Panangtulong Kadagiti Agtutubo a Manglisi iti “Kultura ni Patay”

Ania ti makagapu iti panaginteres dagiti agtutubo iti kaaldawantayo iti tema nga ipapatay? Kinuna ti diputado a ni Henry Hyde, iti estado ti Illinois, E.U.A.: “Agsipud ta awan ti ammo dagitoy nga agtutubo kadagiti naespirituan a banag, bin-ig a ti kultura ni patay ken kinaranggas ti ipaspastrekda iti panunotda.”

NAGSURAT ti agbasbasa iti magasin a Time: “Dagiti nasadut a nagannak, naranggas a paglinglingayan ken ti kinaawan ti moral ken naespirituan a panangiwanwan ti makagapu a rimsua kadagiti agtutubo iti kaaldawantayo ti kultura ni patay.”

Ti panagleddaang ti maysa pay kadagiti kangrunaan a parikut dagiti agtutubo. Dadduma ti addaan nagannak nga agpada nga agtartrabaho ket awanda a dua iti kaaduan nga oras ti aldaw. Dadduma ti addaan agsolsolo a nagannak. Sigun iti maysa a gubuayan, agsolsolo nga aguray iti 3.5 nga oras kada aldaw dagiti agtutubo idiay Estados Unidos ket kurang a 11 nga oras ti pannakikaduada kadagiti nagannak kadakuada iti kada lawas no idilig kadagiti agtutubo idi dekada 1960. Kinapudnona, dadduma nga agtutubo ti saan a kadua wenno saan a pulos a saranayen dagiti nagannak kadakuada iti emosional.

No Ania ti Maaramid Dagiti Nagannak

Gapu ta ‘awan ti ammo dagitoy nga agtutubo kadagiti naespirituan a banag,’ kasano kapateg ti akem dagiti nagannak? Maamiris dagiti masirib a nagannak a masapul dagiti annakda ti nasayaat a paglinglingayan ken iti kasumbangirna, masapulda ti regular a personal a tulong. Matignay dagiti nagannak a makisarita maipapan kadagiti pagay-ayatda a musika, programa iti telebision, video, nobela, video game, ken sine, no adda naayat nga interesda kadakuada. Nupay di iyebkas dayta dagiti agtutubo, tartarigagayan ti adu kadakuada ti panangipateg ken naayat a panangiwanwan dagiti nagannak kadakuada. Masapulda ti direkta a sungbat dagiti pakadukotanda gapu ta agbibiagda iti lubong a napno iti panagduadua. Maawatan koma dagiti adulto a maipaspasango dagiti annak iti narikrikut a lubong ngem idi isuda ti agtutubo.

Dagiti nagannak a mayat a mangsalaknib kadagiti annakda makisaritada a regular kadakuada, talaga a dumngegda kadakuada, ken pakdaaranda ti annakda kadagiti peggad ti pannakipaset iti moderno a kultura. No mangikeddeng dagiti nagannak iti nainget, saan nga agkarabaliw, ken nainkalintegan a limitasion, a mabuyogan iti ayat, gagangay a nasayaat dagiti ibungada.​—Mateo 5:37.

Ikagkagumaan dagiti nagannak a Saksi ni Jehova ti regular a makisarita kadagiti annakda, nga usarenda ti Biblia ken dagiti naibasar iti Biblia a publikasion ken video.a Usarenda dagita nga okasion, saan a tapno babalawenda dagiti annakda, no di ket tapno mangusig kadagiti tema a makapabileg iti naespirituan. Kadagitoy a panagtitipon ti pamilia, denggenda dagiti problema wenno karit a mapaspasaran ti tunggal anakda tapno adda gundaway dagiti agtutubo a maikkan iti personal nga atension.

