Pinabileg ti Namnama Tapno Makapagibtur Kadagiti Pakasuotan

KAS INSALAYSAY NI MICHIKO OGAWA

Abril 29, 1969 idi naawatko ti maysa nga awag manipud iti polisia. Nadangran ni lakayko a Seikichi iti maysa nga aksidente ti lugan ket addan idiay ospital. Imbatik ti dua nga ubbing pay a babbarok iti gayyemko ket nagdardarasak a napan sadiay. Paralisadon ni Seikichi nanipud idi ket pulos a saanen a nagsubli ti puotna. Palubosandak a mangisalaysay maipapan iti pamiliami ken no kasano a nakapagibturkami.

PEBRERO 1940 idi naipasngayak idiay Sanda, nga asideg ti Kobe, Japan. Agam-ammokamin ken ni Seikichi nanipud pay idi agkaeskuelaankami iti kindergarten. Pebrero 16, 1964 idi nagkasarkami. Saan a matagtagari ni lakayko, ngem nadungngo kadagiti ubbing. Idi agangay, naaddaankami iti dua a babbaro, da Ryusuke ken Kohei.

Agtartrabaho idi ni Seikichi iti kompania ti konstruksion idiay Tokyo, isu a kalpasan ti panagkasarmi, nagnaedkami iti maysa kadagiti kabangibangna. Idi Oktubre 1967, sinarungkarannak ti maysa nga agkabannuag a babai a nangyam-ammo iti bagina kas mannursuro iti Biblia. “Pagyamanan laengen. Adda Bibliakon,” kinunak.

“Mabalin kadi a kitaek ti Biblia?” inyimtuodna.

Innalak ti Biblia manipud iti estantemi​—kukua dayta ni Seikichi​—ket impalubosko a kitaenna. Impakitana kaniak ti nagan a Jehova iti dayta. Pulos a diak pay ammo idi a daytoy ti nagan ti Dios. Tangay napaliiw ti babai ti dua a babassit nga annakko, kastoy ti imbasana kaniak iti Biblia: “Iruammo ti ubing iti dalan a rebbengna a papanan, ket uray intono lakayen saannanto a pagpanawan.” (Proverbio 22:6) Kinapudnona, pampanunotek idin no kasano ti naballigi a panangpadakkelko kadagiti annakko. Isu a dagus nga immannugotak a makipagadal iti Biblia.

Pinastrekko ti babai, ket rinugianmi a nagsaritaan ti bokleta nga “Adtoy! Pagbalinek Dagiti Isuamin a Bambanag a Baro.” Kinunak iti un-unegko, ‘Nagsayaat ketdin no masagrapmi a sangapamiliaan ti naragsak a biag!’ Kinunak idi nagawid ni Seikichi: “Kayatko nga adalen ti Biblia.”

“Dungngo, din kasapulan nga agbalinka nga edukado unay,” kinunana. “Tulonganka iti aniaman a kayatmo a maammuan.” Kaskasdi a rinugiak ti nakipagadal kadagiti Saksi ni Jehova iti kada lawas ket di nagbayag, tumabtabunoakon kadagiti gimongda.

Panangrugi Dagiti Pakasuotanmi

Idi dimtengak iti ospital iti daydi a rabii ti Abril 1969 a nadakamaten, nakigtotak a nakaammo a ti gayyem ni Seikichi, ti asawa ti babai a nangibatiak iti annakko, ket adda met gayam iti uneg ti taksi idi napasamak ti aksidente. Natay ti gayyem ni lakayko makalawas kalpasanna.

Iti daydi a rabii, imbaga kaniak ti maysa nga agtartrabaho iti ospital nga ayabakon ti siasinoman a pagarupek a masapul a mangkita ken Seikichi, tangay din manamnama nga agbiag pay. Adda dunor iti makimbaba a paset ti bangabangana ken nadangran ti utekna. Kabigatanna, dagiti kabagianmi manipud iti aglawlaw ti Kobe nagdardarasda nga immay iti ospital.

Dagus a naipakaammo iti napigsa a trompa ti ospital: “Kadagiti amin a kabagian ni Seikichi Ogawa, pangngaasiyo ta sarungkaranyon a dagus.” Nagdardaraskami a napan iti intensive care unit ket nagsisinnublatkami a nagpakada kenkuana. Nupay kasta, nagpaut iti makabulan ti nakain-inanaka a kasasaadna. Impakita ti maudi a panangeksamen a mabalin nga agbayag daytoy a kasasaad.

