit saanen a maakseptar ti dara kas maysa nga agas, tangay saanna a naragpat dagiti pagannurotan ti Food and Drug Administration maipapan iti kinatalged. Ti dara ket maysa a paset ti bagi, ken kinaagpaysuanna, maysa nga organ transplant ti panangyalison iti dara.”
Kastoy pay ti kinuna ni Dr. Godec: “Ti organ transplant isu ti kaudian a maikeddeng a pamay-an ti panangagas a maisingasing kadagiti pasiente. Gapu kadagiti mabalin a nagdakes nga epektona, maipakaammo a naimbag kadagiti pasiente ti amin a posible nga alternatibo sakbay a maaramid ti transplant.” Adtoy ti inkonklusionna maipapan iti panangyalison iti dara: “Mapagduaduaan unay ti pagimbaganna ta uray la nga inadaptaren ti adu a siruhano ti pilosopia a ‘panangliklik iti panangyalison’ saan laeng a gapu kadagiti medikal no di ket uray kadagiti legal a rason.”
Ti kangrunaan a parikut iti panangyalison iti dara isu ti pannakaimpektar ti rinibu a tattao kadagiti makapapatay a sakit a pakairamanan ti AIDS. Nupay simmayaaten dagiti pamay-an a pangeksamen iti dara iti adu a lugar, kastoy ti impatuldo ni Dr. Godec: “Tumaud ti potensial a peggad iti dara nga indonar dagiti naimpektaran a tattao a dida pay nakapataud kadagiti antibody a makita babaen ti panangeksamen.”
Idi inngudo ni Dr. Godec ti artikulona, sinungbatanna ti saludsod nga adda iti ngato: “Bayat a sumaysayaat ti pannakaawat dagiti doktor ken siruhano maipapan iti pisiolohia ti panangitulod iti oksihena ken mabigbigda a saan a nesesita ti nangato a hemoglobin a kas iti dati a naipagarup, dandani kanayon a posible a makasarakda kadagiti alternatibo ti panangyalison. Kas iti napasamak itay napan a tawen, dagiti nagrigat a panangi-transplant iti puso ken dalem ket napakuyogan ti nakaro a panagsayasay ti dara, isu a kanayon a pampanunotenda a kasapulan a masukatan daytoy iti adu a dara. Ita, mabalinen nga aramiden dagita a pamay-an a din kasapulan ti panangyalison.
“Iti asideg unayen a masakbayan, talaga a naan-anay a mapukawton ti panangyalison. . . . Saan laeng a nangina ken napeggad ti panangyalison; talaga la ngamin a dina maipaay ti kasayaatan a pannakaaywan a rumbeng a masagrap dagiti pasiente.”