Dagiti agtutubo a saan nga ipapaayan dagiti nagannak kadakuada iti naespirituan a panangiwanwan mapabilegda iti kunaen ti Salmo 27:10: “No da ama ken ina baybay-andak, ni ngad Jehova pidutennakto.” Kasano a tumulong kadagiti agtutubo ti Ama dagiti nadungngo nga asi a ni Jehova? Adu a kongregasion dagiti Saksi ni Jehova ti nagserbi a pagkamangan a sadiay nasagrap ti adu ti panangipateg ti sabsabali a tao ket nalawlawagan dagiti panagduaduada. Kinuna ni Josías, maysa nga agtutubo a nakapaneknek nga agpayso dayta: “Napateg ti maaramidan ti organisasion ni Jehova. Impagarupko idi nga awan mamaay ti biag. Awan ti direksion ti panagbiagko ken awanan namnama. Ngem ti pannakaammo a saanak nga agmaymaysa binalbaliwanna a naan-anay ti biagko. Ibilangko dagiti kakabsat iti kongregasion a kas iti pamilia a napukawko. Kas man la emosional a sinipete dagiti panglakayen ken pamilia iti kongregasion.”

Kinapudnona, rimmang-ay ti mental ken espiritual a salun-at ti adu nga agtutubo ken adulto babaen ti regular nga itatabuno kadagiti gimong iti kongregasion dagiti Saksi ni Jehova. Kinuna ti antropologo a ni Patricia Fortuny maipapan iti daytoy a positibo nga epekto iti estoriana a Los Testigos de Jehová: una alternativa religiosa para enfrentar el fin del milenio (Dagiti Saksi ni Jehova: Narelihiosuan nga Alternatibo iti Panangsango iti Panagngudo ti Milenio): “Mangipapaay dagiti Saksi ni Jehova iti nabatad ken espesipiko a sistema ti urnos a mayaplikar iti inaldaw a panagbiag, ti maitutop nga alagaden a mangiwanwan iti panunot ken panagtignay.” Naibasar iti Biblia ti “sistema ti urnos” ken ti “alagaden” a madakdakamat ditoy. Gapuna, nupay sarangten dagiti Saksi ni Jehova ti dadduma a parikut ken rigat a kas kadagiti padada a tattao, ti naisangsangayan a kinasirib nga ipaay dayta a kadaanan a libro ti mangpabileg kadakuada. Wen, makasarak dagiti Saksi iti pagkamangan kadagiti nalawag a doktrina ken prinsipio a masarakan iti Biblia.

No “Awanton ni Patay”

Kanayon nga ipaganetget ti pannursuro a maipapaay kadagiti Kingdom Hall dagiti Saksi ni Jehova ti kari ti Dios a baro a lubong a mabiiten a mangrugi, a ‘pagtaengan ti kinalinteg’ ken “awanto ti mangpabuteng kadakuada.” (2 Pedro 3:13; Mikias 4:4) Kasta met, insurat ni mammadto nga Isaias a kalpasanna ti Dios “inalimonna nga agnanayon ni patay; ket ni Jehova nga Apo punasennanto dagiti lulua kadagiti isuamin a ruprupa.” Matmatay ti puli ti tao kas supapak ti basol ti immuna a tao a ni Adan, ngem ti kari ti Dios ket di agbayag “awanton ni patay.”​—Isaias 25:8; Apocalipsis 21:3, 4; Roma 5:12.

No maysaka nga agtutubo nga agkasapulan iti tulong, awisendaka a maaddaan iti namnama ken panggep iti biag, babaen kadagiti pahina ti Biblia. Babaen ti tulong dagiti Saksi ni Jehova, maaddaanka iti namn7ama nga asidegen a dumteng ti kasayaatan a panawen iti baro a lubong nga inkari ti Dios.

[Footnote]

[Ladawan iti panid 9]

Rumbeng nga adda koma panawen dagiti nagannak a dumngeg kadagiti annakda ken mangtarus kadagiti parikutda

[Dagiti ladawan iti panid 10]

“Mangipapaay dagiti Saksi ni Jehova iti nabatad ken espesipiko a sistema ti urnos a mayaplikar iti inaldaw a panagbiag”