Isu a manipud Tokyo, nayambulansia ni Seikichi a nayakar ditoy Kobe, nga 650 a kilometro ti kaadayona. Nakitak a naipanaw ken nayawid babaen ti bullet train, ket inkarkararagko a makalasat koma. Karabiyanna, napalaus ti ragsakko idi nakitak a sibibiag iti maysa nga ospital ditoy Kobe. Inyarasaasko kenkuana, ‘Dungngo, nalasatam!’

Pannakipagnaed Kadagiti Nagannak Kaniak

Kaduak ti babbarok a nagsubli iti pagtaengan dagiti nagannak kaniak idiay Sanda, a sadiay ti nageskuelaan dagiti annakko iti kindergarten. Gimmatangak iti season ticket ti tren nga agpa-Kobe, 40 a kilometro ti kaadayona, ket nagsinnublatkami ken katugangak a babai a napan idiay ospital iti kada aldaw iti simmaganad a tawen. Pinampanunotko, ‘Makapuot ngata ni Seikichi ita? Ania ngata ti umuna nga ibagana kaniak? Kasanoak ngata a sumungbat?’ Pinampanunotko met, nangnangruna no makakitaak iti naragsak a pamilia, ‘No la koma nakaradkad ni Seikichi, naragsak met koma dagiti annakko.’ Tumrem no kuan dagiti luak.

Kadagidi umuna a tawtawen, no mabasak iti periodiko nga adda tao a nagsubli ti puotna kalpasan ti sumagmamano a bulan a pannaka-coma-na, pampanunotek a nalabit agriingto metten ni Seikichi. Isu a nasaok naminsan iti bayawko: “Kayatko nga ipayospital idiay makin-amianan a daya ti Honshu.” Ngem imbagana kaniak nga awanen ti pamuspusan, ket binagbagaannak nga usarek laengen ti nabatbati a pondomi para iti dadduma a miembro ti pamilia.

Adda Kristiano a panglakayen iti maysa kadagiti kongregasion dagiti Saksi ni Jehova nga agnanaed iti asideg ti ospital, ket dumagasak no kua iti balayna sakbay a sarungkarak ni Seikichi. Iyadalannak ni baketna iti Biblia maminsan iti kada lawas. Ket umay no kua mangipan ti dua nga annakda iti kuartomi idiay ospital iti audiocassette dagiti gimongda iti kongregasion. Pinarparegta ken liniwliwadak unay daytoy a pamilia.

Pinabileg ti Namnama

Maysa nga aldaw, sinarungkarannakami ti agdaldaliasat a manangaywan dagiti Saksi ni Jehova idiay ospital ket imbasana kaniak ti Roma 8:18-25. Kastoy ti kuna ti sumagmamano a pasetna: “Ibilangko a dagiti panagsagaba iti agdama a panawen awan aniaman a pategda no maidilig iti dayag a maipanayagto kadatayo. . . . Ta ammotayo nga isuamin a sangaparsuaan agtultuloyda nga agas-asug a sangsangkamaysa ken agpapaut-otda a sangsangkamaysa agingga ita. . . . No ti maysa a tao makitana ti maysa a banag, namnamaenna aya dayta? Ngem no namnamaentayo ti ditay makita, itultuloytayo nga ur-urayen dayta a buyogen ti panagibtur.”

Ti pannakailawlawag ti Nakristianuan a namnamatayo ti nangipalagip kaniak a nagbassit dagiti agdama a panagsagaba no idilig iti rag-o nga inkari ni Jesus​—biag iti asidegen a Paraiso a daga. (Lucas 23:43) Ti panangilawlawag ti nakatulong kaniak a mangsango kadagiti agdama nga aktual a pasamak buyogen ti pananginanama ken mangpanunot kadagiti aktual a mapasamak iti masakbayan a bendision iti baro a lubong.​—2 Corinto 4:17, 18; Apocalipsis 21:3, 4.

Hunio 1970 idi nayakar ni Seikichi iti maysa nga ospital idiay Sanda, ti lugar a pagnanaedanmi kadagiti nagannak kaniak. Iti simmaganad nga Enero, napalalot’ ladingitko ket diak nagawidan ti panagarubos dagiti luak idi naawatko ti dokumento nga insagana ti abogadomi a nangideklara nga inutilen ni lakayko gapu iti aksidente. Sangkaibaga ti katugangak a babai: “Michiko, ladingitek ti mapaspasaram a rigat gapu iti anakko.” Kunana pay: “No mabalin la koma a siak laengen imbes a ni Seikichi.” Nagsinsinnangitkami.

Indagadag kaniak ni tatangko nga agsapulak iti amin-tiempo a panggedan, ngem determinadoak a mangaywan ken Seikichi. Nupay kasla awan puotna, adda reaksionna iti bara ken lamiis ken kadagiti naipaay a wagas ti panangaywan. Kayat ni Tatang a makiasawaak manen, ngem naamirisko a di maitutop ti kasta, tangay sibibiag pay laeng ni lakayko. (Roma 7:2) Kalpasanna, no nakainum ni Tatang, kastoy ti kunana: “Inton matayak, ikuyogko ni Seikichi.”

Naragsakanak ta nabuangay ti maysa a kongregasion idiay Sanda idi 197 1. Kalpasanna, insimbolok ti dedikasionko ken Jehova idi Hulio 28, 1973, babaen ti bautismo iti danum. Daytoy ket kabayatan ti internasional a kombension dagiti Saksi ni Jehova idiay Osaka Expo Grounds.

Idi agangay, nakaptan ti anakko a ni Kohei iti grabe a nephritis ket lima a bulan a nayospital. Nayospital met ni tatangko gapu iti tuberculosis. Isu nga idi Enero 1, 1974, sinarungkarak ni tatangko, ni lakayko, ken ti barok iti tallo a sabasabali nga ospital. No Domingo a sarungkarak ni Kohei a kaduak ti inauna a barok a ni Ryusuke, iyadalak ida iti libro a Panagimdeng iti Naindaklan a Mannursuro. Kalpasanna, makigimongkami ken ni Ryusuke ditoy Kobe sakam agawid a siraragsak.

Kanayon nga agyamanak kadagidiay timmulong a nangaywan ken Seikichi. Inkeddengko nga iranud kadakuada ti pannakaammok iti Biblia. Kalpasan a ti maysa a para aywan ket naulila iti adingna a babai gapu iti maysa nga uram, isut’ naparegta idi impakitak kenkuana ti nadayag a namnama ti panagungar a naikari iti Biblia. (Job 14:13-15; Juan 5:28, 29) Nairugi a nayadalan iti Biblia idiay ospital, ket idi agangay, nabautisaran iti maysa a kombension idi 1978.

Dagiti Annakko, Gubuayan iti Rag-o

Maysa a karit ti panangpadakkel kadagiti annakko nga awan ti tulong ni lakayko, ngem anian a makagunggona dayta! Insurok kadakuada dagiti umiso a kababalin ken ti pannakaseknan kadagiti rikna ti sabsabali. Idi tallo pay laeng ti tawen ni Ryusuke, agpadispensar no adda dakes a naaramidna a kunkunana: “Mama, ladingitek.” Medio rebelioso idi ni Kohei, ta no dadduma ket agpasugnod no padasek a korehiren. Naminsan, inyiddana pay ketdi ti nagsangit iti sango ti maysa a kantina idi kayatna ti maysa a banag. Ngem nakirinnasonak kenkuana, nga impakitak ti dungngo ken anus. Idi agangay, nagbalin a natulnog, nasingpet nga anak. Daytoy ti nakatulong a nangkombinsir kaniak a ti Biblia ket pudno a Sao ti Dios.​—2 Timoteo 3:15-17.

Idi ageskuelan ni Ryusuke iti junior high school, inlawlawagna kadagiti mannursurona no apay a di makipagsanay iti martial arts. (Isaias 2:4) Maysa nga aldaw, maragragsakan a nagawid manipud eskuelaan ta iti maysa a miting a kadua ti sumagmamano a mannursuro, nasungbatanna dagiti saludsodda.

Nakatulong unay kadagiti babbarok ti naimbag a pannakitimpuyog iti kongregasion. Masansan nga awisen ida dagiti Kristiano a panglakayen iti pannangan ken inramanda ida kadagiti panagadal ti pamiliada iti Biblia ken uray pay kadagiti panagpalpaliwa. Addada met idi gundaway para iti makaparagsak a panagtitimpuyog, agraman ti pannakipasetda iti nadumaduma nga isports. Insimbolo ni Ryusuke ti dedikasionna ken Jehova babaen ti bautismo iti danum idi 1979, ket nabautisaran ni Kohei iti simmaganad a tawen.

Ti Amin-Tiempo a Ministeriomi

Naminsan, kabayatan ti ibibisita ti agdaldaliasat a manangaywan, imbagak kenkuana a kayatko ti agbalin a payunir, kas pangawag kadagiti amin-tiempo a ministro dagiti Saksi ni Jehova. Agsipud ta saan a nainsiriban idi nga aramidek ti kasta nga addang gapu kadagiti kasasaadko, siaasi a pinalagipannak a masapul a padakkelek ti babbarok a mairamut iti kinapudno ti Biblia. “Ti napateg,” kinunana, “ket maaddaanka iti espiritu ti kinapayunir.” Isu a nagbalinak nga auxiliary pioneer, a nakipasetak iti daytoy nga aktibidad a kadua ti babbarok kabayatan dagiti bakasionda iti eskuelaan. Dakkel ti naitulong kaniak daytoy nga aktibidad a mangtaginayon iti rag-o ken talna ti panunot bayat nga ay-aywanak ni Seikichi.

Kamaudiananna, nagbalinak met laengen a regular pioneer idi Setiembre 1979. Agarup makatawen kalpasan a nagturpos ni Ryusuke iti haiskul, nagpalista metten kas payunir idi Mayo 198 4. Nakikadua ni Kohei kenkuana iti trabaho a kinapayunir idi Setiembre 198 4. Isu a tallokamin a mangtagtagiragsak iti daytoy a kita ti amin-tiempo a ministerio. No lagipek ti nasurok a 20 a tawen a panagpayunirko, a kabayatanna ket naaddaanak iti pribilehio a tumulong iti sumagmamano a tattao nga agserbi ken Jehova, patiek a nakatulong daytoy nga aktibidad tapno madaerak dagiti pakasuotak.

Nagboluntario ni Ryusuke iti pannakaibangon ti educational hall a kaariping ti Kansai Assembly Hall. Idi agangay, pito a tawen a nagserbi kas agaywan iti Hyogo Assembly Hall. Ita, kas Kristiano a panglakayen iti maysa a kabangibang a kongregasion ditoy Kobe, isun ti mangay-aywan kaniak. Nanipud 1985, agserserbin ni Kohei kas boluntario a trabahador iti sanga nga opisina dagiti Saksi ni Jehova idiay Ebina.

Pinabileg ti Adu a Bendision

Iti adu a tawen, agkaraapanak idiay ospital iti kada lawas tapno sarungkarak ni Seikichi ken tapno digusek. Ti panangaywanko ket panangtulong iti serbisio ti maysa a regular a para aywan. Idi Setiembre 1996, kalpasan ti 27 a tawenna kadagiti ospital, nagawiden ni Seikichi tapno ditoy balaymin nga agnaed babaen ti tulong ti maysa a para aywan. Kabaelanna ti mangipauneg iti likido a taraon babaen ti tubo a maiserrek iti agongna. Nupay nakakidem latta, agkuti bassit no adda ibagami kenkuana. Maladingitanak a makakita ken Seikichi iti kastoy a kasasaad, ngem ti nadayag a namnama iti masakbayan ti mangpabpabileg kaniak.

Sakbay unay ti panagawid ni Seikichi, pinagdagusko ti agdaldaliasat a manangaywan ken ni baketna, isu nga iti makatawen, limakami a nagnaed iti bassit a balaymi. Diak pulos impagarup a makaduak manen ni Seikichi ditoy balay, ket agyamanak ken Jehova gapu itoy. Adun a tawen a tartarigagayak unay nga agmulagat koman ni Seikichi, ngem ita, basta tartarigagayak laengen a maaramid koma ti pagayatan ni Jehova.

Sipupudno a maikunak: “Ti bendision ni Jehova ti mangpabaknang; ket saanna nga anayan iti ladingit.” (Proverbio 10:22) Nupay ababa ti naragsak a biag a kadua ti nakaradkad a ni Seikichi, naparaburannak iti dua a babbaro a ‘nanglagip iti Naindaklan a Namarsua kadatayo.’ Agyamanak unay gapu itoy!​—Eclesiastes 12:1.

Kabayatanna, agpadpada a kayatko nga itultuloy ti agpayunir​—tapno matulongak dagiti sabsabali a manggun-od iti “pudpudno a biag”​—ken maigiddato iti dayta, sidudungngo nga aywanak ni Seikichi. (1 Timoteo 6:19) Ti kapadasak ti nakasursuruak iti kinapudno ti sasao ti salmista: “Iyallatiwmo ta awitmo ken Jehova, ket saranayennakanto: dinanto ipalubos a magaraw ti nalinteg.”​—Salmo 55:22.

[Ladawan iti panid 13]

Dakam ken lakayko kaduami ni Ryusuke

[Ladawan iti panid 13]

Ni Seikichi a kadua ti dua a babbaromi, innem a bulan sakbay ti aksidente

[Ladawan iti panid 15]

Naparaburankami iti dua a babbaro, da Ryusuke ken Kohei (nakatakder), a ‘nanglagip iti Naindaklan a Namarsua kadatayo’